Iphulo Elikhethekileyo Lephecana Elisusela KuOktobha 20 Liye KuNovemba 16!
1 Kwiiveki ezine ukususela ngoMvulo, Oktobha 20, siza kube sikwiphulo lokusasaza iphecana elitsha elinomxholo othi Ngaba Ungathanda Ukwazi Eyona Nyaniso? Sithemba ukuba eli phulo likhethekileyo eliya kwenziwa ehlabathini jikelele liya kwenza abantu babe nomdla ongakumbi kokuphela komthombo wenyaniso.—Yoh. 17:17.
2 Eli phecana lineempendulo ezimfutshane ezivela eBhayibhileni zemibuzo emithandathu ebalulekileyo: “Ngaba ngokwenene uThixo usikhathalele?” “Ngaba imfazwe nokubandezeleka ziya kuze ziphele?” “Kwenzeka ntoni kuthi xa sisifa?” “Ngaba likho ithemba ngabantu abafileyo?” “Ndingathandaza njani ukuze ndiviwe nguThixo?” nothi “Ndinokulufumana njani ulonwabo ebomini?” Iicawa zeNgqobhoko azikwazanga ukuyiphendula ngendlela eyanelisayo le mibuzo. Nkqu nabantu abangengomaKristu baye bayibuza le mibuzo, kodwa ke abazi ukuba iimpendulo ezicacileyo ziyafumaneka eBhayibhileni. Ngoko ke esi sigidimi simele ukuba siya kuxatyiswa ngabantu abaninzi.
3 Yisebenzeni Yonke Intsimi Yenu: Zamani ukungena kuzo zonke izindlu ezikwintsimi yenu. Ukuba ibandla lenu linentsimi enkulu, abadala basenokunikhuthaza ukuba nishiye iphecana nakwizindlu eningafumananga bantu kuzo xa benityelele. Khumbulani ukulinika abamelwane benu, izalamane, abo niqhelene nabo emsebenzini okanye enifunda nabo esikolweni, nabanye enidla ngokuncokola nabo eli phecana litsha. Mhlawumbi ungahlengahlengisa iimeko zakho ukuze ube nguvulindlela ongumncedani ngo-Oktobha okanye ngoNovemba. Ngaba unomntwana okanye isifundo seBhayibhile esenza inkqubela ebonakalayo ngokomoya nesinokufaneleka ukuba ngumvakalisi ongabhaptizwanga, size sisithelele kweli phulo? Ukuba ukho, xelela abadala.
4 Oko Umele Ukuthethe: Ukuze ukwazi ukufikelela abantu abaninzi ngesigidimi, kuhle ukuba ibe mfutshane intshumayelo yakho. Buza nje umninimzi omnye wemibuzo emithandathu engaphandle uze umbonise impendulo ekwiphecana. Loo nto iya kwenza bonke abavakalisi bakwazi ukuyilungelelanisela iimfuno zentsimi yabo intshumayelo yabo. Ukuba kukho umntu onomdla, mbhale phantsi uze ubuyele kuye. Ngeempelaveki kunokuhanjiswa amaphephancwadi aloo nyanga kunye nalo eli phecana. Emva kokuphela kweli phulo ngoNovemba 16, siya kuhambisa incwadi ethi Okufundiswa yiBhayibhile. Amaphecana ashiyekileyo aya kusasazwa ngendlela esiqhele ukuwasasaza ngayo amanye amaphecana.
5 Qalisa Isifundo SeBhayibhile: Eli phecana lenzelwe ngokukhethekileyo ukusinceda sikwazi ukuqalisa izifundo zeBhayibhile. Xa ubuyela kumntu onomdla, usenokumbuza ukuba yiyiphi inyaniso yeBhayibhile eye yamthuthuzela okanye yamzisela isiqabu? Mbonise iphepha elingasemva apho kuthethwa khona ngelungiselelo lethu lokuqhuba izifundo zeBhayibhile uze umnike incwadi ethi Okufundiswa YiBhayibhile. Ukuba kunokwenzeka funda naye imizuzwana nje, isiqendu esinye okanye ezibini kwisahluko esinenkcazelo engakumbi ngomxholo aye wawukhetha.
6 UYehova ukhangela abantu abaya kumnqula “ngomoya nangenyaniso.” (Yoh. 4:23) Ngamana sonke singanegalelo kweli phulo likhethekileyo lokunceda abantu bazi inyaniso!