Ukuthembela NgoYehova Kundenze Ndakhuseleka Nyhani

UKUMAZI KWAM UYEHOVA NOKUMTHEMBA

Ndazalwa ngo-1948 kwilali encinci ekumzantsi-ntshona weNigeria. Ngelo xesha, utat’ omncinci uMoustapha wabhaptizwa, kwaza kwalandela umkhuluwa wam uWahabi. Utata wasweleka xa ndandineminyaka eyi-9. Ndaba buhlungu kakhulu. UWahabi wandixelela ukuba utata angavuswa size siphinde simbone. Loo nto yandithuthuzela ndaza ndafuna ukufunda iBhayibhile. Ngo-1963 ndabhaptizwa. Abantakwethu abathathu nabo babhaptizwa.

Ngo-1965 ndaya kumkhuluwa wam uWilson eLagos ndaza ndonwatyiswa kukuba kunye noovulindlela abathe ngxi kwiBandla laseIgbobi. Yandosulela indlela ababekhuthele nababonwabe ngayo, ndaza nam ndanguvulindlela othe ngxi ngoJanuwari 1968.

UAlbert Olugbebi owayekhonza eBheteli waba nentlanganiso nathi bantu ababesebatsha, esixelela ukuba kufuneka oovulindlela abakhethekileyo kumntla weNigeria. Ndiyikhumbula kakhulu indlela awayenehlombe ngayo xa wayesithi: “Nisebatsha, ninexesha namandla okusebenzela uYehova. Mninzi umsebenzi eninokuwenza pha!” Ndasifaka isicelo sokuba nguvulindlela okhethekileyo, kuba ndandifuna ukufana noIsaya, ndize ndiye naphi na apho uYehova afuna ndiye khona.​—Isa. 6:8.

NgoMeyi 1968, ndaba nguvulindlela okhethekileyo ndaza ndathunywa kwidolophu yaseKano, ekumntla weNigeria. Ngelo xesha kwakukho imfazwe eBiafra (1967-970), neyamosha kakhulu kuloo ndawo ngaphambi kokuba idlulele kwimpuma yeNigeria. Enexhala, omnye umzalwana wazama ukundicebisa ukuba ndingayi. Ndathi kuye: “Enkosi ngokundicingela. Kodwa ukuba uYehova ufuna ndiyokukhonza kula ndawo, uza kundikhusela.”

SATHEMBELA NGOYEHOVA KWINDAWO EYONAKALISWE YIMFAZWE

Yayibuhlungu nyhani into eyayisenzeka eKano ngexesha lemfazwe. Yamoshakala kakhulu le dolophu inkulu. Xa sisentsimini sasidla ngokubona izidumbu zabantu ababuleweyo. Nangona kwakukho amabandla aliqela, abazalwana abaninzi babebalekile. Ngenxa yemfazwe, kwakushiyeke abavakalisi abangaphantsi kwe-15, ababesoyika futhi betyhafile. Bavuya kakhulu xa safikayo singoovulindlela abakhethekileyo abayi-6. Baziva bhetele emva kokuba sibakhuthazile. Sabanceda baphinda baqala apho babeyeke khona ukushumayela nokuya kwiintlanganiso. Baqalisa ukuoda iincwadi nokuthumela ingxelo kwiofisi yesebe.

Mna nabanye oovulindlela abakhethekileyo saqalisa ukufunda ulwimi ekuthiwa sisiHausa. Abantu abaninzi babesimamela kuba sasithetha nabo ngolwimi lwabo. Kodwa abantu beecawe ezazixhaphakile apho zange bayithande le nto sasiyenza. Ngoko kwafuneka silumke. Ngenye imini, mna nomzalwana endandishumayela naye saleqwa ngumfo owayephethe imela. Sabaleka kakhulu samshiya! Nangona kwakukho iingozi, uYehova wasenza ‘sahlala sikhuselekile,’ nenani labavakalisi laqalisa ukwanda. (INdu. 4:8) Namhlanje, eKano kukho abavakalisi abangaphezu kwe-500, kumabandla ayi-11.

SATSHUTSHISWA ENIGER

Emva kokusebenza iinyanga ezimbalwa eKano, ngoAgasti ka-1968 mna noovulindlela abakhethekileyo ababini sathunywa eNiamey, elikomkhulu laseNiger. Sakhawuleza saqonda ukuba iNiger ekwiNtshona Afrika, yenye yezona ndawo zitshisayo emhlabeni. Kwafuneka sifunde iindlela zokushumayela kwelo langa, ibe kwakusafuneka sifunde nolwimi olwaluthethwa, isiFrentshi. Nangona kwakunzima, sathembela ngoYehova saza saqalisa ukushumayela nabavakalisi abambalwa ababehlala apho. Kungadlulanga xesha lide, wonke umntu owayekwazi ukufunda eNiamey wazifumanela ikopi yencwadi efundisa ngeBhayibhile ethi Inyaniso Ekhokelela Kubomi Obungunaphakade. Abantu babesikhangela ukuze bazifumanele le ncwadi!

