Imbono YeBhayibhile

Ngaba UThixo Uyimfihlelo?

“Yintoni imfihlelo? Ngentetho eqhelekileyo, imfihlelo yinyaniso ngokwemvelo ekungenakwenzeka ukuba uyiqonde okanye uyingqine. . . . Yintoni imfihlelo yonqulo? Yenye yeenyaniso zikaThixo ekunyanzelekileyo ukuba siyikholelwe, nangona singenako ukuyiqonda nokuyingqina. Ziziphi iimfihlelo zonqulo eziyintloko? Yimfihlelo kaBathathu Emnye Ongcwele, eyothixo owenziwe umntu neyeNtlawulelo.”​—⁠Abrégé de l’exposition de la doctrine chrétienne, 1901 (Ingcaciso Efinyeziweyo Yemfundiso YamaKristu)

OKU kungasentla yindlela incwadi eyabhalwa ekuqaleni kwenkulungwane yama-20 eyayishwankathela ngayo imbono yeCawa yamaRoma Katolika ngokuphathelele imfihlelo. Ngokubhekele phaya incwadi esandul’ ukupapashwa ethi Guide des difficultés de la foi catholique (Incwadi Esisikhokelo Kwiingxaki Zokholo LwamaKatolika, yowe-1989) ibonisa ukuba iimbono ezinjalo zemfundiso zisezezomdla ngokuchaza ngolu hlobo: “Asingomtsalane nje wobuqu ngeenyaniso ezifihlakeleyo obangela ukuba umKristu amkele ubukho beemfihlelo ezithile kwiSivumo Sokholo sonqulo lwakhe. Ukuba uyazikholelwa, kuphela kungenxa yesizinzi seLizwi likaThixo.” Kodwa lithini “iLizwi likaThixo”? Ngaba uThixo uyimfihlelo?

Ngaba Sinokwazi Yonke Into NgoThixo

IBhayibhile isinika iinkcukacha ezininzi ngoThixo njengoMntu, ngeempawu zakhe nangendlela aqhubana ngayo noluntu. Kodwa ikwasicacisela ukuba ubulumko nengqiqo yakhe ingaphaya kokuqonda komntu. Ngaloo ndlela, umprofeti uIsaya uthi iindlela neengcinga zikaThixo ziphakame kakhulu kunezo zomntu.​—⁠Isaya 55:​8, 9.

Ukungabi nako ukwazi yonke into ngoThixo akufanele kusothuse. Ngokomzekelo, nakubeni ulwazi lwethu ngendalo lusoloko lusanda, izazinzulu ziyavuma ukuba mhlawumbi azisokuze ziziqonde ngokupheleleyo zonke iimfihlelo zezinto ezincinane okanye ezinkulu ngokungenakulinganiswa. Ngoko kunokwenzeka njani ukuba nasiphi na isidalwa sibazi ngokupheleleyo ubunzulu bobulumko bukaThixo, onguMdali? UYobhi wavuma oku kuYehova: “Ngoko ke ndithethe ndingaziqondi izinto ezibalulekileyo kum, ndingazazi.” (Yobhi 42:3; thelekisa amaRoma 11:33.) Ngaloo ndlela, ulwazi olupheleleyo ngoThixo, kwiinkalo ezithile, lungaphaya kokuqonda kwethu okulinganiselweyo. Noko ke, iimfundiso zeecawa ezininzi zidlulela ngaphaya kwemilinganiselo yezi zinto ziphawulwe ngokucacileyo.

Ngaba Ufihlakele Ngaphezu Kokuba Kuyimfuneko?

Intyilalwazi yamaKatolika iThéo esandul’ ukupapashwa ithi: “Kwiimfundiso zecawa, igama elithi imfihlelo linokusetyenziswa nakoko uThixo akutyhilayo ngaye, ngokomzekelo, ngokuphathelele ukuba ngubathathu emnye kwakhe.” Njengakwezinye iincwadi ezininzi ezingezifundo zakwalizwi, ingcamango eveliswe ngokucacileyo apha yeyokuba ‘ekubeni ulwazi ngoThixo ngokucacileyo luyimfihlelo, ayifanele isothuse into yokuba uThixo unguBathathu Emnye nokuba lo Bathathu Emnye uyimfihlelo.’ Ngaba kukho apho ukuqiqa okunjalo kusekelwe khona?

