Sikhonza UThixo “Onenceba Ngeyona Ndlela”

1. Yintoni esinokucinga ngayo xa kuthethwa ngomntu onenceba?

XA KUTHETHWA ngomntu onenceba, siba nombono womntu onobubele, onothando nophayo. Le nto isenza sicinge ngebali likaYesu lomSamariya owaba nobubele. Lo mSamariya ‘wanceda’ umYuda owayehlaselwe ngootsotsi. ‘Wayisizela’ le ndoda yayonzakele, waza wenza zonke iindlela zokuyinceda. (Luka 10:29-37) Lo mzekeliso usifundisa ngophawu oluthandekayo analo uThixo wethu, inceba. Unenceba kuba uyasithanda. Inceba anayo siyibona yonke imihla kwindlela asiphatha ngayo.

2. Yeyiphi enye indlela umntu anokubonisa ngayo inceba?

² Ikhona enye indlela umntu anokuyibonisa ngayo inceba. Usenokungamohlwayi umntu ebekufuneka amohlwaye. Yiloo nto ayenzayo uYehova nakuthi. Umdumisi wathi: “Akenzanga kuthi ngokwezono zethu.” (INdu. 103:10) Kodwa ngamanye amaxesha uYehova ukhe amohlwaye kabuhlungu umntu owenze isono.

3. Yeyiphi imibuzo eza kuphendulwa kweli nqaku?

³ Kweli nqaku siza kuphendula le mibuzo mithathu: Kutheni uYehova enenceba? Kudibana ngantoni ukohlwaya kabuhlungu nokuba nenceba? Yintoni enokusinceda sibe nenceba? Makhe sive iLizwi LikaThixo ukuba liyiphendula njani le mibuzo.

KUTHENI UYEHOVA ENENCEBA?

4. Kutheni uYehova enenceba?

⁴ UYehova uyakuthanda ukuba nenceba. Umpostile uPawulos waphefumlelwa ukuba abhale athi uThixo ‘unenceba ngeyona ndlela.’ UPawulos wayesithi uThixo unenceba kuba unike abathanjiswa abangafezekanga ithemba lokuphila ezulwini. (Efe. 2:4-7) Inceba yakhe ayikhange iphelele apho. Umdumisi uDavide wathi: “UYehova ubenzela izinto ezilungileyo bonke, inceba yakhe ibonakala kuyo yonke imisebenzi yakhe.” (INdu. 145:9) UYehova akayeki ukwenzela abantu bakhe inceba nanini na ifuneka, kuba uyabathanda.

5. UYesu umazi njani ukuba uYehova unenceba?

⁵ Akakho umntu oyazi njengoYesu indlela uYehova akuthanda ngayo ukuba nenceba. Kaloku, iminyaka emininzi ngaphambi kokuba eze emhlabeni, wayehlala noTata wakhe ezulwini. (IMize. 8:30, 31) Wayibona kwizinto ezininzi indlela anenceba ngayo uTata wakhe kubantu abangafezekanga. (INdu. 78:37-42) Xa efundisa wayehlala ethetha ngolu phawu luthandekayo lukaTata wakhe.

6. UYesu wabonisa njani ukuba uTata wakhe unenceba?

⁶ Kule veki iphelileyo sifunde ngebali likaYesu lonyana owayelahlekile. Kweli bali, wayesibonisa indlela uYehova akuthanda ngayo ukuba nenceba. Lo nyana wemka kokwabo ‘wadlala ngelifa lakhe, waphila ubomi bokungakhathali.’ (Luka 15:13) Ekuhambeni kwexesha wabuyela ezingqondweni, waguquka, wazithoba waza wagoduka. Wathini utatakhe? Zange kufuneke lo mfana akhe alinde, ajonge ukuba uza kuthini utata. UYesu wathi: “Uthe esekude, utata wakhe wambona, waba nosizi, wabaleka waya kuye, wamanga waza wamphuza.” Zange abe embuza izinto ezininzi, waba nenceba kuye, wamxolela waza wamamkela. Lo mfana wayemmoshe kakhulu utatakhe, kodwa ngenxa yokuba waguquka, utatakhe wamxolela. Utata onenceba ekuthethwa ngaye kweli bali umela uYehova. Apha uYesu usibonisa indlela uTata wakhe akufuna ngayo ukuxolela aboni abaguquka nyhani.​—Luka 15:17-24.

