UYehova Wasinceda Saqhela Saza Sonwaba Kwiindawo Esasithunyelwa Kuzo

AbakwaKassholms baya kwiSikolo SaseGiliyadi ngo-1979, baza kwiminyaka emva koko bathunyelwa ukuba bayokukhonza eIran, eMauritius, eMyanmar, eTanzania, eUganda naseZaire. Icebiso elalivela kutitshala wabo waseGiliyadi uJack Redford, lalibanceda qho befumana isabelo esitsha, nto leyo eyenzeka kaninzi. Makhe basibalisele.

Mandiqale ngawe Mats, wayifumana njani inyaniso?

UMats: NgeMfazwe Yehlabathi II utata wayehlala ePoland. Apho wabona indlela abanganyanisekanga ngayo abantu beCawa YamaKatolika. Kodwa wayedla ngokuthi, “Imele ukuba ikhona inyaniso nokuba iphi.” Ekuhambeni kwexesha ndaye ndakwazi ukuyingqina loo nto. Ndathenga iincwadi ezininzi esele zisetyenzisiwe. Enye yazo yayiyincwadi eluhlaza ethi Inyaniso Ekhokelela Kubomi Obungunaphakade. Ndatsalwa nguloo mxholo ndaza ndayifunda yonke kwangobo busuku ndayifumana ngabo. Kwathi kusisa ndabe ndisazi ukuba ndiyifumene inyaniso.

Ukususela ngoAprili 1972 ukubheka phambili, ndafunda iincwadi ezininzi zamaNgqina KaYehova, kwaza kwaphenduleka imibuzo yeBhayibhile endandinayo. Ndaba ngathi ndingusomashishini okumzekelo kaYesu, owafumana iperile enye exabiseke kakhulu waza wayokuthengisa yonke into awayenayo ukuze ayithenge. ‘Ndathengisa’ ngento endandizimisele ukuyenza, ukufundela ukuba ngugqirha eYunivesithi, ukuze ndithenge “iperile” yenyaniso endandiyifumene. (Mat. 13:​45, 46) Ndabhaptizwa nge-10 kaDisemba ngo-1972.

Kwisithuba esingangonyaka emva koko, abazali bam nomninawa wam, nabo bayamkela inyaniso baza babhaptizwa. NgoJulayi 1973, ndaba nguvulindlela othe ngxi. Phakathi koovulindlela ababekhuthele ebandleni lethu kwakukho udade owayemhle, emthanda kakhulu uYehova, uAnn-Catrin. Sathandana saza satshata ngo-1975. Emva kokuba sitshatile sahlala kwidolophu yaseStrömsund, eSweden, iminyaka eyi-4. Le ndawo yayintle, inabantu abaninzi ababenomdla wokufunda iBhayibhile.

UAnn-Catrin: Utata wayifunda inyaniso xa wayeza kugqiba eyunivesithi eStockholm. Ndandineenyanga ezintathu qha ngelo xesha, kodwa xa esiya kwiintlanganiso nasentsimini wayehamba nam. Umama wayengayithandi le nto kangangokuba wayesoloko ezama iindlela zokubonisa ukuba amaNgqina awananyani. Zange akwazi, kangangokuba naye ekuhambeni kwexesha wabhaptizwa. Xa ndandineminyaka eyi-13 ndabhaptizwa, ndaza ndanguvulindlela ndineminyaka eyi-16. Ndaya kukhonza eUmeå apho kwakudingeka abavakalisi boBukumkani abaninzi, ndaza emva koko ndanguvulindlela okhethekileyo.

Emva kokuba nditshate noMats, sakuvuyela ukunceda abantu abaninzi bafunda inyaniso. Omnye wabo bantu yayiyintombazana eneminyaka engaphantsi kweyi-20 uMaivor, owancama imidlalo awayethanda ukuyidlala waza wanguvulindlela nodadewethu omncinci. Ngo-1984 baya eGiliyadi, ngoku bangabathunywa bevangeli e-Ecuador.

Kwisabelo senu sokuba ngabathunywa bevangeli nalisebenzisa njani icebiso elithi “qhela uze wonwabe apho uthunyelwa khona”?

