Bathabatheni Njengomzekelo Abaprofeti—UHoseya
1. Nguwuphi umbuzo osenokuba ukhe wazibuza wona?
1 ‘Ziintoni endikulungeleyo ukuzincama ngenxa kaYehova?’ Mhlawumbi ukhe wazibuza lo mbuzo xa ubucamngca ngokulunga nenceba kaYehova. (INdu. 103:2-4; 116:12) Ngokuzithandela uHoseya wakwenza oko wakuyalelwa nguYehova, nangona kwakufuneka ancame izinto ezithile. Sinokumxelisa njani uHoseya?
2. Sinokuwuxelisa njani umzekelo omhle kaHoseya wokuzingisa kumsebenzi wokushumayela?
2 Shumayela Nangexesha Lenkathazo: Ngokuyintloko isigidimi sikaHoseya sasijoliswe kubukumkani bezizwe ezilishumi zakwaSirayeli, apho lwalusele lusecicini lokubhanga unqulo oluyinyaniso. UKumkani uYerobhoham II wenza okubi emehlweni kaYehova yaye waqhubeka ekhuthaza ukunqulwa kwethole okwakuqalwe nguYerobhoham I. (2 Kum. 14:23, 24) Ookumkani abalandela emva kwakhe baqhubeka nalo mkhwa de batshatyalaliswa ubukumkani bezizwe ezilishumi ngonyaka ka-740 ngaphambi kokuzalwa kukaYesu. Phezu kwako nje ukugqugqisa konqulo lobuxoki, uHoseya wakhonza ngokuthembeka njengomprofeti iminyaka eyi-59. Ngaba nathi njengaye sizimisele ukushumayela unyaka nonyaka, enoba abantu abanamdla okanye bayachasa?—2 Tim. 4:2.
3. Ubomi bukaHoseya buyibonisa njani inceba kaYehova?
3 Khawubone Inceba KaYehova: UYehova wayalela uHoseya ukuba atshate “umfazi wobuhenyu.” (Hos. 1:2) Nangona umfazi wakhe uGomere, wamzalela unyana, kuyacaca ukuba kamva wamzalela abantwana ababini abangengobakhe. Ukukulungela kukaHoseya ukuxolela umfazi wakhe kwabonisa inceba uYehova awayelungele ukuyenzela amaSirayeli aphambukileyo xa eguquka. (Hos. 3:1; Roma 9:22-26) Ngaba sikulungele ukubekela bucala iminqweno yethu size sixelele abantu bazo zonke iintlobo ngenceba kaYehova?—1 Kor. 9:19-23.
4. Ziziphi ezinye izinto ekusenokufuneka sizincame ngenxa kaYehova?
4 Bambi abakhonzi bakaYehova baye bancama imisebenzi ehlawula imali eninzi ukuze babe nexesha elingakumbi lokushumayela. Abanye baye bahlala bengatshatanga okanye ababi nabantwana ukuze bafune izilangazelelo zoBukumkani. Xa sisihl’ amahlongwane ubomi bukaHoseya, sisenokuthi, ‘andinakuze ndiyenze mna lento.’ Noko ke, njengoko sisiya sibuqonda ngakumbi ububele obungasifanelanga bukaYehova size sixhomekeke kumoya wakhe oyingcwele ukuze sifumane amandla, usenokusisebenzisa ngendlela esingazange siyicinge nokuyicinga, njengoHoseya.—Mat. 19:26; Fil. 2:13.