Unako Ukuba Ngumfundisi!
1. Liliphi ithuba elikhethekileyo analo umvakalisi woBukumkani ngamnye?
1 Ukufundisa umntu inyaniso kuyenye yezona zinto zivuyisayo kubulungiseleli bethu. Kuvuyisa ngokwenene ukumbona esabela kwisigidimi soBukumkani nokumnceda asondele kuMongami wendalo iphela. (Yak. 4:18) Umvakalisi woBukumkani ngamnye ufanele azibekele usukelo lokufundisa umntu onxanelwe inyaniso, aze ambone eqalisa ukwenza utshintsho kubuntu, kwinkangeleko nakwihambo yakhe.—Mat. 28:19, 20.
2. Kutheni abanye beba madolw’ anzima ukuqhuba izifundo zeBhayibhile, yaye yintoni enokubanceda boyise le ngxaki?
2 Thembela KuYehova: Kumaxesha angaphambili abakhonzi abathembekileyo babengaziboni befanelekile ukufeza uthumo lwabo. Ukuthembela kuYehova kwanceda uMoses, uYeremiya, uAmosi nabanye abantu abaqhelekileyo boyisa amathandabuzo nokungazithembi baza benza umsebenzi obalulekileyo. (Eks. 4:10-12; Yer. 1:6, 7; Amo. 7:14, 15) Nompostile uPawulos ‘wakhalipha.’ Njani? Wathi uncedwe ‘nguThixo.’ (1 Tes. 2:2, Appleyard’s Version) Ewe, sonke sinokuba nentembelo yokuba uYehova uya kusinceda, asinike ubulumko namandla esiwafunayo ukuze siqhube izifundo zeBhayibhile eziphumelelayo.—Isa. 41:10; 1 Kor. 1:26, 27; 1 Pet. 4:11.
3, 4. Luluphi uqeqesho olulungiselelweyo ukusinceda sifundise iLizwi likaThixo?
3 Yamkela Uqeqesho: UMyaleli wethu Ozukileyo, uYehova uThixo uyasiqeqesha ngocwangciso lwemfundo yokomoya ukuze sifanelekele ukufundisa. (Isa. 54:13; 2 Tim. 3:16, 17) Lwamkele olu qeqesho ngokuwasebenzisa onke amathuba okwandisa indlela oziqonda ngayo iZibhalo yaye uphucule ubuchule bakho bokufundisa iinyaniso zeBhayibhile. Nangona ngokukhethekileyo le kuyinjongo yeSikolo Sobulungiseleli Sobuthixo neNtlanganiso Yenkozo, zonke iintlanganiso zebandla zisiqeqeshela ukuba sifundise ngokusuka kwiLizwi likaThixo.
4 Zama ukufunda iindlela zokuzifundisa lula kwaneenyaniso ezintsonkothileyo. Incwadi YeSikolo Sobulungiseleli, kwiphepha lama-227, ithi: “Umele uwuqonde kakuhle umbandela wakho wena kuqala ukuba ufuna abanye bawuqonde.” Ukugqabaza kwiintlanganiso kusinceda sibethelele iingongoma ezizintloko engqondweni yethu ukuze sikwazi ukuzisebenzisa kamva. Ngoko ke lungiselela kakuhle yaye uya kubuthemba nangakumbi ubuchule bakho bokufundisa.
5. Luluphi uqeqesho olongezelelekileyo esilufumana ebandleni olusinceda senze inkqubela njengabafundisi?
5 Kwasekuqaleni, ngokuqinisekileyo abashumayeli abangamaKristu babefunda kwabanye xa bekumsebenzi wokwenza abafundi. (Luka 10:1) Ukuba kunokwenzeka hamba nabavakalisi abanamava kuquka oovulindlela, abadala kunye nabaveleli abahambahambayo kumsebenzi wokuqhuba izifundo zeBhayibhile. Phawula indlela abasebenzisa ngayo imizekelo elula nezinye izinto ezinceda ekufundiseni ezifumaneka kwiincwadi zethu zokuqhuba izifundo ukuze bacacise iinyaniso zeBhayibhile. Cela kubo amacebiso okuphucula ubuchule bakho bokufundisa. (IMize. 1:5; 27:17) Luxabise uqeqesho olunjalo—kuba luvela kuThixo.—2 Kor. 3:5.
6. Yintoni efunekayo nebalulekileyo ukuze umntu abe ngumfundisi weLizwi likaThixo?
6 Thembela kuYehova uze ungenelwe kuqeqesho alunikelayo. Yithandazele inkqubela yakho. (INdu. 25:4, 5) Nawe unokufumana uvuyo lokunceda umntu abe ngumfundisi weLizwi likaThixo njengawe!