UYehova Wandenzela Izinto Endingazange Ndazicinga

Xa ndaba nguvulindlela, ubomi bam batshintsha ngendlela endingazange ndayicinga. (Efe. 3:20) Mhlawumbi uyazibuza ukuba yenzeka njani loo nto. Yima ke ndikubalisele.

Ndazalwa ngo-1939 eBerlin, eJamani emva nje kweenyanga ezimbalwa kuqale iMfazwe Yehlabathi yesibini. Xa imfazwe yayisele iza kuphela ngo-1945, iBerlin yahlaselwa ngeziqhushumbisi ezininzi. Xa kwakusenzeka le nto esitratweni sethu, sonke ekhaya sabalekela kwindawo ekhuselekileyo. Ukuze kungabikho mntu wonzakalayo, safudukela e-Erfurt, apho umama wazalelwa khona.

Umama wayefuna nyhani ukuyazi inyaniso. Wade wafunda neencwadi ezazibhalwe ziintanda-bulumko waza wajonga nezinye iinkonzo kodwa kwakungade kuthi gingci. Malunga no-1948, kwafika amaNgqina KaYehova amabini ekhaya. Umama wathi mawangene waza wawabuza imibuzo emininzi. Zange kugqithe neyure emva koko, wathi kum nodadewethu omncinci, “Ndiyifumene inyaniso!” Emva koko, mna, umama nodadewethu saqalisa ukuya kwiintlanganiso e-Erfurt.

Ngo-1950 sabuyela eBerlin saza sakhonza kwibandla ekuthiwa yiBerlin-Kreuzberg. Saphinda safudukela kwenye indawo kwaseBerlin, saza sakhonza kwibandla ekuthiwa yiBerlin-Tempelhof. Ekuhambeni kwexesha, umama wabhaptizwa, kodwa mna ndandisarhuqa iinyawo. Kwakutheni?

INTO EYANDINCEDA NDAZAMA UKUYEKA UKUBA NEENTLONI

Kwakungekho lula ukumenzela izinto ezingakumbi uYehova kuba ndandineentloni. Ndandisiya kona entsimini kangangeminyaka emibini, kodwa ndandikhapha nje, ndingashumayeli. Yaphela yonke loo nto xa ndachitha ixesha elininzi nabazalwana noodade ababenesibindi nababezinikele kuYehova. Abanye bakha bavalelwa kwiinkampu zoxinaniso zamaNazi okanye kwiintolongo zaseMpuma Jamani. Abanye babekhe bangenisa iincwadi eMpuma Jamani ngokufihlakeleyo nangona babesazi ukuba yayinokubabambisa loo nto. Bandikhuthaza kakhulu aba bazalwana. Ndaqonda ukuba, xa aba bazalwana baxolela ukufa okanye ukuvalelwa ngenxa kaYehova okanye abazalwana babo, nam ndimele ndizame ukuyeka ukuba neentloni.

Ngo-1955 kwabakho iphulo elikhethekileyo lokushumayela. Ukuba ngomnye wabantu ababelapho kwandinceda ndazama ukuyeka ukuba neentloni. Kwileta eyayibhalwe kwi-Informant,a uMzalwan’ uNathan Knorr wathi alikho iphulo elakha lalikhulu njengeli kule ntlangano. Wathi ukuba bonke abavakalisi babenokubakho, yayiza kuba “yeyona nyanga imnandi kakhulu ekwakhe kwashunyayelwa ngayo.” Kwaba mnandi nyhani. Emva koko, ndazinikela kuYehova saza ngo-1956 sabhaptizwa notata nodadewethu. Kodwa kwakusekho isigqibo esibalulekileyo ekwakufuneka ndisenzile emva nje kokuba ndibhaptiziwe.

Kangangeminyaka, ndandisazi ukuba ndimele ndibe nguvulindlela, kodwa ndandikubekela amangomso. Into yokuqala endaqonda ukuba mandiyenze kukufunda ukuthenga nokuthengisa izinto kwiinkampani ezikwamanye amazwe. Emva koko, ndafuna ukuwenza ixesha elide ukuze ndiwazi kakuhle umsebenzi wam ngaphambi kokuba ndibe nguvulindlela. Ngenxa yaloo nto, ngo-1961, ndafumana umsebenzi kwelona zibuko likhulu laseJamani, kwidolophu ekuthiwa yiHamburg. Ndandiwuthanda kakhulu umsebenzi wam ibe loo nto yayindenza ndingade ndibe nguvulindlela. Ndandiza kuyithini le nto?

