Umthombo Wemilinganiselo Yokuziphatha Yokwenyaniso
Ukusetyenziswa Kwayo Kuya Kuphelisa Ukuwohloka Kwemilinganiselo Yokuziphatha
UMNTU ukhangela phezulu ebusuku kwisibhakabhaka esizele ziinkwenkwezi, ibe uziva esoyika kwaye emangalisekile. Njengoko ekhangela kolo phahla lweenkwenkwezi olukude kangaka ngentla kwakhe, uziva emncinane yaye engabalulekanga. Usenokuphinda amazwi omdumisi awawathetha kudala athi: “Xa ndilikhangelayo izulu lakho, umsebenzi weminwe yakho, inyanga neenkwenkwezi ozimisileyo: Uyintoni na umntu lo, le nto umkhumbulelayo?” (INdumiso 8:3, 4) Umdumisi wabona amawaka ambalwa eenkwenkwezi waza waziva emncinane; ngoku umntu uyazi ukuba kukho amawaka ezigidi zeminyele ngamnye unamawaka ezigidi zeenkwenkwezi, yaye uziva emncinane ngakumbi. Kusenokubakho imibuzo enkentezayo engqondweni yakhe: ‘Ndinokubaluleka njani? Kutheni ndilapha nje? Kanye kanye ndingubani?’
Kodwa asikho isilwanyana esineengcinga ezinjalo.
Umntu ukhangela kwiintlobontlobo zezinto eziphilayo ezimngqongileyo yaye uphawula ummangaliso wokuyilwa kwezinto ukuze zifeze iinjongo eziluncedo. Ubona iintaka ezifudukela kwimimandla engamawaka eekhilomitha kude, izilwanyana ezanyisayo ezilalayo ebudeni bengqele yasebusika nezinye iindidi ezininzi zezidalwa ezazisebenzisa izandi zangaphantsi kwamanzi, izinto ezilawula ubushushu nokuphola komoya, izinto ezihambisa izilwanyana zamanzi, ukwahlukaniswa kwamanzi netyuwa, isilawuli-kukhenkceka kwamanzi, amalungu omzimba enza ukuba isilwanyana siphefumle ngaphantsi kwamanzi, izifukamisi, izinto zokulinganisa ubushushu, iphepha, igilasi, iiwotshi, iikhampasi, umbane, iirotary motors nezinye izinto ezininzi ezimangalisayo kudala ngaphambi kokuba umntu acinge ngazo. Abantu abacingayo bayazibuza: ‘Zavela njani zonke ezi zinto zimangalisayo, zintsonkothileyo nezenziwe ngenjongo? Bubuphi ubulumko obazibangelayo?’
Kwakhona, akukho silwanyana sicingayo ngayo nanye kwezi zinto.
Kodwa umntu uyacinga ngako oku. Kutheni umntu, kuzo zonke izigidi ngezigidi zezidalwa ezisemhlabeni, inguye kuphela okhwankqiswa luloyiko nomangaliswa ngamazulu aphezulu naziimfihlelo zobomi ezilapha phantsi? Kutheni? Kungenxa yokuba umntu wahlukile.
Kutheni Umntu Ahluke Kangaka Nje?
Kungenxa yokuba nguye kuphela owadalwa ngokomfanekiselo nangokufana noThixo: “Wathi uThixo, Masenze umntu ngokomfanekiselo wethu, ngokufana nathi.” (Genesis 1:26) Oku kucacisa umsantsa ongenakuvalwa ophakathi komntu nesilwanyana. Kucacisa isizathu sokuba singekho esinye isidalwa esisemhlabeni esisondela nakancinane emntwini. Kucacisa isizathu sokuba umntu esisidalwa esicingayo, esibuza imibuzo ngehlabathi elisingqongileyo nesiyixhalabeleyo imilinganiselo yokuziphatha.
Umntu wenziwe njani ngokomfanekiselo nangokufana noThixo? Kungokuba neempawu ezithile zikaThixo, ezinjengothando, inceba, okusesikweni, ubulumko, amandla, ububele, ukulunga, umonde, ukuthembeka, ukuba nenyaniso, ukunyaniseka, inkuthalo namandla okuyila izinto. Ezi yayiziimpawu ezilungileyo umntu awadalwa enazo, kodwa ngokusebenzisa phosakeleyo kwesibini sokuqala esingabantu inkululeko yokuzikhethela, nto leyo eyakhokelela kwimvukelo yaso, ezi mpawu zonakaliswa ibe kungoko zingazange zidluliselwe ngokugqibeleleyo kwinzala yaso. Zaphelelwa lulungelelwano, ibe ngenxa yokungasetyenziswa kwazo zimbi zazo zafa. Noko ke, eyabaseKolose 3:9, 10, (NW) ibonisa ukuba, ngokuzuza ulwazi oluchanileyo ngoThixo nangokulusebenzisa, sinokwambatha ubuntu obutsha size sikwazi ukubonakalisa ‘umfanekiselo nokufana noThixo.’
