Indlela Yokwenza Okuninzi Ngexesha Elincinane

‘Kutheni ixesha likhawuleza kangaka nje?’ Kufuthi kangakanani uzibuza lo mbuzo? Ukuba unjengenkoliso yabantu, kunokwenzeka ukuba uwubuza ngokufuthi gqitha ngaphezu kokuba unokukhumbula.

Okulandelayo kunikela amacebiso ngokwembono yebhinqa, kodwa ekubeni amabhinqa namadoda enexesha elilinganayo veki nganye, umbuzo othi, ‘Ndinokwenza njani ukuze ndenze okuninzi ngexesha endinalo?’ ngumbuzo amadoda namabhinqa angathanda ukuwuphendulelwa.

Beka Izinto Eziza Kuqala Endaweni Yazo

Ekubeni yonke imisebenzi eyenziwayo ebomini ithabatha ixesha, kukho izinto ezithi ngokuqhelekileyo zize kuqala kunezinye. Ngokomzekelo, ngentsasa ebandayo yasebusika, akukho nto umama anokuyithanda ngaphezu kokuhlala kumandlalo ofudumeleyo ixesha elidana. Kodwa iwotshi inikela umqondiso wokuba eli lixesha lokulungiswa kwesidlo sakusasa nokulungiselelwa kwendoda yakhe ephangelayo nabantwana abaya esikolweni.

Kwakhona izinto eziza kuqala zifanele zibekwe kuqala ukuze imicimbi yekhaya lakho ihambe kakuhle. Kukho ixesha lokuya kuthenga ukutya nexesha lokukupheka; ixesha lokucoca indlu nexesha lokuhlamba iimpahla; ixesha lokuphumla nexesha lokufundisisa; ixesha lokuphos’ iliso xa abantwana besenza umsebenzi wesikolo wasekhaya nemisetyenzana yasekhaya​—⁠yaye uludwe alupheli ndawo.

Ngaba usebenza ngaphandle kwekhaya? Ukuba kunjalo, ngoxa unemisebenzi eyongezelelekileyo omele uyenze, ixesha liba lelixabiseke ngakumbi. Akunakukuthwala ukudlala ngalo ungenako nokusoloko izinto uzibekel’ amangomso. Kungenxa yoko le nto amabhinqa amaninzi evuma ukuba ucwangciso lufuneka ngokupheleleyo ukuba aza kukwazi ukuyifeza imisebenzi yawo.

UJosephine, unina wabantwana abathandathu abaneminyaka emibini ukuya kweli-15 ubudala uthi, “Ngaphandle kocwangciso lwemihla ngemihla, andikwazi ukuphumeza usukelo lwam losuku ngalunye.” USandra, onabantwana abathathu, usebenza ngaphandle kwekhaya iiyure ezingama-25 ngeveki, yaye uvuma esithi: “Ewe, ukuba bendingenalo ucwangciso, ndicinga ukuba ngendingaphilanga kakuhle apha entloko.”

Ngaphezu koko, izinto eziza kuqala ngokungathandabuzekiyo zimiselwa kukulixabisa kwakho ixesha. Oko kunjalo kuLola. Asingomyeni wakhe kuphela amele amnyamekele kodwa kwakhona uchitha iiyure ezingama-90 ukuya kwi-100 ngenyanga kumsebenzi wakhe wokufundisa ngeBhayibhile. Uthi: “Ixesha libaluleke gqitha kum. Ndivakalelwa kukuba kuhle ukuba ndingabalindisi abantu. Yaye xa abo banokubonakala bengakhathali bebona indlela endilixabisa ngayo ixesha, batyekela ekubeni balixabise ngokungakumbi ixesha lam.”

Yilungelelanise Imisebenzi Yakho

Kutheni le nto amabhinqa amaninzi kubonakala engayifezi imisebenzi yawo? Okanye kutheni abanye besoloko bekhalazela ukungabikho kwexesha? Ngaba esinye sezizathu sikukuba abayilungelelanisi imisebenzi yabo? Kwizizukulwana ezidluleyo kwakulithabatha ibhinqa usuku lonke ukuhlamba impahla yaye olwesibini ukuyolula, ngoxa lwalusiya mihla le evenkileni luze lupheke ngazo zonke iintsuku. Noko ke, kwinkoliso yamazwe namhlanje, ibhinqa linokucoca indlu, lihlambe lize lomise impahla, lize kwangaxeshanye lipheke ukuba lilungelelene. Izinto eziluncedo zale mihla ziye zabakhulula abafazi abaninzi ukuba basebenze ngaphandle kwekhaya baze sekunjalo banyamekele iintswelo zeentsapho zabo.

