Yiyiphi Intuthuzelo Ekhoyo Kwabo Bangamaxhoba?

KWABO bajamelene nokulahlekelwa ngephanyazo ngabathandekayo babo kwiingozi ezinxulumene nokuselwa kotywala, akukho “xesha . . . lakuthi ‘Ndlela-ntle,’ . . . okanye ‘Ndiyakuthanda,’” utsho njalo uJanice Lord, umbhali wencwadi ethi Survivor Grief Following a Drunk-Driving Crash.

Njengoko sesibonile, abo basindileyo bamele bajamelane nokuninzi: umothuko, ukoyika, umsindo nokunxunguphala. Ukufa kwabathandekayo ngaloo ndlela kubangela ukuba uzive ulahlekelwe ngokungapheliyo. Abo basindileyo basenokuvakalelwa kukuba intlungu abayivayo ayisokuze iphele.

Ziyiqonda intlungu enokuba ibangelwa kukulahlekelwa okunjalo, iziphatha-mandla ezininzi ziye zamisela imithetho okanye iimeko ezisenokulinciphisa inani eliphakame ngokothusayo leengxwelerha nyaka ngamnye. Ngokomzekelo, elinye igosa lalatha kubuthathaka obuthile abanabo abo banetyala lokuqhuba benxilile laza lacebisa ukuba kubekho amaziko abanokusoloko besiya kuwo apho banokuthi ngoqeqesho oluthile nomsebenzi nangonyango lweziyobisi, ‘baqiniswe baze bomelezwe khona’ ukuze boyise obu buthathaka banabo.

Yintoni Eyona Nto Ifuneka Ngokwenene?

Enoba oku kunqweneleka kangakanani na, akakho umntu okanye uthunyashwe womntu onokuphelisa intlungu ebangelwa kwabo bangamaxhoba, kungekho nomntu onokubuyisa abo bafileyo. Into efunekayo ukuze kulungiswe wonke lo monakalo ingaphezulu lee koko abantu banokukwazi ukukulungiselela. Eyona nto ifuneka ngokwenene lulungelelwaniso olwahluke ngokupheleleyo lwehlabathi, elingayi kusekelwa kwingcamango yanamhlanje yokuzingca netshabalalisayo ‘yokufumana uyolo enoba sekumnyam’ entla’ esuba imiphefumlo yabantu abaninzi.

Ngaba sikho isizinzi sokuba nethemba eliqiniseke ngolo hlobo lehlabathi elilunge ngakumbi apho iintlekele ezinjalo ziya kuba zizinto zexesha elidluleyo? Ewe, sikho. Enyanisweni, kukho ithemba eliqinisekileyo lehlabathi elitsha apha emhlabeni apho ziya kuba zingasekho iintlekele ezinjengezi, ihlabathi aya kuthi kulo namaxhoba eengozi abuyiselwe ebomini kwakhona. Olunjani lona uvuyo oluya kubangelwa koku xa aba bemanyaniswa nabathandekayo babo kwakhona! Oku kuya kwenzeka kwihlabathi elitsha apho, ekuhambeni kwexesha, iinkumbulo ezilusizi zeentlekele zexesha elidluleyo ziya kube zipheliswe ngonaphakade.

Elo themba lehlabathi elitsha lifumaneka kwiLizwi likaThixo eliphefumlelweyo, iBhayibhile, elithi: “[UThixo uya] kuginya ukufa kuphele, izisule iNkosi uYehova iinyembezi ebusweni bonke.” (Isaya 25:⁠8) Oku kuya kuquka ukubuyiswa kwabo bafileyo basemangcwabeni. Kunjengokuba umpostile uPawulos wabhala oku: “Ndinethemba kuThixo . . . ukuba kuza kubakho uvuko lwabafileyo, lwamalungisa kwanolwabangemalungisa.” (IZenzo 24:15) UYesu nabapostile bakubonisa oku ngokuvusa abafileyo.​—⁠Luka 7:​11-16; 8:​40-42, 49-56; Yohane 11:​1, 14, 38-45; IZenzo 9:​36-42; 20:​7-⁠12.