UMats: Sasisoloko sithunyelwa kwizabelo ezitsha. Sazama ukuzifaka zitshone iingcambu zethu kuYesu ngokuzama ngamandla ethu onke ukumlinganisa, ngokukodwa kuphawu lokuthobeka. (Kol. 2:​6, 7) Ngokomzekelo, endaweni yokulindela ukuba amaNgqina akwindawo esithunyelwe kuyo enze izinto ngendlela yethu, sazama ukwazi isizathu sokuba azenze ngendlela azenza ngayo izinto. Sasifuna nokuqonda indlela acinga ngayo, nendlela aphila ngayo. Njengokuba sasisiya silinganisa uYesu, sasisiya siziva ngathi ‘sityalwe ngakwimisinga yamanzi’ ukuze siqhele size sonwabe naphi na apho sithunyelwe khona.​—INdu. 1:​2, 3.

UAnn-Catrin: Ukuze ukhule apho uphinde watyalwa khona umthi, udinga ilanga. UYehova ebesoloko elelo ‘langa’ kuthi. (INdu. 84:11) Ebesisikelela ngabazalwana noodade abaninzi abanobubele nothando. Ngokomzekelo, kwibandla lethu elincinci eliseTehran, eIran, basenzela ububele obabuqhelekile ngamaxesha okubhalwa kweBhayibhile. Sasinokuthanda ukuhlala ixesha elide eIran, kodwa ngoJulayi 1980 umsebenzi wamaNgqina KaYehova wavalwa apho. Saye sanikwa iiyure eziyi-48 zokuba simke apho. Sathunyelwa eZaire (ngoku eyiCongo) eAfrika.

Ukuqala kwam ukuva ukuba sithunyelwa eAfrika, ndalila. Ndandisoyika kuba ndandive ngeenyoka nezifo eziseAfrika. Kodwa omnye umzalwana nenkosikazi yakhe ababengabahlobo bethu nekwakukudala bekhonza eAfrika, bathi: “Zange naya phaya. Khaniye, niza kuyibona nize niyithande iAfrika.” Babenyanisile. Abazalwana noodade banothando futhi banobubele. Kodwa emva kweminyaka eyi-6, xa kwakufuneka simke eZaire kuba umsebenzi uvaliwe, ndancuma ndodwa kuba ngoku ndazibhaqa ndithandaza kuYehova ndisithi, “Sicela ukuhlala eAfrika.”

Ziintoni ezinivuyisileyo kule minyaka nikwinkonzo yexesha elizeleyo?

UMats: Ngenxa yesabelo sethu siye sanabahlobo abangabathunywa bevangeli, abasuka kumazwe ahlukeneyo, nabakhule ngeendlela ezahlukahlukeneyo. Kwezinye iindawo ebesishumayela kuzo besivuyiswa kukuqhuba izifundo zeBhayibhile ezininzi, ngamanye amaxesha ngamnye kuthi eqhuba eziyi-20. Soze ndilulibale uthando nobubele babazalwana noodade baseAfrika. Xa siye kumabandla aseTanzania, abahlobo bethu abaninzi babesiba nobubele kuthi, ‘benikela nangaphezulu’ kwezinto abanazo xa sipake ikhumbi yethu esasihlala kuyo ngasemizini yabo. (2 Kor. 8:3) Eyona nto sasiyithanda kakhulu yinto esasiyibiza ngokuba lixesha lokubalisa. Elo yayilixesha laxa mna noAnn-Catrin sasiye sihlale phantsi, sibaliselane izinto eziye zenzeka ngolo suku, emva koko sibulele uYehova ngokuba eye wanathi.

UAnn-Catrin: Mna eyona nto eye yandivuyisa kukwazi abazalwana noodade abaphuma kumazwe ngamazwe. Siye safunda iilwimi ezintsha, isiFarsi, isiFrentshi, isiLuganda nesiSwahili, ngoxa sifunda neendlela zokuphila ezahlukeneyo. Sincedise nasekuqeqesheni abazalwana noodade abasebatsha enyanisweni, sanabahlobo bokwenene, saza sonke ‘samkhonza simanyene’ uYehova.​—Zef. 3:9.

