Imbono YeBhayibhile
Isizathu Sokuba Izinto Ezibonisa Amanyala Ziyingozi
IZINTO ezibonisa amanyala azisafumaneki kuphela kwiivenkile ezithengisa izinto ezingamanyala nakwimiboniso engesini. Zifumaneka kuwonke wonke. Kumazwe ngamazwe, zenziwa zifumaneke kummi oqhelekileyo ngamaphephancwadi, ngamaphephandaba, ngeencwadi, ngeenkqubo zikamabonwakude, ngemifanekiso-bhanyabhanya nangeevideo. Ngaba nayiphi na into ethe hlaka kangaka inokuba yingozi enkulu ngokwenene?
Noko ke, ziyintoni izinto ezibonisa amanyala? Izinto ezibonisa amanyala zichazwa ngokuthi ‘ziyimifanekiso engokungcola (njengakwimifanekiso okanye kokubhaliweyo) eyenzelwe ukuba ibangele ukuvuseleleka ngokwesini.’ Loo ngcaciso icacile. Kodwa kuye kuphakame iimpikiswano xa kufuneka kuchazwe oko kubangela ukuvuseleleka kwesini noko kungakubangeliyo. Liyinyaniso elokuba, ukusa kumlinganiselo othile, oko kubandakanya izinto ezibonisa amanyala kuxhomekeke kwimbono yomntu ngamnye. Ngamanye amazwi, okumvuselelayo omnye umntu ngokwesini kusenokungabi njalo komnye. Sekunjalo, uhlolisiso lwakutshanje lwabantu abangama-5 000 eJamani lwatyhila ukuba kwinqanaba elithile, izinto zokungcola phantse ukuba zichaphazela wonk’ ubani, amadoda namabhinqa.
Ngaba Ukuvuselela Iinkanuko Kuphosakele?
Ukuvuselela inkanuko engokwasemthethweni—nokuba yeyaluphi na uhlobo—akubobulumko ukuba akukho ndlela yokuyanelisa ngokufanelekileyo. Ngokomzekelo, ukuba ukutya okuthandayo akukho phambi kwakho, mhlawumbi ubungayi kuziva wanelisekile ukuba uhlala wondele imifanekiso yako kumaphephancwadi okanye ezincwadini. Kwelinye icala, ukuba—mhlawumbi ngenxa yezizathu zempilo—akuvumelekanga ukuba ukutye, ukuhlala ucinga ngako kunokwenzeka ukuba kukukhokelele ekuzaphuleni okuyingozi izalelo. Ngokukwanjalo, intshayi ezama ukwahlukana nalo mkhwa ayisayi kuwandisa amathuba okwenjenjalo ngokuthi ichithe ixesha ibukele ngomdla abanye abantu betshaya.
Ngokwembono yeBhayibhile, iinkanuko zesini zizisa ulonwabo xa zisaneliswa ngokufanelekileyo phakathi kweqhina lomtshato wothando. (1 Korinte 7:2-5; Hebhere 13:4) Ngoko hayi indlela ekungebobulumko ngayo ngomntu ongatshatanga ukuvuselela iinkanuko angenako ukuzanelisa! Oku kukhokelela kuphela kudandatheko okanye, kwanokubi ngakumbi, ekuzaneliseni ngokubhenela ekuphululeni amaphambili okanye ekuhenyuzeni, ngaloo ndlela esaphula imithetho nemigaqo kaThixo.—1 Tesalonika 4:3-7.
Ngaba oku kuthetha ukuba izinto ezibonisa amanyala aziyongozi kuwe ukuba utshatile? Akunjalo, loo mithetho yeZibhalo engokuziphatha iyasebenza nakubantu abatshatileyo. Kwakhona, izinto ezibonisa amanyala zibangela ukuba ube neemvakalelo zesini zokuzingca, zikhuthaza ukwanelisa iinkanuko zobuqu, ngoxa uthando lulolokwanelisa iimfuno zeqabane likabani. Izinto ezibonisa amanyala zikukhokelela ekubeni ungabi nalwazelelelo yaye ube ngozingcayo kwisini, esithi, kwanakulwalamano lomtshato, sibe sesithobayo nesokungabi naluthando.—1 Korinte 13:5.
