Abenzi Milingo Bengengabo Noothixo

NGOKUBALISWA NGUMERCY UWASI, WASENIGERIA

LALIGQATS’ UBHOBHOYI ngaloo mva kwemini eNtshona Afrika, xa ndaqalisa ukuva iingqaqambo ngoMatshi 1992. Ndandihambe nentsapho yakowethu saya kwintsimi yethu ngenjongo yokuya kuvuna iicassava. Ngoxa silapho, ndaqalisa ukuva iingqaqambo esiswini. Ekubuyeleni kwethu ekhaya, iingqaqambo zazingathi ngumlilo odlayo. Ndandihlanza; kwakunzima ukuphefumla. Nangona ngenxa yezi ngqaqambo kwakunzima nokuba ndime okanye ndihambe, umama wakwazi ukundikhwelisa iteksi, eyathi yagqotsa ukuya kwisibhedlele sikawonke wonke esikufutshane.

Ugqirha owayekho esibhedlele wayeyindoda endakha ndanikela ubungqina kuyo ngethemba leBhayibhile. Lo gqirha wandicofa isisu; sasidumbile. Wabuza ukuba ndandikhupha igazi na, umama wavuma ukuba ndandisexesheni.

Ugqirha wathi: “Intombi yakho ineenyanga ezintlanu ikhulelwe. Isizathu sokopha kwayo kukuba ibizama ukuqhomfa.”

UMama waphendula: “Hayi, Gqirha! Ayinjalo le yam intombazana.”

“Ungatsho. Kule mihla amantombazana ayabakhohlisa abazali bawo. Ikhulelwe.”

Ndathetha nam ke ngoku. Ndathi ndandingomnye wamaNgqina kaYehova ibe ndandikhuliswe kwikhaya lamaKristu yaye isazela sam esiqeqeshwe ngeBhayibhile sasingenakundivumela ndibandakanyeke kwizenzo zokuziphatha kakubi.

Ugqirha waphendula wabhekisa kumama wathi: “Nkosikazi, makhe sime kancinane ngonqulo ngoku khe sithethe izinto zokwenyaniso. Ndikuxelela ukuba le ntombazana ineenyanga ezintlanu ikhulelwe.”

UMama wathi: “Phakama. Siya kwesinye isibhedlele.” Ukuphuma kwethu kweso sakhiwo, ndahlala engceni ndagixa ngenxa yeengqaqambo ezazinganyamezeleki. UMama wandibalekisela ekhaya waza waxelela utata oko kwakuthethwe ngugqirha.

Bagqiba kwelokuba bandise kwisibhedlele esikhudlwana nesihambele phambili noko, isibhedlele esifundisa oogqirha. Endleleni eya apho, ndathandaza kuYehova ukuba andisindise ukuze abantu banganyelisi igama lakhe elingcwele ngokuthi ndabulawa kukumitha okungafunwayo. Ndathi ukuba ndiyafa, xa laa gqirha ebona amaNgqina kaYehova esiza kumshumayeza, uya kuthi: ‘Andithi ngomnye wenu lo wakha waza apha kwixesha elidluleyo ekhulelwe?’ Kwakhona ndathandazela ukuba ndikwazi ukubuyela kula gqirha ndize ndinikele ubungqina kuye kwakhona.

“Usenyulu!”

Kwisibhedlele esikhudlwana, kwaphinda kwaphakama laa ngxoxo ibiqhubeke kwisibhedlele sokuqala; oogqirha babecinga ukuba ndikhulelwe. Iingqaqambo zaya zisiba mandundu. Ndandikhala. Omnye ugqirha wathetha kabuhlungu, esithi: “Ninje nina mantombazana. Niyakhulelwa, nize niqalise ukusingxolela.”

Oogqirha bandihlola. Besenjenjalo nje babendihlaba nangemibuzo. “Utshatile?”

Ndathi: “Hayi.”

“Mingaphi iminyaka yakho?”

“Ilishumi elinesibhozo.”

“Mangaphi amakhwenkwe othandana nawo?”

“Andithandani namntu.”

Wandula ke ugqirha omkhulu kwaba waqalisa ukukhwaza, “Uthetha ukuthini? Ufuna ukundixelela ukuba nangona uneminyaka eli-18 akunamntu uthandana naye?” Kwakhona, njengakwisibhedlele sokuqala, ndachaza ukuma kwam njengomKristu. Wandula ke wandibuza ukuba ndandingomnye wamaNgqina kaYehova na. Ndavuma. Emva koko, zange aphinde andibuze omnye umbuzo.

