IBhayibhile Iyabutshintsha Ubomi Babantu

YINTONI eyabangela ukuba indoda ekhuliswe kwintsapho ezinikele kubuKatolika neyayisebenza kwezomthetho ibe liNgqina likaYehova? Yintoni eyabangela ukuba umgrogrisi ayeke ugonyamelo aze abe ngumshumayeli? Khawuzivele ukuba bathini.

“Ndakwazi Ukwahlula Phakathi Kokulungileyo Nokungalunganga.”—SEBASTIÃO ALVES JUNQUEIRA

UNYAKA WOKUZALWA: 1946

ILIZWE: EBRAZIL

UBOMI BANGAPHAMBILI: IJAJI

INDLELA ENDANDIKADE NDIPHILA NGAYO: Intsapho yakowethu yayihlala emaphandleni, kumgama omalunga neekhilomitha ezintandathu ukusuka kwidolophu yasePiquete. Abazali bam babenefama encinane, esasiphila ngayo. Ndandifunda kwisikolo sasePiquete, ngenxa yoko ndathenga ibhayisekile, eyayisenza kubelula ukuya edolophini. Indawo endandihlala kuyo yayinabantu abatsala nzima, kodwa idolophu yayicocekile nolwaphulo mthetho luphantsi. Inkoliso yamadoda alapho yayisebenza kumzi mveliso owenza izixhobo zomkhosi.

Ndandikuthanda ukufunda ngenxa yoko ndafunda kwiSikolo Somkhosi Womoya kwisixeko esingekude kangako ndaza ngo-1966, ndaba nguSajini womkhosi. Emva koko ndaya kwisikolo somthetho ndaza ndafumana isidanga. Kamva, ndafaka isicelo sokuba yintloko yamapolisa. Ngo-1976, ndaphumelela uvavanyo lukarhulumente ndaza ndanikwa esi sikhundla. Ngamanye amaxesha umsebenzi wam wawuquka ukuba ngumphathi wentolongo. Ebudeni beli xesha, amaNgqina kaYehova ayedla ngokuza aze acele imvume yokushumayela kumabanjwa. Nam ayedla ngokundishumayeza. Ndandimhlonela gqitha uThixo. Ndachukumiseka ndakufunda ukuba uThixo unegama elinguYehova, yaye sinako ukuba ngabahlobo bakhe.

Ngokuthe ngcembe ndaya ndisenyuselwa kwezomthetho. Ngo-1981, ndaphumelela olunye uvavanyo lukarhulumente ndaza ndaba yijaji. Ngo-2005, ndamiselwa ukuba ndibe yijaji kwinkundla yezibheno yaseSão Paulo.

INDLELA EBUTSHINTSHE NGAYO IBHAYIBHILE UBOMI BAM: Emva kokuba ndiphumelele kwisikolo somthetho, ndaqalisa ukufunda iBhayibhile—nto leyo eyatshintsha indlela endicinga ngayo. NdandingumKatolika ozinikeleyo. Intsapho yakowethu yayinabefundisi nobhishophu, ndandincedisa umfundisi xa kusenziwa idini le Misa. Ngaphambi kokuba ashumayele, ndandifunda izicatshulwa zomthandazo kwincwadi yemithandazo. Kumakhaya amaKatolika yayingafundwa iBhayibhile. Umama wacaphuka gqitha xa wandibona ndifunda iBhayibhile. Ngelokundityhafisa, wathi ndiza kushiywa ziingqondo. Sekunjalo, ndaqhubeka ndifunda kuba kwakungekho nto iphosakeleyo.

Ukuthand’ ukwazi kwandikhuthaza ndaqhubeka ndifunda iBhayibhile. Ndandifuna ukwazi okungakumbi ngabefundisi nendima yabo ecaweni. Kwakhona ndaqalisa ukufunda ngombutho wabefundisi olwela inkululeko kwezentlalo, ezopolitiko nakwezoqoqosho, kodwa indlela ababeqiqa ngayo yayiphixene kangangokuba kwakunzima ukuyiqonda.

