Abantu Abaselula Bayabuza . . .

Ndinokuzikhusela Njani Kuhlaselo Lweqela Leenjubaqa?

NGENYE ingokuhlwa epholileyo yasekwindla, uTom oneminyaka eli-12 ubudala waya kwivenkile eselumelwaneni ukuya kuthenga izinto ezimbalwa. UTom wayenexhala kuba wayekummandla owawulawulwa liqela leenjubaqa zesitrato lasekuhlaleni, yaye uloyiko lwakhe lwangqineka luyinto yokwenene. Engalindelanga, amalungu aliqela eli qela leenjubaqa amhlasela, emwisa phantsi emhlabeni embetha ngamanqindi.

Ngenxa yokuxelwa kwangaphambili ‘kokwanda kokuchasa umthetho,’ abanye bahlala kwimimandla enogonyamelo gqitha kwanabasemagunyeni abangakwazi kululawula. (Mateyu 24:​12) Yaye ukuba uhlala kummandla apho amaqela eenjubaqa axhaphake khona, amava kaTom anokuba ngaqheleke gqitha kuwe. Ngokomzekelo, qwalasela imeko yeNqila yaseLos Angeles, eUnited States. Ngokutsho kwephephancwadi iMaclean’s, kwiingozi ezingama-257 ezinxulumene neqela leenjubaqa ezenzeka ngowe-1988, isiqingatha sazo sasibandakanya ukubulala kweqela leenjubaqa abangengomalungu ngaphandle kwesizathu! Ngenxa yoku, ulutsha oluhlala kwimimandla amaqela eenjubaqa agqugqisa ngogonyamelo kuyo lujongene nocelomngeni lokwenene: ukuzikhusela.

Inqaku elingaphambili libonise ubudenge bokunxulumana neqela leenjubaqa.a Kucacisiwe ukuba ukuba lilungu leenjubaqa ngokwenene kwandisa ingozi yokwenzakala, ukubanjwa okanye kwanokubulawa. Yaye ukuphatha imela, umpu okanye naluphi na uhlobo lwesixhobo kuchasene nesiluleko seBhayibhile esikuIsaya 2:⁠4 nakuMateyu 26:​52. Ngaphandle koko, ukwenza oko kuyandisa ngakumbi imbambano kunokuba kuyithomalalise. Kunokuthethwa okufanayo ngokufunda ubugcisa bokulwa, obunjengejudo, okanye ikarate, njengendlela yokuzikhusela. Ke ngoko, okulunge ngakumbi kukuthi zisuka nje uphephe ukuxhonyiswa liqela leenjubaqa. Kodwa njani?

Amaqela Eenjubaqa Nemibala Yawo

Okokuqala, qwalasela isinxibo sakho, indlela yokuzilungisa nendlela yokuziphatha kwakho. Amaqela amaninzi eenjubaqa anxiba iimpahla ezahlukileyo, imibala okanye iintlobo ngeentlobo zempahla eziwahlulayo kwamanye amaqela eenjubaqa. Iqhiya okanye kwanendlela umnqwazi onxitywa ngayo inokukufanisa njengelungu leqela leenjubaqa. Amaxesha amaninzi, amaqela eenjubaqa anezimbo zawo ezithile zomzimba nesigama sawo kwakunye nendlela ethile yokuma.

Ingxaki ikukuba imibala yeempahla zamaqela eenjubaqa nezinye iimpawu ezinjalo ezahlula abantu ziba sefashonini phakathi kolutsha ngokubanzi​—⁠kuquka nabangengomalungu eqela leenjubaqa. Iphephandaba laseKhanada iThe Globe and Mail lathi: “Abanye abafikisa ebuntwini obukhulu balinganisa ngokuyinxenye indlela amanye amaqela eenjubaqa anxiba ngayo, nangona bengengawo amalungu. . . . Mhlawumbi bezama ukutsala ingqalelo yabanye abakwishumi elivisayo.”

Kubonakala ukuba lumbi ulutsha luvakalelwa kukuba eso sinxibo sikhethekileyo siya kulwenza lubonakale ngathi luzizigantsontso. Abanye baqiqa ngelokuba ukunxiba iimpahla eziyimibala yeqela leenjubaqa kuya kubanika umlinganiselo othile wokhuseleko. Bacinga ukuba abanye baya kuba madolw’ anzima ukucinga ngokubahlasela, becinga ukuba banxulumene neqela elithile leenjubaqa. Ngaba oku kukuqiqa okusezingqondweni? Akunjalo konke-konke. IThe Globe and Mail ikubeka ngokuphandle oku isithi: “Basengozini yokubethwa ukuba babhaqwe ngamalungu okwenene eqela leenjubaqa.”