Ndimbulela kakhulu uYehova ngokusebenzisa abazalwana ukuze bandincede ndibone ukuba eyona nto ibalulekileyo kukukhonza yena. Abahlobo bam abaninzi babengoovulindlela ibe babengumzekelo kum. Omnye umzalwana owandikhuthaza ukuba ndimthembe uYehova, nguErich Mundt owakha wavalelwa kwinkampu yoxinaniso. Wathi abazalwana ababethembele kwiziqu zabo kwinkampu yoxinaniso babetyhafa. Kodwa abo babethembele ngokupheleleyo kuYehova, bahlala bethembekile ibe bakwazi nokuyinceda intlangano kaYehova.

Umzalwana uMartin Poetzinger owaba lilungu leQumrhu Elilawulayo, wayedla ngokukhuthaza abazalwana athi, “Isibindi yeyona nto ibalulekileyo enimele nibe nayo.” Emva kokucinga ngala mazwi, ndade ndawuyeka umsebenzi wam ndaza ndaba nguvulindlela ngoJuni 1963. Eso yaba sesona sigqibo sivuyisayo kwendakha ndazenza. Emva kweenyanga ezimbini, ndacelwa ukuba ndibe nguvulindlela okhethekileyo, ndingekakhangeli nomnye umsebenzi. Emva kweminyaka embalwa, uYehova wandenzela izinto endingazange ndazicinga. Ndaya kwiklasi ye-44 yeSikolo SaseGiliyadi.

NDAFUNDA IZINTO ENDINGASOZE NDIZILIBALE EGILIYADI

Enye yezona zinto endingasoze ndizilibale endazifundayo, ingakumbi kumzalwana uNathan Knorr noLyman Swingle, “kukungakhawulezi ndiwuyeke umsebenzi endiwunikiweyo.” Basikhuthaza ukuba singawuyeki nokuba sekunzima kangakanani. Umzalwana uKnorr wathi: “Uza kukhetha ukujonga ntoni? Ubumdaka, izinambuzane, abantu abasokolayo okanye indlela ezimbi ngayo izinto kwindawo ohlala kuyo? Okanye uza kujonga imithi, iintyantyambo nabantu abonwabileyo? Bathande abantu!” Ngenye imini, xa umzalwana uSwingle wayesixelela ukuba kutheni abanye abazalwana bekhawuleza banikezele, akazange akwazi ukuzibamba, wavele walila. Kwafuneka athi cwaka okwexeshana, waza waphinda wathetha akuzola. Yandichukumisa kakhulu loo nto ibe ndazixelela ukuba andifuni kuphoxa uKristu nabazalwana bakhe.—Mat. 25:40.

Emva kokuba sichazelwe iindawo esiya kuzo, abanye abazalwana baseBheteli bafuna ukwazi ukuba siza kuthunyelwa phi. Bathetha kakuhle ngezinye iindawo. Kodwa xa ndathi siya kwidolophu ekuthiwa yiKinshasa, eCongo, bakhe bama baza bathi: “Yho! eCongo? UYehova abe nani.” Ngelo xesha, kwakuxhaphakile ukuva ngabantu abalwayo nababulalanayo eCongo. Kodwa ndandisoloko ndicinga ngezinto endandizifunde eGiliyadi. Emva kokuba iphelile iklasi ngoSeptemba 1967, mna, uHeinrich Dehnbostel, noClaude Lindsay saya kwikomkhulu laseCongo, iKinshasa.

SAFUNDA IZINTO EZININZI EZIBALULEKILEYO NGOXA SASINGABATHUNYWA BEVANGELI

Sakufika eKinshasa, safunda isiFrentshi kangangeenyanga ezintathu. Emva koko, saya eLubumbashi eyayikade ibizwa ngokuba yiElisabethville. Le ndawo ikufutshane nomda waseZambia kumzantsi weCongo. Sahlala kwikhaya labathunywa bevangeli phakathi edolophini.

Kwasivuyisa kakhulu ukuba ngabantu bokuqala ukushumayela ebantwini baseLubumbashi, ekubeni kwakungekashunyayelwa kwiindawo ezininzi. Emva koko, saba nezifundo zeBhayibhile ezininzi kangangokuba kwakunzima ukufundela abanye abantu kuba sasingazukuba naxesha laneleyo lokubafundela. Sashumayela nakubantu abasebenza kwarhulumente nasemapoliseni. Abantu abaninzi babelihlonipha iLizwi LikaThixo nomsebenzi wethu wokushumayela. Olona lwimi lwaluthethwa kakhulu yayisisiSwahili, ngoko mna noClaude Lindsay safunda lona. Emva koko sathunyelwa kwibandla lesiSwahili.