Kodwa kuthekani ngexesha elichithelwa kude nekhaya? Uninzi lwalo, ngaphandle kwexesha ngenene elichithelwa emsebenzini, lichithwa kusiyiwa yaye kubuywa emsebenzini, kulindwe kwiiofisi zoogqirha bamayeza nezoogqirha bamazinyo nakwezinye iindawo. Ngaba ixesha elinjalo alinakusetyenziswa kusini na? Ngokomzekelo, ngaba uyanitha, uyakhrowutsha, wenza imiqukumbelo yokuhombisa, okanye wenza imihombiso ngamalaphu? Ngaba unokucwangcisa ukuba wenze eminye yale misetyenzana yobuchule ngala maxesha nakwiindawo ezinjengezo? Amabhinqa amaninzi ayafunda, abhale izinto ezimele zithengwe okanye abhale iileta. Enyanisweni, kwixesha elizayo xa uhlala phantsi ukuze ubukele umabonwakude, kutheni ungathungi okanye wenzele intsapho yakho okuthile? Basenokukuxabisa oko ngaphezu kwento ethengwe evenkileni, yaye unokuba nobungqina obubambekayo bokuba akudlali ngexesha!

Noko ke, kukho enye inkalo kulo mbandela. Ubani ufanele akulumkele ukuba ngqongqo gqitha ekuzameni ukusebenzisa umzuzu ngamnye. Usenokuba likhoboka lexesha, yaye oko kuya kukuhlutha uvuyo. Kukho amaxesha axa ubani efuna ukuhlala azole aze aqwalasele oko akwenzileyo. Enyanisweni loo maxesha anokuba ngazukileyo!

Umgaqo ofanayo ubuya kusebenza xa kufikelelwa ekongeni imali. Ulungelelwano luyafuneka. Usenokuzulazula idolophu yonke ukuze ulondoloze nje iisenti ezimbalwa, ngoxa uchitha ixesha elingakumbi nepetroli eninzi ngokwenjenjalo. Kambe ke, xa unoqingqo-mali olungqongqo, kubalulekile ukonga. Ngoko mhlawumbi ukuthenga kwishishini leevenkile elinezinto zonke kusenokukunceda. Uyazazi apho zikhoyo izinto (nto leyo ekongela ixesha), yaye uyalazi ixesha lezisulu (nto leyo ekongela imali).

Ukukhetha Elona Xesha Lifanelekileyo

Bhinqa ngalinye linexesha eliziva likulungele ngalo ukusebenza. Wambi asebenza kakuhle gqitha kusasa; wambi awasebenzi kakuhle de kube semva kwemini. Ukuba ungumntu osebenza kakuhle kusasa, qiniseka ukuba ucwangcisela imisebenzi enzima ngelo xesha. Wasebenzise amandla akho ngawona maxesha afanelekileyo kuwe. Ukuba usebenza ngaphandle kwekhaya, kutheni ungathethi nomqeshi wakho? Oku kuya kuba yingenelo kuwe nakuye ukuba acwangcise umsebenzi wakho ngokuvumelana neemeko zakho. Ukuba, ngakwelinye icala, akusebenzi kakuhle kusasa, owona msebenzi wakho ubalulekileyo wubekele ixesha lasemva kwemini xa usebenza ngokusemagqabini.

UMary usebenza kakuhle kusasa. Uligqala ixesha alichithela kubulungiseleli bakhe njengelona candelo libalulekileyo kusuku lwakhe. Ngoko wafumana umsebenzi wesingxungxo wasemva kwemini. Oku kumvumela ukuba anikele ezona yure zakhe zibalaseleyo emsebenzini wakhe wokufundisa iBhayibhile. Ngaba unokwenza okufanayo kucwangciso lwakho?

Yiba Ngonyanisekileyo

Ukuze ucwangciso lwakho lusebenziseke, alumele luquke imisebenzi emininzi gqitha. Ukuzama ukuba nguMama Obalaseleyo, uMfazi, okanye uMsébenzi okwanjalo kusenokukhokelela kudano nakunxunguphalo. Oku kunjalo ngokukhethekileyo ukuba uneengxaki zempilo. Zifundise ukusebenza ngokwamandla onawo.

