Abantu Abaselula Bayabuza . . .

Ndinokuhlangabezana Njani Nentlekele?

“Kwakutheni ukuze abanqolobi babulale umama?”—UKevin.a

“[Ngaphambi koSeptemba 11], ndandikuthanda ukuya ematoneleni. Kodwa ngoku ndisuka ndicinge ngokufa xa linokuqhushunjiswa ndiselapho kulo.”—UPeter.

UNINA kaKevin wabulawa ngoSeptemba 11, 2001, xa kwakuhlaselwa iWorld Trade Center kwisiXeko saseNew York. UPeter akazange afumane intlungu enjalo yokufelwa, kodwa naye wachatshazelwa ngokunzulu zezi ziganeko.

Elinye iphephandaba lithi: “Amawaka abantwana abahlala eNew York baphazamisekile engqondweni ngenxa [yohlaselo] lukaSeptemba 11, yaye abaninzi baya kuphazamiseka de babe badala.” Okubuhlungu kukuba “nabantwana ababengekho kuloo ndawo yentlekele babechaphazeleke ngokufanayo nabo babezibonele ngamehlo abo olo hlaselo.”b

Ezi ngxaki zinokubangelwa nazezinye iintlekele ezifana nabantu bakwaSirayeli abaziqhushumbisa ngeebhombu ngenjongo yokufa nabanye, nabantu abasuka bahlwayele nje ngeembumbulu bebulala nabani na ophambi kwabo. Ithetha ngolu hlobo lokudutyulwa kwabantu enye ingcali yathi: “Nokuba [abantwana] bahlala kumgama weemayile ezingama-2 000 ukusuka kuloo ndawo yentlekele, ezi ziganeko zinokubenza baxhalabe ngakumbi.”

Yintoni le ibaxhalabisayo? Xa kusehla izinto ezibuhlungu babona uthotho lwemifanekiso emasikizi esasazwa ngamajelo eendaba. Amajelo eendaba abonisa ngokuphindaphindiweyo imifanekiso eyoyikisayo yabanqolobi abasebenzisa iziqhushumbisi, eyokudutyulwa kwabantu esikolweni neyeentlekele zemvelo, yaye oko kwenza kube nzima ukuba ulutsha oluninzi luyilibale. Ngoko, ayingomnqa into yokuba uhlolisiso olwenziwa yiNew York City Board of Education lwabonisa ukuba: “Kwiinyanga ezi-6 emva kokuwa kweWorld Trade Center abantwana abangama-76 ekhulwini kubantwana abafunda kwizikolo ezingama-8 266 zikawonke-wonke, basacinga ngolo hlaselo lwabanqolobi.”

Siphila kumaxesha iBhayibhile ewabiza ngokuba ‘ngamaxesha anomngcipheko.’ (2 Timoti 3:1-5) Xa usehlelwa ziintlekele ezibuhlungu ungakwazi njani ukujamelana nazo?c

Isizathu Sokwehla Kwezinto Ezibuhlungu

Enye indlela yokuhlangabezana nezinto ezibuhlungu kukuvuselela ‘amandla akho okucinga angcwengekileyo.’ (2 Petros 3:1) Xa ujonga izinto zama ukucinga ngendlela anokuba uzijonga ngayo uThixo. Ngokomzekelo, kusenokufuneka ukhumbule ukuba iintlekele ezininzi zehla ngenxa ‘yexesha nesihlo esingenakubonwa kwangaphambili.’ (INtshumayeli 9:11) Esenza umzekelo woku, uYesu Kristu wathetha ngokuwa kwenqaba yaseSilowam. Kuloo ntlekele kwafa abantu abali-18. Noko ke, uYesu wakwenza kwacaca ukuba loo maxhoba ayengohlwaywa nguThixo. Aba nelishwa nje lokuba kwindawo eyayiza kuba nentlekele ngexesha lokwehla kwayo. (Luka 13:1-5) Ukucamngca ngesi sibakala kunokukunceda ube nembono elungeleleneyo ngeentlekele.