Xa uYehova uThixo wanika amaSirayeli uMthetho kaMoses, wawuqulethe imilinganiselo yokuziphatha yokwenyaniso, phakathi kwayo kwakukho iMithetho Elishumi nomyalelo wokuba ‘abathande abamelwane bawo njengoko azithanda ngako.’ (Levitikus 19:18; Eksodus 20:3-17) Le milinganiselo yokuziphatha yayiya kudluliselwa kwizizukulwana ezilandelayo njengomthetho. UMoses waxelela uSirayeli ukuba awuthobele lo Mthetho, yaye ngokubhekele phaya wathi: ‘Bawiseleni umthetho oonyana benu, ukuba bagcine ukuwenza onke amazwi alo myalelo. Ngokuba asilizwi lilambathayo eli kuni, kuba bubomi benu.’ (Duteronomi 32:46, 47) Kwiinkulungwane kamva, IMizekeliso 8:18, (NW) yabhekisela kuwo ‘njengemilinganiselo yokuziphatha esiyizuz’ ilifa.’
Imilinganiselo Yokuziphatha Yokubuyisela Ukuwohloka Kokuziphatha Kwimeko Yako
Noko ke, abaninzi baphikisa ngelithi ibutho labantu lahlukahlukene kakhulu ngokokude kungabikho milinganiselo yokuziphatha efanayo eya kuhlangabezana neentswelo zabantu bonke. Bema ngelithi iimvelaphi neendlela zokuphila ezahlukahlukeneyo zibangela ukwahlukahlukana okukhulu kwemilinganiselo yokuziphatha. Kodwa yiyiphi ingxaki ekhoyo engayi kukuvumela ukuqhelisela umyalelo kaYesu wokuthanda ummelwane wakho njengoko uzithanda ngako? Okanye ukwenza kwabanye njengoko ubuya kuthanda benze ngako kuwe? Okanye ukuphila ngokuvisisana nemigaqo equlethwe kwiMithetho Elishumi? Okanye ukuba nosukelo lokuvelisa iziqhamo zomoya ezidweliswe kumaGalati 5:22, 23: “Ke sona esoMoya isiqhamo, luthando, uvuyo, uxolo, ukuzeka kade umsindo, ububele, ukulunga, intembeko, ubulali, ukuzeyisa; akukho mthetho uchasene nezinto ezinjalo.” Akukho nanye kwezi zinto efuna nantoni na engenakwenzeka; nganye yazo iya kuphelisa umlinganiselo omkhulu wooyeha abakhoyo kwibutho labantu.
Usenokuthi: ‘Abantu abanakuphila ngolo hlobo!’ Noko ke, ukuba ucinga ukuba izicombululo ezinjalo zinzima kakhulu, musa ukucinga ukuba iingxaki ziya kuconjululwa ngeendlela ezilula. Kusemandleni ebutho labantu ukusebenzisa la macebiso aluncedo, nangona kubonakala ukuba abathandi ukwenjenjalo. Esi sizukulwana asinamilinganiselo kwiinkululeko zaso, kuquka inkululeko yaso yokwenza okuphosakeleyo size sivune esikuhlwayeleyo.
Kwiphephandaba iBottom Line/Personal kubuzwa oku: “Kwenzeka Ntoni Kuphawu Lokuzeyisa?” Emva kokugqabaza ngesibakala sokuba “abantu abaninzi bayothuswa yimiphumo kavula zibhuqe ongokwesini kwixesha lethu,” lihlabela mgama lisithi: “Sekunjalo abantu bakugqala njengento engcwele ukuziyolisa ngeenkanuko zesini kangangokuba befuna. . . . Abantu balindeleke ukuba balawule imikhwa yabo yokutya, benze umthambo, bayeke ukutshaya, baziqeqeshe ngendlela abaphila ngayo ngenxa yempilo yabo. Kubonakala ukuba kuphela kukuzanelisa ngesini okunikwa isikhundla esiphakamileyo nesingcwele ukuze kungabikho milinganiselo kuso.” Asikukuba abakwazi ukuyisebenzisa imilinganiselo yokuziphatha; kukuba abafuni ukwenjenjalo. Ngoko ibutho labantu liyahlwayela lize livune.
