Amandla Enyaniso Okulungisa Isimilo Somntu
“Omnye umqhekezi, okhululwe ngaphambi kwexesha, uqhekeze izihlandlo ezingama-500 kwiinyanga ezisixhenxe. Isidlwengu, esikhululwe kwiminyaka emine ngaphambi kokuba iphele iminyaka elishumi esasigwetywe yona, sihlasele elinye ibhinqa ngokwesini saza salibulala. Umbulali owanikwa ilungelo lokugqibezela isigwebo sakhe ngaphandle uqhekeze kumakhaya amabini waza wabulala abantu abathathu.”—IReader’s Digest kaNovemba 1990.
“Phantse ama-63 ekhulwini amabanjwa awakhululwa kwiintolongo ezinkulu aye abanjelwa ulwaphulo-mthetho olunzulu kwisithuba nje seminyaka emithathu, ngokutsho kweSebe Lezobulungisa kuhlolisiso olukhutshwe namhlanje.”—IThe New York Times ka-Aprili 3, 1989.
“Ingcamango yokuba intolongo yindawo yokulungisa isimilo sezaphuli-mthetho ayichananga. Iintolongo ziindawo nje zokugcina izaphuli-mthetho nalapho zifunda khona ubugewu obungakumbi.”—ISunday Star yaseToronto kaMatshi 20, 1988.
Umgcini wamabanjwa eRikers Island, intolongo yesiXeko saseNew York, uthi: “Umntwana ufika apha, eneminyaka elishumi elinesithoba ubudala, ebengumntu obegade ukuza kwamapolisa xa bekuphangwa. Xa ephuma apha akayi kuba engumntu ogada ukuza kwamapolisa. Kwixesha elilandelayo, uza kuba ngumfana odubulayo.” —Iphephancwadi iNew York ka-Aprili 23, 1990.
“Amasango entolongo aye afana ngokungakumbi neengcango ezijikelezayo: phantse amabanjwa amabini kwamathathu ayabanjwa kwakhona kwisithuba seminyaka emithathu emva kokukhululwa kwawo.”—Iphephancwadi iTime kaMeyi 29, 1989.
AKUKHO nanye kwezi ngxelo zingasentla evakala intsha. Yinto eqhelekileyo: Iintolongo azisilungisi isimilo somntu. Yinyaniso esilungisayo. Nanku umzekelo ongqinela oku: uRon Pryor.
URon uqalisa usuku ngalunye ngokufunda nentsapho yakhe itekisi eseBhayibhileni. Umtshato wakhe unoxolo nothando. Ikhaya lilungelelene yaye licocekile. Oonyana babo ababini babengabafundi abalungileyo—ba benga zibandakanyi kwiziyobisi, etywaleni nakwiingxaki. Ngoku bazimele ibe babandakanyeke kwimisebenzi yamaKristu. URon nomfazi wakhe uArlynn, baxakekile kwindawo abahlala kuyo besenza umsebenzi wokuzithandela njengamaKristu. Basebenzisa ubomi babo ekuncedeni abanye abantu.
Noko ke, ngowe-1970, uRon Pryor wayesentolongweni elindele ukuchotshelwa kwetyala awayebekwa lona lokubulala. Wafunyaniswa enetyala, wagwetywa, waza waqalisa ukutsala isigwebo sakhe kwintolongo enkulu. Le yayiyincopho yekhondo lakhe njengomguvela owaziwayo nelambangela ukuba aquq’ ebuyelela entolongweni. Kodwa masimvumele uRon asibalisele ngokwakhe ibali lakhe.