Nangona kwenzeka izinto ezininzi ezimnandi, zazikhona neengxaki. Amajoni awayesele utywala, eshushu, ephethe nemipu, namapolisa akhohlakeleyo ayedla ngokusityhola ngezinto esingazenzanga. Ngenye imini, kwangena amapolisa amaninzi ngoxa sasiqhuba iintlanganiso kwikhaya labathunywa bevangeli. Asisa kwisikhululo samapolisa aza asihlalisa phantsi bhaxa kwada kwabetha intsimbi yeshumi ebusuku.

Ngo-1969, ndaba ngumveleli wesiphaluka. Ngoxa ndandingumveleli, ndandidla ngokuhamba imigama emide kwiindawo ezinodaka nengca ende, ibe ziqhelekile ezo zinto eAfrika. Kwenye ilali, kwakukho inkukhu eyayilala namantshontsho ayo phantsi kwebhedi yam ebusuku. Asoze ndiyilibale indlela eyayingxola ngayo ize indivuse ekuseni, kusemnyama. Ndisazicinga nangoku iingokuhlwa esasidla ngokotha ngazo umlilo nabazalwana size sincokole ngenyaniso.

Enye yeengxaki ezinkulu esasinayo yayingabantu ababezenza amaNgqina KaYehova, kodwa bekumbutho ekwakuthiwa yiKitawala.b Abanye babhaptizwa baza bangabadala bebandla. Abaninzi kwaba bantu ‘babengamalwalwa afihlakeleyo’ abazange bakwazi ukubalahlekisa abazalwana noodade abathembekileyo. (Yude 12) Ekugqibeleni, uYehova wabasusa aba bantu ebandleni kwaza kwabakho abantu abaninzi abangena enyanisweni.

Ngo-1971 ndathunyelwa eBheteli, eKinshasa. Ndandisenza imisebenzi emininzi, enjengokuthumela iileta emabandleni, ukuodwa kweencwadi, nezinto ezinokwenza nomsebenzi wokushumayela. EBheteli ndafunda indlela yokuqiniseka ukuba umsebenzi wethu uhamba kakuhle kwilizwe elikhulu nangona zazingekho izinto ezininzi esasizidinga. Ngamanye amaxesha, iileta zethu zazifika emva kweenyanga emabandleni. Iileta zazisothulwa kwinqwelo-moya zize sifakwe kwisikhephe esasixinga kangangeeveki kukhula olusemanzini. Kodwa ke, sasiwenza siwugqibe umsebenzi nangona kwakusenzeka izinto ezinje.

Yayindimangalisa nyhani into yokubona abazalwana besiba neendibano ezinkulu nangona kwakungekho mali ingako. Babezenzela ngokwabo iqonga ibe udonga nezitulo babezenza ngengca. Ukuze benze iipali babesebenzisa imithi, baze bagqume uphahla neetafile ngokhuko. Kuba babengenazo izikhonkwane, babesebenzisa amaxolo emithi ukuze badibanise izinto. Ayesoloko endothusa amacebo ababewasebenzisa abazalwana noodade xa bebona ukuba kukho ingxaki. Loo nto yandenza ndabathanda nyhani. Ndabakhumbula kakhulu xa ndathunyelwa kwenye indawo.

XA NDANDIKHONZA EKENYA

Ngo-1974, ndaya kukhonza kwiBheteli eseNairobi, eKenya. Wawumninzi umsebenzi apho kuba isebe laseKenya lalijongene namazwe akufutshane alishumi, ibe kwamanye wawuvaliwe umsebenzi wokushumayela. Ndandidla ngokuthunyelwa kula mazwe, ingakumbi e-Ethiopia. Abazalwana bakhona babephethwe kakubi ibe benyamezele izinto ezibuhlungu. Abaninzi kubo babebethwa baze bavalelwe entolongweni, ukanti abanye bade babulawa. Kodwa abazange bagungqe, banyamezela kuba babesondele kuYehova nakwabanye abazalwana.

Ngo-1980, kwenzeka into emnandi kakhulu ebomini bam xa ndatshata noGail Matheson waseKhanada. Sasikunye eGiliyadi ibe ukususela ngoko sasibhalelana iileta. UGail wayengumthunywa wevangeli eBolivia. Emva kweminyaka eyi-12, saphinda sadibana eNew York. Emva koko, satshata eKenya. Ndimbulela kakhulu uGail kuba usoloko ecinga njengoYehova ibe wanelisekile zizinto anazo. Usoloko endixhasa kwaye sithandana kakhulu.