Ukucinga ngendlela efanelekileyo kunokukunceda ‘ungabi nomsindo nxamnye noYehova’ uze umbek’ ityala ngeziganeko ezibuhlungu. (IMizekeliso 19:3) Kunokuba abe ngunobangela weenkxwaleko zethu, uYehova ‘nguThixo wentuthuzelo yonke.’ (2 Korinte 1:3) Xa kusehla iintlekele, kufuneka sisondele kuye—singabi nomsindo size simnikel’ umva. Camngca ngamazwi eBhayibhile akuYakobi 1:13 athi: “Makungabikho nabani na, xa esesilingweni othi: ‘Ndilingwa nguThixo.’ Kuba uThixo akanakulingwa ngezinto ezimbi yaye naye akalingi namnye.”d

Omnye umzekelo onokusinceda kule nkalo ngulowo wesiganeko esibuhlungu esehla kuMbindi Mpuma kwiinkulungwane ezadlulayo. IBhayibhile isixelela ukuba umntu owasindayo kweso siganeko weza nengxelo ethi: “Kuhle umlilo kaThixo emazulwini watshisa phakathi kwezimvu nabalindi wabadla wabagqiba.” (Yobhi 1:16) Enjani yona ukuba manyumnyezi intlekele! Yaye kuyacaca ukuba le ndoda ityhwatyhwayo yayicinga ukuba nguThixo obangele oko. Ukanti, yayingenguye uThixo. UYobhi 1:7-12 usichazela ukuba loo mlilo wawungaveli kuThixo, kodwa wawuvela kuTshaba lukaThixo—uSathana uMtyholi!

Leyo yayiyimeko engaqhelekanga: uYehova wayenike uSathana imvume ekhethekileyo yokuvavanya ingqibelelo kaYobhi. Ngoko, ungangxam’ ugqibe ngelithi iintlekele zemvelo ezifana nezaqhwithi nezikhukula zibangelwa nguSathana ngokungqalileyo.e Sekunjalo, iBhayibhile ithi “ihlabathi liphela lisemandleni ongendawo.” (1 Yohane 5:19) Ngoko, unako ukusebenzisa abantu ukuba babangele kwehle izihelegu neentlekele.

Noko ke, asimele soyike. Cinga ngesinye isiganeko esiseBhayibhileni kweyoku-1 kaSamuweli 22:12-23. Apha siva ngesenzo esimasikizi sokubulawa kweqela lababingeleli abathembekileyo neentsapho zabo. Akuthandabuzeki ukuba uSathana washukumisela uKumkani uSawule ongendawo ukuba enze oko. Noko ke, uDavide othembekileyo, nowaba ngukumkani kamva, wabhala iNdumiso 52, apho avakalisa intembelo yakhe yokuba uThixo wayeza kubatshabalalisa abenzi bobo bubi.—INdumiso 52:5.

Ngokufanayo namhlanje, unokuqiniseka ukuba uThixo akayi kuzinyamezela ngonaphakade izenzo zokubulala nezogonyamelo eziphenjelelwa nguMtyholi. Yaye, iBhayibhile ithembisa ukuba kungekudala uThixo uza kusebenzisa uNyana wakhe uYesu, ukuze “ayichithe imisebenzi kaMtyholi”! (1 Yohane 3:8) Ekugqibeleni, akuyi kubakho nomzila omncinane obonakalayo womonakalo owenziwe nguSathana. Ngokuvusa abafileyo, uThixo unokubabuyisela ebomini abantu abafe kwizenzo ezibuhlungu zogonyamelo okanye zobunqolobi.—IZenzo 24:15.

Iindlela Zokujamelana Nentlekele

Eli themba leBhayibhile linokukunceda ungoyiki ngokugqithiseleyo. Kodwa akho namanye amacebiso aluncedo onokuwasebenzisa. Ngokomzekelo, cinga ngomgaqo weBhayibhile okwiMizekeliso 12:25. “Ilizwi elilungileyo” elikhuthazayo unokulifumana kuphela xa uncokola nabanye ubachazela indlela ovakalelwa ngayo. Ukwenjenjalo kuya kukunceda uqonde ukuba akuwedwa kule ntlungu. Ngoko ke, ukuba uziva ucinezelekile, zama ukuthetha nabazali bakho okanye ilungu eliqolileyo kwibandla lamaKristu.f

Nali elinye icebiso: Musa ukubukela ngokuphindaphindiweyo imifanekiso yeziganeko ezimasikizi eboniswa ngamajelo eendaba. Ukwenjenjalo kuya kwenza kube nzima ukuyilibala.—INdumiso 119:37.