Sibone nendalo kaYehova entle neyahlukahlukene ngendlela emangalisayo. Qho sifumana isabelo esitsha, bekuba ngathi uYehova uhamba nathi, usibonisa indlela. Usifundise izinto ebesingasoze sikwazi ukuzifundela ngokwethu.

Zeziphi iingxaki eniye nanazo, futhi yintoni enincedileyo nakwazi ukunyamezela?

UMats: Ngamanye amaxesha besiye sigule zizifo ezifana nemalaria. Kwakhe kwakho ixesha apho kuye kwafuneka uAnn-Catrin enziwe utyando ebesingalulindelanga. Sasikhathazeka naxa sicinga ngabazali bethu ababesiya besiba badala. Ngoko sibabulela abantwana basekhaya abaye babahoya, umninawa wam, abantakwaboAnn-Catrin ababini abeza emva kwakhe, nodadewabo omncinci. Loo nto bayenze ngothando, benomonde futhi bevuya. (1 Tim. 5:4) Kodwa ngamanye amaxesha besiye sikhathazeke xa sicinga ukuba, ukuba besihlala kufutshane nabo nathi besiza kukwazi ukubahoya ngaphezu kokuba sisenza.

UAnn-Catrin: Xa sasiseZaire ngo-1983, ndahlaselwa yikholera. Ugqirha wathi kuMats, “Phuma naye namhlanje kweli lizwe!” Ngosuku olulandelayo sakhwela inqwelo-moya ehambisa imithwalo, sisiya eSweden. Yayiyiyo kuphela eyayikhona.

UMats: Sasicinga ukuba asizukwazi ukuphinda sibe ngabathunywa bevangeli, ngoko salila kakhulu. Zange yenzeke la nto ugqirha wayeyicinga, uAnn-Catrin waphila. Kunyaka olandelayo sakwazi ukubuyela eZaire, kodwa ngoku kwibandla elincinci lesiSwahili eliseLubumbashi.

UAnn-Catrin: Ngoxa sasiseLubumbashi, usana lwethu olwalungekazalwa lasweleka. Nangona le nto yenzeka singakhange sicinge ngokuba nabantwana, ukusweleka kwalo kwaba nzima kakhulu kum. Kanye xa sasikuloo ntlungu, uYehova wasisikelela ngendlela esasingayilindelanga. Saba nezifundo ezininzi kunangaphambili. Kungaphelanga nonyaka, inani labavakalisi lakhula, lisuka ku-35 laya kutsho ku-70, nelabo bezayo kwiintlanganiso lasuka ku-40 laya kutsho ku-220. Sasixakeke nyhani kumsebenzi wokushumayela, nokubona indlela uYehova awayesisikelela ngayo kwandithuthuzela. Sisalucinga nangoku usana lwethu olwaswelekayo esasiluthanda, futhi sisancokola ngalo. Sikhangele phambili kwixesha laxa uYehova eza kusithuthuzela ngokupheleleyo.

UMats: Kwakhe kwakho ixesha apho uAnn-Catrin wadinwa kakhulu, waphelelwa nangamandla. Kwangelo xesha oogqirha bafumanisa ukuba ndinecancer yamathumbu esele iku-stage 4, kwaza kwafuneka ndityandwe. Kodwa ngoku ndiyaphila, noAnn-Catrin uzama ngamandla akhe onke ukusebenzela uYehova.

Siye sabona ukuba ayisithi sodwa abanyamezele iingxaki. Emva kokuba kubulewe abantu abaninzi eRwanda ngo-1994, saya kubona abazalwana noodade abaninzi kwiinkampu zabantu ababaleke kwiindawo ababehlala kuzo. Sathi sakubona ukholo lwabo, indlela ababenyamezele ngayo nobubele babo, safunda ukuba uYehova unamandla okubanceda abantu bakhe kuyo nayiphi na ingxaki abanayo.​—INdu. 55:22.