Kunokuba zomeleze uthando lwasemtshatweni, izinto ezibonisa amanyala ziyalubulala ngokuluthoba nangokulugqwetha. Iintlobano zesini njengoko zizotywe kwizinto ezibonisa amanyala ziyeyona ngcamango imbi kuba zidlulisela izigidimi ezingachananga neziyingozi ngobuqabane bomtshato. Ngaphandle koko, ulwalamano lobomi bokwenene lubandakanya okungakumbi kuneentlobano zesini; lusekelwe kulwazelelelo, kuburharha, kuncokoliswano nakwinkathalo. Ngokwahlukileyo koko izinto ezibonisa amanyala zikwanokubangela umsantsa phakathi kwesibini esitshatileyo.
Izinto ezibonisa amanyala ziyabathoba abantu ukusa kumgangatho wezilwanyana ezenza izinto kuphela ngethuku. Azikukhuthazi ukuzeyisa, isiqhamo somoya kaThixo. (Galati 5:22, 23) Zinokubangela ukuba kube lula ukubandakanyeka kwisini esigqwethekileyo. Ezi zizizathu nje ezimbalwa zokuba amaKristu efanele aziphephe izinto ezibonisa amanyala.
Ngoko ke, isiluleko seBhayibhile sobulumko sesi: “[Vuya] ngomfazi wobutsha bakho . . . Yini na nyana wam, ukuba uyotywe ngumkamntu, uwole [ngokoqobo okanye ngokwenzelwa ngabanye ngohlobo lwezinto ezibonisa amanyala] isifuba sowolunye uhlanga?”—IMizekeliso 5:15-20.
Noko ke, umntu unokukuphepha okanye aphuncuke njani ekubanjisweni zizinto ezibonisa amanyala?
Indlela Yokuphuncuka Ekubanjisweni Zizo
Ukuze uwuchase umtsalane wezinto ezibonisa amanyala, iBhayibhile iluleka ngokuthi: “Bhubhisani ngoko amalungu enu asemhlabeni: umbulo, ukungcola, ukuthabatheka okuhlazisayo.” (Kolose 3:5) Apha, igama elithi “bhubhisani” ngokucacileyo lidlulisela ingcamango yokubulala—ingekuko nje ukucinezela—naliphi na ilungu lomzimba elinokusetyenziswa kule mikhwa mibi.
Noko ke, oku kufanele kuqondwe ngengqiqo ebusafobe, kungekhona eyokoqobo. AmaKristu akafanele enzakalise imizimba yawo. Ukuba ‘sizibulala’ ngokupheleleyo iingcinga ezingafanelekanga ngesini, asiyi kuyekelela kumtsalane wezinto ezibonisa amanyala, ngale ndlela sisebenzisa amalungu ethu omzimba, anjengamehlo, ngendlela ephosakeleyo. (Thelekisa uMateyu 5:29, 30.) Ngenxa yoku, iBhayibhile iluleka ngokuthi zithabathelen’ indawo iinkanuko ezingafanelekenga ngazo “naziphi na izinto ezibubulungisa, naziphi na izinto ezinyulu,” yandula ke ithi “qhubekani nicinga ngezi zinto.”—Filipi 4:8, NW.
Yintoni enye enokukunceda? Ukukhumbula—mhlawumbi kwanokuzicengceleza—izicatshulwa zeBhayibhile, ezifana nezi zilandelayo:
“Dlulisa amehlo am angakhangeli inkohlakalo.”—INdumiso 119:37.
“Konke okusehlabathini, inkanuko yenyama, nenkanuko yamehlo . . . asikokuphuma kuye uYise, kokuphuma ehlabathini.”—1 Yohane 2:16.
“Elowo ke uhendwa akutsalwa, abanjiswe, yeyakhe inkanuko. Ithi ke inkanuko, yakuba ithabathile izale isono; sithi ke isono, sakuba sikhululwe, sizale ukufa.”—Yakobi 1:14, 15.
Nayiphi na into esekuqaleni koludwe lwezenzo eziphelela ekufeni ngokufanelekileyo kunokuthiwa iyingozi, yaye izinto ezibonisa amanyala zikufanele ukuchazwa ngolo hlobo! Khumbula: “Lowo uhlwayelela eyakhe inyama, wovuna ukonakala ngokwasenyameni; lowo uhlwayelela uMoya ke, wovuna ubomi obungunaphakade ngokwaseMoyeni.” Musa ukuvumela izinto ezibonisa amanyala zikuphulukanise nobomi obungunaphakade!—Galati 6:8.
[Amagama acatshulweyo akwiphepha 29]
Kunokuba zomeleze uthando lwasemtshatweni, izinto ezibonisa amanyala ziyalubulala ngokuluthoba nangokulugqwetha