“Isihlandlo sokuqala ‘sokuvalelwa’ endisasikhumbulayo yaba kukubotshelelwa ngebhanti kucingo lokwaneka impahla. Xa ndandineminyaka emithathu okanye emine ubudala, ndandibonakala ngokungathi ndandirhawuzelelwa lunyawo. Ndandiye ndibhadule, ndilahleke, ndicholwe ngamapolisa aze andigoduse. Ekugqibeleni, umama wandixelela ukuba ukuba ndandingakuyeki oko, wayeya kutsalela umnxeba umzi weenkedama aze ababize ukuba bandithathe baze bandivalele. Ndahlala eyadini ndilila ndibalindele ukuba beze. Abazange beze. Kunoko, umama wandibophelela ngebhanti kucingo lokwaneka impahla.
“Njengoko ndandisiya ndikhula, ndandisoloko ndingena ezingxakini, ibe zonke iingxaki ndandizilungisa ngogonyamelo. Ndandididekile, ndixakanisekile, ndingafunwa. Ndandingayazi into elungileyo nembi. Ndandilawulwa ziimvakalelo zam kunokuba ndilawulwe sisazela sam. Esikolweni ndandidluliselwa ukusuka kwelinye ibanga ukuya kwelilandelayo kuba abafundisi-ntsapho babekuvuyela ukwahlukana nam. Kwibanga lesihlanu ndasiyeka isikolo ndaza ndalishiya ikhaya. Ndanxulumana namaqabane amabi, ibe ngokuvisisana nesilumkiso esingokweZibhalo, oku kwandikhokelela kwinkathazo enzulu ngakumbi.—1 Korinte 15:33.
“Kungekudala izikolo zokuhlaziya izimilo zakuthabathel’ indawo ukubotshelelwa ecingweni lokwaneka impahla. Azizange zisiguqule esam isimilo. Ndandiye ndibaleke ndibuye ndibanjwe kwakhona. Xa ndazimela kwesinye isikolo eVirginia, ndaba ilori yokuthutha impahla ndaza ndabanjwa. Ndimi phambi komgwebi owayenegama elinguJenkins ndimangalelwa ngokuba isithuthi, ndafumanisa ukuba le lori ndandiyibile yayiyeyomgwebi uJenkins! Ndandineminyaka eli-16 kuphela ubudala, kodwa umgwebi wavakalisa ukuba ndiqaqadekile laza ke ityala lam lasingathwa ngokwelomntu okhulileyo. Ndavalelwa iminyaka emibini.
“Emva kokuba ndiphumile entolongweni yaye ndikwiminyaka yam yama-20, ndafumana isithuthuthu. Imvakalelo yokuba namandla esasindinika yona yayinomtsalane kum. Kodwa oko kwakunganele. Ndaba lilungu leePagans—iqela leenjubaqa elalisihla linyuka ngezithuthuthu nelalisoloko linxanelwe inkathazo, ngamaxesha onke linomnqweno wokuqala umlo. Ndaba ngathi ndandizalelwe kweli qela.
“Kamva, ndasebenza njengomqhubi welori ndithutha imveliso yokutya kwiindawo ezingaphandle kweFlorida. Ndandingasahambi neqela leePagans, kodwa xa ndandidlula eVirginia ngeli xesha, ngowe-1969, ndahlangana nabanye babo babesakuba ngamaqabane am kwiiPagans. Saqalisa ukuvuyisana—sisela iwayini, siyotywe ziziyobisi. Kwavuka udushe, lwaya lusanda, ibe kwisiphithiphithi esalandelayo siphenjelelwa butywala naziziyobisi, ndadubula ndaza ndabulala enye indoda. Esi yayisisiqhamo esingakumbi sonxulumano olubi! Kamva, abacuphi ababini bandincina, ndaza ndavuma ukuba ndandibulele. Oku kwakungowe-1970.