7. Inceba kaYehova ibubonisa njani ubulumko anabo?

⁷ UYehova unenceba ngenxa yobulumko bakhe obungenakulinganiswa nanto. Uhlala esenza izigqibo eziza kunceda indalo yakhe. IBhayibhile ithi ‘ubulumko obuvela emazulwini bunenceba ibe buvelisa iziqhamo ezihle.’ (Yak. 3:17) UYehova ufana nomzali obathandayo abantwana bakhe, uyayazi indlela ekuba mnandi ngayo kubantwana bakhe xa esiba nenceba kubo. (INdu. 103:13; Isa. 49:15) Aba bantwana banesono, banethemba lezinto ezintle aza kubenzela zona kwixesha elizayo ngenxa yokuba unenceba. Kuba elumke kakhulu, uba nenceba nanini na xa kufuneka abe nayo. Kodwa uYehova osisilumko akadlali ngenceba yakhe. Ayimenzi abe ngathi akayiboni into embi abayenzayo abantu.

8. Kuye kwenziwe ntoni kuboni abangaguqukiyo, yenzelwa ntoni loo nto?

⁸ Masithi umkhonzi kaThixo wenza isono ngabom. Yintoni esimele siyenze? UYehova waphefumlela uPawulos ukuba ayalele ibandla ukuba ‘liyeke ukuhlobana naye.’ (1 Kor. 5:11) Aboni abangaguqukiyo bakhutshelwa ngaphandle ebandleni. Loo nto yenzelwa ukukhusela abazalwana noodade abathembekileyo, nokuze abantu babone ukuba iindlela zikaYehova zingcwele. Kodwa abanye bacinga ukuba umntu okhutshelwe ngaphandle akenzelwanga nceba. Ngaba kunjalo nyhani? Makhe sibone.

YINCEBA UKUKHUPHELA UMNTU NGAPHANDLE?

9-10. Ngokutsho kwamaHebhere 12:5, 6, kutheni sisithi ukukhutshelwa ngaphandle komntu ongaguqukiyo kukuba nenceba? Yenza umzekelo.

⁹ Xa ebandleni kusenziwa isaziso esithi umntu esimaziyo nesimthandayo akaselilo iNgqina LikaYehova, sikhathazeka kakhulu. Sisenokuzibuza ukuba bekunyanzelekile na ukuba ade akhutshelwe ngaphandle. Ngaba nyhani kukuba nenceba ukukhuphela umntu ngaphandle? Ewe. Kaloku ayibobulumko, ingeyonceba, ingekuko nokumthanda ukungamohlwayi umntu xa kufuneka umohlwaye. (IMize. 13:24) Ngaba ukukhutshelwa ngaphandle komKristu ongaguqukiyo kungamnceda atshintshe? Kungamnceda! Abazalwana noodade ababekhe benza izono ezinzulu bathi ukukhutshelwa ngaphandle kuyamnceda umntu abuyele ezingqondweni, atsho aziyeke izinto abezenza, abuyele kuYehova.​—Funda amaHebhere 12:5, 6.

¹⁰ Makhe siyizekelise ngolu hlobo le nto. Umalusi uqaphela ukuba enye yeegusha zakhe iyagula. Uyazi ukuba ukuze iphile, kuza kufuneka ingadibani nezinye. Kodwa iigusha ziyathanda ukuba kunye. Xa iyodwa, iba ngathi ilahlekile. Ngaba umalusi ukhohlakele xa eyahlula kwezinye iigusha ukuze ayinyange? Hayi. Uyazi ukuba xa enokuyiyeka ihambe nezinye, iza kuzosulela. Xa eyihlalisa yodwa, ukhusela ezinye iigusha.​—Thelekisa iLevitikus 13:3, 4.

11. (a) Ufana njani negusha egulayo umntu okhutshelwe ngaphandle? (b) Ziintoni ezinokunceda umntu okhutshelwe ngaphandle abuyele entlanganweni?

¹¹ UmKristu okhutshelwe ngaphandle sinokumfanisa nale gusha igulayo. Ufana nogulayo kuba umshiyile uYehova. (Yak. 5:14) Umntu omshiyileyo uYehova ufana nomntu ogula yinto eyosulelayo, kuba unokwenza nabanye abantu bamshiye. Yiloo nto kufuneka asuswe phakathi kwabantu bakaThixo. Le ndlela uYehova abohlwaya ngayo abantu abangaguqukiyo, ibonisa indlela abathanda ngayo abakhonzi bakhe abathembekileyo. Inokumnceda naloo mntu wenze isono aguquke. Ngoxa ekhutshelwe ngaphandle angaya kwiintlanganiso, apho aza kufundiswa khona, lutsho luqine ukholo lwakhe. Angazifumanela neencwadi zentlangano, azifunde, abukele neJW Broadcasting. Xa abadala bembona ukuba uyatshintsha, banokumana besiya kuthetha naye ukuze bamncede abuyele kuYehova aze aphinde abe liNgqina LikaYehova.b