Kuqala, iincwadi ezininzi ziyavuma, njengokuba isenjenjalo iThe New Encyclopædia Britannica, ukuba “igama elithi uBathathu Emnye okanye imfundiso yakhe ecacileyo ayibonakali kwiTestamente Entsha.” Ngaphezu koko, imbali yale mfundiso ibonisa ukuba iye yadibanisa iingcamango ezininzi ezithatyathwe kwiintanda-bulumko ezingabahedeni ezafakelelwa kwizivumo zokholo zecawa kumashumi aliqela eminyaka emva kokufa kwabapostile. Ngoko ke, akukho bungqina obuqinileyo bokuba imfihlelo kaBathathu Emnye iyafumaneka eBhayibhileni.a

Khawucinge ngoku: Ekubeni kungenakwenzeka ukwazi yonke into ngoThixo, ngaba bekuya kuba sengqiqweni ngoYehova ukufihla oko akuko? Akunjalo, ufuna bonke abantu bamazi. (Yohane 17:⁠3; thelekisa amaHebhere 8:​11.) Yaye ngaba bekuya kuba sengqiqweni ngabo ngokwenyaniso bafuna ukumkholisa ukufihla oko akuko? Ngokomzekelo: Ukuba ekuphela kwethuba ubani analo lokwakhel’ umkhanya ubuhle belizwe kungokujonga ifestileni, ngaba ibiya kuba bubulumko ukuzalisa ifestile ngomphunga, usithi: ‘Naloo festile inokuzaliswa ngomphunga ngenxa yokuba kakade asiziboni iinkcukacha?’ Kakade akunjalo! IBhayibhile nengqiqo efanelekileyo ibonisa ukuba ulwazi lwethu ngoThixo lusikelw’ umda ngokufanelekileyo. Kodwa le mida ayikuthetheleli konke konke ukuguqulwa kolwazi lwethu ngoThixo lube yimfundiso efihlakeleyo, njengoBathathu Emnye, kuphela ephixanisa ukumqonda kwethu.

Iimfihlelo​—⁠Ezobuhedeni NezobuKristu

Ngaphezu koko, xa igama elithi “imfihlelo” libonakala eZibhalweni, alithethi “ulwazi olufihlakeleyo,” njengokuba lidla ngokuqondwa njalo. Kunjengokuba kanye iThéo isikhumbuza: “Igama elithi imfihlelo alinantsingiselo ifanayo apha. KumaKristu libonisa into ngokuqhelekileyo efihlakeleyo okanye engenakufikelelwa, kodwa leyo uThixo afuna ukuwaxelela yona . . . nafuna ukuba adibane nayo.”

Igama lesiGrike elithi my·steʹri·on (“imfihlelo,” okanye “imfihlelo engcwele”) lasetyenziswa izihlandlo ezingama-20 ngumpostile uPawulos ngengqiqo ekhethekileyo. Walisebenzisa ekubhekiseleni kwimfihlelo engcwele ekwakukudala ifihliwe kodwa awathi uThixo wayityhila xa wathumela uYesu emhlabeni. UYesu Kristu, uMsindisi woluntu, wayeyinxalenye eyintloko ‘yembewu’ ethenjisiweyo uThixo awayeza kuyisebenzisa ukuhlawulela uluntu, ‘Ngaye iintlanga zonke zehlabathi zaziya kusikelelwa’ yaye wayeya kuba kunye neendlalifa ezinxulumene naye ezulwini. (Genesis 3:​15; 22:​18; Roma 8:​17) Ezi nyaniso zisitheleyo, okanye ezifihlakeleyo zazifihlwe kubakhonzi bakaThixo bangaphambi kobuKristu kodwa zatyhilwa nguYehova ngexesha elifanelekileyo. (Efese 1:⁠9; Kolose 1:​26) Okuvuyisayo kukuba olu lwazi alugcinelwanga nje abambalwa abakhethiweyo​—⁠njengokuba kunjalo ngeemfihlelo zonqulo kwiinkonzo ezithile⁠—​kodwa lumele lwaziswe kubantu abaninzi kangangoko kunokwenzeka ngaphandle komkhethe.​—⁠Efese 6:​19, 20.

Ukunqula UThixo Ngenyaniso

IBhayibhile isiqulathele inkcazelo eyaneleyo ukuze sinqule uThixo ngendlela eyamkelekileyo kuye. Kunokuba ifundise ngoBathathu Emnye, isityhilela ngokucace gqitha ubukhulu bukaYehova nesigxina sikaYesu esingaphantsi. Ngokomzekelo, uYesu wathi: “UBawo mkhulu kunam.” (Yohane 14:28; 1 Korinte 15:28) Kwakhona iBhayibhile ibonisa ukuba umoya oyingcwele ungamandla kaThixo asebenzayo, alathisa abakhonzi bakhe abathembekileyo.​—⁠IZenzo 2:​1-4.

Xa wayethetha nomSamariyakazi, uYesu wabonisa ukuba ukuze ubani akholise uThixo, umele amnqule “ngomoya nangenyaniso.” Wongezelela ngokuthi “uBawo ufuna abanjalo ukumnqula.” (Yohane 4:​21-24) Yimbopheleleko yomntu ngamnye wethu ukufuna olu lwazi luchanileyo oluya kusizisela iintsikelelo ukuba sithembela kwiLizwi likaThixo kunokwamkela izithethe eziyimfihlelo nezenziwe ngabantu ezilungcatshayo.

[Umbhalo osemazantsi]

[Inkcazelo Ngomfanekiso okwiphepha 30]

All rights reserved