“Ndandisentolongweni ndilindele ukuchotshelwa kwetyala ibe ndandisengumqhwayi wenkathazo ovukelayo. Ngokomzekelo, ngenye intsasa umbanjwa owayephathiswe amalungelo athile weza nekofu. Babedla ngokukunika ikomityi yesibini ukuze uyiphunge ngelinye ixesha. Ngaloo ntsasa, ndasondeza enye ikomityi yam embizeni, kodwa wathi, ‘Ayikho engakumbi.’ Ndazigqibela kwelokuba wayegqibe kwelokuba ayinike omnye umntu. Ngoko ndathi, ‘Akunakofu yaneleyo ngale ntsasa, hi?’ Wathi, ‘Kunjalo.’ ‘Ukuba kunjalo ke thabatha le yam.’ Ndamchithela ngayo ebusweni. Ngenxa yoku ndavalelwa ndedwa esiseleni esimnyama.
“Ngoko ndandinkolonkoloza kweso sisele sinobude [obuziimitha ezimbini ezinesiqingatha nobubanzi obuziimitha ezintathu] nesingenazifestile. Okwesihlandlo sokuqala ebomini bam ngokwenene ndaqalisa ukucinga. Ndaqalisa ukuzibuza imibuzo emininzi. ‘Kutheni le nto ubomi bam, busoloko busenyuleni nje? Kutheni ndisoloko ndingena ndiphuma entolongweni? Kutheni khona ndikwesi sisele simnyama? Kutheni ndilapha nje? Kutheni? Kutheni? Kutheni? Ndaqhubeka ndizibuza imibuzo emininzi, kodwa kwakungekho zimpendulo. Ngoko ndazixelela oku: ‘Ngoku inkal’ ixinge etyeni. Amacebo aphelile. Ngaphandle—ngaphandle kokuba ukho uThixo—kokuba uThixo ondibonayo, owaziyo ukuba ndiyaphila, uyandiqonda—njengoko mna ndiqinisekile ukuba andiziqondi! Thixo, ukuba ukho, ukuba undikhathelele, ukuba kukho nto ndingayenzayo—ndixelele nje okuthile, nantoni na!’
“Kweso sisele kwakukho iBhayibhile. Ndacinga oku, ‘Oko kusisiqalo.’ ndaqalisa ukuyifunda. Andikukhumbuli endakufundayo. Ndikhumbula nje ukuba ndayifunda, kungekho nto ndiyiqondayo. Kwisithuba nje seveki ndabuyiselwa kumgangatho wezisele. Esinye isisele sasingenamntu, zombini iibhedi ezilapho zazingenabantu. Bandingenisa kuso, ibe kwiintsuku ezimbini kamva bangenisa elinye ibanjwa elathi lahlala nam. Ngelo xesha ndandifunda iBhayibhile, ndingayiqondi. Eli banjwa landibona ndifunda laza labuza: ‘Ngaba ungathanda ukuyiqonda iBhayibhile?’ ‘Ewe!’ ‘Ndiza kukufunela incwadi eza kukunceda.’ Ladibana nelinye lamaNgqina kaYehova—ngasihlandlo sithile ayekhe afundisisa nalo—ibe kungekudala landinika incwadi enomxholo othi INyaniso eKhokelela kuBomi obungunaPhakade. Ngoko kwakungoJulayi wowe-1970.
“Ndaqalisa ukuyifunda, ibe ndayifunda ukususela ekuqaleni kuse ekugqibeleni. Andizange ndiqonde yonke into, kodwa yayisengqiqweni. Njengokuba amaNgqina kaYehova eza aza afundisisa kunye nam, yonke imibuzo endayibuza kwesaa sisele simnyama yaqalisa ukuphendulwa. Okwesihlandlo sokuqala ebomini bam, ndaba nokukuqonda okulungileyo nokubi. Okukhona ndandikutya oku kutya kokomoya, kokukhona ndandiya ndisondela ekubeni ngofana ‘nabo bathi ngenxa yobugcisa, babe nezimvo eziqheliselwe ukucalula okuhle kwanokubi.’ (Hebhere 5:14) Isazela sam sashukumiseka, sabuyela ebomini!
