“Intsimi Ekhethekileyo”

INKOLISO yolutsha olungamaKristu iye yaba nembono yokuba isikolo ‘siyintsimi yalo ekhethekileyo,’ ibe ngoko iwaphaphele amathuba okunikela ubungqina kubafundisi-ntsapho nakubafundi abangoowalo. Phawula imiphumo emihle eyafunyanwa nguSusan, intwazana ene-13 leminyaka ubudala yaseKhanada.

“NgoDisemba umfundisi-ntsapho wam waxelela abafundi ukuba babhale ibali elingeKrismesi ukwenzela ‘ukuvelisa ubuchule bokubhala.’ Ndakhetha ukubhala ngombandela othi ‘Ingxelo Engemvelaphi YeKrismesi.’ Ndisebenzisa iintyila-lwazi zesikolo namanqaku kaVukani! ukwenzela iimbekiselo, ndakwazi ukubhala ingxelo enenkcazelo.” Wathini umfundisi-ntsapho ngayo?

“Xa egqiba ukufunda ingxelo yam umfundisi-ntsapho wathi: ‘Susan, uyibhale kakuhle gqitha! Ndiyakuncoma ukunyaniseka kwakho ibe ndiyazihlonela iinkolelo zakho. Ngenxa yokucingisisa kwakho nokuqonda kwakho, uya kusoloko uhlonelwa. Ndinethemba lokuba kwixesha elizayo uya kuzilondoloza ezi mpawu zincomekayo onazo ngoku. Ekuqukumbeleni, kuyahlaziya yaye kuyavuza ukufunda okanye ukuthetha nothile okobu budala bakho oye wavelisa inkalipho ngeenkolelo zakhe waza wayilondoloza.’

“Emva kokuba eyifundile ingxelo, wavumela bonke abafundisi-ntsapho abakwigumbi labo lokuphumla ukuba bayifunde. Ngoko bonke babufumana ubungqina! Kwandinika inkalipho nozimiselo ukuthetha ngeenyaniso zeBhayibhile kwabanye esikolweni.

“Kakade ke, bonke abantwana endifunda nabo bayazi ukuba ndingomnye wamaNgqina kaYehova, ibe, xa bevayo ngoko ndikubhalileyo, nabo bafuna ukuyifunda ingxelo yam. Babonakala benomdla gqitha kangangokuba ndabaxelela ukuba ndandingabaphathela inkupho kaVukani! [wesiNgesi], eyayinenqaku elithetha ngeKrismesi. Loo nkupho yayiyekaDisemba 22, 1979, ibe yayikwanenqaku elithetha ‘ngedisko.’

“Xa ndeza nemibhalo yaloo nkupho ka Vukani! esikolweni, abanye abaliqela egumbini lokufundela bayibona baza bazicelela eyabo imibhalo. Babonakalisa umdla omkhulu kwinqaku elithetha ‘ngedisko’ kangangokuba ndaba nesigqibo sokubaphathela ngamnye kubo umbhalo kaVukani! kaSeptemba 8, 1979, eyayinongcelele lwamanqaku athetha ngalo mbandela. Ngenxa yoko, ndahambisa amaphephancwadi angama-26 kubafundi abangoowethu.

“Ngelinye ithuba kamva, ngexesha laxa umongikazi wesikolo sethu wayebonisa ifilimu engokukhula komntu, ndaphathela ngamnye kubafundi abangoowethu abaliqela umbhalo wencwadi ethi Ubutsha Bakho—Ukufumana Okona Kulungileyo Kubo. Ndabaxelela ukuba le ncwadi yandinceda kunene ukuba ndiqonde iinguqulelo neengxaki ezinxulumene nokukhula.

“Kwakhona, xa abanye egumbini lokufundela babona la mantombazana efunda ibe encokola ngale ncwadi, bandibuza ukuba bangawufumana na nabo umbhalo—kwanamakhwenkwe athile awucela. Ngoko, xa zizonke, ndahambisa imibhalo eli-17 yencwadi ethi Ubutsha Bakho ngelo thuba. . . .

“Ngelinye ithuba enye intombazana esikolweni yandixelela ukuba yayisiya kwisikolo seCawa ibe iyifunda neBhayibhile, kodwa yayingayiqondi. Ndayixelela ukuba ndandinayo iBhayibhile ekwakulula ukuyifunda ibe bendiya kukuvuyela ukuyiphathela yona. Andizange ndiyiphathele iNew World Translation kuphela kodwa ndayiphathela nombhalo weNcwadi Yam Yamabali EBhayibhile ndaza ndayibonisa indlela le ncwadi eyayinokuyinceda ngenene ngayo ekuqondeni iBhayibhile. Yayivuyela gqitha.”

USusan uvakalelwa njani ngokunikela ubungqina esikolweni? “Ndikunandipha ngenene ukunikela ubungqina kubahlobo bam esikolweni ibe ndikujonga njengelungelo ukuba nale ntsimi ikhethekileyo.”

Ngaba usesesikolweni? Kutheni ungayisebenzisi ngokunengenelo nje le “ntsimi ikhethekileyo” yakho?