Imiqobo Ethintela Uxolo Phakathi Kwabantu Namarhamncwa

Abantwana bayayithanda imifanekiso enjengalo ukwiphepha elingaphandle leli phephancwadi. Ngokufuthi iba nomtsalane kwanakubantu abadala.

Kutheni abantu besabela ngolu hlobo? Ngaba uxolo lokwenene phakathi komntu kwanelona rhamncwa lineengcwangu liphupha nje lobuntwana? Okanye ngaba liya kuba yinto yokwenene?

Umntu Ungumqobo

Umqobo omkhulu othintela ukubakho koxolo olunjalo ngumntu ngokwakhe. Umzekeliso wamandulo uthi: ‘Umntu uye wagunyazela umntu kwaba kubi kuye.’ (INtshumayeli 8:⁠9) Yaye imbali yomntu yokwenzakalisa abanye abantu ibonakala kwimpatho aphatha ngayo izilwanyana.

Ngokomzekelo, amarhamncwa asendle aliqela ayebanjwa aze alwiswe kumabala emidlalo kwiRoma yamandulo. Ngowe-106 C.E., umlawuli waseRoma uTrajan kuthiwa wenza imidlalo ekwathi kuyo kwabulawa amadoda awayesilwa angama-10 000 namarhamncwa angama-11 000 ukuze kwaneliswe ukunxanelwa igazi kwababukeli abanogonyamelo.

Liyinyaniso elokuba, uhlobo olunjalo lokuzonwabisa aluyonto ixhaphakileyo namhlanje. Kodwa ukwanda kwenani leendidi zezilwanyana eziphelileyo emhlabeni nezisengozini yokuphela kunikela ubungqina bokuba kukho okuthile okuphosakeleyo kwindlela umntu aziphatha ngayo izidalwa zasendle. Njengoko amanani abantu esanda, iindawo zokuhlala izilwanyana ziyancipha. Yaye ngenxa yokubawa kwabantu, iimfele, iimpondo, namabamba ezilwanyana ezinqabileyo afunwa ngokubanzi. Zimbi iingcali zoyikela ukuba ekugqibeleni ekuphela kwezilwanyana ezininzi eziya kufumaneka iya kuba zezo zikwiindawo zokugcinwa kwezilwanyana.

Izilwanyana Ezidla Abantu

Kusenokubonakala ngathi omnye umqobo othintela ukubakho koxolo ngamarhamncwa athile asendle. EAfrika naseAsiya, akunto ingaqhelekanga ukufunda iingxelo zokuba amarhamncwa asendle aye ahlasela aza abulala abantu. IThe Guinness Book of Animal Facts and Feats ithi amarhamncwa akuhlobo lweekati “kusenokwenzeka ukuba abangela ukufa kwabantu abamalunga ne-1000 nyaka ngamnye.” EIndiya kuphela, izingwe zibulala abantu abangaphezu kwama-50 nyaka ngamnye. Wambi amahlosi kwelo lizwe aye azizidla-bantu.

Kwincwadi yakhe ethi Dangerous to Man, uRoger Caras ucacisa ukuba maxa wambi amahlosi aba zizidla-bantu emva kokudla inyama ebolileyo yezidumbu zabantu xa bekukho ubhubhani wesifo. Ucacisa athi, ngokufuthi oobhubhani abanjalo baye “balandelwa ziinyanga zoloyiko njengoko amahlosi esanelisa uthando lwawo ngencasa asandul’ ukuyiva yenyama yomntu aze aqalise ukubulala.”

Kodwa lo kaCaras uphawula ukuba oobhubhani bezifo ababangeli zonke iintlaselo zamahlosi. Omnye unobangela woku kukuvuseleleka kwesilwanyana, ingakumbi xa sikufutshane nabantwana.

Ebudeni beminyaka yee-1918-26, ihlosi elinye eIndiya labulala abantu abali-125, ngokutsho kwengxelo kaColonel J. Corbett kwincwadi yakhe ethi The Man-Eating Leopard of Rudraprayag. Kumashumi eminyaka kamva, amahlosi azizidla-bantu abulala ubuncinane abantu abangama-82 kwisithili saseBhagalpur.

Umgcini-zilwanyana eTanganyika (ngoku eyinxalenye yeTanzania) wabalisa indlela awachitha ngayo iinyanga ezintlanu ngowe-1950 ezama ngokungenampumelelo ukudubula ihlosi elisisidla-bantu elalinxunguphalise abantu kummandla ongqonge ilali yaseRuponda. Ekugqibeleni, emva kokubulala abantwana abali-18, labanjiswa ngummi waloo dolophana yaseAfrika. Elinye ihlosi labulala abafazi nabantwana abangama-26 kwidolophana yaseMasaguru.

Kukwakho ke nengonyama yaseAfrika. Xa ithe yaqalisa ukudla abantu, ngokufuthi amaxhoba iba ngamadoda akhulileyo. UC. Ionides kwincwadi yakhe ethi Mambas and Man-Eaters, ubhala athi, “Kwiminyaka engamashumi amabini anesithathu endayichithela kwiSebe Logcino-Zilwanyana, ndadubula iingonyama ezingaphezu kwamashumi amane, inkoliso yazo eyayizizidla-bantu, ngoxa intsalela yayisele iza kuba zizidla-bantu okanye yayigqugqisa imihlambi.” Ngokutsho kukaIonides, iingonyama ziba sisisongelo kubantu xa umntu enciphisa ngokungathethekiyo amaxhoba azo.

Uxolo Lomhlaba Wonke Lwaxelwa Kusengaphambili

Phezu kwayo nje le miqobo ethintela ukubakho koxolo phakathi kwabantu namarhamncwa, iBhayibhile ithi: “Zonke iimvelo zezinto ezizitho zine . . . ziyadanjiswa, kanjalo sezikhe zadanjiswa yimvelo eyiyeyabantu.”​—⁠Yakobi 3:⁠7.

IBhayibhile ixela kusengaphambili kuHezekile 34:​25 isithi: “[Mna Thixo] ndiya kuwenzela umnqophiso woxolo, ndiwaphelise amarhamncwa amabi elizweni, uhlale entlango ukholosile, ulale emahlathini.”

Ngaba iziprofeto zeBhayibhile ezinjalo ziliphupha nje elingekho gqiqweni? Ngaphambi kokuligatya ithemba loxolo lomhlaba wonke phakathi kwabantu namarhamncwa, qwalasela ezinye izinto ezalatha kubunyaniso boko iBhayibhile ikutshoyo. Kuye kwabhalwa ngeminye imizekelo emangalisayo yemvisiswano phakathi kwabantu abanenkathalo namarhamncwa asenokuba yingozi.