“Oku kufumana ngequbuliso inyaniso yeBhayibhile kwabangela iinguqulelo zokwenene kwingqondo yam. Ndayifunda loo ncwadi kwiiyure ezingama-24. Ngobusuku nje obunye ndandiguqukile ukusuka komnye umlinganiselo ukusa komnye. Ndandizimisele ukuwabonisa la mabanjwa ndandivalelwe nawo ukuba yayiziinyaniso ezi ndandizifunda. Ndandicinga ukuba wonk’ ubani wayeya kuthabatheka yiyo ngendlela endandithabatheke ngayo. Ayengenjalo. Ngaphambili ndandiwaphethel’ imbengwana amanye amabanjwa ndiwachukela; ngoku ndandiwacaphukisa ngakumbi—nto leyo kwakungekho bani wayecinga ukuba ingenzeka! Kodwa njengoko amaNgqina ayeqhubeka esiza kwintolongo yenqila ukuza kufundisisa nam, ndaba nobuchule obungakumbi ekushumayeleni kwam.
“Ndenza iinguqulelo ezininzi, ndaza kwiinyanga ezimbini ndaba libanjwa eliphathiswe iimbopheleleko ezithile. Bade bandivumela nokuphumela ngaphandle, okwakuyinto emangalisayo ngenxa yengxelo yam yangaphambili nesizathu sokuba ndibe ndandikuloo ntolongo. Imigaqo endandiyifunda eBhayibhileni yayisebenza. Amanzi enyaniso yeLizwi likaThixo ayesenza umsebenzi wawo wokucoca, njengokuba ayenjalo ngemihla yabapostle. Amandla awo okulungisa isimilo somntu abonakaliswa kweyoku-1 kwabaseKorinte 6:9-11, ngolu hlobo:
“‘Anazi na, ukuba abangemalungisa abayi kubudla ilifa ubukumkani bukaThixo? Musani ukulahlekiswa; abenza umbulo, nabakhonzi bezithixo, nabakrexezi, nezifebe, namadoda alalanayo, namasela, namabawa, namanxila, nabatshabhisi, nabaphangi, abayi kubudla ilifa ubukumkani bukaThixo. Naye ninjalo ke inxenye yenu; kuloko nahlanjululwayo.’
“Ekugqibeleni lachotshelwa ityala lam. Ndagwetywa iminyaka engama-20 ngokubulala. Ngowe-1971, ndathunyelwa kwintolongo yamabanjwa agwetywe ithuba elide. Kwakulapho apho ufundisiso lwam lweBhayibhile namaNgqina lwathi lwabuya lwaqhubeka. Ihambo yam yayitshintshe ngeyona ndlela imangalisayo. Ngokukhawuleza kule ntolongo intsha, bandenza ibanjwa eliphathiswe iimbopheleleko ibe baqala ukundinika iiholide ezinikwa amabanjwa. Ebudeni benye yazo, ndabuza iNgqina endandihlala nalo oku: ‘Kwala ntoni na ukuba ndingabhaptizwa?’ Laqhagamshelana nebandla lasekuhlaleni ibe impendulo yabuya isithi: ‘Akwali nto.’ Ngowe-1973, ngongcwalazi, ndabhaptizelwa kwiqula leenkomo kwifama ekufutshane. Njengoko ndandingena emanzini ndathandaza, ekubeni oko yayikoko uYesu wakwenzayo xa wantywiliselwa kuMlambo weYordan nguYohane uMbhaptizi.
“Emva koko, inkqubela yam yokomoya yakhawuleza. Ndabhalisa kwiSikolo Sobulungiseleli Sobuthixo esasiqhutywa kwibandla lasekuhlaleni—kambe ke, andizange ndibekho ngokobuqu. Ndandifumana izabelo esikolweni ndize iintetho zam ndizirekhode kwikhasethi, zize ke zidlalelwe ibandla. Umluleki wesikolo wayendithumelela isiluleko sokundinceda ukuze ndiphucule. Sasiba neentlanganiso zeeveki ngeeveki entolongweni apho namanye amabanjwa ayevumelekile ukuba abekho.
