Umfanekiso weqonga nelaphu elinombhalo omkhulu entla kwalo
1922 Kwiminyaka Elikhulu Eyadlulayo
“UTHIXO . . . usenza soyise . . . esebenzisa . . . uYesu Kristu!” (1 Kor. 15:57) La mazwi omxholo wonyaka ka-1922, enza aBafundi BeBhayibhile baqiniseka ukuba uYehova uza kubasikelela ngenxa yokuthembeka kwabo. Ngaloo nyaka, uYehova wabasikelela nyhani aba bashumayeli bakhutheleyo. Loo nto yabonakala ngokuba bakwazi ukuqalisa ukuziprintela iincwadi zabo nokushumayela ngerediyo. Ekupheleni kwaloo nyaka, kwaphinda kwacaca ukuba uYehova uyabasikelela abantu bakhe. ABafundi BeBhayibhile bakwazi ukuba nendibano engasoze ilibaleke eCedar Point, eOhio, eUnited States. Ukususela ngoko, loo ndibano yaba negalelo kumsebenzi owenziwa yintlangano kaYehova, isenalo nangoku.
“ICEBISO ELIHLE”
Ngenxa yokuba babesiya besiba baninzi abazalwana noodade abashumayelayo, kwafuneka kuprintwe iincwadi ezininzi. Abazalwana baseBheteli eBrooklyn babesenza iimagazini, kodwa iincwadi ezinoqweqwe oluqinileyo babeziprintelwa yinkampani yangaphandle. Le nkampani yakhe ayakwazi ukuprinta iincwadi ezaneleyo kangangeenyanga, yaza loo nto yenza kwanzima ukushumayela. UMzalwan’ uRutherford wabuza uRobert Martin owayejongene nefektri, ukuba ucinga ukuba bangakwazi na ukuziprintela iincwadi.
Ifektri eyayiseConcord Street eBrooklyn, eNew York
UMzalwan’ uMartin uthi, “yaba licebiso elihle eli kuba lalitheth’ ukuthi sasiza kuzivulela eyethu indawo yokuprinta iincwadi.” Abazalwana baqesh’ indawo e-18 Concord Street eBrooklyn, bafumana noomatshini bokusebenza.
Ayinguye wonke umntu owayeyiqhwabel’ izandla le nto. Umphathi wenkampani eyayisiprintela iincwadi weza kubona le ndawo yethu intsha. Wathi: “Ninoomatshini abasemgangathweni, kodwa akho nomnye kuni okwaziyo ukubasebenzisa. Ndininika nje iinyanga eziyi-6, bonke baza kuba bemoshakele.”
UMzalwan’ uMartin uthi: “Yayivakala yona le nto wayeyithetha, kodwa sasisazi ukuba iNkosi iza kusinceda, yasinceda ke nyhani.” Wayenyanisile uMzalwan’ uMartin kuba kungabanga xesha lide, umatshini wethu omtsha wawuprinta iincwadi eziyi-2 000 ngosuku.
Abazalwana, bame ngakoomatshini bokuprinta ababebasebenzisa efektri
WAVIWA NGABANTU ABANINZI KWIREDIYO
Abantu bakaYehova zange baphelele nje ekuziprinteleni iincwadi, kodwa baqalisa ukushumayela nangerediyo. Emva kwemini ngeCawa, nge-26 kaFebruwari, 1922, uMzalwan’ uRutherford wayeqala ukuthetha kwirediyo. Wanikela intetho eyayinomxholo othi “Izigidi Eziphilayo Ngoku Azisayi Kuze Zife” kwisitishi serediyo iKOG esasikwidolophu yaseeCalifornia, iLos Angeles, eUnited States.
Kuqikelelwa ukuba ngabantu abayi-25 000 ababemamele loo ntetho. Abanye bathumela iileta bebulela uMzalwan’ uRutherford. Enye yezo leta yayivela kuWillard Ashford owayehlala eSanta Ana, eCalifornia. Wabulela uMzalwan’ uRutherford “ngentetho emnandi neyayisenza umdla.” Emva koko wathi: “Apha endlini kukho abantu abathathu abangakwaziyo ukuphuma kuba bayagula. Ukuba ubungathethanga kwirediyo, besingazukuyiva le ntetho nokuba ubukufutshane nalapho sihlala khona.”