Uhlolisiso lwangqina ukuba ndandingakhulelwanga. UMama weva omnye woogqirha exelela abanye: “Usenyulu!” Oogqirha bangxengxeza, besithi: “Umele usixolele ngokucinga oko besikucinga. Yinto esidibana nayo le kumantombazana yonke le mihla.” Noko ke, kwakungekabiphi iingxaki zam zazisaqala.

‘Uza Kulwamkela Utofelo-Gazi’

Ukuxilongwa ngeendlela ezikwazi ukuva izandi ezingavakaliyo ezindlebeni zethu kwabonisa ukuba kwakukho into enkulu ekhula kwenye yeFallopian tubes zam. Yayilingana neorenji elikhulu. Kwakufuneka ndityandwe.

Ndakhawuleza ndabaxelela ukuba ndandingayi kuvuma ukutofelwa igazi nangona ndandiya kuzamkela ezinye izinto ezisetyenziswa endaweni yegazi. Bema kwelokuba kwakufuneka igazi.

Omnye ugqirha osafundayo wandingxolisa, esithi: “Le nto uyithethayo iyafana neyakha yathethwa ngomnye wenu apha. Kodwa yathi imeko yakhe yakuba mandundu, walamkela utofelo-gazi.”

Ndaphendula ndathi: “Imeko yam yahlukile, kuba kum uewe nguewe nohayi nguhayi. Andisayi kuze ndilalanise kwingqibelelo yam.”

Kamva, ndatyelelwa ngoogqirha abathathu ebhedini yam befuna ukuqonda ngokungalifuni kwam igazi. Ndabachazela ukuba iBhayibhile ithi amaKristu afanele ‘azikhwebule kwigazi.’—IZenzo 15:20.

Bandicenga besithi: “Kodwa akuzi kulifaka emlonyeni. Liza kufakwa apha emithanjeni yakho.”

Ndathi akukhathaliseki nokuba ulifaka emlonyeni okanye emithanjeni, kuyafana.

NgoMgqibelo, ngoMatshi 14, emva kweveki ziqalile iingqaqambo, ugqirha oyintloko wotyando wandihlola. Nguye owayemele andityande. Ngelo xesha ndandisele ndidumbe nalapha esifubeni.

Wabuza, “Ngaba sebekuxelele ukuba kuza kufuneka utofelwe igazi?”

Ndaphendula: “Bandixelele, Gqirha, kodwa andizi kulamkela igazi.”

Waqhuba: “Mamela ke, uza kulamkela. Ukuba akulamkeli, uza kufa. Xa ndifika, ngoMvulo, ukuba igazi alilungiswanga, andikutyandi. Ukuba alikho igazi, alukho notyando.”

Wandula ke wabona incwadi eyayisecaleni kwebhedi yam waza wabuza, “YiBhayibhile yakho le?” Ndathi hayi; yayiyincwadi ethi Oyena Mntu Ubalaseleyo Wakha Waphila.a Wathi ndifanele ndiyisebenzise le ncwadi ukuthandazela ukuba ndingafi. Ndamcacisela ukuba imithandazo yethu asiyifundi ezincwadini. Nanini na sinengxaki, sithandaza kuYehova ngokusuka entliziyweni.

Kwiintsuku ezimbini ezilandelayo, oogqirha nabongikazi babebolekisana ngam bezama ukundinyanzelela ukuba ndamkele utofelo-gazi. Babendixelela ukuba ndandisemncinane gqitha ukuba ndingafa. Babesithi: “Yamkela igazi uphile!”

“UYehova Ungakum”

Ebudeni baloo maxesha okubandezeleka, ndandifunda INdumiso 118, ethi ngokuyinxenye: “Ndabiza uYehova ndisengxingongweni; wandiphendula uYehova, wandibeka endaweni ebanzi. UYehova ungakum, andoyiki; angandenza ntoni na umntu?”—INdumiso 118:5, 6.

Emva kokuba ndicamngce ngezi ndinyana, ukholo lwam kuYehova lomelela. Ngaloo ntsasa abazali bam beza esibhedlele. Ndababonisa loo ndumiso, yaye nolwabo ukholo lomelela.