“Ngalo lonke elo xesha ndandisongeza izibhalo ezininzi kulwazi lwam lweBhayibhile. Zazifana namanqwanqwa awayendikhokela ukuphuma kwimeko yokudideka ngokuphathelele imilinganiselo yokuziphatha ebendiphila ngayo ixesha elininzi lobomi bam, de ndayiqonda inguqulelo umpostile uPawulos awathetha ngayo kwabaseKolose 3:9, 10, NW: ‘Zihlubeni ubuntu obudala kunye nezenzo zabo, nambathe ubuntu obutsha, obuthe ngolwazi oluchanileyo benziwa butsha ngokomfanekiselo walowo wabudalayo.’
“Ngowe-1978 ukuya okwesihlandlo sesithathu phambi kwebhodi ejongene nokukhululwa kwamabanjwa phantsi kwemiqathango ethile kwakusondela. Izihlandlo ezibini andizange ndiphumelele ngenxa yobunzulu bamatyala am. Ngesi sihlandlo ibhodi yafumana iileta ezinokuba ngama-300 ezazivela kumaNgqina nakwabanye bengqina ngokwenene ukuba ndandiguqukile.
“Njengoko amathuba okukhululwa kwam ayebonakala emahle, ndacinga ngokutshata. UArlynn, umhlolokazi owayenabantwana ababini, wayeliNgqina elalindibhalela ngoxa ndandisentolongweni. Wandityelela ekunye noonyana bakhe ababini. Sathandana. Ndakhululwa ngoFebruwari 1, 1978. Satshata ngoFebruwari 25, 1978. Ngoku, iminyaka eli-13 kamva, sisenomtshato owonwabileyo. Omnye woonyana bethu utshatile ibe usebenza ngokukhutheleyo njengomnye wamaNgqina kaYehova. Omnye unyana usebenza ixesha elizeleyo kwikomkhulu lehlabathi lamaNgqina kaYehova eBrooklyn, eNew York.
“Imithandazo yam iphendulwe. Ndinombulelo ngabazalwana noodade ababeluncedo olungaka kum. Lonke ulonwabo lwam ndilunikwe nguThixo owonwabileyo, uYehova.—1 Timoti 1:11, NW.
“Noko ke, ndisazisola ngezono zangaphambili. Ndisayicekisa nangoku ihambo yam yangaphambili elihlazo xa ndiyicinga. Ndiye ndathandaza izihlandlo ezininzi ukuba uYehova andixolele, ibe ndivakalelwa kukuba undixolele. Kwakhona ndiyathemba ukuba abantu endabonayo ngaphambili baya kukwazi ukundixolela. Ibe ngokukodwa ndiyathemba ukuba uYehova uya kubuyisela ebomini indoda endayibulalayo yaye iya kukwazi ukuba nethuba lokuphila ngonaphakade kumhlaba kaThixo oyiParadisi. Oko kuya kundenza ndivuye ngokupheleleyo!”
Oko iintsimbi zentolongo nokuvalelwa esiseleni esimnyama kwakungenako ukukwenza, inyaniso yeBhayibhile yakwenza. Yambangela uRon Pryor ukuba akwazi ukuhluba ubuntu obudala besaphuli-mthetho aze azambathise ngobuntu obutsha bobuKristu. Ngoba? Kuba ‘ilizwi likaThixo liphilile, yaye liyasebenza,’ ibe linamandla okulungisa isimilo somntu.—Hebhere 4:12.
[Amagama acatshulweyo akwiphepha 12]
Yayiyilori yoMgwebi uJenkins endayibayo!
[Amagama acatshulweyo akwiphepha 13]
Kwakukho iBhayibhile kweso sisele simnyama. Ndaqalisa ukuyifunda
[Amagama acatshulweyo akwiphepha 13]
Ndagwetywa iminyaka engama-20 ngokubulala
[Umfanekiso okwiphepha 14]
URon Pryor nowakwakhe, uArlynn, namhlanje