UAnn-Catrin: Ngo-2007 saya eUganda xa kwakunikezelwa iofisi yesebe lalapho. Xa sasisendleleni eya eNairobi eKenya, sikunye nabathunywa bevangeli nabazalwana noodade baseBheteli, satshayiswa yilori eyavele yaza kungena kwicala esasihamba kulo, singekanqumli nomda waseKenya. Umqhubi nabazalwana noodade abayi-5 basweleka ngoko nangoko, waza omnye udade waswelekela esibhedlele. Ingathi alisafiki ixesha esiza kuphinda sibabone ngalo abahlobo bethu!​—Yobhi 14:​13-15.

Ekuhambeni kwexesha, zaphola iindawo endandilimele kuzo. Mna, uMats nabanye, sasihlala sisoyika ngenxa yaloo ngozi. Kum le nto yayisenzeka ebusuku, ndothuke ndingumntu ongathi uhlaselwa yintliziyo. Yayisoyikisa loo nto, kodwa ukuhlala sithandaza kuYehova nokufunda ezinye izibhalo esizithandayo ezithuthuzelayo kwasinceda sanyamezela. Kwasinceda nokuya kufuna uncedo koogqirha abakwaziyo ukunyanga ingxaki esasinayo. Ngoku asisoyiki kangako, futhi sicela uYehova ukuba athuthuzele nabanye abanengxaki efana neyethu.

Xa benichaza indlela uYehova anincede ngayo nakwazi ukunyamezela iingxaki, niye nathi ‘ebeniphethe njengamaqanda.’ Benithetha ukuthini?

UMats: Lawo ngamagama esiSwahili athi “Tumebebwa kama mayai mabichi,” okanye “Besiphethwe njengamaqanda.” Njengokuba umntu eliphatha kakuhle iqanda ukuze lingaqhekeki, uYehova onothando ebesinceda kwisabelo ngasinye ebesikuso. Besisoloko sinazo izinto esizidingayo, sifumana nezingaphezu kwezo besizidinga. Enye into ebonise ukuba uYehova uyasithanda futhi uyasinceda, luvelwano esaluboniswa liQumrhu Elilawulayo.

UAnn-Catrin: Mandikwenzele umzekelo ngenye yeendlela uYehova aye wasinceda ngazo. Ngenye imini ndafowunelwa, kusithiwa utata wam oseSweden usesibhedlele, ugula kakhulu. UMats wayesanda kuba nemalaria, engenamandla. Sasingenayo nemali yamatikiti enqwelo-moya, ngoko sagqiba ekubeni kufuneka sithengise imoto yethu. Kusenjalo, safowunelwa ngomnye umzalwana nodade ababevile ngemeko yethu, befuna ukusithengela itikiti. Saphinda safowunelwa ngomnye udade osele emdala, owayegcine imali kwibhokisi awayeyibhale, “Yeyomntu odingayo.” Kwimizuzu nje embalwa, uYehova wasinceda sawafumana amatikiti esasiwadinga!​—Heb. 13:6.

Kule minyaka iyi-50 nikwinkonzo yexesha elizeleyo, nifunde ntoni?

UAnn-Catrin: Ndifunde ukuba siyomelela xa ‘sihlala sizolile yaye simthemba’ uYehova. Xa simthemba, uyasilwela amadabi ethu. (Isa. 30:15; 2 Kron. 20:​15, 17) Ukukhonza uYehova ngamandla ethu onke, kuso nasiphi isabelo esiye sasifumana, kusenze safumana iintsikelo ebesingasoze sizifumane nangayiphi na enye indlela.

UMats: Eyona nto ndiyifundileyo kukuthembela ngoYehova kuyo yonke into, ndibone ukuba uza kundinceda njani. (INdu. 37:5) Akazange wandiphoxa, ebesoloko eyenza into ayithembisileyo. Simbona esayenza loo nto nangoku kwisabelo esikuso kwiBheteli yaseMyanmar.

Siyathemba ukuba abantu abasebatsha abafuna ukumsebenzela kakhulu uYehova, nabo baza kulubona olu thando lungagungqiyo asibonise lona. Siqinisekile ukuba baza kulubona xa bemvumela abancede baqhele baze bonwabe kwizabelo zabo.