Abantu Abaselula Bayabuza . . .

Ndimele Ndiyijonge Njani Imidaniso Yolutsha?

“Injongo yokuya kwam apho—yayikukuba ndizonwabise.”—UShawn.

“Ndimele ndivume, kwakumnandi apho—kwakumnandi ngeyona ndlela! Kwakudaniswa kungadlalwa, kwadaniswa ubusuku bonke.”—UErnest.

IMIDANISO yolutsha iye yathandwa gqitha kwiminyaka yakutshanje. Ulutsha oluninzi olufuna ukuzonwabisa luquqa kule midaniso.

Ewe, sonke siyafuna ukuzonwabisa. NeBhayibhile ithi likho “ixesha lokonwaba” yaye likwakho “nexesha lokudanisa.” (INtshumayeli 3:4, iToday’s English Version) Noko ke, ngaba lukho ulonwabo lokwenene kwimidaniso yolutsha? Okanye ngaba kukho izizathu ezifuna umntu acinge kabini ngaphambi kokuya kule midaniso?

“Iimbutho Ezingalawulekiyo”

Ngoxa iBhayibhile ingazaleli iimbutho zokuzonwabisa ezifanelekileyo, iyasilumkisa ‘ngeziyunguma,’ okanye “iimbutho ezingalawulekiyo.” (Galati 5:19-21; Byington) Kumaxesha okubhalwa kweBhayibhile, iziyunguma zazisoloko zisenza abantu bangakwazi ukuzilawula. Umprofeti uIsaya wabhala wathi: “Yeha ke abo bavuka ekuseni ukuze bafune nje isiselo esinxilisayo, abazilazila kude kuhlwe ekutshoneni kwelanga ukuze batshiswe yiwayini! Kubakho uhadi, nomrhubhe, nentambula, nembande, ndawonye newayini emathekweni abo; kodwa umsebenzi kaYehova abawukhathalele.”—Isaya 5:11, 12.

Kwezi mbutho kwakubakho “iziselo ezinxilisayo” nomculo ongalawulekiyo. Zaziqala ekuseni zitsho de kurhatyele. Kwakhona, phawula isimo sengqondo sabantu ababesiya kuzo—babeziphatha ngokungathi uThixo akakho! Siyaqondakala ke isizathu sokuba uThixo angazifuni ezi mbutho. Noko ke, uThixo uvakalelwa njani ngoko kwenzeka kwimidaniso yolutsha emininzi namhlanje?

Khawuqwalasele ezi zibakala. Olunye uhlobo lomdaniso oluthandwayo “kukuphakanyiselwa komntu phezulu sisihlwele” nokudanisa ngendlela ebonakalisa ugonyamelo. Enye ingxelo ithi olu hlobo lomdaniso ‘lwavela kwiminyaka yee-1980 emva kokuba ulutsha lwaluthabatheke yipunk eUnited States. Lo mdaniso wavela “kwislam-dance” apho abadanisi bangqubana ngomzimba.’ Abantu abenza lo mdaniso badla ngokuxhuma-xhuma, badlikidle neentloko ngamandla, bangquzulane oku kweenkunzi zegusha bade bagilane nokugilana. Yinto eqhelekileyo ukwaphuka amalungu omzimba nokuba namanxeba, yaye aba badanisi bakhe benzakale emqolo nasentloko. Abanye bade bafe. Umntu uphakanyiselwa phezulu ngezandla sisihlwele. Abaninzi okwenziwa kubo oku bakhe bayekwe baye kuwa phantsi benzakale. Yinto eqhelekileyo ukuba amantombazana acofwa-cofwe ngendlela engafanelekanga.

Akuthandabuzeki ukuba, uThixo akakholiswa yimikhwa enjalo. Ngapha koko, iLizwi lakhe liyalela amaKristu ukuba ‘azilumle kuko ukungabi nabuthixo nakwiminqweno yehlabathi aze aphile ngengqondo ephilileyo.’—Tito 2:12.