Namhlanje le milinganiselo yokuziphatha iye yajongelwa phantsi. Abaninzi bathi okubi kulungile yaye okulungileyo kubi, njengoko kwaxelwa kwangaphambili ukuba babeya kwenjenjalo: “Yeha, abathi okubi kulungile, okulungileyo kubi; abamisa ubumnyama endaweni yokukhanya, ukukhanya endaweni yobumnyama; abamisa ubukrakra endaweni yobumnandi, ubumnandi endaweni yobukrakra!” (Isaya 5:20) Noko ke, abanye baya besiba namaxhala angakumbi. Bayasibona isivuno esibolileyo esivela kwintandabulumko yokwenza unothanda ibe bafuna ukubona ukubuyiselwa kokuwohloka kokuziphatha okukhoyo kwimeko yesiqhelo.
Ngaba Unqulo Nentsapho Zinokunceda?
Kuye kwakho iinkqubo ezininzi zokuzama ukubuyisela imilinganiselo yokuziphatha. Enye yazo lunqulo. Kucingelwa ukuba luya kuvelisa amandla okomoya. Kodwa loo mandla awafumaneki kwiinkonzo zezithethe zeNgqobhoko. Zimbi zazo ziye zabuyela emva kubuhedeni ukuze zivuse izinyeliso ezinjengoBathathu Emnye, intuthumbo kanaphakade nomphefumlo ongafiyo. Ezinye ziye zayilahla ingcamango yentlawulelo neyokudalwa zaza zaqubuda kunqulo lwenzululwazi yendaleko. Zamkela uhlalutyo oluqatha olungakukholelwayo ukugqibelela kweLizwi likaThixo, iBhayibhile. Zinikela “ubuKristu” obuvangiweyo nobungcoliswe ngokokude kungasali nantoni na exabisekileyo kubo, yaye izizukulwana eziselula zibona uhanahaniso nempoxo enkulu. Asifanele siwafune kwiinkonzo ezigula ngolo hlobo amandla okomoya kodwa sifanele sikhangele kuphela kunqulo olunye lokwenyaniso olusekelwe eBhayibhileni oluvakalisa uBukumkani bukaYehova njengobukuphela kwethemba lehlabathi.
Noko ke, kusele omnye umthombo woncedo kubantu abaxhalabileyo, ibe loo mthombo yintsapho, imeko apho abazali banokubethelela kubantwana babo imilinganiselo yokuziphatha. Ukusondelelana okwaqala ekuzalweni kufanele kuqhubeke. Abantwana ababathandayo nababathembayo abazali babo bafuna ukufana nabo, bafuna ukuthetha baze bazenze izinto ngendlela abenza ngayo, baxelise ukuziphatha kwabo yaye bathabathele kubo indlela yabo yokuziphatha, ibe ekuhambeni kwexesha imilinganiselo yokuziphatha kwabazali imanyana nenkqubo yemilinganiselo yokuziphatha yabantwana. Iingcaciso ezilula, ingezizo iintetho ezingaphele ndawo; unxibelelwano lwamacala omabini, ingengawo amazwi okuyalela ngokurhabaxa, ziindlela eziphumelelayo zokuthetha nabo.
Abazali abangashumayeliyo kuphela kodwa abakwaqhelisela imilinganiselo yokuziphatha yokwenyaniso baya kuba nabantwana abanaloo milinganiselo yokuziphatha kubo ngaphakathi. Abantwana abanjalo abayi kuba sesichengeni semizekelo yehambo ephosakeleyo yoontanga babo basesikolweni okanye kwenye indawo. Kunjengokuba iMizekeliso 22:6 isithi: “Mfundise umntwana ngendlela efanele umntwana; naxa athe wamkhulu akasayi kumka kuyo.” Qeqesha ngesiluleko esixabisekileyo. Okubaluleke ngakumbi, qeqesha ngomzekelo oxabisekileyo.