Ngaba ungumKristu? Ukuba kunjalo qhubeka usenza imisebenzi yakho yobuKristu. (Filipi 3:16) Le misebenzi iquka ukuya kwiintlanganiso namanye amaKristu uze wabelane nabanye ngokholo lwakho. (Hebhere 10:23-25) Oko kuya kukunceda uyeke ukusoloko ucinga ngezinto ezikukhathazayo. Ukuzenza ikheswa kuya kukwenzakalisa—ngokweemvakalelo nangokomoya.—IMizekeliso 18:1.

Ukuqhubeka ufunda iBhayibhile yonk’ imihla kunokukunceda ngokukhethekileyo kuyo nayiphi na into ekudandathekisayo. Unina wenye intwazana egama linguLoraine wayesifa ngumhlaza. Phawula indlela uLoraine awahlangabezana ngayo nale ntlungu, uthi: “Ndikhumbula ukuba ndandifunda incwadi kaYobhi izihlandlo eziliqela xa ndikhathazekile. Incwadi yeeNdumiso yandinceda ndafumana intuthuzelo. Njengoko ndandifunda amazwi athuthuzelayo aseZibhalweni, kwakuba ngathi uYehova uyandanga.” Nodade wabo uMishael uthi: “Kwakuthi ukuba kukho usuku endingayifundanga ngalo iBhayibhile, ndiyive imiphumo yoko. Ndandisuka ndiqale phantsi ukucinga ngezinto ezibuhlungu. Ukufunda iBhayibhile kwakundihlaziya ngokomoya ndize ndilungele usuku ngalunye.”

Ukuba ukhe wehlelwa yinto ebuhlungu—ngakumbi ukufelwa ngumntu omthandayo—kuya kukuthuthuzela gqitha ukufunda incwadana enemifanekiso ethi Xa Umntu Omthandayo Esifa.g Ziphe ixesha lokufunda uze ucamngce ngazo zonke izibhalo ezicatshuliweyo. Kwakhona, camngca ngethemba lovuko. ULoraine uthi: “Ndandiba ngathi ndiyambona umama evuka ekufeni. Ndize ndimve esithi: ‘Ndibuyile. Khawutsho usiphekele ntoni ngale ngokuhlwa?’ Oko kwakundishiya ndonwabile.”

Ukuthembela kuYehova uze uthandaze kunokukunika amandla okunyamezela nezona zinto zibuhlungu gqitha. ULoraine uthi: “Ndandisendlwini ukufa kukamama. Ndakhawuleza ndacela uYehova ukuba andiphe amandla okunyamezela nokujamelana nale meko. Kwangoko ndaluva uxolo lukaThixo.” Ngqala xa uthandaza kuYehova. Mxelele ngokuthe ngqo indlela ovakalelwa ngayo. Umdumisi uthi: “Phalazani intliziyo yenu phambi kwakhe.”—INdumiso 62:8.

Kunokwenzeka ukuba njengoko ixesha lihamba, abantu baza kuya bedandatheka ngakumbi emhlabeni. (2 Timoti 3:13) Sekunjalo, iBhayibhile ithembisa ithi: “Abenzi bobubi baya kunqunyulwa . . . Kodwa abalulamileyo baya kuwudla ilifa umhlaba, baziyolise ngokugqibeleleyo ngobuninzi boxolo.” (INdumiso 37:9-11, 29) Ukubambelela nkqi kweli themba kuya kukunceda ukwazi ukuhlangabezana ngokuphumelelayo nokwehla kweentlekele.

[Imibhalo esemazantsi]

[Umfanekiso okwiphepha 18]

Kunokuba bubulumko ukungabukeli ngokuphindaphindiweyo imifanekiso emasikizi eboniswa ngamajelo eendaba