Ixesha LeSikhumbuzo—Ithuba Lokwandisa Inkonzo!
1. Kutheni sifanele sicinge ngokwandisa inkonzo yethu ngoMatshi, ngoAprili, nangoMeyi?
1 Ngaba unokwenza okungakumbi entsimini ngexesha leSikhumbuzo? Abavakalisi abaninzi baza kuba besekhefini nezikolo ziza kuba zivaliwe yaye elo xesha banokulichitha entsimini. Ukususela ngoAprili 2, kuza kubakho iphulo elikhethekileyo lokumemela abantu abanomdla eSikhumbuzweni, esiza kuba ngoAprili 17. NgoMgqibelo, ngoAprili 16, iya kube ilusuku Olukhethekileyo Lwamaphephancwadi. Emva kweSikhumbuzo, bonke abantu ebebezile, siya kubamemela kwintetho ekhethekileyo eza kunikelwa ngeveki kaAprili 25. Eneneni, sinezizathu ezininzi zokucinga ngokwandisa inkonzo yethu ngoMatshi, ngoAprili, nangoMeyi.
2. Yiyiphi enye into enokusinceda senze okungakumbi kubulungiseleli?
2 Ubuvulindlela Bobuncedani: Enye into enokusinceda senze okungakumbi enkonzweni, bubuvulindlela bobuncedani. Ekubeni sonke sixakekile, kufuneka sicebe kakuhle kwangaphambili size senze uhlengahlengiso kucwangciso lwethu. (IMize. 21:5) Mhlawumbi unokubekela ecaleni izinto ezingabalulekanga oqhele ukuzenza. (Fil. 1:9-11) Kutheni ungaxeleli amanye amalungu ebandla ukuba unqwenela ukuba nguvulindlela ongumncedani uze ubone enoba akanakufuna ukusebenza nawe kusini na?
3. Iintsapho zinokuceba njani ukuchitha ixesha elingakumbi entsimini?
3 Ebudeni boNqulo Lwentsapho, kunokuba kuhle ukuba ninokuthetha ngosukelo eninalo njengentsapho. (IMize. 15:22) Ukuba intsapho iyasebenzisana, mhlawumbi amanye amalungu anokuba ngoovulindlela abangabancedani inyanga enye okanye ezingakumbi. Kuthekani ukuba nivakalelwa kukuba aninakukwazi ukwenza oku? Intsapho inokwenza amalungiselelo okwandisa ubulungiseleli bayo ngokuya entsimini ngorhatya okanye ngokusebenza ixesha elininzi ngeempelaveki.
4. Ziziphi iintsikelelo esiya kuzifumana ngokwandisa ubulungiseleli bethu ngexesha leSikhumbuzo?
4 UYehova uyayibona imigudu esiyenzayo enkonzweni yakhe yaye uyawuxabisa umoya wethu wokuzincama. (Heb. 6:10) Ukupha uYehova nabanye abantu kusizisela uvuyo. (1 Kron. 29:9; IZe. 20:35) Ngaba unokuyandisa inkonzo yakho ngexesha leSikhumbuzo uze ngenxa yoko ufumane uvuyo neentsikelelo?