Kwangelo xesha, ugqirha wam wamazinyo ongumBhuda wandipha incwadi eyayinikwe yena. Umxholo wayo wawusithi Did Man Get Here by Evolution or by Creation?a Ndayithakazelela, ndicinga ukuba iza kubangela umdla xa ndiyifunda kunye nencwadi ethi The Origin of Species, ebhalwe nguCharles Darwin. Izibakala zale ncwadi zazinamandla, ingqiqo yaye ziseyisela. Ngaphandle kwamathandabuzo ndafumanisa ukuba imfundiso yokuba indalo yazivelela ayinasihlahla.

Ukufunda le ncwadi ethetha ngendalo kwandenza ndanomdla ngakumbi. Ndafuna ezinye iincwadi zamaNgqina kaYehova. Ndaxelelwa ukuba kukho umkhandi okwisikolo esifundisa ukulungiswa kweenqwelo moya oliNgqina likaYehova. Ndathetha naye, waza wandinika iincwadi ukuba ndizifunde. Ngelo xesha, andizange ndivume ukuqhutyelwa isifundo seBhayibhile ngamaNgqina. Ndandicinga ukuba ndinokuzifundela.

Ukuqalisa kwam ukufunda iBhayibhile, ndagqiba kwelokuba kuya kuba bubulumko ukuba ndiyifunde nentsapho yam ekubeni ndandisele nditshatile. Sasiba nesifundo sentsapho veki nganye yaye sasifunda iBhayibhile kunye. Ekubeni intsapho yakowethu yayingamaKatolika, yonke into eyayiyazi yayiyifundiswe ngabefundisi noobhishophu. Kodwa, amazwi akuYohane 14:6 athi: “UYesu wathi kuye [umfundi uTomas]: ‘Ndim indlela nenyaniso nobomi. Akukho bani uzayo kuBawo ngaphandle kokuza ngam’” andihlab’ umxhelo. Emva kokuwuphanda ngokucokisekileyo lo mbandela, ndeyiseka ukuba usindiso lwethu luvela kuYehova ngoYesu. Kaloku sasenziwe sakholelwa ukuba usindiso lwethu luvela kubefundisi.

Kukwakho nezinye iivesi ezimbini zeBhayibhile ezaye zatshintsha isimo sam sengqondo ngeCawa yamaKatolika neemfundiso zayo. Enye yazo yiMizekeliso 1:7, ethi: “Ukoyika uYehova kukuqalisa kolwazi. Ubulumko nengqeqesho koko izidenge nje zikudelileyo.” Enye nguYakobi 1:5, othi: “Ukuba kukho nabani na kuni oswele ubulumko, makaqhubeke ebucela kuThixo, kuba unika bonke ngesisa, engangcikivi; yaye uya kubunikwa.” Ndandilunxanelwe ulwazi nobulumko, zinto ezo endingazange ndizifumane ecaweni. Ngenxa yoko, ndayiyeka icawa.

Ngo-1980, inkosikazi yam yaqalisa ukufunda iBhayibhile namaNgqina. Nanini na ndikho ekhaya bendiye ndihlale phantsi nam ndifunde. Ekuhambeni kwexesha ndavuma ukufundiswa iBhayibhile. Noko ke, kwadlula ixesha elide ngaphambi kokuba senze isigqibo sokuba sibhaptizwe njengamaNgqina kaYehova. Inkosikazi yam yabhaptizwa ngo-1994, ndaza mna ndabhaptizwa ngo-1998.

INDLELA ENDINGENELWE NGAYO: Bobane abantwana bam baye bancedakala ngokukhuliswa ngemilinganiselo kaYehova. (Efese 6:4) Ndinoonyana ababini abazibhokoxayo ukuze banyamekele iintswelo zokomoya zamanye amaNgqina ebandleni. Iintombi zam ezimbini ziwukhuthalele umsebenzi wokushumayela. Inkosikazi yam ichitha ixesha elininzi inceda abanye bafunde iBhayibhile, kwaye kuyandivuyisa ukukhonza njengomdala ebandleni.

Ndathi ndakuba liNgqina likaYehova, ndakwazi ukwahlula phakathi kokulungileyo nokungalunganga. Ekubeni ndiyijaji, ndiye ndizame ukuxelisa uYehova xa ndichophele ityala, ndizivelela zonke iinkalo, ndibe nengqiqo novelwano xa umoni ethetheleleka.