Kusenokwenzeka Ukuba Imilinganiselo Yokuziphatha Yayilwa Kwiiseli Zethu Zemfuza
UYesu wathi: “Banoyolo abo baxhalabele intswelo yabo yokomoya.” (Mateyu 5:3, NW) Yintswelo yokwemvelo eyiliweyo kuthi ngaphakathi, njengoko bambi oogqirha bengqondo baye batsho njalo. Kukwayinyaniso ukuba ngamandla okomoya kuphela anokusinceda sikwazi ukuxhathisa imilinganiselo yokuziphatha yobuxoki ebalaseliswayo namhlanje.
Ngokuvisisana nesibakala sokuba sadalwa ngokomfanekiselo nangokufana noThixo, ekunokwenzeka ukuba sinamandla emilinganiselo yokuziphatha yokwemvelo ekuthi, uThomas Lickona, unjingalwazi wemfundo, uthi: “Ndicinga ukuba amandla okwenza okulungileyo akho kwasekuqaleni.” Kodwa wongezelela esithi “abazali bafanele bawakhulise loo mandla okwemvelo kanye njengokuba bebanceda abantwana babo ukuba babe ngabafundi, iimbaleki neemvumi ezifanelekileyo.”
Umhleli weenkqubo zikamabonwakude uNorman Lear wayesisithethi sembeko kwingqungquthela yesizwe yoManyano Lwemfundo Yesizwe. Emva kokuba eyiqondile “ingxaki yabo banobucukubhede, abantu abaphakathi kwethu abafunde kakhulu—abo baye balukhupha engqondweni uphando lwezinto ezingaphaya kwezo bazibonayo njengolububudenge okanye olungafanelekanga,” wathi: “Andinangxaki ekwenzeni isigqibo, ngokusuka kwimbali yomntu, sokuba ukusabela ebomini, ukuPhila, imvakalelo yokukholelwa entweni ethile ebaluleke ngakumbi kunomntu siqu, inamandla yaye ayinakuthintelwa njengoko isiba yindlela esiyilwe ngayo ngokwemfuza.”
Lo kaLear ulibek’ ityala ishishini elikhulu namashumi amane eminyaka okubakho komabonwakude nokusasaza kwakhe “inkqubo yemilinganiselo yokuziphatha emitsha” enempembelelo enkulu kangaka ekuziphatheni kwabantu nakwimilinganiselo yokuziphatha yobuqu ezivele kuyo iingxaki ezininzi zebutho labantu; izikolo neekholeji eziphumelelisa abantu abangakwaziyo ukufunda nokubhala; ukwanda kokusetyenziswa kweziyobisi; amantombazana akwishumi elivisayo angatshatanga aneentsana; neentsapho ezingayongiyo imali zitshona nzulu ematyaleni. Ngoko lo kaLear wongezelela esithi: “Xa sithetha ngeengxaki ezilikhulu zebutho labantu—ndicinga ukuba sinokuba sithetha ngokudluliselwa kwenkqubo yemilinganiselo yokuziphatha kwizizukulwana ezilandelayo eye, ngoncedo lukamabonwakude, yabhukuqa yonke impucuko.” Ibe kwakhona wathi “ukholelwa ukuba, into ekwiiseli zethu zemfuza yinkolelo yokuba kukho amandla nemfihlelo enkulu ebumba ubomi bethu, esifanele siyinikele ingqalelo yethu.”
Ingcali ngezigulo zengqondo eyaziwayo uC. G. Jung wathi unqulo “lusisimo sengqondo esingokwethuku esikho kuphela emntwini, yaye ukubonakaliswa kwaso kunokulandwa kuyo yonke imbali yoluntu.” Kwakhona into yokwemvelo sisazela esinemvakalelo yokulungileyo nokubi: “Kuba xa abeentlanga bathi, bengenamthetho, benze ngemvelo okomthetho, abo, bengenamthetho nje, bangumthetho kubo ngokwabo: bona bawubonakalalisayo umsebenzi womthetho, ubhalwe ezintliziyweni zabo, sibe isazela sabo singqinelana nabo, zibe izicamango zabo zimangalelana, ziphathe kuziphendulela.” (Roma 2:14, 15) “Isazela” ‘silulwazi olukuthi ngaphakathi’ njengenkundla yokusesikweni ehlanganisene ngaphakathi kuthi ukuze inikele izigqibo ngehambo yethu, isimangalela okanye isiphendulela. Noko ke, ukuba sibonakalisa “ukudela inkundla” ngokudela isazela sethu, imvakalelo yaso iya kuba lukhuni ize ingasebenzi.
