Abantu Abaselula Bayabuza . . .

Kuthekani Ngeendawo Zokuzonwabisa Zasebusuku?

“SIFUNA ukuzihlaziya.” “Siyela ukuya kungqungqa kuphela.” “Wonk’ ubani uyaya.” “Sifuna nje ukuzonwabisa.” Lwacacisa ngaloo ndlela ulutsha oluninzi kwintatheli kaVukani! ngesizathu sokuba lusiya rhoqo kwiindawo zokuzonwabisa zasebusuku. Iindawo zokuzonwabisa zasebusuku ezinjalo zithandwa kakhulu lulutsha oluninzi, yaye ukuba zikho kwindawo ohlala kuyo, usenokuba nawe uye wacinga ngokuya kuzo.

Namhlanje, abantu abaselula abaninzi bayathontelana ukuya kwiintlobo ezilandelayo zeendawo zokuzonwabisa, njengoko zichazwa liphephancwadi iFriday: “Ixesha lokuzonwabisa likho nangaliphi na ithuba yaye lithuba lakho ngokuhlwanje. Kwabo bangalelwayo, ixesha lokuzonwabisa alize liphele. Umngqungqo utsho njalo njengoko abantu bezitshiza ngeziselo ezibandayo phantsi kwezibane ezimibalabala ezidanyazayo nesandi somculo otsho kungavumi ukuba uhlale phantsi. ‘Ngoku iindawo zokuzonwabisa zilungiselelwe ukwanelisa zonke iindidi zabantu. . . . Kukho iindawo zokuzonwabisa ezilungiselelwe abasebenzi abaselula, abafundi bakwanokholeji, amafanasini nesihlwele sabantu abakhudlwana.’”

Ukulungiselela abantu abanobunkunkqele, kukho iindawo zokuzonwabisa ezifuna imali eninzi ekhutshwa kusengaphambili, ekunxitywa kuzo iimpahla ezibiza imal’ eninzi, nezikwafuna abantu abanomzekelo omhle wokuziphatha ukuze banikwe ilungelo lokungena. Ukulungiselela abangezozityebi kangako, kukho iindawo zokuzonwabisa ezinezinto ezingenamekobume ehlaziya kangako apho kuthi kubekho ulonwabo oluzuzwa ngemali encinane. Ibe ukulungiselela ulutsha oluselula gqitha (okanye olungekanxaxhi kangako) ukuze lungeniswe kwezi ndawo zokuzonwabisa zabantu abakhulileyo, kubakho “iindawo zokuzonwabisa ezineziselo ezibandayo,” ekucingelwa ukuba akukho tywala kuzo.

Akunzima ukusiqonda isizathu sokuba iindawo zokuzonwabisa zasebusuku zinomtsalane onamandla kangaka kulutsha oluninzi. Xa uselula, kuyimveli nje ukufuna ukuba nexesha elimnandi. (Thelekisa INtshumayeli 11:⁠9.) Ubusuku bokungqungqa busenokubonakala buyindlela eyimpilo yokulwa noxinezeleko lwesikolo nolomsebenzi. Kodwa kanye kanye zifaneleke kangakanani iindawo zokuzonwabisa zasebusuku?

USonya, ibhinqa eliselula elalisakuya rhoqo kwiindawo zokuzonwabisa zasebusuku, uyavuma esithi: “Imbono yoko ukuyelayo ibonakala ilunge ngokwaneleyo. Uyele ukuya kungqungqa nokuzonwabisa. Kodwa maxa wambi oko kuguqukela ekubeni kokuthile okungakumbi. Uqalisa ukuya ngobusuku baxa umculo nesihlwele sisemoyeni. Kungekudala uyabazi abo bangaphoswayo, ibe nawe akuphoswa. Imbono ikukungqungqa​—⁠nokudibana nothile. Yaye enoba oko kulusukelo lwakho okanye akunjalo, kusoloko kulusukelo lwabo.” Ngaba uSonya uyazibaxa izinto?

Iindawo Zokuzonwabisa Zasebusuku Namhlanje

Iindawo zokuzonwabisa ezinomculo wedisco zeminyaka elishumi edluleyo ziye zaziwa njengezikhuthaza ukuziphatha okubi ngokwesini, ukusebenzisa kakubi iziyobisi kwanobufanasini.a Ibe izinto ziye zaguquka kancinane ukususela ngoko. Nangona umculo (eUnited States, ngokufuthi ubizwa ngokuba ngumculo wasekhaya okanye kusuke nje kuthiwe ngumculo wokungqungqa) nezingqisho zokungqungqa ziye zaguquka, umoya okhoyo kwiindawo ezininzi zokuzonwabisa zasebusuku ngokothusayo uzisa inkumbulo yezo ndawo zokuzonwabisa ezinomculo wedisco nezonakeleyo.

