Sasaza IKingdom News No. 35 Ngokubanzi
1 Sonke siza kube sixakeke ngamandla ngo-Oktobha nangoNovemba. Kwiintsuku ezili-11 zokuqala kuOktobha, siza kuhambisa amaphephancwadi IMboniselo noVukani! Sandule ke, ngeCawa, ngo-Oktobha 12, kuse ngeCawa, ngoNovemba 16, sithelele ekusasazweni kweKingdom News No. 35 ehlabathini lonke. Siya kuba nelungelo lokusa isigidimi esibalulekileyo kubo bonke abantu basekuhlaleni. Esi sigidimi siphendula umbuzo othi, “Ngaba Bonke Abantu Baya Kuze Bathandane?” Ebudeni beli phulo likhethekileyo, siza kusasaza iKingdom News No. 35 phakathi evekini. Ngeempela-veki, ukongezelela ekuhambiseni iKingdom News, siza kuhambisa neenkupho zakutshanje zamaphephancwadi.
2 Ngoobani Abasenokuba Nesabelo? Njengesiqhelo, abadala baza kukhokela kulo msebenzi. Wonk’ umntu uyakunandipha ukusasaza iiKingdom News, yaye akuthandabuzeki ukuba abavakalisi abaninzi baza kuba ngoovulindlela abangabancedani kangangenyanga enye okanye ezimbini zeli phulo. Abanye abavakalisi baza kufuna ukuchitha ixesha elingakumbi kuneliqhelekileyo kubulungiseleli.
3 Ngaba unesifundo seBhayibhile esele siyikhathule kanobom incwadi ethi Ulwazi nesiya kuthi kungekudala sifanelekele ukuba nesabelo kwinkonzo yasentsimini? Mhlawumbi sisenokuba ngumvakalisi ongabhaptizwanga ekuhambeni kwexesha size sibe nesabelo kweli phulo lokuhambisa iKingdom News. Kufuneka nje intshumayelo elula xa uhambisa iphecana. Ngokomzekelo, usenokuthi: “Esi sigidimi sibaluleke gqitha kangangokuba kule nyanga sisasazwa ehlabathini lonke ngeelwimi ezili-169. Ndingakuvuyela ukukushiyela elakho.” Nabantwana bakho banokuba nesabelo kulo msebenzi uvuyisayo.
4 Abaqhubi besifundo sencwadi bafanele bakhuthaze onke amalungu eqela labo abe nesabelo ngokuzeleyo ekusasazeni iKingdom News No. 35. Kwakhona kusenokubakho nabavakalisi abaye baphola kodwa abasenokuphinda bakhuthale enkonzweni xa befumana ukhuthazo. Ngaphambi kokuba lifike eli phulo, abadala bafanele batyelele ngamnye kwaba ukubona abanokukwenza ukubanceda bahambe nabavakalisi abanamva kule nkalo yobulungiseleli.
5 Siza Kudibanela Phi Xa Sisiya Enkonzweni? Wonke lo msebenzi uza kufuna kwenziwe amalungiselelo aya kulungela wonk’ ubani okunikela ubungqina njengeqela. Naphi na kunokwenzeka, kufanele kulungiselelwe iintlanganiso zenkonzo suku ngalunye phakathi evekini, ngeempela-veki nangamarhatya. Zifanele ziqhutywe ngamaxesha aya kwenza abavakalisi bawaxhamle la mathuba okunikela ubungqina. Kwakhona kufanele kwenziwe namalungiselelo okuhlanganisana ngeenjikalanga ukwenzela abo bahamba isikolo, abo bangena ngamaxesha athile emsebenzini nabanye. Umveleli wenkonzo ufanele aqinisekise ukuba kuza kubakho umhlaba owaneleyo wezindlu ngezindlu nowamashishini ukuze wonk’ ubani abe nesabelo ngokuzeleyo kulo msebenzi. Kummandla onabavakalisi abaninzi, kufanele kusetyenziswe ingqiqo ngenani labo basebenza kwinxalenye ethile yentsimi.
6 Kuthekani Ngabangekhoyo Ezindlwini? Sifuna ukuthetha nabaninimzi abaninzi kangangoko kunokwenzeka ukuze sibacacisele ngesizathu sokuba befanele bafunde iKingdom News No. 35. Ngoko ukuba ufika kungekho mntu endlwini, bhala ikhelingi uze uphinde ubuye ngelinye ixesha lemini. Ukuba abafumaneki aba baninimzi kwiveki yokugqibela yeli phulo, usenokushiya iKingdom News emnyango apho ingayi kubonwa ngodlulayo. Kwiindawo ezinezindlu zabantu, kuphaphele ukuhambisa iKingdom News kubantu abahamba ngesitrato. Xa nisebenza kumhlaba ongabelwanga bani, emaphandleni okanye apho kukho umhlaba omkhulu kunalowo ninokuwugubungela ebudeni beli phulo, nisenokushiya iKingdom News kwizindlu ezingenabantu kwakutyelelo lokuqala.
7 Luyintoni Usukelo Lwethu? Amabandla afanele azabalazele ukuzisebenzisa zonke izixa zawo zeKingdom News ukuze agubungele yonke intsimi yawo ngaphambi kokuba liphele eli phulo ngoNovemba 16. Ukuba umhlaba webandla lenu mkhulu kakhulu yaye kukhuselekile ukusebenza uwedwa kunokuba ube neqabane, usenokukufumanisa kukuhle ukwenjenjalo. Oko kuya kukwenza ufikelele abaninzi abafanelekayo kangangoko kunokwenzeka ngeendaba ezilungileyo. (Mat. 10:11) Kweminye imimandla, kusenokuba kuhle ukuphatha amaphecana ambalwa kunye neBhayibhile epokothweni okanye kwingxowa yakho, kunokusebenzisa ibhrifkheyisi. Qiniseka ukuba ugcina ingxelo entle yalapho ufumene khona umdla.
8 Ngaba Sele Ukulungele Ukuqalisa? Abadala bafanele bahlole inani lamaphephancwadi athe chatha aya kufunwa libandla baze bawaodole. Kwibandla ngalinye kuza kuthunyelwa isixa seKingdom News No. 35. Oovulindlela abakhethekileyo, abathe ngxi nabangabancedani baya kunikwa imibhalo engama-250 ukuba bayisasaze, ngoxa abavakalisi bebandla bona beya kunikwa imibhalo engama-50. Lo msebenzi usilingene. Ngaba ungxamele ukuba nesabelo kulo msebenzi uvuyisayo? Akuthandabuzeki ukuba unjalo. Masisisasaze ngokubanzi kangangoko kunokwenzeka ke esi sigidimi sisekelwe eBhayibhileni sikwiKingdom News No. 35!