Ndiye ndachophela amatyala amaninzi awogonyamelo, olwaphulo mthetho, ukuxhatshazwa kwabantwana namanye amatyala anzulu. Sekunjalo, andikayeki ukuba novelwano. Xa ndibukele iindaba ndiyakucekisa ukonakala kwemilinganiselo yokuziphatha kweli hlabathi. Ndiyambulela uYehova ngokundinceda ndiqonde izizathu zokwesamela kolwaphulo mthetho, nethemba esinalo lekamva elingcono.

“Intolongo Ayizange Inditshintshe.”—KEITH WOODS

UNYAKA WOKUZALWA: 1961

ILIZWE: ENORTHERN IRELAND

UBOMI BANGAMAPHAMBILI: UMGROGRISI

INDLELA ENDANDIKADE NDIPHILA NGAYO: Ndazalwa ngo-1961 ePortadown, idolophu exakekileyo ekuMantla Ireland. Ndakhula ndingumProtestanti, kodwa ndakhulela kwindawo enamaKatolika namaProtestanti. Inkoliso yeentsapho zazihlelelekile. Nangona Sasingathathi ntweni sasincedana.

Andinalunda ngendlela endandiphila ngayo. Ngo-1974, ndangena “Ezinkathazweni” ezazise Mantla eIreland ngalo mihla. Mayela nelo xesha izinto zaqatsela. Ngokomzekelo, ngobunye ubusuku utata wam owayengumphathi kuMzi-mveliso owenza ikhaphethi, eUlster wayesemsebenzini eqeqesha amatyendyana amabini amaKatolika awayengabamelwane bethu. Kwangaxeshanye, umntu othile wajula ibhombu ngefestile ekhayeni laba bafana, kwigumbi lokuhlala yaza yabulala uyise, unina nomninawa wabo.

Iingxaki zaya zithath’ unyawo, kwaza kwaqhambuka imfazwe. Imizi yamaProtestanti eyayikwiindawo zamaKatolika yatshiswa aza amaProtestanti anyanzeleka ukuba uphum’ aphele kwiindawo zamaKatolika. NamaKatolika ayephathwa kakubi kwiindawo zamaProtestanti. Indawo esasihlala kuyo yayinamaProtestanti amaninzi. Akuzange kube kudala, ndabanjwa ndaza ndagwetywa iminyaka emithathu entolongweni ngenxa yokuba nenxaxheba kwizenzo zokuqhushumbisa.

Xa ndandisentolongweni, ndaba ngumhlobo osenyongweni welinye ibanjwa elalizinikele emzabalazweni. Sasingathi sizalwa ngumntu omnye, kangangokuba xa wayetshata ndaba ngumkhaphi. Intolongo ayizange isitshintshe. Ukukhululwa kwethu, sabuyela kumzabalazo wezopolitiko ngamandla. Ngenxa yoko, umhlobo wam waphinda wavalelwa entolongweni. Kodwa kweli ityeli, wabulawa.

Nam, ndaba yitekeni kangangokuba ngesinye isihlandlo imoto yam yadlakazwa ngesiqhushumbisi. Kodwa ezo ziganeko zandenza ndazijul’ ijacu emzabalazweni.

Ngelo xesha, ndavela kwenye inkqubo kamabonwakude ethi “Troubles,” neyasasazwa kwijelo likamabonwakude laseBritani. Le nkqubo yandifaka ezingxakini ezingakumbi. Ngokomzekelo, xa ndandigoduka ngobunye ubusuku ndafumanisa ukuba inkosikazi yam indishiyile. Akuzange kubekudala, nonyana wam wathathwa kum. Ndikhumbula ndikhangele esipilini ndisithi, “ukuba ukho Thixo, ndincede.”

NgoMgqibelo olandelayo, ndadibana nenye itshomi yam uPaul, owayeliNgqina likaYehova. Waqalisa ukuthetha nam ngeBhayibhile. Emva kweentsuku ezimbini, uPaul wandithumelela iphephancwadi IMboniselo. Inqaku elikwelo phephancwadi lalinamazwi kaYesu abhalwe kuYohane 18:36, athi: “Ubukumkani bam abuyonxalenye yeli hlabathi. Ukuba ubukumkani bam bebuyinxalenye yeli hlabathi, abalindi bam bebeya kulwa ukuze ndinganikelwa kumaYuda. Kodwa ubukumkani bam abusuki kulo mthombo.” Loo mazwi andichukumisa gqitha. Ubomi bam batshintsha ngaloo mini.

