Abantu Abaselula Bayabuza . . .

Ndinokuzisebenzisa Njani Ngokufanelekileyo Izithambiso Zokuzihombisa?

UNINA wamangaliswa kukuva umama wakhe embuza oku, “Ngaba uyafuna ukuziphophotha nje kancinane ngesithambiso sokuzihombisa?” Kwiminyaka emibini ngaphambilana, walelwa ukuba asebenzise isithambiso sokuzihombisa. Kodwa kwesi sihlandlo sikhethekileyo, njengoko babeza kuya kwitheko lomtshato, umama wakhe wayegqibe kwelokuba yayilixesha lokuba uNina afunde ubuchule bamabhinqa bokusebenzisa izithambiso zokuzihombisa. UNina ukhumbula oku, “Ndandingcangcazela. Ndandingayazi indlela yokuzithambisa efanelekileyo. Ngoko uMama wandithambisa ngelipstick nomgutyana obomvu wasebusweni.”

Mhlawumbi ngokufanayo nabazali bakho banoluvo lokuba kufanelekile ngawe ukuba ufake izithambiso zokuzihombisa.a Xa zisetyenziswa ngokufanelekileyo​—⁠nangendlela yokuzonga⁠—​izithambiso zokuzihombisa zinokumenza abonakale emhle ngakumbi umntu. Noko ke, xa zisetyenziswe ngokuphosakeleyo zinokumenza abe mbi. Enye inkwenkwe ekwishumi elivisayo ithi, “Wambi amantombazana asebenzisa izithambiso zokuzihombisa yaye ziwenza abe mahle. Kodwa wambi amantombazana ayazinyhibhela ezi zithambiso zokuzihombisa, yaye ziwenza oyikeke.”

Intwazana ekwishumi elivisayo yalek’ umsundulo ngokuthi, “Xa bethambisa ezimbala uqaqambe gqitha, yaye beziqaba ngokubaxiweyo, zisuka nje zibachininikise baze babe lilifa lentsini!” Unokuzisebenzisa njani izithambiso zokuzihombisa ngendlela eya kukwenza ukhangeleke umhle​—⁠kungekhona ukuba mbi?

Imigaqo Evela KwiLizwi LikaThixo

Izithambiso zokuzihombisa kudala zikho. Kumabhodlo akwaSirayeli kwavunjululwa iingqayi okanye amatye okulungisa imbola awayesetyenziselwa ngokumangalisayo injongo yanamhla. La “ayesetyenziselwa ukulungiselela izinto zokuqaba ubuso” bamabhinqa akwaSirayeli. Ngokutsho kweThe Biblical Archaeologist, ngoFebruwari 1955, kwanakumaxesha okubhalwa kweBhayibhile “iziqholo zomzimba . . . zazisetyenziswa gqitha.”​—⁠Hezekile 23:⁠40.

Namhlanje, umzi-mveliso wesiqholo uchitha imali enokuba ngamawaka amahlanu ezigidi zeerandi ngonyaka kwizibhengezo zentengiso eUnited States kuphela. Besebenzisa iimbelukazi ezingoonobuhle, bakhuthaza iindlela zakutshanje zenkangeleko, ukususela kweziqhelekileyo ukusa kwezingaqhelekanga. Bathi, nawe unokukhangeleka ngale ndlela ukuba nje uthenga ibhokisi yeziqholo eziveliswa ngabo. Phofu ke, ambalwa amantombazana afikelelayo kule nkangeleko yoonobuhle. Kwanokuba ayayifikelela, le “nkangeleko” intsha inokushiywa lixesha ngaphambi kokuba ityhubhu yokuqala yelipstick iphele.