Ubomi emhlabeni kwihlabathi elitsha, kuquka ukuphila kwabantu ababefile nabavuswe emangcwabeni, buya kuzinyaswa ngokufezeka kwabantu. Amandla kaThixo okuphilisa aya kuzenza iingqondo nemizimba yabo bonke abaphilayo ngoko ibe yimiqabaqaba: “Akayi kuthi ummi wakhona, Ndiyafa.” “Aya kuvulwa amehlo eemfama, zivulwe iindlebe zezithulu; size sitsibe njengexhama isiqhwala, lumemelele ulwimi lwesidenge.”​—⁠Isaya 33:24; 35:​5, 6; bona kwanoMateyu 15:​30, 31.

IBhayibhile iyichaza imeko yexesha elizayo yoluntu emhlabeni ngokubonisa ukuba uThixo uya ‘kuzisula zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu; ngokuba izinto zokuqala zigqithile.’ (ISityhilelo 21:⁠4) UMniki wezi ngenelo zimangalisayo neemeko ezonwabisayo ezizayo uvakalisa oku: “Izinto zexesha elidluleyo azisayi kukhunjulwa, kwaye azisayi kuthi qatha entliziyweni. Ngoko, memelelani nina bantu, nikuvuyele ngonaphakade oko ndikudalayo.”​—⁠Isaya 65:​17, 18, NW.

Kungegunya likabani ekuya kuthi konke oku kwenzeke? Kungegunya namandla oMniki-themba ozukileyo, uMdali wendalo iphela, uYehova uThixo. KwiLizwi lakhe uqinisekisa ukuba kungekudala inkqubo entsha “apho kumi ubulungisa” iya kuthabathel’ indawo le nkqubo yangoku yokuzingca nenogonyamelo, inkqubo esele ingene nzulu ‘kwimihla yayo yokugqibela.’​—⁠2 Petros 3:13; 2 Timoti 3:​1-5, 13; IMizekeliso 2:​21, 22.

Intuthuzelo Evela KwiLizwi LikaThixo

AmaNgqina kaYehova, njengabanye abantu, awagonywanga kwiintlekele ezenzeka kwixesha lethu, engalindelanga ukuba, kweli hlabathi lineengozi, akhuselwe nguThixo ekufeni, kwiingozi okanye kwezinye izinto. Ayazi ukuba okwangoku oku asikuko ukuthanda kukaThixo. INtshumayeli 9:11 ithi: “Bonke bephela bafikelwa lixesha nasisihlo.” Kanti, kudala amaNgqina esalathisela ingqalelo kwiLizwi likaThixo, njengoko amadinga akhe eyintuthuzelo engapheliyo kwabo bawakholelwayo.

Omnye wamaNgqina kaYehova wayechaphazeleke ngokunzulu xa umqhubi owayenxilile wabulala umlanya walo waza washiya umfazi wakhe (udade walo) iingqondo zakhe zingabambi kakuhle ngenxa yokwenzakala ngamandla entloko, nto leyo eyenza ukuba kufuneke ahlale enomntu omnyamekelayo. Nabo babengamaNgqina kaYehova. Ubalisa esithi:

“Ixesha elininzi enyakeni, ndandisoloko ndilila, yaye ndiqumbile. Ndandiqunjiswe ngulo mfana wayenze le ntlekele, ndiqumbele abazali bakhe abangazange babeke liso kuye. Maxa wambi le ngqumbo yayide ijoliswe kuThixo nakwizithunywa zakhe kuba zingakuthintelanga ukuba kwenzeke oku. Enjani yona ilahleko yabantu ababini ababemkhonza!

“Enyanisweni, ndandisazi ukuba uThixo wayengabekeki tyala ngokugqalileyo ngoku yaye enganqweneli ukuba kwenzeke izinto ezilolu hlobo. Kodwa ndavakalelwa kukuba nguye owalathisa onke amanyathelo ethu yaye uyasikhusela kwiingozi ezinjalo. Ngoku ndaqonda ukuba kwakufuneka ndibe noluvo olulungeleleneyo mayela noku, yaye ndaqalisa ukufuna isicombululo.

“Kwandithabath’ ithuba elide ngaphambi kokuba ndixole ndize ndikwazi ukuqiqa ngalo mbandela. Ndavakalelwa njengoAsafu, owathi kwiNdumiso 73 kubonakala ngathi ababi bayathandwa. Kodwa kwakuloo ndumiso inye, iLizwi likaThixo lihlabela mgama libonisa ukuba akunjalo, uThixo akabathandi abangendawo, yaye ngexesha lakhe elifanelekileyo, baya kutshatyalaliswa.

