IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • g91 8/8 iphe. 25-26
  • UGawulayo—Oko Abazali Nabantwana Bafanele Bakwazi

No video available for this selection.

Sorry, there was an error loading the video.

  • UGawulayo—Oko Abazali Nabantwana Bafanele Bakwazi
  • Vukani!—1991
  • Imixholwana
  • Amanqaku Afanayo
  • Oko Ufanele Ukwazi
  • Ukunceda Abo BanoGawulayo
    Vukani!—1994
  • UGawulayo—Amanqam Kwabeshumi Elivisayo
    Vukani!—1991
  • UGawulayo—Ngaba Ndisengozini?
    Vukani!—1993
  • UGawulayo—Ilahleko Elusizi Ayibangelayo Ebantwaneni
    Vukani!—1991
Khangela Okunye
Vukani!—1991
g91 8/8 iphe. 25-26

UGawulayo—Oko Abazali Nabantwana Bafanele Bakwazi

NGELISHWA kubantwana abaninzi abafikisayo nabangamaxhoba kaGawulayo, iingxaki zabo ngokufuthi zenziwa zintsonkothe yindlela engalungelelenanga abacinga ngayo abantu abaninzi abakhulileyo nabanolwazi oluncinane ngoGawulayo. Kwiimeko ezininzi abazali baye bahlwayela ezingqondweni zabantwana babo intiyo ngabo banesi sifo. Kwanasemva kokuba oogqirha beye bathi akukho bungozi, abahloli neenqununu zezikolo ziye zala ukubamkela abafundi abanentsholongwane kaGawulayo. Ngenxa yoko abazali abaninzi abanabantwana abaneHIV bakugcina oku kuyinyewe yakwamkhwekazi. Kwiimeko ezithile ngezizathu ezivakalayo, banoloyiko lokuba abantwana babo baza kwenziwa amakheswa, baxhatshazwe, okanye bangcungcuthekiswe kakubi.

Ngokomzekelo, umama owayenentombi enoGawulayo wayesoyika ukusukuzana nabamelwane bakhe kangangokuba wamthintela umntwana wakhe ekudlaleni nabantwana babo. “Akuthandi ukuba abamelwane bazi ukuba umntwana wakho unoGawulayo, kuba abantu benza izinto ezihlasimlisayo.” Ngokutsho kweengxelo, oku asikokubaxa. Abazali baye baphetshwa ngabahlobo babo abasenyongweni nangabamelwane. Abahlobo bayabaphepha ezitratweni kunokuba bavuyele ukubabona okanye bababulise. Ityhefu kaGawulayo yendele nzulu ekubangeleni intiyo kangangokuba abathengi baye baphuma bahamba kwiivenkile zokutyela abaqhele ukuthenga kuzo, bebhodl’ izabhongo zamazwi xa kungena intsapho enomntwana onoGawulayo. Oobawo baphelelwe yimisebenzi. Abanye baye basongelwa ngeziqhushumbisi. Ukanti abanye batshiselwe amakhaya abo.

Abantwana abanoGawulayo baye baba ngamaxhoba okuqhulwa kakubi ngabafunda nabo. Elinye ixhoba elinjalo likaGawulayo, elasulelwa sesi sifo ngotofelo-gazi, lalityholwa ngokuphindaphindiweyo ngamaqabane alo esikolo ngokuba lilifanasini. Ayelingcikiva esithi: “Siyayazi eyona ndlela owamfumana ngayo uGawulayo.” Intsapho yakowalo yayibalekwa ngamalungu ecawa yayo. Kwakufika iileta ezimbi nezingaziwayo apho zivela khona. Imfumba yenkunkuma yayiphoswa engceni yayo. Omnye umntu wade wadubula imbumbulu yangena kwifestile engaphambili.

Omnye umama onomntwana onoGawulayo wathi, “Iludaba lwakwamkhwekazi, yaye yiloo nto emenza azive eyedwa.” IThe New York Times yongezelela ilizwi layo: “Abaninzi kubantwana baseMerika abali-1 736 abangaphantsi kweminyaka eli-13 abafunyaniswa benoGawulayo bangamalolo ngenxa yesi sifo sabo, benyanzeleka ukuba bayifihle imeko yabo kubahlobo abasempilweni okanye kumaqabane esikolo asenokubaphepha.” Ibe, okokugqibela, kwaphawulwa oku kwiThe Toronto Star: “Kwanasemva kokuba umntwana efile, iintsapho ezininzi ziyoyika ukuveza inyaniso, okwandisa intlungu nobulolo obuhambisana nokushiywa kwabo ngumntwana wabo.”