IBhayibhile iyakunceda ukuphephe ukulawulwa ngumoya wokuba sefashonini. Ithi: “Ningamilisi okweli phakade; manibe kumila kumbi ngokuhlaziyeka kwengqiqo yenu, ukuze nikucikide into okuyiyo ukuthanda kukaThixo okulungileyo, okukholekileyo, okuzalisekileyo.” (Roma 12:⁠2) Kumaxesha okubhalwa kweBhayibhile, wambi amabhinqa angamaKristu asenokuba ayetyekele ekunxibeni iimpahla ezimbejembeje neendlela zokulungisa iinwele ezazithandwa ngelo xesha. Kodwa umpostile uPawulos waluleka esithi: “Mabathi abafazi banxibe iingubo ezifanelekileyo, beneentloni, benesidima, ingabi kukuphotha iinwele, nokunxitywa kwegolide neeperile, nesambatho esixabiso likhulu.”​—⁠1 Timoti 2:⁠9.

Isiluleko sikaPawulos asikugwebi ukukhangeleka kwakho kakuhle. Sithetha nje ukuba imbonakalo ifanele ibe yefanelekileyo, ingabi bubumbejembeje; indiliseke yaye ibe sengqiqweni, ingabi yengaqhelekanga okanye esefashonini. Igama lesiGrike elithetha “ukundiliseka” linengcamango ‘yokuhlonela izimvo zabanye,’ yaye ufanele uzihlonele ngokukhethekileyo izimvo zabazali bakho. Ngoko ke masibone indlela oku okusenokuhlobana ngayo nokusebenzisa izithambiso zokuzihombisa.

Ngaphambi Kokusebenzisa Izithambiso Zokuzihombisa

Ekubeni izithambiso zokuzihombisa zilungiselelwe ukukwenza mhle ngakumbi, zingaguquli imbonakalo yakho, kusengqiqweni ukuqala ngokunyamekela imbonakalo yakho yemvelo nempilo yakho yonke. Ukulondoloza iindlela zokutya ezilungeleleneyo nokuphumla ngokwaneleyo nokwenza umthambo rhoqo kusenokwenza okungakumbi ekukwenzeni ube nomtsalane ngakumbi kunokuba nasiphi na isithambiso sokuzihombisa sinokukwenza.

Umcebisi woonobuhle uJane Parks-McKay ngokubhekele phaya ubongoza iintwazana “ukuba ziqale ngezinto ezisisiseko​—⁠oko kukuthi, ukunyamekela ngokuthe rhoqo nangokuphumelelayo ulusu. . . . Abantu abaninzi batyekele ekubeni bangalunyamekeli ulusu lwabo . . . [baze ke] banyhibhele izithambiso zokuzihombisa kulusu lwabo olungenamtsalane kangako benethemba lokuba oko kuya kubenza babe bahle.”

Izithambiso zokuzihombisa zisebenza kakuhle gqitha kulusu olunyanyekelwa kakuhle. Incwadi ethi A Lifetime of Beauty icacisa oku: “Ukucoca ulusu kufana nokulungisa udonga ukuze lulungele ukupeyintwa ngokutsha: kungakhathaliseki ukuba umbala mhle kangakanani, ukuba lungcolile yaye kukho iindawo ezirhabaxa loo peyinti ayiyi kuba ntle. Ulusu olungacocwanga kakuhle luya kubonakala lumnyama yaye lutshile.”

Ngaloo ndlela ingcali yezithambiso zokuzihombisa yaxelela uVukani! oku: “Kusasa, intombazana inokuhlamba ubuso bayo ngesihlambisisi esifanelekileyo sobuso. Yakugqiba inokufaka isithambiso sobuso esifaka ibala nesenza ulusu luthambe.”

Ukuhlolisisa Iimfuno Zakho

Ngoku, khawuqwalasele kakuhle ubuso bakho uze uhlolisise iindawo ezithandekayo nezingathandekiyo. Ngaba unamehlo anomtsalane, ulusu olugudileyo, okanye kwanolumpuluswa? Mhlawumbi ke uya kufuna isithambiso sokuzihombisa esingengako okanye akuyi kusifuna. Kwelinye icala, mhlawumbi ulusu lwakho lunamafutha gqitha (ngokuqhelekileyo ebudeni beminyaka yeshumi elivisayo) yaye uthandwa ngamaqhakuva. Okanye kusenokubakho nkalo ithile kubuso bakho (njengezidlele zakho) obungathanda ukuyithambisa. Ukusebenzisa ngokulinganiselweyo isithambiso sokuzihombisa kusenokukunceda.

