Imbono YeBhayibhile

UmKristu Unokuzikhusela Ukusa Kuwuphi Umkhamo?

“Kutheni usoloko usoyika nje? Funa iindlela ezisebenzisekayo zokuzikhusela nezokuzisindisa kulowo ukuhlaselayo. Ubuchule bokuzikhusela obulula nobuphumelelayo buye babonakaliswa ngokweenkcukacha. Le video inenkcazelo engokwenza umahluko phakathi kokuba lixhoba okanye ube ngosindileyo.”​—⁠Isibhengezo se-“Video” ebonisa iindlela zokuzikhusela.

AKUKHO namnye onokuyithandabuza indlela enokuba ithengwa ngayo loo video namhlanje. Kwisixeko sasePhiladelphia, ePennsylvania, eUnited States, amaqela olutsha amemeza esithi, “Betha, betha, betha” njengokuba ehamba-hamba ezitratweni efuna amaxhoba anokuwaphanga. Iphephancwadi iTime lithi, “Uloyiko ngenxa yolwaphulo-mthetho luyinto eqhelekileyo kuso sonke eso sixeko” saseRio de Janeiro. EHong Kong izenzo zokuphanga eziphelekwa kukusetyenziswa kwezixhobo nezokudubulana zenzeka kwimimandla apho ulwaphulo-mthetho phantse belungaziwa​—⁠kude kube ngoku.

Kuviwa iingxelo ezikwafanayo ehlabathini jikelele. Ngawuphi umphumo? INewsweek ithi, “Abemi baqwalasela ngenyameko iingozi zokuphindisa ngokudubula.” AmaKristu awakhuselwanga kula “maxesha anomngcipheko,” kodwa ngaba ngenene ukuphindisa ngokudubula kwenza “umahluko phakathi kokuba lixhoba okanye ube ngosindileyo”?​—⁠2 Timoti 3:⁠1.

Ukubuyisela Ugonyamelo Ngogonyamelo?

Abanye bakholelwa kwelokuba, ‘Ukuba ndiphatha umpu ndiya kukhuseleka. Ndiya kumdubula ngaphambi kokuba andidubule. Ubuncinane ndiya kumoyikisa!’ Noko ke, akulula ngolo hlobo.

UGeorge Napper oligosa eliphambili kukhuseleko lukawonke wonke eAtlanta, eGeorgia, eUnited States, uthi: “Ukuba nompu kuthetha ukukulungela ukujamelana nomphumo wokubulala omnye umntu.” Ngaba umKristu ukulungele ukujamelana nomphumo onjalo, osenokuquka ityala legazi?​—⁠Thelekisa iNumeri 35:​11, 12.

Kwakhona, iLizwi likaThixo liyalela oku, ‘Khandani amakrele enu abe ngamakhuba’ yaye, ‘Funani uxolo niluphuthume.’ (Mika 4:⁠3; 1 Petros 3:​11) AmaKristu anokufuna njani ukuzikhusela ngemipu aze kwangaxeshanye aphile ngokuvisisana nemigaqo yeBhayibhile? Kakade ke, umntu ohlaselayo unobuchule bokuhlasela kuqala kunexhoba.

UYesu akazange akuvume ukuzikhusela ngezixhobo. Kuyinyaniso ukuba wayalela abapostile bakhe ukuba baphathe amakrele amabini ukuya kwisitiya saseGetsemane, indawo apho awayeza kubanjelwa khona. Kodwa kwakutheni ukuze ayalele oku? Ukuba nezixhobo, baze bangazisebenzisi, kwabonisa ngamandla ukuba abalandeli bakaYesu babengafanele babhenele kwizixhobo zokwenyama. Kubalulekile ukwazi ukuba ngokusuka abe nesixhobo esikufuphi, uPetros ngokungxama wasisebenzisa. UYesu wamkhalimela ngesi senzo sokutyhuthuzela ngala mazwi: “Bonke abathabatha ikrele baya kutshabalala likrele.”​—⁠Mateyu 26:​36 47-56; Luka 22:​36-38, 49-⁠51.

Omnye usenokuthi, ‘Oku kusebenza xa unemipu. Kodwa kuthekani ngokufunda ubugcisa bokulwa bokuzikhusela, obunjengejudo, ikarate nekendo?’ Zibuze oku, ngaba injongo ephambili yolu qeqesho asikokulwa okanye ukwenzakalisa abanye? Yaye ngaba uqeqesho olunjalo ngenene alulingani nokuxhobisa ubani ngokuyingozi? (1 Timoti 3:⁠3) Kwanezihlandlo zoqeqesho ziye zaphumela kukwenzakala okukhulu nakwiingozi ezibulalayo.