12. Yintoni abayenzayo abadala kumntu ongaguqukiyo ebonisa ukuba banothando nenceba?

¹² Simele sazi ukuba ngabantu abangaguqukiyo qha abakhutshelwa ngaphandle. Abadala bayazi ukuba bamele bacingisise kakuhle ngaphambi kokuba benze isigqibo sokuba umntu akhutshelwe ngaphandle. Bayazi ukuba uYehova ‘usiqeqesha ngendlela esifaneleyo.’ (Yer. 30:11) Bayabathanda abazalwana noodade, abafuni ukwenza nantoni na enokubahlukanisa noYehova. Kodwa ngamanye amaxesha, ukuze babonise uthando nenceba, kuye kufuneke bamkhuphele ngaphandle ebandleni umntu ongaguqukiyo.

13. Kwakutheni ukuze kufuneke omnye umKristu waseKorinte asuswe ebandleni?

¹³ Cinga ngento umpostile uPawulos awathi mayenziwe kumKristu owayengaguquki. EKorinte kwakukho umKristu owayelala nomfazi katatakhe. Into eyayisonyanyeka nyhani! UPawulos wayeyazi into eyathethwa nguYehova kumaSirayeli ngomntu owenza le nto. Wathi: “Indoda elala nomfazi katata wayo imhlazisile utata wayo. Nakanjani bamele babulawe bobabini.” (Lev. 20:11) Kodwa yena uPawulos wayengenakuthi loo ndoda mayibulawe. Wathi mayisuswe ebandleni. Indlela eyayiziphethe ngayo yayisele imosha namanye amaKristu ebandleni, ayengasaboni nto imbi kule nto yayiyenza.—1 Kor. 5:1, 2, 13.

14. UPawulos wayibonisa njani inceba kumKristu waseKorinte owayekhutshelwe ngaphandle? Sasiyintoni isizathu? (2 Korinte 2:5-8, 11)

¹⁴ Ekuhambeni kwexesha uPawulos weva ukuba le ndoda iguqukile. Yayilihlazisile lona ibandla, kodwa uPawulos waxelela abadala ukuba ‘akafuni kusebenzisa amazwi ahlabayo.’ Wathi kubo: “Nibe nobubele, nimxolele yaye nimthuthuzele.” Khawuve isizathu sokuba atsho njalo: “Ukuze angakhathazeki kakhulu.” Wayisizela le ndoda yayiguqukile. Wayengafuni ukuyibona ikhathazeke kakhulu ide icinge ukuba soze ixolelwe nokuba ingacela ukuxolelwa.​—Funda ama-2 Korinte 2:5-8, 11.

15. Yintoni abayenzayo abadala ebonisa ukuba banenceba nangona bemohlwaya kabuhlungu umntu?

¹⁵ Abadala bayafana noYehova, nabo bayakuthanda ukuba nenceba. Bohlwaya kabuhlungu xa kufuneka, kodwa bazama ngazo zonke iindlela ukuba nenceba. Kaloku bebengazukuba banenceba xa bemyeka njee bangamohlwayi umntu owenze into embi. Bebeza kuba bayamkhuthaza ukuba angayiyeki. Kodwa ngabadala bodwa abamele babe nenceba?

YINTONI ENOKUSINCEDA SIBE NENCEBA?

16. IMizekeliso 21:13 ithi uYehova uza kwenza ntoni kubantu abangenanceba?

¹⁶ Onke amaKristu azama ukuba nenceba njengoYehova. Kutheni? Kaloku uYehova akammameli umntu ongabenzeli inceba abanye. (Funda iMizekeliso 21:13.) Asifuni angayimameli imithandazo yethu, ngoko sizama ngeendlela zonke ukuba nenceba kwabanye abantu. Kunokuba simfulathele umKristu okhathazekileyo, masihlale sizivulile iindlebe zethu xa “kukhala umntu osweleyo” kuba “lowo ungenanceba akazukwenzelwa nceba xa egwetywa.” (Yak. 2:13) Into eza kusinceda sikwazi ukuba nenceba kwabanye abantu, kukuba singalibali ukuba nathi siyafuna ukwenzelwa inceba. Kufuneka sibe nayo nyhani kumntu obuyiselwe ebandleni.