Kumaxesha okubhalwa kweBhayibhile bambi abafazi babeqaba isithambiso esimnyama ukuze ‘amehlo abo abonakale emakhulu.’ (Yeremiya 4:​30) Namhlanje, izinto zokuqaba amehlo, amashiyi nezokudyobha amehlo zokuhomba zisetyenziselwa imiphumo efanayo. Amafuthana okuthambisa nezithambisi ezingamanzi anokuluthambisa ulusu oluxwebileyo. Izithambiso zokuzihombisa ezibomvu zinokuzenza zikhangeleke izidlele zakho.

Kuthekani ukuba ufuna uncedo oluthile ekukhetheni okanye ekusebenziseni izithambiso ezithile zokuzihombisa? Kumathala encwadi kawonke wonke ziyafumaneka iincwadi ezinokukunceda. Kodwa kwakhona usenokufuna ukuthetha nomama wakho okanye umhlobo okhulileyo. Intwazana ekwishumi elivisayo egama linguTina ikhumbula oku: “Umama wahamba nam xa wayesiya kuthenga waza wacela umthengisi wezithambiso zokuzihombisa ukuba andibonise imibala endifaneleyo.” Iingcali zezinto zobuhle ezikwiivenkile ezidumileyo zinokukucebisa ngemibala yezithambiso zokuzihombisa ehambisana nolusu lwakho nangendlela izithambiso zokuzihombisa ezinokusetyenziswa kakuhle ngayo. Kodwa ekubeni umsebenzi wabo ikukukuthengisela izithambiso zokuzihombisa, lumkela ukuthenga izinto ongazifuni ngokwenene. Yaye ngenxa yeemfuno ezikhethekileyo zohlobo lwakho lobomi bobuKristu, uya kuqinisekisa ukuba akuthengi imibala esenokusebenza kakuhle kwitheko langokuhlwa kodwa esenokungafaneleki kwimicimbi yesikolo okanye yobuKristu.

Amacebiso Ngezithambiso Zokuzihombisa

Iintlobo zezithambiso zokuzihombisa ziya zisohluka ngokwamazwe ngamazwe. Kodwa imigaqo embalwa eqhelekileyo inokukhankanywa:

Qwalasela Uhlobo Lolusu Lwakho. Ekubeni abaninzi abakwishumi elivisayo benolusu olunamafutha, kusenokwenzeka ukuba uya kufuna ukusebenzisa izithambiso zokuzihombisa ezenziwe ngamanzi nezingenamafutha. Ezi azikho mbejembeje, ngoko aziyi kubonakala kangako. Abaninzi bakwanoluvo lokuba izithambiso zokuzihombisa ezinamafutha zibangela amaqhakuva.

Funda Amaphetshana Emiyalelo. Thelekisa izinongo zeentlobo ezixabiso liphantsi neentlobo ezibiza imali eninzi. Mhlawumbi umahluko wokwenene lixabiso nje nephepha lokusongela elisetyenzisiweyo. Ukufunda amaphetshana emiyalelo kubaluleke ngokukhethekileyo ukuba ulusu lwakho alulungelwa zizithambiso zokuzihombisa ezithile.

Sebenzisa Izibane Eziqaqambileyo. Ukuba akukhanyi ngokwaneleyo, usenokuzinyhibhela ngesithambiso sokuzihombisa esininzi. Ekubeni isithambiso sokuzihombisa esisetyenziswa ngakwisibane esiqaqambileyo sisenokubonakala sirhabaxa xa uselangeni, zama ukuma ngasefestileni xa uthambisa ukuze ubone indlela obonakala ngayo elangeni.