Kwinqaku elikwiphephancwadi iLife elithetha ngomculo wasekhaya, omnye okuzondelelayo ukuya kwezi ndawo zokuzonwabisa zasebusuku uthi: “Umculo wokungqungqa xa ukwimekobume yawo uye wasoloko unemvakalelo yobuzwe​—⁠isingqisho esinamandla nesivuselela isini, esikutsalayo de ungenwe ngumoya elinawo elo butho labantu. Okuthile bekungekho kwisiphithiphithi sezixeko, yaye umculo wasekhaya uyasizalisa eso sithuba.” Umsasazi wezomculo kunomathotholo waseNew York uDavid Piccioni uthi: “Injongo ikukuyotywa ngokupheleleyo ubusuku bonke.”

Ngenxa yokuthandwa kakhulu komngqungqo wakutshanje onjengelambada evuselela isini, iphephancwadi iMademoiselle lavakalisa oku: “Isini: Asisenzelwa kumagumbi okuhlambela kunoko sibuyiselwe endaweni yaso​—⁠kumgangatho wokungqungqa. Kwimihla yakudala (iminyaka yee-1970), umgangatho wokungqungqa kwakudlalelwa kuwo yaye amagumbi okuhlambela ayelungiselelwa iintlobano zesini neziyobisi. Ngoku ekubeni wonk’ ubani exhalabele uGawulayo, amagumbi okuhlambela alungiselelwe ukuzihombisa yaye umgangatho ekungqungqelwa kuwo kulapho ubukela khona abanye abantu besiba neentlobano zesini. Okanye besenza ngathi baneentlobano zesini.” Ewe, umculo usenokusetyenziselwa ukwakha isimo sengqondo esiphelisa amandla okuxhathisa ukwenza okubi nasekuvuselelekeni okungokwesini.

Ngubani Odibana Naye?

Zimbi iindawo zokuzonwabisa zasebusuku zikwaziwa njengeendawo zokudibana nothile wesini esahlukileyo. Noko ke, luhlobo luni lwabantu osenokudibana nalo? Enye intombazana eyayikade ithanda ukuya kwezi ndawo zokuzonwabisa zasebusuku ivuma isithi: “Abantu abaninzi apho baphila ubomi bokuziphatha okubi yaye banomdla wokuba neentlobano zesini nothile. Ukuba batsaleleke kuwe, baya kukuthengela iziselo ezibandayo ezininzi baze bakunxuse ubusuku bonke betheth’ izinto ezihlekisayo, ezithandekayo benethemba lokuba uza kunikezela kwiminqweno yabo.”

Zimbi iindawo zide zenzelwa ukulungiselela ezi zenzo zokuziphatha okubi. UDoris, ibhinqa eliselula nalo elalikade lisiya rhoqo kwezi ndawo zokuzonwabisa zasebusuku, uthi: “Kukho iindawo zokuzonwabisa ezinemimandla ekuhlalwa kuyo enezingqengqelo nezihlalo ezilungiselelwe abo bathandanayo apho uninzi luya khona ukuze lwangane luze luphathaphathane. Amadoda amaninzi atshatileyo alapho engahambi nabafazi bawo. Bambi balapho benethemba lokudibana nothile ukulungiselela ukuthandana obo busuku bunye, yaye abanye baze kukhangela iqabane.” UDoris ugqibezela ngokuthi: “Umoya okwiindawo zokuzonwabisa zasebusuku ufak’ isandla ekuziphatheni okubi. Iziselo ezinxilisayo zikhutshwa zikhutshiwe ngobuninzi bazo kude kube ziiyure zakusasa, ibe kukho yonk’ into.”

Kwakhona iindawo zokuzonwabisa zasebusuku ziye zanxulunyaniswa nokusebenzisa kakubi ngokugqithiseleyo iziyobisi. Omnye ongumnini wenye yezi ndawo zokuzonwabisa kunikelw’ ingxelo yokuba wathi: “Lo mbutho . . . unxibelelene ngokupheleleyo neziyobisi.” Iziyobisi neziselo ezinxilisayo ngokufuthi zinokufunyanwa kwanakwiindawo zokuzonwabisa ezineziselo ezibandayo ekucingelwa ukuba akukho tywala kuzo. UJesse, omnye owayekade esiya rhoqo kwezi ndawo zokuzonwabisa zasebusuku, walek’ umsundulo esenjenje: “Umsi womya nowomdiza ngokufuthi uzalisa yonk’ indawo. Inkoliso yabantu elapho inxiba ngendlela evuselel’ inyama: impahla ethe nca neveza umzimba, ukunxiba ngendlela elihlazo, izihombiso zamatye anqabileyo ezibukhazikhazi ngokugqithiseleyo.”