Sakhawuleza sabona ukuba abasemagunyeni babengawathandi amaNgqina KaYehova. NgoJulayi 1969, saba nendibano yesiphaluka yokuqala kwelo lizwe, eyayinabantu abamalunga nabayi-20. Sasijonge phambili ekubhaptizweni kwabavakalisi ababini abatsha. Kodwa ngosuku lokuqala lwale ndibano, kwafika amapolisa alumisa ucwangciso. Athatha umveleli wesiphaluka noovulindlela abakhethekileyo abasa kwisitishi sawo. Emva kokuba esihlabe ngemibuzo, athi masibuyele kuwo ngosuku olulandelayo. Kuba sasibona ukuba siza kuba neengxaki, salungiselela ukuba kwenziwe intetho yobhaptizo kwelinye ikhaya, baze abo babeza kubhaptizwa babhaptizwe emlanjeni ngokufihlakeleyo.

Kwiiveki ezimbalwa emva koko, urhulumente wasigxotha, mna noovulindlela abakhethekileyo abayi-5. Sanikwa iiyure eziyi-48 zokuba siphume siphele kwelo lizwe ibe kwakuza kufuneka sizibonele ukuba sihamba njani. Sathobela saza saya ngqo kwiofisi yesebe yaseNigeria, apho safumana izabelo ezitsha.

Ndathunywa eOrisunbare, eyilali yaseNigeria ndaza ndashumayela neqela elincinci labavakalisi ababehlala apho. Kodwa emva kweenyanga eziyi-6, iofisi yesebe yathi mandibuyele eNiger ndedwa. Ekuqaleni ndandothukile, ndinexhala. Kodwa ndandijonge phambili ekuphindeni ndibabone abazalwana noodade!

Ndabuyela eNiamey. Ngosuku lwesibini ndilapho, omnye usomashishini waseNigeria waqaphela ukuba ndiliNgqina likaYehova waza waqalisa ukundibuza imibuzo ngeBhayibhile. Saqalisa ukufunda sobabini, wayeka ukutshaya nokusela kakhulu waza wabhaptizwa. Kwakumnandi ukushumayela nabazalwana noodade kwiindawo ezahlukeneyo eNiger, nokubona indlela abantu ababeyamkela ngayo inyaniso njengoko iminyaka yayihamba. Ukufika kwam, ayeyi-31 amaNgqina kwelo lizwe, kodwa ndathi ndihamba abe eyi-69.

“AKUKHO NTO INGAKO SIYAZIYO NGOMSEBENZI WOBUKUMKANI OWENZIWA EGUINEA”

NgoDisemba 1977, ndabuyela eNigeria ukuze ndiqeqeshwe. Emva kokuqeqeshwa kangangeeveki ezintathu, umnxibelelanisi weKomiti Yesebe uMalcolm Vigo, wathi mandifunde ileta eyayisuka kwisebe laseSierra Leone. Abazalwana babekhangela uvulindlela osempilweni nongatshatanga onokuba ngumveleli wesiphaluka eGuinea. Kwakuza kufuneka akwazi ukuthetha isiNgesi nesiFrentshi. Emva koko uMzalwan’ uVigo wandixelela ukuba bendiqeqeshelwa kanye eso sabelo. Wayibethelela nento yokuba sasingazukuba lula. Wathi: “Cingisisa kakuhle ngaphambi kokuba usamkele.” Ndakhawuleza ndaphendula, ndathi, “Kuba inguYehova ondithumayo, ndiza kuya.”

Ndakhwela inqwelo-moya eyayisiya eSierra Leone ndaza ndadibana nabazalwana kwiofisi yesebe. Omnye umzalwana owayekwiKomiti Yesebe wathi, “Akukho nto ingako siyaziyo ngomsebenzi wobukumkani owenziwa eGuinea.” Isebe laseSierra Leone lalihoye umsebenzi wokushumayela owawusenziwa eGuinea, kodwa kwakunzima ukunxibelelana nabavakalisi ngenxa yemeko eyayingazinzanga yeepolitiki. Isebe lalikhe lizame ukuthumela abazalwana eGuinea, kodwa ezo nzame zingaphumeleli. Ngoko ndacelwa ukuba ndiye kwikomkhulu laseGuinea, eConakry ukuze ndizame ukufumana imvume yokuhlala apho kurhulumente.

Ukufika kwam eConakry, ndaya kwindlu yozakuzo yaseNigeria ndaza ndadibana nonozakuzaku walapho. Ndamxelela ukuba ndinqwenela ukushumayela eGuinea. Wandicela ukuba ndingahlali kuba ndandisenokubanjwa okanye ndenzakaliswe. Wathi: “Buyela eNigeria uze ushumayela khona.” Kodwa mna ndathi kuye, “Ndizimisele ukuhlala.” Ngoko wabhalela igosa likarhulumente laseGuinea ukuba lindincede, ibe landinceda.

