Musa Ukuzoyikisela—Indlela Yokoyisa Ukungazithembi
1. Yintoni ebangela ukuba abanye babe madolw’ anzima ukuqalisa izifundo zeBhayibhile?
1 Ngaba uba madolw’ anzima ukuqalisa isifundo seBhayibhile kuba usithi awunakukwazi ukusiqhuba? Nabakhonzi bakaThixo bamandulo njengoMoses noYeremiya, babekhe bacinge ukuba abakufanelekelanga ukwenza umsebenzi ababewunikwe nguYehova. (Eks. 3:10, 11; 4:10; Yer. 1:4-6) Ngoko, kuqhelekile ukuvakalelwa ngolo hlobo. Singakoyisa njani ukungazithembi?
2. Kutheni singafanele siye nje kwindlu ngendlu size sikuyekele kwabanye ukuqhuba izifundo zeBhayibhile?
2 Sifanele sikhumbule ukuba uYehova akaze asicele ukuba senze okungaphaya kwamandla nobuchule bethu. (INdu. 103:14) Ngoko kuyacaca ukuba singakwazi ‘ukwenza abafundi nokubafundisa.’ (Mat. 28:19, 20) UYehova akakhethanga kuphela oompondo-zihlanjiwe okanye iincutshe ukuba zenze lo msebenzi. (1 Kor. 1:26, 27) Ngoko asimele sanele kukuya nje kwindlu ngendlu size sikuyekele kwabanye ukuqhuba izifundo.
3. UYehova uye wasiqeqesha njani ukuze sikwazi ukufundisa abanye iBhayibhile?
3 UYehova Uyasiqeqesha: NguYehova osiqeqeshayo ukuze sikwazi ukwenza abafundi. (2 Kor. 3:5) UYehova uye wasebenzisa intlangano yakhe ukuze asifundise inyaniso yeBhayibhile, engaziwa nkqu nangabona bayifunde bayityekeza kweli hlabathi. (1 Kor. 2:7, 8) Uye waqiniseka ukuba ibhalwa phantsi indlela awayefundisa ngayo uMfundisi Omkhulu uYesu, ukuze sikwazi ukumxelisa, yaye uyaqhubeka esiqeqesha esebenzisa ibandla. Ukongezelela, uYehova akasishiyanga enyanyeni kodwa usinike iincwadi nezinye izinto zokufundisa iBhayibhile. Usinike iincwadi ezinjengethi Okufundiswa YiBhayibhile, ezifundisa inyaniso ngendlela ecacileyo neqondakala lula. Ukuqhuba isifundo seBhayibhile kunokuba lula kakhulu kunokuba sicinga.
4. Kutheni sinokuqiniseka ukuba uYehova uza kusinceda?
4 UYehova wanceda uMoses noYeremiya ukuze bakwazi ukwenza umsebenzi awayebanike wona. (Eks. 4:11, 12; Yer. 1:7, 8) Nathi sinokucela uYehova ukuba asincede. Kakade ke, xa sifundisa abanye iBhayibhile, sibafundisa ngoYehova, nto leyo ayithandayo uThixo. (1 Yoh. 3:22) Ngoko ke, zimisele ukwenza le nxalenye imnandi yomsebenzi wethu wokushumayela, ukuqhuba izifundo zeBhayibhile.