Umphumo Wokunganyaniseki

IZINTSO zikaCasey Lunsford zazingasebenzi kakuhle. Oogqirha baqikelela ukuba le nkwenkwana ineminyaka emithathu nesiqingatha ubudala iza kuphila kuphela iinyanga ezintathu okanye ezine ngaphandle kokuba kunokwenziwa uqhaqho-fakelo lwezintso. Abazali bayo, abangamaNgqina kaYehova, bagqiba kwelokuba balwamkele utyando; enyanisweni, utata kaCasey wayeza kunikela ngenye yezintso zakhe kule nkwenkwe.a Ekuphela komqathango abawubekayo ngowokuba kungasetyenziswa gazi​—⁠amaNgqina kaYehova awakwamleli ukutofelwa igazi ngenxa yezizathu ezingokweZibhalo.​—⁠Bona IZenzo 15:⁠20.

Intsapho yakwaLunsford yayicebe ukuba olu tyando lwenziwe kwisibhedlele saseTexas esaziwayo ngempumelelo yaso yotyando lwezintso ngaphandle kokusetyenziswa kwegazi. Kodwa isibhedlele esikumgama weekhilomitha ezimbalwa kwikhaya lakwaLunsford eKhalifoniya sasikulungele ukulwenza olu tyando ngaphandle kokusetyenziswa kwegazi. Intsapho yakwaLunsford yakhetha esi sibhedlele sikufuphi.

Ebudeni beveki engaphambi kolu tyando, abo basebenza esibhedlele nogqirha baphindaphinda bebaqinisekisa aba bazali ukuba akusayi kubakho mfuneko yokutofela igazi okanye ukufunwa komyalelo wasenkundleni ogunyazisayo ngokuchasene nemiqathango yabazali. Noko ke, kanye emva kokuba abazali bevumile ukuba lwenziwe olu tyando, lo gqirha waqalisa ukulungiselela ukuba afumane umyalelo wenkundla wokunyanzelisa utofelo-gazi kuCasey. Wade wakwazi nokubangela ukuba kuziswe omnye unontlalontle xa lowo wayekho wagxininisa kwelokuba aba bazali babenelungelo lokwazi ngawo nawuphi na umyalelo wenkundla. Ngentsasa yotyando, isibhedlele safaka isiqinisekiso esicela umyalelo wenkundla wokuba uCasey atofelwe igazi. Esi siqinisekiso savakaliswa ngokungathi uCasey wayesopha ngeli xesha kwitafile yotyando, ngoxa enyanisweni utyando lwalungekaqaliswa! Kwiyure emva kotyando, olwalwenziwe ngokunempumelelo ngaphandle kwegazi, uCasey watofelwa igazi.

Intsapho yakwaLunsford yammangalela lo gqirha ungumtyandi nesibhedlele ngokutyeshela amalungelo abo nangokuqhatha, ukuphatha kakubi, ukucinezela ngokweemvakalelo okwenziwa ngabom, nokungathotyelwa kwesifungo somsebenzi. Emva kwetyala elavavanywa iiveki ezine, iqumrhu labagwebi lahlanganisana kangangeentsuku ezimbini ezinesiqingatha yaza yamfumanisa enetyala ugqirha ongumtyandi kunye nabasebenzi basesibhedlele. Bayalelwa ukuba bahlawule intsapho yakwaLunsford imali iyonke isisi-R1 300 000.

Nangona ijaji echophele ityala ngoku iye yasiguqula isigwebo esingokutyeshelwa kwamalungelo obumi yaza yayalela ukuvavanywa ngokutsha kwetyala mayela nokuqhatha nezinye izimangalo, abagwebi abali-12 babeyisekile ukuba ukuxoka kwesibhedlele nogqirha kwakusifanele isigwebo sesi-R1 300 000. Amagqwetha entsapho aye abonisa ukuba aza kufuna ukubambelela kwisigqibo sequmrhu labagwebi ngokuthi abhene.

[Umbhalo osemazantsi]