“Ndaqonda ukuba indlela yam yokucinga, ingeyiyo ekaThixo, ibiphosakele. Bendizisebenzisa kakubi izibhalo. UThixo akaqinisekisi ngokusikhusela ngokupheleleyo kwiingozi, kukugula, okanye kukufa ngeli xesha kodwa uthembisa ukuba iintsikelelo ezinjalo ziya kufumaneka kwixesha elizayo, kwihlabathi lakhe elitsha. Ndakuba ndikuqondile oko iLizwi likaThixo ngenene likuthethayo ngokuphathelele ukukhuselwa kwethu nguThixo ngokomoya, ingekuko ngokwenyama, ingqumbo endandinayo yaya iphela. Kwakhona ngoku ndiyakwazi ukunikel’ ingqalelo kulowo ngokwenene ubangela zonke iintlekele, uSathana uMtyholi, owayesisibulala-mntu nexoki ukususela kwixesha awavukela ngalo uThixo. IBhayibhile ikwenza kukhanye ukuba nguSathana onguthixo weli hlabathi elizaliswe ziintlungu ngolu hlobo.​—⁠Yohane 8:44; 2 Korinte 4:⁠4.

“Ndathi ndakuyiqonda ngokuzele ngakumbi inyaniso engesizathu sokuba kubekho ukubandezeleka, isizathu sokuba uThixo ekuvumele, nendlela aya kukuphelisa ngayo, kwacaca ukuba uThixo akalulo utshaba lwethu, kodwa ulusindiso lwethu!

“Kwakhona, kwaba yintuthuzelo enkulu ukwazi ukuba ngomoya wakhe oyingcwele, uYehova uyabaxhasa abo bamkhonzayo. IBhayibhile iyasiqinisekisa ukuba umoya oyingcwele uya kusinika ‘amandla ayincamisa.’ Ngale ndlela usinika amandla okunyamezela okunganyamezelekiyo. Yaye kwakhona usithuthuzela ngethemba lokubona abathandekayo bethu ngexesha lovuko. Ngaloo ndlela sinokuzoyisa iimbandezelo.”​—⁠2 Korinte 4:⁠7.

Ikamva Eliqaqambileyo

Abantu abaninzi baye behlelwa ziintlekele ezahlukahlukeneyo, kuquka amaNgqina kaYehova, ukutyhubela iminyaka. Oku kuqinisekisa inyaniso yeBhayibhile yokuba bonke bafikelwa lixesha nasisihlo. (INtshumayeli 9:11) Kodwa amava abakhonzi bakaThixo nawo angqina inyaniso yokuba iLizwi likaThixo liyathuthuzela yaye liyabazimasa abantu bakhe ngamaxesha anzima yaye kwakhona liqinisekisa ikamva eliqaqambileyo kwihlabathi lakhe elitsha, apho iintlekele ezinjalo ziya kuba zizinto zexesha elidluleyo.

Enyanisweni kuyathuthuzela ukwazi ukuba kwihlabathi elitsha likaThixo lobulungisa, kuya kubakho uthando lokwenene phakathi kwabantu nentlonelo efanelekileyo ngesipho esixabisekileyo sobomi. Ezi mpawu zintle ziya kuthabathel’ indawo ukuzingca nokusebenzisa ubuthathaka boluntu ukuze kuzuzwe ingenelo ngabo nto leyo ezalise eli hlabathi. Kwakhona amaxhala obu bomi aya kube ephelile, iingcinezelo, noloyiko olutyhalela abaninzi ukuba babone kuyimfuneko ukuba basebenzise utywala ngokugqithiseleyo okanye basebenzise ezinye iziyobisi.

Kwanangoku, amaNgqina kaYehova abumba ubuzalwana bazwenibanzi obumanyaniswe ngamandla amanyanisayo othando. (Yohane 13:​34, 35) Abo bayinxalenye yobu buzalwana banikela inkxaso enamandla yokunceda abo baye basentlungwini yokulahlekelwa. Bayakuvuyela ukunceda nabani na ofuna ukuthuthuzelwa kanye njengokuba nabo beye bathuthuzelwa.​—⁠2 Korinte 1:​3, 4.

[Umfanekiso okwiphepha 13]

IBhayibhile ithembisa ukuba kuza kubakho uvuko lwabafileyo