UDolly, onesifo esinganyangekiyo ucacisa esithi: “Ixesha lam ndilicwangcisa ngokwemisebenzi yomyeni wam. Ungumlungiseleli ohambahambayo. Ekubeni sihlala kwikhaya elincinane elikwayinqwelo-mafutha, xa ewugqibile umsebenzi wakhe, ndandula ke ndenze owam. Ukugula kwam kuyandithintela ekwenzeni konke oko ndinga ndingakwenza. Kodwa xa ndikwazi, ubulungiseleli bam buza kuqala. Ezinye izinto ekhaya zishiywa zingenziwanga ngolo suku.”

Yiba Bhetyebhetye

Into evavanya uzimiselo lwebhinqa ngalinye yindlela elisebenza ngayo xa licinezelekile. Ukuba linokuhlala lizolile phantsi kobunzima, liya kuphumeza okuninzi gqitha kunokuba liphathe liyeka.

USandra wayifumana imfihlelo yokulawula ingcinezelo. Uthi: “Xa kuvela izinto ezingxamisekileyo yaye kuvela izinto ezininzi macala onke, ndisuka nje ndizole. Ndiyazi ukuba oko kuvakala kungaqhelekanga, kodwa kuyasebenza. Xa ndithi ndikwazi ukuzilawula, emva koko ndiye ndikhangele ukuba yintoni efanele yenziwe kuqala. Ukuba andizolanga, andikwazi ukubeka izinto eziza kuqala endaweni yazo. Xa ezi zinto ziye zamiselwa, ndandula ke ndiyenze ngokukhawuleza imisebenzi yam ukuze ndihlangabezane nexesha longxamiseko yaye ndiphumeza okuthile ngolo hlobo. Ngokomzekelo, ngesinye isihlandlo ndakhe ndafikelwa ziindwendwe kuseziiyure ngaphambi kwexesha lesidlo. Kunokuba ndiphathe ndiyeka, kuphela nje ndapheka ngoxa ndandizenza zizive zisekhaya kangangoko kunokwenzeka. Zonke zaphumla zaza zazonwabisa.”

Fumana Uncedo

Omnye umntu wakhe wathi oyena somaqhuzu ufanelekileyo ngulowo usoloko enabantu abaninzi abamncedisayo. Ngaba uyabacela abanye ukuba bakuncedise xa usebenza? Xa abo usebenza nabo besazi ukuba uncedo lwabo luyaxatyiswa, bakulungela ngakumbi ukunceda. Oku kunjalo nasekhaya. Ngelishwa, abafazi abaninzi bangamachule ekunyamekeleni imizi yabo nasekuphekeni kangangokuba abafuni kuncediswa. Yaye sona kanye eso simo sengqondo sisenokubangela ukuba bambi abafazi nomama basoloko benoxanduva lomsebenzi ngoxa amalungu entsapho ezihlalele ebonakala engakhathali.

Ngoko kuthekani ngawe? Xa ufuna uncedo, ngaba uyakhuthaza ukuba uncedwe? Ngaba uyalucela uncedo, okanye uncedo ulufuna ngegunya? Ukuthi “ungandinceda” kuvakala kakuhle kunokuthi “ndifuna ukuba”​—⁠enoba uthetha nabantwana okanye umyeni wakho.

Omnye umfazi, encoma umyeni wakhe ngoncedo alunikela kuye, uthi: “Ndimncoma gqitha ngakwelo cala. Xa ndingaphilanga, uthi mandilale, yaye upheka ngokwakhe; yena nabantwana bathi qubudu baze bancede kwimisetyenzana yasekhaya. Ndikuxabisa gqitha oko!”

Esinjani sona ukufaneleka isimo sengqondo intsapho enokuba naso! Kodwa undoqo kule meko ngumama. Unokubaqeqesha abantwana bakhe ukuze bakuqonde ukubaluleka kwexesha baze babe nesimo sengqondo esihle ngomsebenzi. Abantwana abanjalo ngokuqhelekileyo baya kufuna ukunceda kuba bafumana uvuyo ekufaken’ isandla kwinjongo enye yekhaya.

Sekunjalo, bambi abantu baya kudlalisa ngexesha enoba abanye bathini na okanye benza ntoni na. Asinakubaguqula; kodwa sinokuziphucula thina. Sinokuzimisela ukulisebenzisa ngokuyingenelo ixesha, sibe ngabalungelelene ngakumbi, sibeke izinto eziza kuqala endaweni yazo, size sifune uncedo xa lufuneka.

[Imifanekiso ekwiphepha 30]

Izinto eziza kuqala zimele zibekwe endaweni yazo ukuba ikhaya lakho liza kuqhuba kakuhle