AmaRoma 12:​17-19 anikela icebiso lobulumko kulo mbandela: “Ningabuyekezi ububi ngobubi nakubani. . . . Ukuba kunokwenzeka, okukokwenu nina, hlalani ninoxolo nabantu bonke. Musani ukuziphindezelela, zintanda, yikhweleleni ingqumbo; kuba kubhaliwe kwathiwa, Impindezelo yeyam, kuya kubuyekeza mna, itsho iNkosi.” Igama lesiGrike uPawulos awalisebenzisayo elithetha “ububi” (ka·kosʹ) lisenokuthetha “ukutshabalalisa, ukwenzakalisa.” Ngenxa yoko, amaKristu amele azigcine kwingcingane yokubuyekeza ububi ngokwenzakalisa okanye ukubangela ingozi komnye umntu.

Kunokuba abonakalise umsindo wakhe, umKristu ukholose ngokupheleleyo ngoThixo, othi ngabantu bakhe: “Onichukumisayo uchukumisa ukhozo lweliso [“lam,” NW].” Ngokuvisisana noku, uThixo uthembisa ‘ukubatshabalalisa bonke abangendawo’ kungekudala.​—⁠Zekariya 2:⁠8; INdumiso 145:⁠20.

Liliphi Ixesha Lokulwa?

Abanye ngenkalipho badanduluka besithi, ‘Andinakuze ndiyincame imali yam ngaphandle komlo!’ UDick Mellard, umalathisi wemfundo kwiZiko leSizwe Lokuthintela Ulwaphulo-Mthetho, ulumkisa ngokuthi: “Kungokwemvelo ukuxhathisa, kodwa imvelo yomntu [inokukubulalisa] kwimeko embi.” Abaphangi abaninzi baxhobe ngokuyingozi yaye baxhalabile baphaku-phaku. Imali ophulukene nayo inokuphinda ifunyanwe, kodwa kuthekani ngobomi ophulukene nabo? Ngaba umele uxhathise?

UGeorge Napper unikela eli cebiso: “Mhlawumbi eyona ndlela ilungileyo yokuzikhusela kukujongana nengozi yokuphulukana nezinto zakho kunobomi bakho. Inkoliso yabaphangi nabaqhekezi abazanga zokubulala, bazokuba.” Kwiimeko apho umntu acelwa umngeni nje okanye xa imali yakhe ifunwa ngegunya, umgaqo osengqiqweni ngulo: “Umkhonzi weNkosi akamele kulwa.”​—⁠2 Timoti 2:⁠24.a

Oku akuyonkcaso yomlo, inkqubo yokungaxhathisi naphantsi kwaziphi na iimeko. KwiEksodus 22:​2, 3, apho kuchazwa imeko yesela elibethwa life ngoxa lingena endlwini kabani emini. Imilinganiselo enjalo yokuzikhusela yayigqalwa njengefana nokubulala, ekubeni isela belinokwaziwa lize lisiwe kwinkundla efanelekileyo yamatyala. Kodwa ebusuku, bekuya kuba nzima ngomninimzi ukulubona olu ndwendwe lungamenywanga aze aqiniseke ngeenjongo zalo. Ngoko ke, umntu obulala olu ndwendwe ebusuku wayegqalwa njengongenatyala.

Ngaloo ndlela, iBhayibhile ayizixhasi iinzame zokungxama ngokuzikhusela. Phofu ke, ibonakalisa nokungakuxhasi ukuziyekelela ukuze ube lixhoba, iBhayibhile ibonisa ukuba likhona ixesha lokuzikhusela. AmaKristu anokukuphepha ukuhlaselwa kwawo ngamandla emzimbeni, kwiintsapho zawo, okanye kwabanye abayifuna ngokwenene inkuselo.b Kodwa awanakuqala ahlasele, ngokwawo, engenakuzikhusela ngokwenzakalisa ngokwasemzimbeni ukusindisa izinto zawo. Awanakuphatha izixhobo elindele ukuhlasela okunjalo; kunoko enza iinzame “zokuhlala eseluxolweni.”​—⁠2 Korinte 13:​11, NW.

[Imibhalo esemazantsi]

[Inkcazelo Ngomfanekiso okwiphepha 12]

Betrayal of Christ, by Albrecht Dürer, 1508