Izazinzulu Zibona Iimfihlelo Ezinokuchazwa NguThixo Kuphela
Okubangel’ umdla sisibakala sokuba njengoko kwinzululwazi kufundwa okungakumbi ngomhlaba nommandla wendalo, zimbi izazinzulu zityekele kwinkolelo yokuba konke oku kufanele ukuba kubangelwe bubulumko obongamileyo. Noko ke, ziyala ukwamkela uThixo weBhayibhile.
Isazinzulu ngamachiza nokwakheka kweenkwenkwezi uGeorge Greenstein, kwincwadi yakhe ethi The Symbiotic Universe, waqalisa “ukuchaza oko kunokubonakala kuphela ikukulandelelana okumangalisayo kweengozi ezinkulu nezingaqhelekanga ezahlahl’ indlela yonxunguphalo lobomi. Kukho uludwe lweziganeko ezenzeka ngaxeshanye, zonke zibalulekile ekuphileni kwethu.” Lo kaGreenstein wathi olu ludwe luye lwanda, iziganeko ezenzeka ngaxeshanye azinakuba zenzeka ngamabonandenzile, ibe kwanda ingcamango yokuba uthunywashe othile ongaphaya kwemvelo wayesebenza. Wacinga ngolu hlobo: “Ngaba kunokwenzeka ukuba, ngequbuliso, singakhange sicinge ngokwenjenjalo, siye sema phambi kobungqina obungokwenzululwazi bobukho boMntu Owongamileyo? Ngaba yaba nguThixo owangenelelayo waza ngolwazelelelo olukhulu wavelisa indalo yonke ukuze kungenelwe thina?” Waziva “ecaphuke gqitha” ngokucinga ngolo hlobo ibe ngeligwebayo wathi: “AsingoThixo owenze ezi zinto.” Kanti uludwe olwandayo “lweziganeko ezenzeka ngaxeshanye” lwamnyanzela ukuba abuze loo mibuzo.
UFred Hoyle, esinye isazinzulu ngamachiza nokwakheka kweenkwenkwezi, owazuza ibhaso likaNobel, kwincwadi yakhe ethi The Intelligent Universe, waxubusha ngezo ziganeko zenzeka ngaxeshanye neziyimfihlelo ezazimkhathaza uGreenstein esithi: “Izinto ezinjalo zibonakala zinegalelo kwisakhiwo sehlabathi lemvelo njengongcelele lweengozi eziyolisayo. Kodwa zininzi gqitha ezi ziganeko ezenzeka ngaxeshanye nezingaqhelekanga eziyingenelo ebomini ngokokude kubonakale kufuneka ingcaciso ethile ebalisa ngazo.” Kwakhona lo kaHoyle uyavumelana nokaGreenstein kwinto yokuba azinakuba zenzeka ngamabonandenzile. Ekugqibeleni, lo kaHoyle uthi, ‘imvelaphi yendalo iphela ifuna kubekho ubulumko,’ ‘ubulumko obukumgangatho ophakamileyo,’ ‘ubulumko obandulela ubukho bethu nobo bakhokelela kwisenzo esizenzekelayo sokudalwa kwezinto ezifanele ubomi.’
UEinstein wathetha ngoThixo kodwa hayi ngengqiqo yonqulo lwesithethe. Ingcamango yakhe ngoThixo yayibhekiselwe “kumoya owongamileyo ngokungenasiphelo” awawubona utyhilekile endalweni. UTimothy Ferris, kwinqaku lakhe elithi “Omnye UEinstein,” wacaphula amazwi kaEinstein ngokulandelayo: “Endikubonayo endalweni sisakhiwo esikhulu thina esinokusibona luzizi kuphela, yaye oko kufanele kuzalise umntu ocingayo ngemvakalelo ‘yokuthobeka.’ Le yimvakalelo yokwenene yonqulo engenanto yakwenza nemfihlelo. . . . Imvakalelo yam ngonqulo iquka ukondela ngokuthobekileyo umoya owongame ngokungenasiphelo nozityhila kancinane ukuze thina, ngokuqonda kwethu okubuthathaka nokufutshane, sibuqonde ubunyaniso. . . . Ndifuna ukwazi indlela uThixo awalidala ngayo eli hlabathi. Ndifuna ukwazi iingcamango zakhe, emva koko nezinye iinkcukacha.”