Ukuba Ngolumkileyo

Ukususela kumaxesha amandulo, umculo nokungqungqa bezisetyenziselwa ukuhendela abantu ekuziphatheni okubi. Ngokomzekelo, sifunda ukuba amaSirayeli akha ‘ahlala phantsi, adla asela, esuka ema adlala.’ Oku kwabandakanya umculo ongalawulekiyo nomngqungqo ongenamilinganiselo. Noko ke, oku ‘kudlala’ kwakuyingabula-zigcawu ekunquleni izithixo okubi kakhulu nakwihambo evakalala engenamilinganiselo.​—⁠Eksodus 32:​6, 17-19, 28.

Ngenxa yoko ulutsha olungamaKristu lufanele lukuphephe ukungena nakuyiphi na imeko enokuthi ngokukhawuleza iphumele ekubeni ‘yeyemihlali egqithiseleyo,’ okanye ‘ulonwabo olungalawulekiyo.’ (Galati 5:​19, 21; Byington) EyokuQala kwabaseKorinte 15:​33 isikhumbuza oku: “Musani ukulahlekiswa. Incoko embi yonakalisa izimilo ezilungileyo.” Ngaba ngokwenene umntu angaziyolisa kwiindawo zokuzonwabisa kunye nabantu ‘ezenziwe mnyama iingqondo zabo, zingazani nobomi bukaThixo’ aze angachaphazeleki ngokuyingozi? (Efese 4:​18) Ibe kunjengokuba elinye ibhinqa eliselula livuma lisenjenje: “Unxibelelwano olusenyongweni nobuhlobo lunako yaye ngokufuthi luyakheka phakathi kwakho [nabanye abeza rhoqo kwezi ndawo zokuzonwabisa zasebusuku].” Oku kunokukuchaphazela njani ngokwasemoyeni?

Phofu ke, bambi basenokuqiqa ngelithi, isicombululo sikukuza neqela lamaKristu angoowabo. Noko ke, ubulungisa bunokuveliswa kuphela ngumoya wobuKristu. (Yakobi 3:​18) Ibe umoya okwiindawo zokuzonwabisa zasebusuku ezininzi ulungiselelwe ukuvuselela iimvakalelo ‘zasemhlabeni, ezemvelo nezeedemon,’ kunezomoya.​—⁠Yakobi 3:⁠15.

Kuyavunywa ukuba, asizizo zonke iindawo zokuzonwabisa zasebusuku eziba kwiimeko ezigqithiseleyo ekuxutyushwe ngazo apha, kungeyiyo into esengqiqweni nokuzibopha ngabande linye zonk’ iindawo zokudlela ezinomngqungqo okanye ezinolonwabo. Kodwa uPawulos usiluleka ukuba sihlale ‘sicikida ukuba yintoni na ekholekileyo kakuhle kwiNkosi.’ (Efese 5:​10) Ibe ukuba umenyelwa kwindawo yodumo olungazekiyo okanye oluthandabuzekayo, ufanele ulumke ngokona kona ngokuphathelele ukusamkela eso simemo.​—⁠IMizekeliso 14:⁠15.

Usenokuzibuza imibuzo enjengale: Ngoobani abayayo, yaye banohlobo olunjani lodumo? Yintoni eyaziwa ngabazali bakho okanye abanye abantu abakhulileyo abanokuthenjwa ngale ndawo? Inohlobo olunjani lomoya? Luhlobo olunjani lwabantu oluya rhoqo kuyo? Ngaba ilungiselelwe ulutsha kuphela? Ukuba kunjalo, kunokwenzeka njani ukuba ibe nomoya omhle? Ukuba kukho uhlobo oluthile lokuzonwabisa, lolwantoni? Luhlobo olunjani lomculo oluza kudlalwa? Ngaba yindawo evumela abo bayixhasayo ubukhulu becala ukuba bazihlalele, okanye ngaba yindawo yembutho esenokukunyanzelela ekubeni unxulumane nabanye?

UDoris, ocatshulwe ngaphambilana, uyavuma esithi: “USathana wenza ukuba iindawo zokuzonwabisa zasebusuku zibonakale zinomtsalane, zibangel’ imincili, zifanelekile, zisonwabisa​—⁠zibonakale ziyiyo nantoni na enokusihenda.” Kodwa musa ukukhohliswa luchwayito olubangelwa zezi ndawo zokuzonwabisa zasebusuku! Ziye zafunyanwa zisisirhintyelo esibulalayo kulutsha oluninzi. Fumana iindlela ezamkelekileyo neziyingenelo zokuzonwabisa.b

[Umbhalo osemazantsi]

[Umfanekiso okwiphepha 25]

Abaninzi abaya rhoqo kwiindawo zokuzonwabisa zasebusuku banomdla ngokungakumbi ekuziphatheni okubi ngokwesini kunasekuzonwabiseni