Zonge Izithambiso. Kwanento elungileyo ukuba iyabaxwa isenokuba yingozi. (Thelekisa IMizekeliso 24:​13; 25:​27.) Ukuba ubuso bakho “buyachininika!” usifake kakhulu isithambiso zokuzihombisa okanye usebenzise imibala eqaqambileyo. Isithambiso esibaxiweyo sibenza bungabonakali ubuhle bakho yaye sisenokude sibangele ukuthandatyuzwa kwemilinganiselo yakho yokuziphatha. (Thelekisa UHezekile 23:​36-42.) Ngoko sebenzisa izithambiso zokuzihombisa ezincinane, kungekhona eziqaqambileyo. Zisebenzise ngobuchule izithambiso zokuzihombisa ukuze umgubo obomvu wokuthambisa ungabonakali njengomgca wepeyinti ebusweni okanye isithambiso sokuzihombisa samehlo sibe ngathi siza kukuvala amehlo.

Buhlambisise Ubuso. Incwadi ethi A Lifetime of Beauty ithi: “Ungaze uye kulala ebusuku ungazisusanga zonke izithambiso zokuzihombisa ozifakileyo . . . Ngokuziqhelisa ukulala unobuso obungcolileyo, iinkokho neeseli zesikhumba ezifileyo ezisebusweni bakho ziya kushiya ulusu lwakho lurhonorhono yaye lungenamtsalane.” Enye ingcali ngolusu nezifo zalo ide ithi “ukuba akuzihlambi zonke izithambiso zokuzihombisa busuku ngabunye ngaphambi kokulala usengozini yokungenwa zizifo nokonakalelwa lulusu.” Sebenzisa izinto zokunyibilikisa izithambiso zokuzihombisa, njengecold cream ukuhlamba ubuso bakho.

IMizekeliso 31:​30 ithi: “Ngamampunge ubunzwakazi,” yaye kwanesithambiso zokuzihombisa esifakwe ngobuchule asinakuyifihla ingqondo engentle okanye engaphangalalanga. IBhayibhile isikhumbuza oku: “Ukuhomba kwenu makungabi kokwangaphandle . . . makube kokomntu ofihlakeleyo wentliziyo, ovethe ukungonakali, umoya onobulali, ozolileyo, oxabiso likhulu emehlweni kaThixo.”​—⁠1 Petros 3:​3, 4.

[Umbhalo osemazantsi]

[Ibhokisi ekwiphepha 20]

Iingozi Zezithambiso Zokuzihombisa

Igqwetha labathengi uElaine Brumberg unikela le ngxelo: “Amachiza amaninzi nezinongo zeziqholo zinamandla okutyhutyha ulusu zize zingene emzimbeni.” Ezinye zezinongo ezisetyenziswayo ngokuqhelekileyo ziicarcinogen ezithandabuzekayo.

Ezinye izinongo (ngokuqhelekileyo ezinukisa kamnandi nezilondoloza isithambiso sokuzihombisa) phantse kuyaziwa ukuba zibangela umonakalo onjengowokurhawuzela nowokuthimla. Kuyinyaniso ukuba, ezinye izinto eziveliswayo kuthiwa azinamonakalo ungako okanye zivavanyiwe ukuba zingawenza na umonakalo. Kodwa indlela wena oya kusabela ngayo kweso sithambiso sokuzihombisa inokuqinisekiswa kuphela ngamava nangokuhlolisisa ngenyameko amaphetshana aqulethe imiyalelo.

Enye ingozi eyesameleyo kukusulelwa ziintsholongwane. Umsizi omnyama wemisebe oyimascara unokuba yindawo yokuzalela iintsholongwane ezincinane ezidluliselwa apho zisuka kwiinkophe okanye eminweni zidluliselwa ngento yokuqaba imascara. Oku kunokubangela isifo samehlo ukuba into yokuqaba imascara ikrwela iliso. Ukwasulelwa zizifo kuyingxaki ngokukhethekileyo kwiivenkile zemiboniso ekuthi kuyo abantu abaninzi bathi nkxu iminwe yabo. Ngoko ke ezinye iingcali zincomela ukuba ukuphephe ukusebenzisa ezi zithambiso zisetyenziselwa ukubonisa ebusweni bakho.

[Umfanekiso okwiphepha 18]

Umama wakho usenokukwazi ukukufundisa indlela yokusebenzisa isithambiso sokuzihombisa