Ungabalibali Abo Bakumakhaya Anyamekela Abantu Abangaphilanga
1. Kutheni kufuneka sishumayele iindaba ezilungileyo nakwabo bahlala kumakhaya anyamekela abantu abangaphilanga?
1 Baninzi abantu abathwaxwa ziingxaki ezibangelwa kukwaluphala. (INtshu. 12:1-7) Abanye babo bahlala kumakhaya anyamekela abantu abangaphilanga, ngenxa yoko akusoloko kulula ukuba sibafumane xa sishumayela kwindlu ngendlu. Nkqu nakumazwe apho abazali abalupheleyo baye bahlale nabantwana babo okanye nezinye izalamane, akukho lula ukubafumana. Nakubeni kusenokuba nzima ukuhamba-hamba okanye ukukhumbula izinto, abantu abalupheleyo nabanye abahlala kumakhaya anyamekela abantu abangaphilanga banako ukufunda, ukuqonda nokuthanda uYehova. Sinokwenza njani ukuze sibachazele ‘ngethemba elonwabisayo’?—Tito 2:13.
2. Unokulufumana njani uludwe lwamakhaya anyamekela abantu abangaphilanga ekunokuyiwa kuwo?
2 Ukuqalisa: Ngokuqhelekileyo, uludwe lwamagama ala makhaya luyafumaneka kwincwadi yefowuni. Unokukhangela kwindawo ethi “nursing homes.” Umveleli wenkonzo unokukhokela ekufuneni abavakalisi abafanelekayo ukuze batyelele la makhaya. Ukulungiselela kakuhle nokuthembela ngoYehova kunokukhokelela ekuqalisweni kwesifundo seBhayibhile seqela.—IMize. 21:5; 1 Yoh. 5:14, 15.
3, 4. (a) Sifanele sithethe nabani xa sifuna ukuqalisa isifundo seqela? (b) Sinokuyichaza njani indlela esiza kuqhutywa ngayo?
3 Indlela esiqaliswa ngayo isifundo ixhomekeka kuhlobo lwekhaya. Kumakhaya amakhulu, ahlala abantu nanabasebenzi abaninzi, kuhle ukuba udibane nomntu ojongene nezinto ezenziwa kwelo khaya. Kumakhaya amancinane ahlala abantu abadala abambalwa nanabasebenzi ababini okanye abathathu, unokucela ukudibana nomphathi welo khaya.
4 Kuzo zombini ezi meko, chaza ukuba unikela ngexesha lakho ukuze ukhuthaze abantu abakuthandayo ukufunda nokuncokola ngeBhayibhile. Buza enoba bakhona na abantu abanokuthanda ukubakho kwingxubusho yeBhayibhile yeqela yemizuzu eyi-30 ngeveki. Kukho iincwadi ezininzi onokuzisebenzisa, kodwa abantu abaninzi bathanda incwadi ethi Incwadi Yam Yamabali EBhayibhile nethi Oyena Mntu Ubalaseleyo Wakha Waphila. Usenokubonisa umphathi ezi ncwadi. Unokuthetha naye ngosuku, ixesha kunye negumbi eziza kuqhutyelwa kulo ezi ngxubusho ibe ngokuqhelekileyo oko kuya kubhalwa kwizinto abazenzayo. Ungoyiki ukuchaza ukuba uliNgqina likaYehova. Kwangaxeshanye, nceda umphathi aqonde ukuba awuzukuqhuba inkonzo kodwa injongo kukukhuthaza ukufundwa kweBhayibhile.
5. Ziintoni onokuzenza ukuze isifundo sibe mnandi sikhuthaze?
5 Ukuqhuba Isifundo: Indlela osiqhuba ngayo isifundo ixhomekeke kwiimeko zekhaya elo, ngoko yiba bhetyebhetye ube nengqiqo. Lowo uqhuba isifundo ufanele eze neekopi eziliqela zalo ncwadi ayisebenzisayo aze aphinde aziqokelele emva kwesifundo. Abanye abantu kusenokufuneka baphathelwe iincwadi ezinamagama amakhulu. Kunokufundwa iziqendu, kubuzwe imibuzo kuze kuphendulwe ngendlela esiqhele ukuqhuba ngayo. Abo bavumayo nabakwaziyo banokucelwa bafunde iziqendu okanye iZibhalo. Ebudeni besifundo, yiba nobubele uze nabo ubavulele ithuba lokuba bathethe. Ukuba umphathi uyavuma, unokubabukelisa enye yeevidiyo zentlangano ezinceda abantu bayikholelwe iBhayibhile okanye ezichaza oko ithetha ngako. Unokuvula uze uvale isifundo ngomthandazo. Abanye abavakalisi baye bacule neengoma zoBukumkani.
6. Unokwenza ntoni xa kukho umntu ongavumelaniyo noko kuthethwayo?
6 Kuthekani ukuba umntu akavumelani nento ethethwayo okanye efundwayo? Sebenzisa ingqiqo xa uphendula. (Kol. 4:6) Mhlawumbi unokufunda isibhalo esifutshane esimphendula ngokucacileyo. Ukuba oko akunakwenzeka, kungakuhle ukumchazela ukuba ukuvile oko akuthethayo uze umphendule ecaleni emva kwesifundo.
7. Unokwenza ntoni xa umntu enombuzo wobuqu okanye ebonisa umdla ongakumbi?
7 Ngamanye amaxesha umntu unokubuza umbuzo okanye afune ukufunda okungakumbi. Omnye udade uphendula ngale ndlela: “Mhle umbuzo wakho. Kuba ingumbuzo wobuqu, masilinde de sigqibe isifundo. Siza kuwuxubusha sobabini.” Unokwenza amalungiselelo okuqhuba isifundo nomntu onomdla ngelinye ixesha, kwenye indawo.