Oko Ufanele Ukwazi

Kufanele kuqondwe ukuba uGawulayo akakhethi bantu batheni. Unokwasulela izityebi, amahlwempu, abaselula, iintsana nabantu abadala. Kumazwe athile, abasebatsha banolwazi oluncinane gqitha ngoGawulayo. Ingcali ngoGawulayo yesiXeko saseNew York yathi, inkoliso yabantu “ayibuqondi ubukhulu bengozi uGawulayo ayiyo kwabeshumi elivisayo.”

Ngokomzekelo, uhlolisiso lwabantu abaselula kwisixeko esikhulu saseMerika lwatyhila ukuba abangama-30 ekhulwini kwabo bahlolwayo babekholelwa ukuba uGawulayo unokunyangeka ukuba unyangwe kwangethuba. Okwangoku alukho unyango lukaGawulayo olusele lufunyenwe. Umntu omnye kwabathathu wayengazi ukuba umntu akanakwasulelwa nguGawulayo ngokuchukumisa nje umntu onesi sifo okanye ngokusebenzisa inkcaza yakhe. Uhlolisiso olongezelelekileyo lwabeshumi elivisayo abangama-860, abaneminyaka eli-16 ukusa kweli-19 ubudala, kwelinye icala leUnited States lufumanise ukuba abangama-22 ekhulwini babengazi ukuba intshologwane kaGawulayo inokudluliselwa ngolwelo olukhutshwa yindoda yaye abangama-29 ekhulwini babengazi ukuba inokudluliselwa ngolwelo olukhutshwa ngamabhinqa.

Ebudeni balo lonke ixesha lokufukama kukaGawulayo kwanasebudeni bexesha lokuqandusela kwakhe ngokwenene, amaxhoba ayasulela ibe anokuyidlulisela kwabanye intsholongwane kaGawulayo. Noko ke, ayinakudluliselwa ngokuxhawula okanye ukugona ixhoba likaGawulayo, ekubeni intsholongwane isifa ngokukhawuleza yakuba ngaphandle komzimba. Ngokufanayo, le ntsholongwane ayinakuhlala kwizihlalo zezindlu zangasese, nto leyo eyoyikwayo ngabantu abathile. Ngaba iinqununu nabahloli bezikolo babesoyika ukuba abafundi abangenaye uGawulayo babenokwasulelwa sesi sifo ngokusela kwiimpompo zamanzi ebezisandul’ ukusetyenziswa lixhoba likaGawulayo? Iingcali zithi olu loyiko alusebenzi njengokuba intsholongwane ingayi kuba nandlela yakungena egazini lomntu ongasulelwanga.

Oogqirha basoloko bebuzwa ngobungozi bokugqobhoza indlebe, ekubeni kusetyenziswa iinaliti. Iingcali ziyavuma ukuba ukuba kusetyenziswa isixhobo esingcolileyo, le isenokuba yindlela yokufumana intsholongwane kaGawulayo. Yaye kuthekani ngokuncamisa? Enye ingcali yathi: “Ukuba ubani othile onoGawulayo okanye owasulelwe yiHIV uyakuncamisa, ube wena unenxeba elophayo okanye isilonda emilebeni okanye emlonyeni wakho, usenokwasulelwa, kodwa kunqabile kakhulu.” Noko ke, kusenokwenzeka.

Ekuphela kwendlela onokwazi ngayo ukuba wasulelwe, kwanasemva kokuba kuvele iimpawu ezikrokrisayo, kungokuxilongwa ngenyameko ngugqirha nokuhlolwa kwegazi.

Ibe, okokugqibela ukuba ungumntwana, nyaniseka kubazali bakho. Xa bonke abanye bekushiya, iya kuba ngabo abanokuba ngabahlobo bakho baze bakunike intuthuzelo noncedo oya kulufuna. Yiba nobulumko uze ungazamkeli iziyobisi ibe ungavumi ukuba neentlobano zesini ngaphambi komtshato. Oku kunokubusindisa ubomi bakho. Abantu abaselula abaninzi abafumene intsholongwane kaGawulayo ngesini okanye ngeenaliti ezingcolileyo baye bavuma ukuba baphenjelelwa lunxulumano olubi. Ngokuqinisekileyo, amazwi ompostile uPawulos anentsingiselo enzulu kubo ngoku: “Musani ukulahlekiswa. Unxulumano olubi lonakalisa imikhwa elungileyo”​—⁠yaye kwiimeko ezithile, lunokusuba ubomi bakho.​—⁠1 Korinte 15:​33, NW.

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share