UBernard, owayekhe walilungu leqela leenjubaqa kodwa ngoku ongomnye wamaNgqina kaYehova, uyayiqinisekisa le ngcamango. Ekhumbula imini zakudala, uthi: “Ukuba umntu unxibe ngokufana nomnye wethu, yaye engenguye omnye wethu, ngokunokwenzeka ebeya kuba lixhoba. Phakathi kwezinto ezimbini bekuya kufuneka ukuba abe ngomnye weqela lethu okanye azifake engozini yokwenzakaliswa.”

Kunomvuzo Ukuba Ngowahlukileyo!

Ukwazi oku kufanele kukwenze uyikhethe impahla oyinxibayo. Ngapha koko, ngaba indlela esinxiba ngayo ayithethi okuthile ngathi​—⁠ide isifanise nokusifanisa? Oku kwakuyinyaniso kwiminyaka engamawaka eyadlulayo ngexesha lokubhalwa kweBhayibhile. Kwincwadi yesi-2 yooKumkani, sifunda ngabanye abathunywa abanikela ingxelo kuKumkani uAhaziya wakwaSirayeli. Bachaza ukuba badibene nendoda ebanike umyalezo othile. Ukumkani wabuza wathi, “Iluhlobo luni na indoda leyo?” Xa bachaza iimpahla zayo, ngoko nangoko ukumkani wathi, ‘IbinguEliya umprofeti!’ Wakwazi njani oko? Ngenxa yokuba uEliya wayenxiba impahla eyahlukileyo yomprofeti. (2 Kumkani 1:​5-⁠8) Namhlanje, njengangoko, indlela esinxiba ngayo ingasinxulumanisa nodidi oluthile lwabantu, nangona sisenokuba asenzi oko bakwenzayo okanye asikholelwa koko bakukholelwayo. Abanye baya kutyekela ekucingeni ukuba ubuncinane sinobuhlobo nodidi oluthile lwabantu abanxiba ngaloo ndlela.

UMichael, owayesakuba lilungu leqela leenjubaqa ocatshulwe kwiSports Illustrated, uthi: “Izihlangu, iibhatyi neminqwazi ziyimiqondiso epheleleyo . . . Ndinokuqhuba inqwelo-mafutha ndehlise isitrato ndize ndikhombe ilungu leqela leenjubaqa nje ngendlela elinxibe ngayo.”

Ngoko, hayi indlela ebekuya kuba bubuyatha ngayo ngomKristu oselula ukuzilungisa, ukunxiba, ukuhamba, ukuthetha, okanye ade ame ngendlela efana neyamalungu eqela leenjubaqa zesitrato! Isiluleko sikaYesu ‘sokungabi ngabo abehlabathi’ besiya kusebenziseka ngokukhethekileyo apha. (Yohane 17:​16) Ngokwenene, amalungu eqela leenjubaqa awanabunzima ekwalatheni abo bangengawo amalungu eqela lawo. UMichael ukhumbula oku: “Sisenokubona umfo enxibe ibhulukhwe efanelekileyo, uhlobo oluthile lwejezi entle nezihlangu zofele ezingaphakamanga. Wawungenakundeyisela kwelokuba loo mntu lilungu leqela leenjubaqa.”

UBernard, ocatshulwe ngaphambilana, wongezelela esithi: “Amalungu eqela leenjubaqa asoloko etyekela ekunxibeni iimpahla ezisefashonini ngoku.” Ngenxa yoku, ubani ufanele abe nenyameko nobulumko ngaphambi kokwamkela uhlobo lokunxiba nolokuzilungisa olusenokuba luxhaphakile esikolweni okanye elumelwaneni kodwa olunokukwenza ngokulula ixhoba logonyamelo lweqela leenjubaqa ngenxa yokufaniswa phosakeleyo. Ukunxiba ngokunesidima kusenokungqineka kuyinkuselo.​—⁠Thelekisa eyoku-1 kuTimoti 2:⁠9.