8. Isifundo seqela nezifundo zobuqu ezifumanekayo zifanele zibalwe njani?
8 Kuhle ukuba ibe ngabavakalisi abanye abaqhuba isifundo kwelo khaya. Nabaphi na abavakalisi abanenxaxheba banokulibala elo xesha. Xa isifundo sele siqalisiwe, umvakalisi osiqhubayo unokubala ibuyelo elinye rhoqo esiya aze abale nesifundo seBhayibhile esinye ngenyanga. Izifundo zeBhayibhile zobuqu eziqhutywa kunye nabantu abahlala apho abakwaziyo ukuqonda nokufunda, ziya kubalwa ngendlela eqhelekileyo.
9, 10. Ziziphi iimpawu ezifunekayo kumntu oza kuqhuba izifundo kula makhaya? Cacisa.
9 Qhubeka Nesifundo: Kuhle ukuba nosuku nexesha elibekiweyo lokuqhuba isifundo seqela. Abantu abahlala kwelo khaya kunye nabasebenzi balindele ukuba siqale size siphele kwangethuba. (Mat. 5:37) Ngenxa yoko, kufuneka ukuzincama nolungelelwano. Amava aye abonisa ukuba kuhle xa abavakalisi ababini abafanelekayo besebenza kunye ukuze baqhube esi sifundo. (INtshu. 4:9, 10) Kumakhaya amakhulu, kusenokufuneka abavakalisi abangakumbi.
10 Ukuba nobubele nomdla onyanisekileyo ebantwini nako kubalulekile. (Fil. 2:4) Kutyelelo lokuqala, zinike ithuba lokudibana nomntu ngamnye obakho kwisifundo. Zama ukukhumbula amagama abo ngaphambi kwesifundo esilandelayo. Sekunjalo, abanye abantu abasele bekhulile bayakhubeka xa umntu abangamaziyo ebabiza ngegama. Ukuba nomonde novelwano kuya kwenza wonke umntu azive ekhululekile.
11. Abo baqhuba izifundo zeqela banokuyibonisa njani imbeko nobubele kubasebenzi nakwizalamane zabo bahlala kula makhaya?
11 Kubalulekile ukuba nembeko nobubele kubasebenzi bekhaya nakwizalamane zabantu abahlala kulo. Xa sele kwenziwe amalungiselelo, ufanele udibane nomphathi ngaphambi kokutshintsha ixesha nendlela isifundo esiqhutywa ngayo. Ekuhambeni kwexesha, unokubuza kumphathi ngendlela esihamba ngayo isifundo. Xa izalamane zityelele ebudeni besifundo, zinike ithuba lokuzazi. Zicacisele injongo yesifundo seBhayibhile. Ziqinisekise ngomdla onawo kwisalamane zaso. Zimeme ukuba zihlale zize ziphulaphule ebudeni besifundo.
12, 13. Balisa amava abonisa ukuba kuluncedo ukushumayela kumakhaya anyamekela abantu abangaphilanga.
12 Imiphumo: Abaveleli abahambahambayo, namabandla anikela iingxelo ezikhuthazayo ngokushumayela kula makhaya. Kwelinye ikhaya, kwabakho abantu abayi-20 kwingxubusho yokuqala. Oku kwakhokelela kwizifundo zeBhayibhile nabantu abathandathu. Omnye wade wabhaptizwa. Kwelinye ikhaya, ezi ngxubusho zakhuthaza umakhulu oneminyaka eyi-85 ukuba aye ezintlanganisweni waza wafuna nokubhaptizwa. Xa elinye ikhaya lenza utshintsho kwiinkqubo zalo, kwaza oko kwaphumela ekuyekisweni kwesifundo seqela, abo bahlala kulo bakhalaza kumphathi. Ekugqibeleni esi sifundo saqaliswa kwakhona ibe kweza abantu abayi-25 ukuya kwabayi-30.
13 Uthando esilubonakalisayo kwabo bakumakhaya anyamekela abantu abangaphilanga aluchukumisi abo bahlala kuwo kuphela. Ngokomzekelo, kuqhelekile ukuba nabasebenzi babe nenxaxheba kwezi zifundo. Umgudu esiwenzayo ukuze sifikelele nakwabo bakula makhaya unikela ubungqina nasekuhlaleni. (1 Pet. 2:12) Emva kokuxelelwa injongo yesi sifundo umphathi welinye ikhaya wathi: “Beniphi lonke eli xesha? Niza kuqala nini?” Omnye wathi: “Ndingakuvuyela ukukhuthaza namanye amakhaya ukuba abe naso esi sifundo. AmaNgqina kaYehova akwenza oku simahla njengenxalenye yomsebenzi wawo wokushumayela ebantwini.” Elinye ikhaya eliseHawaii lawonga amaNgqina kaYehova ngenxa yomsebenzi wawo wokuzithandela, lisithi “axabiseke gqitha” kwelo khaya.
14. Kutheni sifanele sishumayele nakwabo bakumakhaya anyamekela abantu abangaphilanga?
14 UYehova ufuna abantu abakhulileyo bamdumise. (INdu. 148:12, 13) Oku kuquka nabo bakumakhaya anyamekela abantu abangaphilanga. Ngaba akho amakhaya anjalo kwintsimi yenu, anabantu abakhulileyo abanokukuvuyela ukufumana iindaba ezilungileyo? Sincedwa ngabadala nangabaphathi bala makhaya sinokukwazi ukunikela ubungqina kubantu abakuwo. Xa sibakhumbula abo bakhulileyo, sixelisa uYehova.—INdu. 71:9, 18.