Umculo Neziyobisi

Kwakhona, cinga ngohlobo lomculo othandwa kule midaniso. Kweminye kuthandwa umculo werock, okanye umculo onesingqi esiphezulu onamazwi angcolileyo. Kodwa kwimidaniso emininzi kuthandwa irap, okanye ihip-hop. Lo ngumculo okhuthaza isini, ugonyamelo nemvukelo. Ngaba ukuzichanaba kumculo onjalo kwindawo engafanelekanga ngolo hlobo kunokukuchaphazela? UDavid Hollingworth, onolwazi ngeendawo zemidaniso yolutsha wathi: “Umculo unempembelelo enkulu kwiingqondo zabantu. Xa abantu bebaninzi, unokubenza babe ndlongondlongo.” Ayimangalisi into yokuba kweminye yale midaniso kuye kwakho izenzo zogonyamelo kwizixeko eziliqela zaseUnited States. Abantu abaninzi bavakalelwa ukuba olo gonyamelo lubangelwa ngumculo okhuthaza izenzo ezingcolileyo neziyingozi.a

Kwiminyaka yakutshanje kule midaniso kuye kwasetyenziswa iziyobisi. Omnye umphengululi wathi “ukufumaneka nokusetyenziswa kweziyobisi ezahlukahlukeneyo ezingekho mthethweni . . . bekusoloko kusesona sizathu sokuthandwa kwemidaniso.” Enyanisweni, kukho iziyobisi ezibizwa ngokuba zezomdaniso. Abanye abadla ngokuya kule midaniso bade basebenzise iintlobo ezahlukeneyo zeziyobisi. Phakathi kweziyobisi ezidla ngokuxutywa kukho iketamine, enokubangela ingqondo iphazamiseke, okanye idideke, umntu aphefumle nzima yaye onakalelwe yimithambo-luvo. IMethamphetamine inokwenza umntu alibale, abe nengcwangu, abe nomsindo aphathwe yintliziyo onakalelwe nayimithambo-luvo. Esona siyobisi sithandwa ngokukhethekileyo sisiyobisi esenziwa ngeamphetamine ekuthiwa yiecstasy. Inokwenza umntu adideke ingqondo, axhalabe, intliziyo ibethe kakhulu, abe nehigh blood pressure nehyperthermia. Abanye abantu abasebenzisa iecstasy ide ibabulale.

Ukusetyenziswa kweziyobisi ezingekho mthethweni kuyangqubana nomyalelo weBhayibhile othi “masizihlambulule kukho konke ukudyobheka kwenyama nokomoya.” (2 Korinte 7:1) Ngaba bubulumko ukuzichanaba kwindawo ekugquba kuyo ukusetyenziswa kweziyobisi?

Unxulumano Olubi

Khumbula esi silumkiso sikhankanywa rhoqo: “Unxulumano olubi lonakalisa imikhwa elungileyo.” (1 Korinte 15:33) Njengabathandi beziyunguma bamaxesha okubhalwa kweBhayibhile, ulutsha oluninzi oluya rhoqo emidanisweni lubonakala lungayikhathalele kwaphela into yokukholisa uThixo. Enyanisweni, inkoliso yalo inokuchazwa ‘njengabathandi beziyolo kunokuba ithande uThixo.’ (2 Timoti 3:4) Ngaba ngokwenene ufuna ukunxulumana ngokusondeleyo nesihlwele esinjalo?

Olunye lusenokucinga ukuba ukuhamba nolunye ulutsha olungamaKristu xa lusiya kule midaniso kuya kunciphisa iingozi. Noko ke, ulutsha lwamaKristu ‘oluyimizekelo yokwenene yabo bathembekileyo ngehambo’ alunakuvuma ukuya apho. (1 Timoti 4:12) Kwanokuba iqela lolutsha lwamaKristu luyile kule midaniso laza lakwazi ukuhlala ndawonye, umculo ongafanelekanga uza kube uselapho. Lusenokuzifumana lusengxakini xa lucelwa ngabanye ukuba ludanise nabo. Olunye ulutsha luzifumana sele lusilwa! Ngoko ke iBhayibhile ichanile xa isithi: “Ohamba nezilumko uya kuba sisilumko naye, kodwa osebenzisana neziyatha uya kuhlelwa bububi.”—IMizekeliso 13:20.