Kwakhona, lulumkele uhlobo lolwimi nesigama osisebenzisayo. Ukuba uzama ukuzingqina ukuba uyalandela ngokuthetha isitsotsi ngokuqhelekileyo esisetyenziswa ngamalungu eqela leenjubaqa, usenokuyitsala ngamandla ingqalelo yamalungu eqela leenjubaqa. Kuphephe ukuzama ukuzibonisa unembonakalo yendoda esisigantsontso. Khumbula ukuba: “Inja esaphilileyo ilunge ngaphezu kwengonyama efileyo.”​—⁠INtshumayeli 9:⁠4.

Enye into enokukhusela kukuphepha ukuba ‘sisihlobo sehlabathi’ xa kufikelelwa kukhetho lwezinxulumani. (Yakobi 4:⁠4) Usenokucinga ukuba ukuba nabahlobo abambalwa “abazizigantsontso” kunokuba luncedo kuwe. Kodwa ngokusuka kumava akhe ngoxa wayelilungu leqela leenjubaqa, uBernard uthi: “Ukuba unabahlobo abangabeqela leenjubaqa, ngokuzenzekelayo uya kunyanzelelwa ukuba ube ngomnye weqela leenjubaqa.” Kwanemizamo yokukhokelela amalungu eqela leenjubaqa endleleni yobomi ifanele yenziwe ngobulumko.​—⁠Mateyu 28:​19, 20.

Ewe, indlela elungileyo yokuzikhusela isenokuba ludumo lwakho njengomKristu ongumzekelo. Kuyinyaniso ukuba, ngenxa yokuba ‘ungahambi nabo ukuya kuloo melelo wokuzibhubhisa basenokukunyelisa.’ (1 Petros 4:⁠4) Kodwa basenokuba banentlonelo yenzondo. Ubuncinane, mhlawumbi basenokukugqala njengongenakuba lilungu leqela labo leenjubaqa.

Ukuphepha Ingozi

Sekunjalo, udumo olulungileyo alusoloko lwanele ukukukhusela engozini. IMizekeliso 27:​12 inikela eli cebiso lilungileyo isithi: “Onobuqili uyabubona ububi, azimele; ke zona iziyatha zigqitha kubo, zohlwaywe.” Esi siluleko silungileyo sigxininisa imfuneko yokuqonda neyokuhlala uphaphile xa ujamelene neemeko ezinokuba yingozi. Ngokomzekelo, ukuba umenyelwa ukuba uye endaweni okanye kwisihlandlo esithile, zibuze oku, Ngoobani abaya kuba belapho? Ngaba yindawo eyaziwayo ethandwa liqela leenjubaqa?

Omnye owayesakuba lilungu leqela leenjubaqa unikela icebiso elifanayo esithi: “Ziphephe iindawo ezithandwa ngamaqela eenjubaqa. Hamba ngenye indlela ukuba kunokwenzeka.” Ewe, kuphephe ukuhamba ngokungeyomfuneko kwimimandla eyaziwa njengengakhuselekanga. Yaye ukuba kuvuka ugonyamelo, musa ukuvumela ubugagu bukubulalise. IMizekeliso 17:​14 ithi: “Kukuvulela amanzi ukuqala kwengxabano; yiyeke [yishiye, NW] imbambano kungekavunganyelwana.”

Kodwa masithi phezu kwayo yonke imigudu yakho yokuphepha inkathazo, udibana nabantu abafuna ukuba ube ngomnye weqela leenjubaqa. Ngokuzolileyo chaza ukuba awunakuba ngomnye wabo. Ulutsha olungamaNgqina kaYehova ngokufuthi longezelela ngokuthi ixesha lalo nemigudu yalo isetyenziselwa kubulungiseleli bobuKristu. Nokuba yintoni oyithethayo, kuphephe ukuba ngongenambeko okanye ochasene nabo. UYesu waxelela abafundi bakhe kuMateyu 10:​16 oku: “Yibani nobulumko njengeenyoka, nibe njengamahobe ukungabi nabuqhinga.” Kwakhona, ihambo yakho, isinxibo nokuzilungisa kwakho kumele kuvisisane nokuma okuthabathileyo.

Noko ke, qonda ukuba nawona manyathelo enziwe kwangaphambili angqongqo okuzikhusela awanakukuqinisekisa ukuba ukhuseleke ngokupheleleyo. (INtshumayeli 9:​11) Kodwa ngomgudu osengqiqweni, usenokukwazi ukukuphepha ukuba lixhoba leqela leenjubaqa ezinogonyamelo.

[Umbhalo osemazantsi]

[Umfanekiso okwiphepha 16]

Zibaleke iindawo ezinogonyamelo. Musa ukuvumela ubugagu bukubulalise