UGuy Murchie, emva kokuxubusha ngeemfihlelo ezithile ezingenakuqondwa zommandla wendalo, ugqabaza esithi kwincwadi yakhe ethi The Seven Mysteries of Life: “Kulula ukusibona isizathu sokuba izazinzulu zale mihla ngezinto zokwemvelo, eziye zazuza ulwazi olugqith’ ukuqonda mhlawumbi ngokunzulu ngakumbi kunazo naziphi na ezinye izazinzulu zeenkulungwane zakutshanje, zisamkela kakuhle ngakumbi kunenkoliso yabalingane bazo isibakala sokuba konke okuquka imfihlelo yommandla wendalo iphela ekubhekiselwa kuyo sibangelwe nguThixo.”
Funa UThixo, Ungenelwe, Uphile Ngonaphakade
Umntu uyaphuthaphutha. Uphuthaphutha uThixo. Bambi babekwenza oku ngomhla kaPawulos. Wathi: “Ukuze bayifune iNkosi, ukuba kambe bangaphuthaphutha bayifumane, nokuba ingekude kuthi sonke ngabanye.” (IZenzo 17:27) Akukho silwanyana siphuthaphutha uThixo. Akukho nokuba sibe sinye esinayo nayiphi na ingcamango ngoThixo. Umntu unayo, wenziwe ngokufana noThixo, unomsantsa ongenakuvalwa omahlula kwanakwezona zilwanyana zikrelekrele kunezinye. Yaye njengokuba esi sibhalo sisixelela, uThixo ‘akakude kuthi sonke ngabanye.’
Ubungqina bakhe sibubona kuyo yonke indawo esingqongileyo bubonakaliswe kwizinto azidalileyo, njengokuba amaRoma 1:20 esithi: “Kuba kwasekudalweni kwehlabathi, iindawo zakhe ebezingenakubonwa zibonwa kakuhle ziqondeke, ngezinto ezenziweyo, kwa-amandla akhe angunaphakade, nobuThixo bakhe, ukuze bangabi nakuziphendulela.” Njengoko izazinzulu ziya zibona ngakumbi nangakumbi iziganeko ezenzeka ngaxeshanye ezingenakuchazwa nezinto ezinzima zize zicinge nzulu ngemimangaliso eyoyikisayo ekwindalo iphela, kusenokwenzeka ukuba ezingakumbi nangakumbi kuzo ziya kukuqwalasela ukusebenza koBulumko Obongamileyo obubangele zonke ezo zinto zize zimqonde uMdali wazo, uYehova uThixo.
Umhlaba nezinto eziwuzalisileyo zezikaYehova. Abo baya kuphila kuwo ubabekela imilinganiselo. Uye wanikela imilinganiselo yokuziphatha yokwenyaniso njengokhokelo olusa kulonwabo nasebomini. Kwakhona uye wanika abantu inkululeko yokuzikhethela. Abanyanzelekanga ukuba bamthobele. Banokuhlwayela oko bakuthandayo, kodwa ngaxa lithile basaya kuvuna oko bakuhlwayelayo. UThixo akangowokuhlekisa. Uye wanikela imilinganiselo yokuziphatha yokwenyaniso, ingekuko ukuze kungenelwe yena, kodwa ngenxa yengenelo yezidalwa zakhe ezisemhlabeni. UIsaya 48:17, 18 uthi: “Mna Yehova, Thixo wakho, ndingokufundisa okungakuncedayo, ndikunyathelise ngendlela oya kuhamba ngayo. Akwaba imithetho yam ubuyibazele indlebe! Beluya kuba njengomlambo uxolo lwakho, nobulungisa bakho bube njengamaza olwandle.”
Bethobela isibongozo sokwenene sikaYehova, bonke abantu baya kwandula ukuhamba endleleni abafanele bahambe ngayo ibe baya kuyinikela ingqalelo imiyalelo yoMdali wabo. Bonke baya kungenelwa kuxolo njengomlambo nakubulungisa njengamaza olwandle. Bonke baya kusebenzisa imilinganiselo yokuziphatha yokwemvelo ibe abasayi kuphinda bajamelane nokuwohloka kwemilinganiselo yokuziphatha. Yaye kuya kwenzeka nini konke oku? Kungekudala xa lo mthandazo uphenduliwe: “Mabufike uBukumkani bakho. Makwenziwe ukuthanda kwakho nasemhlabeni njengokuba kusenziwa emazulwini.”—Mateyu 6:10.
[Imifanekiso ekwiphepha 23]
Izinto ezihambisa izilwanyana zamanzi
Ukwahlukaniswa kwamanzi netyuwa
Ukwenziwa kwephepha
Izandi zangaphantsi kwamanzi