Ngaba Unokukhonza Apho Kufuneka Abantu Abangakumbi Khona?
UYehova ufuna ukuba iindaba ezilungileyo zivakaliswe “kuwo wonke umhlaba omiweyo” ngaphambi kokuba kufike isiphelo. (Mat. 24:14) Ekubeni ukwazi oku, ukuba unako, ngaba ukulungele ukufudukela apho imfuneko inkulu khona? Kula mabandla abhalwe kwiphepha elilandelayo kufuneka abadala, izicaka zolungiselelo kunye noovulindlela. Ukuba emva kokuwuhlolisisa ngomthandazo lo mbandela uvakalelwa kukuba unokufuduka, wuxubushe nentsapho yakho kunye nabadala bebandla lakho. Emva koko bhala ileta uze uyinike abadala ukuze nabo bongezelele awabo amagqabaza ngaphambi kokuba bayithumele kwiofisi yesebe.
ECookhouse: Kufuneka oovulindlela kunye nabadala abaza kufudukela kulo mmandla mkhulu. Baninzi abantu abanomdla apha, bambi kubo bakhe bafundelwa.
EColesberg: Apha mnye kuphela umvakalisi yaye ufuna uncedo. Baninzi abantu abanomdla kule ntsimi abazicelela ukuqhutyelwa isifundo seBhayibhile. Oovulindlela banokwenza umsebenzi omhle kakhulu apha yaye baqhube iintlanganiso.
ESeymour: Kulo mmandla kufuneka izicaka zolungiselelo okanye oovulindlela abaza kunceda abantu abanomdla. Kukho igcuntswana labavakalisi nabantu abanomdla.
EKwenxura: (kwisithili sase-Elliotdale) Apha kukho abavakalisi abalishumi abanokukuvuyela ukufumana abadala, izicaka zolungiselelo okanye oovulindlela abanokufudukela kulo mmandla. Lufuneka ngokungxamisekileyo ukhokelo.
EMjanyana: (kwisithili saseNgcobo) Eli qela linoodade abane kuphela yaye kufuneka abadala, izicaka zolungiselelo okanye abazalwana abangoovulindlela abaza kulikhokela baze bancede ekubeni lo mmandla ugutyungelwe.
EMonti: (kwisithili saseBizana) Kufuneka abadala okanye izicaka zolungiselelo eziza kunceda abavakalisi abahlanu abakweli qela lincinane.
ETabase: Eli qela lifuna umzalwana oza kulikhokela. Kukwafuneka noovulindlela abaza kusebenza kulo mmandla mkhulu. Kukho oovulindlela abasixhenxe kweli bandla.