INDLELA EBUTSHINTSHE NGAYO UBOMI BAM IBHAYIBHILE: UPaul waqalisa ukufunda iBhayibhile nam. Kamva, yaba lelinye iNgqina uBill owaqhubeka endifundisa. Ndiyaqonda ukuba kwakunzima ukundifundisa iBhayibhile; ndandinemibuzo emininzi. Kwakhona ndandidla ngokubiza abefundisi ukuze baphikise uBill. Kodwa inyaniso yeBhayibhile yagqwesa.

Ndikhumbula ngesinye isihlandlo ndisithi kuBill angezi ukuza kuqhuba isifundo kuba indlela yayivaliwe kwaye nemoto yakhe yayinokuhluthwa ize itshiswe. Sekunjalo, uBill weza kuqhuba isifundo njengesiqhelo. Wayishiya imoto waza weza ngebhayisekile. Ngubani owayenokuyohlutha ibhayisekile? Ngenye imini mna noBill sathi sisahleli sifunda iBhayibhile kwagaleleka amapolisa nomkhosi wamajoni eze kundibamba. Njengoko ayendigxagxamisa uBill wakhwaza esithi mandikholose ngoYehova. Andizange ndizilibale ezo zihlandlo.

Ukuqala kwam ukuya kwintlanganiso yamaNgqina kaYehova kumele ukuba kwabothusa abanye abantu ababelapho kwiHolo yoBukumkani. Ndandineenwele ezinde, icici yaye ndinxibe ibhatyi enomzobo weqela lezopolitiko endandikulo. Noko ke, iyamangalisa indlela amaNgqina awandiphatha ngayo. Ukuba nobubele kwawo kwandihlab’ umxhelo.

Nangona ndandifunda iBhayibhile andizange ndizilahle iitshomi zam. Noko ke, ekugqibeleni iinyaniso endazifundayo zaye zisendela entliziyweni. Ndaqonda ukuba, ukuba ndifuna ukukhonza uYehova ndimele nditshintshe kwiimbono zam zezopolitiko nabantu endandibutha nabo. Kwakungekho lula, kodwa njengoko ndandisiya ndifunda okungakumbi ngeBhayibhile yaye noYehova endinceda, ndakwazi ukutshintsha. Ndazicheba iinwele, ndakhulula icici ndaza ndathenga isuti. Izinto endandizifunda zandinceda ndatshintsha indlela endandibajonga ngayo abanye abantu.

INDLELA ENDINGENELWE NGAYO: Ndiye ndaphila ubomi bokwaphula umthetho nokuba ngumgrogrisi. Ndandisaziwa kakuhle ngamapolisa asekuhlaleni ngokwaphula umthetho. Kodwa ngoku izinto zahlukile. Ngokomzekelo, ukuqala kwam ukuya kwindibano enkulu yamaNgqina kaYehova, eyayikwidolophu yaseNavan ndaphelekwa ngamapolisa ukutyhubela i-Ireland ukuya kuthi xhaxhe ngoMntla Ireland. Kodwa ngoku ndiya kwiindibano ndingaphelekwanga. Kwakhona ndishumayela ngokukhululekileyo kunye namaNgqina anjengoPaul noBill kunye nabanye ebandleni.

Njengoko buye batshintsha ubomi bam, ngoku ndizinzile ebandleni. Kulapho ndadibana khona noLouise, saza satshata. Ukongezelela koko, unyana wam wabuyiselwa kum.

Xa ndijong’ emva ndiyazisola ngokubangela intlungu kwabanye. Kodwa ndiyakuqinisekisa ukuba iBhayibhile inako ukubatshintsha abantu abenza izinto ezingatshongo khona baze baphile ubomi obunenjongo nethemba njengam.

[Umbhalo osemazantsi]

[Amagama acatshulweyo akwiphepha 12]

Umama wacaphuka gqitha xa wandibona ndifunda iBhayibhile