17. Yintoni eyabonisa ukuba uKumkani uDavide unenceba?

¹⁷ IBhayibhile ithetha ngabantu esinokufunda kubo ukuba nenceba, singakhohlakali. Ngokomzekelo, cinga ngoKumkani uDavide. Wayenenceba. USawule wayefuna ukumbulala, kodwa waba nenceba kulo kumkani ukhethwe nguThixo, akafuna ukuziphindezela okanye ukumenzakalisa.—1 Sam. 24:9-12, 18, 19.

18-19. Kunini apho uDavide wakha akabi nanceba?

¹⁸ UDavide wakha akabi nayo inceba. Ngokomzekelo, xa wayedelelwa nguNabhali owayekhohlakele, engafuni ukumnika ukutya namadoda akhe, waba nomsindo wafuna ukumbulala namadoda endlu yakhe. Ukuze angayenzi loo nto, asinde ekubeni netyala legazi, wancedwa ngumfazi kaNabhali uAbhigali, owayenobubele nomonde, wakhawuleza wabanika ukutya.​—1 Sam. 25:9-22, 32-35.

¹⁹ Ngeny’ imini umprofeti uNatan wabalisela uDavide ngendoda eyayisisityebi eyathatha igusha yendoda eyayizisokolela. UDavide waba nomsindo, wathi: “Ephila nje uYehova, indoda eyenze le nto ifanelwe kukufa!” (2 Sam. 12:1-6) Wayewazi uMthetho uYehova awathi uMoses makawunike amaSirayeli. Isela elibe igusha kwakufuneka liyibhatale ngeegusha ezine. (Eks. 22:1) Ngoko yayiyinkohlakalo nyhani le yayithethwa nguDavide esithi le ndoda ifanelwe kukufa. Eyona nto yayisenza uNatan amenzele lo mzekeliso uDavide, wayefuna ukumnceda aqonde ukuba yena wenze izinto ezimbi kakhulu kunalo mntu uthathe igusha yomntu olihlwempu. Kuyacaca ukuba uDavide wayengazukuba nenceba tu kule ndoda ikulo mzekeliso, kodwa yena uYehova waba nenceba kakhulu kuye!​—2 Sam. 12:7-13.

20. Sifunda ntoni kuDavide?

²⁰ Ubonile ukuba ngenxa yomsindo uDavide wathi uNabhali namadoda endlu yakhe mababulawe? Waphinda wathi isityebi esikumzekeliso kaNatan sasifanele sibulawe ngenxa yento esasiyenzile. Kodwa sisenokuzibuza ukuba kwakutheni ukuze indoda eyayisaziwa inenceba icinge ukuba esi sityebi sasifanele sibulawe. Cinga ngendlela awayeziva ngayo uDavide ngelo xesha, wayesatyiwa sisazela. Ukuba umntu akabi nanceba xa egweba, loo nto ibonisa ukuba kukho ingxaki kukholo lwakhe. UYesu wayalela abalandeli bakhe esithi: “Yekani ukugweba ukuze nani ningagwetywa; kuba indlela enigweba ngayo, niza kugwetywa kwangayo nani.” (Mat. 7:1, 2) Ngoko yonke into esiyenzayo masingayenzi ngenkohlakalo, masizimisele ukufana noThixo wethu “onenceba ngeyona ndlela.”

21-22. Zeziphi iindlela esinokuba nenceba ngazo ebantwini?

²¹ Umntu onenceba akabasizeli njee abantu angabancedi. Sonke sinokukhangela ukuba akukho bantu badinga uncedo na kwiintsapho zethu, ebandleni okanye ekuhlaleni. Zininzi iindlela esinokuba nenceba ngazo ebantwini. Ngaba kukho umntu omaziyo ofuna ukuthuthuzelwa? Ngaba unokumnceda, mhlawumbi umphathele ukutya okanye umncede ngezinye izinto azidingayo? Ngaba kukho umKristu obuyiselweyo ofuna ukuthuthuzelwa okanye ukukhuthazwa? Ngaba sinokuthuthuzela abantu ngeendaba ezilungileyo? Le yenye yezona ndlela onokubonisa ngazo inceba kubo bonke abantu odibana nabo.​—Yobhi 29:12, 13; Roma 10:14, 15; Yak. 1:27.

²² Ukuba siyayiqonda into yokuba abantu bayakudinga ukwenzelwa inceba, baninzi abantu esinokubonisa inceba kubo. Xa sinenceba, uvuya kakhulu uTata wethu osezulwini, uThixo “onenceba ngeyona ndlela.”