Ngo-1986, ndaba ngumveleli wesiphaluka ngoxa ndandisekwiKomiti YeSebe. Kwakufuneka siye kumazwe amaninzi aphantsi kwesebe laseKenya.

Ndikhumbula ndilungiselela indibano eAsmara (e-Eritrea) ngo-1992 xa umsebenzi wethu wawungekavalwa. Ngelishwa, indawo esayifumanayo yayingabukeki tu ngaphandle, ndingasathethi ke ngaphakathi. Yandimangalisa indlela abayenza yantle ngayo abazalwana noodade ukuze sikwazi ukukhonza uYehova kuyo. Abantu abaninzi beza namalaphu amahle ukuze bagqume kwanto engajongekiyo. Kwaba mnandi kakhulu kuloo ndibano ibe sasibayi-1 279.

Sasingabuqhelanga ubomi bokujikeleza kuba kwakufuneka sihlale kwiindawo ezahlukahlukeneyo qho ngeveki. Kwenye iveki, sahlala kwindlu entle, enkulu nengaselwandle, saza kwenye sahlala egalini ibe zazikude kakhulu izindlu zangasese. Kodwa, enoba sasiphi, eyona nto siyikhumbula kakhulu ziintsuku esasishumayela ngazo noovulindlela nabavakalisi. Xa sathunyelwa kwenye indawo kwafuneka sishiye abahlobo esasiza kubakhumbula kakhulu.

INDLELA ESASIKELELWA NGAYO XA SASISE-ETHIOPIA

Phakathi ko-1987 ukuya ku-1992, umsebenzi wethu waba semthethweni kumazwe amaninzi aphantsi kwesebe laseKenya. Loo nto yabangela ukuba kwakhiwe iiBheteli nakwamanye amazwe. Ngo-1993, sathunyelwa kwiofisi eseAddis Ababa, e-Ethiopia, apho amaNgqina ayeshumayela ngokufihlakeleyo khona kangangeminyaka. Kodwa ngoku umsebenzi wethu wawusemthethweni.

UYehova uwusikelele umsebenzi e-Ethiopia. Abazalwana noodade abaninzi baba ngoovulindlela. Abavakalisi abangaphezu kwe-20 pesenti bebesiba ngoovulindlela abathe ngxi qho ngonyaka ukususela ngo-2012. Ukongezelela koko, izikolo zentlangano beziqeqesha abantu, kwaza kwakhiwa iiHolo ZoBukumkani eziyi-120. Ngo-2004 intsapho yaseBheteli yafudukela kwesinye isakhiwo. Kwesi sakhiwo kukho neHolo Yendibano nayo eye yasinceda kakhulu.

Kule minyaka idlulileyo, mna noGail siye safumana abahlobo abaninzi abangabazalwana noodade e-Ethiopia. Sibathanda kakhulu, kuba banobubele ibe bayabathanda abantu. Siye sathunyelwa kwisebe elikuMbindi Yurophu ngenxa yeemeko zempilo. Siphethwe kakuhle apha, kodwa sibakhumbula kakhulu abahlobo bethu base-Ethiopia.

UYEHOVA WAWUSIKELELA UMSEBENZI

Siyibonile indlela uYehova awusikelele ngayo umsebenzi wakhe. (1 Kor. 3:6, 9) Umzekelo, xa ndandiqala ukushumayela kubantu baseRwanda ababeze emgodini wobhedu eCongo, kwakungekho bavakalisi eRwanda. Kodwa ngoku kukho abazalwana noodade abangaphezu kwe-30 000 kwela lizwe. Ngo-1967, kwakukho abavakalisi abamalunga ne-6 000 eCongo. Ngoku, bamalunga ne-230 000, ibe ngo-2018, bekukho abantu abangaphezu kwemiliyoni eSikhumbuzweni. Kuwo onke amazwe awayephantsi kwesebe laseKenya, abavakalisi abakhoyo bangaphezu kwe-100 000.

Kwiminyaka engaphezu kweyi-50 eyadlulayo, uYehova wasebenzisa abazalwana abahlukahlukeneyo ukuze bandincede ndibe kwinkonzo yexesha elizeleyo. Nangona ndisenazo nangoku iintloni, ndifunde ukuthembela ngoYehova. Izinto endazifunda eAfrika zindincede ndanomonde ndaza ndaneliseka zizinto endinazo. Mna noGail sibathanda kakhulu abazalwana noodade ababuka iindwendwe, abanyamezela izinto ezibuhlungu nabathembela ngoYehova. Ndimbulela kakhulu uYehova ngobubele bakhe obungasifanelanga. Nyhani, uYehova wandenzela izinto endingazange ndazicinga.—INdu. 37:4.