Kwiiveki ezalandelayo, umyalezo weBhayibhile waqhubeka udluliselwa ngerediyo. Wathi uphela unyaka, kwiMboniselo yesiNgesi kwabe kuqikelelwa ukuba “lo myalezo ubumanyelwe ngabantu abayi-300,000 kwirediyo.”
ABafundi BeBhayibhile bakhuthazwa ziileta nezinto ezazithethwa ngabantu, ngoko bazimisela ukwakha isitishi serediyo eStaten Island, kufutshane neBheteli eseBrooklyn. Kwiminyaka eyayiza kulandela, aBafundi BeBhayibhile babeza kusebenzisa isitishi serediyo iWBBR ukuze umyalezo woBukumkani uviwe ngabantu abakwiindawo ezininzi.
“ADV”
KwiMboniselo yesiNgesi kaJuni 15, 1922, kwathiwa kuza kubakho indibano eCedar Point, eOhio, nge-5 ukuya kwi-13 kaSeptemba, 1922. ABafundi BeBhayibhile bafika bevuya nyhani kuloo ndibano.
Kwintetho awayivula ngayo le ndibano, uMzalwan’ uRutherford wathi: “Ndiqinisekile ukuba iNkosi iza kuyisikelela . . . le ndibano, ize iqiniseke ukuba kushunyayelwa ngaphezu kwendlela ekwakha kwashunyayelwa ngayo emhlabeni.” Izithethi zazikhuthaza umsebenzi wokushumayela.
Abantu abaninzi ababekwindibano eyayingo-1922 eCedar Point, eOhio
NgoLwesihlanu nge-8 kaSeptemba, kwagaleleka abantu abayi-8 000 kuloo holo bezokumamela intetho kaMzalwan’ uRutherford. Babenethemba lokuba uza kucacisa into eyayithethwa ligama elalikwizimemo zabo elithi “ADV.” Abaninzi bathi xa behlala kwizitulo zabo babona iroli enkulu yelaphu elaliphezulu kwindawo eneqonga. UArthur Claus, owayesuka eTulsa ekwidolophu iOklahoma eUnited States, wafumana isitulo kwindawo awayeza kuva kakuhle yonke into kuyo. Ngelo xesha kwakungekho lula ukufumana indawo oza kuva kakuhle yonke into kuyo kuba ngaloo mihla zazingekho izixhobo zokwenza ilizwi livakale kakhulu.
“Sasiyimamele kakuhle yonke into awayeyithetha”
Ukuze kungabikho mntu uphazamisayo xa uMzalwan’ uRutherford enikela intetho, usihlalo wathi akukho mntu ufike emva kwexesha oza kuvunyelwa ukuba angene eholweni xa seyiqalile. Ngo-9:30 kusasa, uMzalwan’ uRutherford waqala intetho yakhe ngamazwi kaYesu akuMateyu 4:17 athi: “Ubukumkani bamazulu busondele.” (IBhayibhile yesiXhosa ka-1996) Xa wayethetha ngendlela abantu ababeza kuva ngayo ngoBukumkani wathi: “UYesu ngokwakhe wathi ngexesha lobukho bakhe wayeza kukhokela kumsebenzi wokuqokelela abantu bakhe abanyanisekileyo nabathembekileyo.”
UMzalwan’ uClaus owayehleli eholweni uthi: “Sasiyimamele kakuhle yonke into awayeyithetha.” Kodwa engalindelanga wagula, kwafuneka aphume eholweni. Waphuma ekrikriza, esazi ukuba wayengazukuvunyelwa ukuba aphinde angene uMzalwan’ uRutherford esanikela intetho.