Umdaniso Ovuselela Inkanuko

Enye into emele iqwalaselwe luhlobo lokudanisa ngokwalo. Kukho uhlobo lomdaniso olungaqhelekanga oluye luthandwa kakhulu, ngokukhethekileyo ngabo bakwishumi elivisayo eUnited States. Lo mdaniso wenziwa xa kukhala iingoma zehip-hop ezinamazwi akhuthaza isini. Ukongezelela, olu hlobo lomdaniso lulinganisa ukuba neentlobano zesini. Luye lwachazwa ‘njengokuba nentlobano zesini unxibe impahla.’

Ngaba ulutsha olungamaKristu lunokufuna ukubandakanyeka kolu hlobo lomdaniso? Alunako ukuba lufuna ukukholisa uThixo osiyalela ukuba ‘sisabe kulo uhenyuzo.’ (1 Korinte 6:18) Abanye basenokuqiqa ngelithi, ‘Ukuba bonke abanye bayakwenza oku, kumele ukuba akuyongozi.’ Noko ke, isihlwele sinokwenza okuphosakeleyo. (Eksodus 23:2) Yiba nesibindi sokuxhathisa oontanga ukuze uhlale unesazela esilungileyo phambi koThixo!—1 Petros 4:3, 4.

Ukwenza Isigqibo

Oku akuthethi kuthi zonke iintlobo zokudanisa ziphosakele. IBhayibhile isixelela ukuba uKumkani uDavide wavuya gqitha emva kokuba ityeya engcwele ibuyiselwe eYerusalem kangangokuba “wayengqungqa . . . ngamandla akhe onke.” (2 Samuweli 6:14) Kumzekeliso kaYesu wonyana wolahleko, uvuyo olwabangelwa kukubuya kwaloo nyana lwaluquka “ikonsathi yomculo nokungqungqa.”—Luka 15:25.

Ezinye iintlobo zokudanisa zisenokwamkeleka kumaKristu endawo ohlala kuyo. Nalapho, kusafuneka ukulungelelana nokusebenzisa ingqiqo. Ukhuseleka ngakumbi xa unandipha umculo yaye udanisa kwiimbutho zamaKristu apho izinto ziba phantsi kweliso elifanelekileyo kunokuba kwimidaniso yolutsha. Kwiimbutho zamaKristu ekuqinisekiswayo kuzo ukuba yonk’ into ihamba kakuhle, abaselula abazahluli bahlale bodwa, kodwa banandipha unxulumano olufanelekileyo namaKristu ahlukahlukeneyo ngobudala.

Ewe, kwindawo ohlala kuyo kusenokubakho iivenkile zokutyela ezinomculo nemidaniso eyamkelekileyo. Kodwa ngaphambi kokwamkela isimemo sokuya apho, kuhle ukuzibuza imibuzo efana nale: Yaziwa ngantoni le ndawo? Ngaba ilungiselelwe ulutsha kuphela? Ukuba kunjalo, ngaba inokuba nezinto ezakhayo? Luhlobo olunjani lomculo odlalwa apho? Luhlobo olunjani lomdaniso owenziwa apho? Bavakalelwa njani abazali bam ngokuya kwam apho? Ukuzibuza le mibuzo kunokukunceda ungangeni enkathazweni.

UShawn, okhankanywe ekuqaleni, uwushwankathela kakuhle lo mbandela. Ngaphambi kokuba abe ngumKristu, wayehamba imidaniso. Uthi: “Kuxhaphake gqitha ukuziphatha okubi kwimidaniso yasebusuku. Umculo olapho uthob’ isidima, umdaniso ubonisa ukuziphatha okubi gqitha yaye inkoliso yabantu iya apho ngeenjongo—iye kufuna umntu eza kuba neentlobano zesini naye.” UShawn wayeka ukuya kule midaniso emva kokuba efunde iBhayibhile namaNgqina kaYehova. Unikela eli cebiso ngokusuka kumava akhe abuhlungu: “Loo midaniso ayiwafanelanga amaKristu.”

[Umbhalo osemazantsi]

[Umfanekiso okwiphepha 26]

Olunye ulutsha luye lwazifumana sele lusengxakini emidanisweni