INDLELA YOKUPHELISA INZONDO EQHUBEKAYO

2 | Sukufuna Ukuziphindezela

Into Efundiswa YiBhayibhile:

“Sanukuphindisa ububi ngobubi nakubani na. . . . Zamani kangangoko ninako ukuba seluxolweni nabantu bonke. Sanukuziphindezela, . . . kuba kubhaliwe kwathiwa: ‘“Ndim ophindisayo, ndim obuyekezayo,” utsho uYehova.’”—ROMA 12:17-19.

Into Ethethwa Sesi Sibhalo:

Nangona kuyinto eqhelekileyo ukuba nomsindo xa senziwe into embi, uThixo akafuni siziphindezele. Endaweni yaloo nto uyasicenga ukuba silindele kuye, kuba uza kuzilungisa izinto kungekudala.—INdumiso 37:7, 10.

Indlela Esinokukunceda Ngayo Esi Sibhalo:

Xa abantu abanesono beziphindezela loo nto yenza inzondo engakumbi. Ngoko xa umntu eyewasikhathaza okanye wasivisa kabuhlungu, kufuneka singaziphindezeli. Zama ukuzibamba uze uphendule kakuhle. Kwezinye iimeko kunokuba ngcono ukungayihoyi into eyenzekileyo. (IMizekeliso 19:11) Siyavuma kona ukuba, ngamanye amaxesha kusenokuba ngcono ukuthetha ngaloo nto yenzekileyo. Ngokomzekelo kwimeko apho senziwe into embi efuna ukulungiswa ngumthetho, sisenokukhetha ukuya emapoliseni okanye kwabanye abasemagunyeni.

Ukuziphindezela okuqhubekayo kuchana kwawena

Uza kuthini ukuba ayikho indlela yokuyilungisa ngoxolo loo ngxaki? Okanye, uza kuthini ukuba sowuzame ngandlela zonke ukuze uyilungise ngoxolo? Sukuziphindezela. Loo nto inokwenza imeko ibe mbi nakakhulu. Ukuba awuziphindezeli, loo nto iza kunceda ekupheliseni inzondo. Unokuthembela kwiindlela zikaYehova zokulungisa iingxaki. “Thembela ngaye, uza kukuxhasa.”—INdumiso 37:3-5.

Ibali Lobomi—UADRIÁN

Wayeka Ukufuna Ukuziphindezela

Esemtsha uAdrián wayenenzondo kangangokuba wayefuna ukuziphindezela kuye nakubanina owakhe wamenza into ebuhlungu. Uthi xa ebalisa: “Ndandisoloko ndisilwa ngompu, amaxesha amaninzi ndandiye ndigcwale ligazi, ndibe phakathi kokufa nokuphila.”

UAdrián waqalisa ukufunda iBhayibhile xa wayena-16. Uphinda athi: “Njengoko ndandiqhubeka ndifunda iBhayibhile ndabona ukuba kufuneka nditshintshe ubuntu bam.” Kwafuneka ayeke ukuba nenzondo nokulwa. Wancedwa yinto awayeyifunde kumaRoma 12:17-19 esikhuthaza ukuba singaziphindezeli. Uthi: “Ndabona ukuba uYehova uza kukulungisa ukuphathwa kakubi kwabantu ngendlela yakhe, nangexesha lakhe. Kancinci kancinci ndaye ndiyeka ukuthanda ukulwa.”

Ngobunye ubusuku iqela lamadoda elalidla ngokulwa nam landibetha. Umntu owayephethe eli qela wakhwaza esithi: “Masilwe!” UAdrián uyavuma nyhani ukuba wayefuna ukuziphindezela. Kunokuba aziphindezele wenza umthandazo omfutshane waze wabashiya.

“Kusuku olulandelayo ndadibana nomntu ophethe eli qela ehamba yedwa. Ndaba nomsindo ndaza ndafuna ukuziphindezela kuye xa ndandimbona kodwa ndaye ndenza umthandazo omfutshane kuYehova ndimcela ukuba andincede ndikwazi ukuzibamba. Ndingalindelanga, waye weza kum waze wathi: ‘Ndixolele ngento eyenzeke izolo ebusuku. Xa ndithetha inyani ndiyafuna ukufana nawe. Ndifuna ukufunda iBhayibhile.’ Ndavuya nyhani xa ndakwazi ukuwubamba umsindo wam! Ndinombulelo ngaloo nto, kuba saqalisa ukufunda iBhayibhile kunye.”