Ngelo xesha, uMama noTata babenganelanga nje ngokuxhasa isigqibo sam sokungalamkeli igazi kodwa babendibeka nasemthandazweni. Amalungu ebandla endikulo ayeqhubeka endithandazela yaye endikhuthaza ngeZibhalo.

“Asenzi Milingo”

NgoMvulo, ngoMatshi 16, ngentsasa endandimele ndityandwe ngayo, omnye ugqirha wangena kwigumbi endandilaliswe kulo waza wabona ukuba ndandiphethe iqweqwe lam elithi Medical Directive, elichaza ukuma kwam kumbandela wotofelo-gazi. Wathi, “Yintoni le? Ngaba ngokwenene akujiki kule nto ubuyithetha?”

“Ewe, andizi kulamkela igazi.”

Wathi, “Ukuba kunjalo ke, asiphumeleli ukukutyanda. Akuzukutyandwa.”

Wandula ke lo gqirha watsalela umama umnxeba ekwigumbi endandilaliswe kulo. UMama wathi: “Mdala ngokwaneleyo ukuba angazenzela ezakhe izigqibo. Andinakumenzela izigqibo. Uthi isazela sakhe esiqeqeshwe ngeBhayibhile asimvumeli alamkele igazi.”

Kwakuba njalo walahla iingxelo zam etafileni waza waphuma kwelo gumbi egibiselekile. Kwathi cwaka kangangeeyure ezintlanu. Ndandiqaqanjelwa yaye ndandingakwazi ukutya. Ibe sasingekho esinye isibhedlele kuloo mmandla.

Kwandula ke ndothuswa kukungena kwestretcher sokundithwalela kwigumbi lotyando. Ndandilibambe nkqi iqweqwe lam elithi “No Blood.” Endleleni eya kwigumbi lotyando ndabona izixhobo zotyando kunye nezingxobo ezinegazi. Ndaqalisa ukulila ngamandla, ndisithi andisayi kulamkela igazi. Omnye wabongikazi wathi ndandifanele ndililahle phantsi elo qweqwe. Wathi andinakungena nalo kwigumbi lotyando. Ndathi ndandingenakungena ngaphandle kwelo qweqwe yaye ndandifuna ukulibonisa ugqirha oyintloko wotyando. Wandula ke lo mongikazi walohlutha elo qweqwe waza wangena nalo kwigumbi lotyando walibonisa ugqirha wotyando. Kwangoko ugqirha oyintloko nabanye oogqirha abahlanu baphuma benxibe impahla abazinxiba xa besenza utyando beza kuloo ndawo ndandikuyo.

Ugqirha oyintloko wayejwaqeka ngumsindo. Wabiza umama, waza walatha esiswini sam, waza wathi kuye: “Mjonge, Nkosikazi. Asazi ukuba siza kufumana ntoni phaya ngaphakathi. Ukuba kufuneka sisike kakhulu, uya kopha kakhulu. Ufuna ophe ade afe?”

UMama waphendula wathi: “Gqirha, ndiyazi ukuba uYehova uza kuba nayo le ntombazana. Yaye uza kuba nani ngokufanayo. Ndicela nenze okusemandleni enu nina konke okunye nikushiyele kuYehova.”

Wandula ke lo gqirha wathi: “Asenzi milingo singengawo namaxhwele. Senza oko sikufundileyo. Andinakulwenza olu tyando ngaphandle kwegazi.”

Kwakhona umama wamcenga ukuba enze nje okusemandleni akhe. Ekugqibeleni, wavuma ukundityanda ngaphandle kwegazi. Wabuza ukuba ndandisoyika na. Ndaphendula ndathi: “Andikoyiki ukufa. Ndiyazi ukuba uYehova ungakum.”

‘Qhubeka Ukhonza UThixo Wakho’

Olu tyando lwathabatha iyure kuphela. Bandiqhaqha baza balisusa ngokulula elo dlala, nto leyo eyamangalisa bonke abasebenza esibhedlele.

Emva koko omnye woogqirha waxelela uMama ukuba oogqirha abasafundayo bathetha ngemeko yam ezindlwini zabo ebusuku. Ngoku xa mna okanye uMama sisiya esibhedlele, basiphatha kakuhle gqitha.

Emva kweentsuku ezimbini ndityandiwe, ugqirha weza kwigumbi endandilaliswe kulo, wabuza ukuba ndinjani na, waza wathi: “Ufanele uqhubeke ukhonza uThixo wakho. Wakunceda ngokwenene.”

[Umbhalo osemazantsi]