Musa Ukwala

1. Yintoni efuna isibindi, yaye ngoba?

¹ Ngaba wakhe wamadolw’ anzima ukushumayela esikolweni ngenxa yokoyika ukugculelwa? Kufuneka ube nesibindi ukuze wenjenjalo, ngakumbi ukuba ungumntu oneentloni. Yintoni enokukunceda?

2. Kutheni kufuneka ingqiqo nje xa uza kushumayela esikolweni?

² Sebenzisa Ingqiqo: Nakuba isikolo sinokujongwa njengentsimi oshumayela kuyo, khumbula ukuba akulindelekanga ukuba uthethe ngezinto zokomoya nabantu bonke njengaxa ushumayela kwindlu ngendlu. Sebenzisa ingqiqo ukuze ulazi ixesha lokuthetha. (INtshu. 3:1, 7) Ingxubusho yaseklasini okanye umsebenzi wesikolo unokukunika ithuba lokubonakalisa ukholo lwakho. Okanye umntu ofunda naye unokukubuza isizathu sokungabi nanxaxheba kwakho kwimibandela ethile. Amanye amaKristu aye achazele ootitshala bawo ekuqaleni konyaka ukuba angamaNgqina kaYehova aze abanike iincwadi ezichaza ngeenkolelo zawo. Amanye aye ashiye uncwadi phezu kweedesika zawo ukuze bavuse umdla kubantwana abafunda nawo.

3. Unokulungiselela njani ukuze unikele ubungqina esikolweni?

³ Lungiselela: Ukuba uyalungiselela, uyakukwazi ukuzithemba. (1 Pet. 3:15) Zama ukucinga ngemibuzo enokuphakama, nendlela onokuyiphendula ngayo. (IMize. 15:28) Ukuba kunokwenzeka, phatha iBhayibhile neempapasho ezimbalwa, njengencwadi ethi Ukuqiqa, Imibuzo Yabantu Abaselula, nezinye ezithetha ngendalo esikolweni, ukuze ubhekisele kuzo xa kuyimfuneko. Cela abazali bakho ukuba niqhelisele eminye imibandela kunqulo lwenu lwentsapho.

4. Kutheni ufanele uqhubeke unikela ubungqina esikolweni?

⁴ Yiba Nesimo Sengqondo Esihle: Musa ukucinga ukuba abantwana besikolo baza kusoloko bekugculela xa uthetha ngenyaniso. Abanye baya kukuncoma ngesibindi onaso bade bakuphulaphule. Kodwa ungapheli mandla xa kungekho ukuphulaphulayo. UYehova uya kukholiswa ngumzamo wakho. (Heb. 13:15, 16) Qhubeka umcela ukuba akuncede ukuze ‘uhlale uthetha ngenkalipho.’ (IZe. 4:29; 2 Tim. 1:7, 8) Cinga ngendlela oya kuvuya ngayo xa kukho umntu okuphulaphulayo. Loo mntu unokugqibela engumkhonzi kaYehova!