Kwimizuzwana nje embalwa, waziva ebhetele. Uthi wathi xa ebuyela eholweni weva intswahla yezandla. Le nto yamenza wanomdla wokufuna ukuva ukuba yintoni le ivuyisa kangaka! Wazixelela ukuba ufuna ukuva uMzalwan’ uRutherford egqibezela intetho yakhe emnandi, nokuba loo nto yayiza kufuna akhwele phezu kophahla. UMzalwan’ uClaus, owayesengumfana ona-23 ngelo xesha, wakwazi ukunyuka wayokutsho eluphahleni lwaloo holo. Iifestile eziseluphahleni zazivuliwe. Wathi xa esiya esondela kuzo, wafumanisa ukuba “uza kukwazi ukuyiva kakuhle” loo ntetho.
UArthur wayengekho yedwa kolo phahla. Kwakukho nabanye abahlobo bakhe. Omnye wabo, uFrank Johnson, wabaleka waya kuye. Wambuza: “Awunamela ibukhali apha kuwe?”
UArthur wathi: “Ndinayo.”
UFrank wathi: “Iphendulwe imithandazo yethu. Uyayibona le roli inkulu yelaphu ixhonywe kwezi zikhonkwane? Inombhalo omkhulu. Uz’ummamele kakuhle uJaji.a Xa esithi, ‘mbhengezeni, mbhengezeni,’ uze uqhawule ezo ntambo zine.”
Ephethe loo mela, uArthur nabahlobo bakhe balinda ukuba uMzalwan’ uRutherford atsho la mazwi ukuze baqhawule ezo ntambo. Kungabanga xesha lide, uMzalwan’ uRutherford wathetha eyona nto yayibalulekile kwintetho yakhe. Ethetha enomfutho wathi: “Yibani ngamangqina athembekileyo nayinyaniso eNkosi. Tyhalelani phambili edabini de niyiphanzise yonke imizila yeBhabhiloni. Vakalisani isigidimi kufuphi nasekudeni. Ihlabathi limele lazi ukuba uYehova unguThixo nokuba uYesu Kristu unguKumkani wookumkani neNkosi yeenkosi. Le yimini yeemini. Khangelani, uKumkani uyalawula! Nina ningabavakalisi bakhe. Ngoko ke mbhengezeni, mbhengezeni, mbhengezeni, uKumkani nobukumkani bakhe!”
UArthur ukhumbula ukuba yena nabazalwana awayekunye nabo baqhawula ezo ntambo, yaza loo roli yehla ithe chu. Yayinamagama achaza into ethethwa ngoonobumba abathi “ADV.” Aba nobumba babemela igama lesiNgesi elithi “advertise” (mbhengezeni) elithetha ukushumayela.
UMSEBENZI OBALULEKILEYO
Le ndibano yayiseCedar Point yanceda abazalwana bacinga kakhulu ngomsebenzi obalulekileyo wokushumayela ngoBukumkani, baza abo babezimisele ukuwenza, bawenza bevuya. Omnye umzalwana owayeyicolporteur (ngoku ebizwa ngokuba nguvulindlela) waseOklahoma, eUnited States wathi, “Ingingqi esasisebenza kuyo yayinabantu abaninzi ababesebenza kwimigodi yamalahle nababesokola kakhulu.” Wathi qho xa besiva umyalezo okwimagazini iThe Golden Age “zazivele zehle iinyembezi. Sasikuvuyela kakhulu ukubathuthuzela.”
Aba Bafundi BeBhayibhile bayibona indlela ebaluleke ngayo into eyathethwa nguYesu kuLuka 10:2 esithi: “Umsebenzi wokuvuna mkhulu, kodwa bambalwa abasebenzi.” Wathi uphela loo nyaka, babe bezimisele ngaphezu kokuba babenjalo ekuqaleni ukubhengeza umyalezo woBukumkani kuzo zonke iindawo.
a Ngamanye amaxesha uMzalwan’ uRutherford kwakusithiwa nguJaji kuba wayekhe abe yijaji eMissouri, eUnited States.