Emva koko ndaya kwisebe laseSierra Leone, ndiyokuxelela abazalwana ngesigqibo somphathiswa. Abazalwana babekhwaza bevuya ngenxa yendlela uYehova alusikelele ngayo uhambo lwam. Urhulumente waseGuinea wandivumela ukuba ndihlale apho!

Ngo-1978 ukuya ku-1989, ndaba ngumveleli wesiphaluka eGuinea, eSierra Leone, ndinguye nomveleli wesiphaluka obambeleyo eLiberia. Ekuqaleni, ndandisoloko ndigula. Le nto yayidla ngokwenzeka xa ndisemaphandleni. Kodwa abazalwana babesenza yonke into ababenokuyenza ukuze ndiye esibhedlele.

Ngenye imini ndagula kakhulu yimalaria, ndaba neentshulube nasemathunjini. Ndakuba bhetele, ndeva ukuba abazalwana babecinga ukuba ndiza kusweleka, becinga nangendawo endandiza kungcwatyelwa kuyo. Zange ikhe ithi qatha kum into yokushiya esi sabelo nangona ndandineengxaki ezininzi ezazibeka ubomi bam engozini. Ndisaqinisekile ukuba nguYehova kuphela onokusikhusela ngokupheleleyo kuba nokuba siye sasweleka, nguye onokukwazi ukusibuyisela ebomini.

MNA NENKOSIKAZI YAM SATHEMBELA NGOYEHOVA

Ngo-1988 ndadibana noDorcas, udade owayenokholo olomeleleyo, enguvulindlela futhi ethobekile. Satshata waza wandincedisa kumsebenzi wesiphaluka. Wasebenza nzima kunye nam, ekulungele nokuncama izinto ezininzi ngenxa kaYehova. Sasidla ngokuhamba ngeenyawo iikhilomitha eziyi-25 sisuka kwelinye ibandla sisiya kwelinye, siphethe nemithwalo. Xa sisiya kumabandla akude sasikhwela nantoni na efumanekayo, sihamba kwezo ndlela zazinodaka, zigcwele nemingxuma.

UDorcas unesibindi kakhulu. Ngamanye amaxesha kwakuye kufuneke siwele imilambo egcwele iingwenya. Kolunye uhambo olwathatha iintsuku eziyi-5, safika ibhulorho eyayenziwe ngamaplanga yophukile, kwaza kwafuneka sisebenzise isikhephe. Ngoko uDorcas wathi xa ephuma kweso sikhephe, wawela emanzini anzulu. Sobabini sasingakwazi ukuqubha, kwabe kugcwele iingwenya kuloo mlambo. Kwanceda abafana ababelapho, batsibela emanzini baza bamkhupha. Kangangexesha elide, yayisiphuphisa kakubi le nto. Kodwa saqhubeka nomsebenzi wesiphaluka.

Ekuqaleni kuka-1992, sothuka sakufumanisa ukuba uDorcas ukhulelwe. Kwafuneka sigqibe ukuba sasiza kuqhubeka na singoovulindlela abakhethekileyo. Sathi, “UYehova usiphe isipho!” Ngoko intombi yethu sayithiya ngokuba nguJahgift. Kwiminyaka emine emva koko, kwalandela ubhuti wakhe, uEric. Bobabini abantwana bethu baba zizipho ezisuka kuYehova. UJahgift ukhonze kangangexesha elide kwiofisi yokuguqulela eConakry, kanti yena uEric usisicaka solungiselelo.

Nangona kwanyanzeleka ukuba uDorcas ayeke ukuba nguvulindlela okhethekileyo, waqhubeka enguvulindlela othe ngxi ukuze akwazi ukukhulisa abantwana bethu. Ngenxa yokuba uYehova endinceda, ndiye ndaqhubeka ndikwinkonzo ekhethekileyo yexesha elizeleyo. Xa abantwana bethu babesele bekhulile, uDorcas wakwazi ukuphinda abe nguvulindlela okhethekileyo. Ngoku, sobabini singabathunywa bevangeli eConakry.

UYEHOVA USIKHUSELA NYHANI

Bendisoloko ndisiya naphi na apho uYehova athi mandiye khona. Mna nenkosikazi yam besisoloko sibona xa esikhusela naxa esisikelela. Ukuthembela ngoYehova kunokuba sithembele ngezinto esinazo, kusincede saphepha iingxaki namaxhala amaninzi. Mna noDorcas siye safunda ukuba oyena mntu unokusikhusela nyhani ‘nguThixo wosindiso lwethu,’ uYehova. (1 Kron. 16:35) Ndiqinisekile ukuba ubomi babo bonke abantu abathembela ngaye uza ‘kubusongela ngengxowa yobomi.’​—1 Sam. 25:29.