Ngaba Ngokwenene Inokubakho Imfazwe Yobulungisa?
UKUTYHUBELA iinkulungwane, iNgqobhoko ithethe yophela ngengcamango ‘yemfazwe yobulungisa.’ Kunyaka ophelileyo iphephancwadi iTime lapapasha uludwe lweemfuneko ezisisiseko ezintandathu ezo abafundi ngezakwalizwi bakholelwa ukuba imfazwe imele ibe nazo ukuze igqalwe “njengeyobulungisa.” Imbali ibonisa ukuba akukho nanye imfazwe ebizakuzelelwa yiNgqobhoko eye ngokuthe ngqo yahlangabezana nezi mfuneko.
Kodwa iHar–Magedon, imfazwe uThixo athembise ukuyizisa nxamnye nale nkqubo yezinto yonakeleyo, iyifikelela yomithandathu le milinganiselo abathi abafundi ngezakwalizwi iyimfuneko.
“Ilandela ‘ikhondo lobulungisa,’ elinjengokuzikhusela okanye ukoyiswa kobungendawo.” IHar–Magedon iya kutyumza kuthi tu zonke iinxalenye zehlabathi elingendawo uSathana uMtyholi anguthixo walo. Ngaloo ndlela, ngokuphathelele uMphumi-mkhosi ‘oThembekileyo noNyanisekileyo’ oya kumela uThixo eHar–Magedon, uKristu Yesu, kunokuthiwa “ugweba, enze imfazwe, ngobulungisa.”—ISityhilelo 19:11; 2 Korinte 4:4.
“Ivakaliswe yaza yalathiswa ‘ligunya elifanelekileyo.’” IHar–Magedon ngaphandle kwempazamo ichazwa ‘njengemfazwe yaloo mini inkulu kaThixo uSomandla’—imfazwe yakhe. Ibingangubani ke elo gunya lifanelekileyo ingenguye uMdali wendalo iphela?—ISityhilelo 16:14; bona nese–11:17, 18; thelekisa uIsaya 36:10.
“‘Lilinge lokugqibela’ emva kokuba amalinge oxolo ekatyile.” Kangangamawaka eminyaka ngoku, uMdali uye wakhuthaza—wade wabongoza—uluntu ukuba ‘luxolelaniswe noThixo’ ukuze ‘lumkhonze uYehova lusoyika.’ Kodwa ngokuba nendlebe ethe nkqi kumanyathelo oxolo nezilumkiso ezivela kuThixo kangangama-6 000 eminyaka, umntu uye wamshiya uMdali engenandlela yakuyiphepha imfazwe.—2 Korinte 5:20; INdumiso 2:2, 10-12.
“Inikela ubuncinane ‘ithemba’ lempumelelo.” Qwalasela amacala alwayo. Kwelinye icala ngamandla eentlanga zeli hlabathi ewonke, namaziko awo ezixhobo zemfazwe ezoyikekayo. Kwelinye icala nguMdali wendalo iphela. Enye yezona zinto zincinane azidalileyo, ilanga, liziko elikhulu lobushushu bogqabhuko-dubulo olunamandla kangangokuba nokuba iintlanga bezinokudubula ngesithonga esinye esikhulu, zonke izixhobo zazo zenyukliya, olo dubulo beluya kuphelela esithubeni njengokuqhwitha komcinga nje omnye wematshisi ngokwentelekiso. UYehova unayo yonke imikhosi enamandla yendalo yokuqinisekisa ukuba imfazwe yakhe iya kuzuza eyona mpumelelo iqinisekileyo.—Isaya 40:15; 54:17.
“Ihambisana ‘ngokulungeleleneyo’—izinto ezintle eziya kufikelelwaziya kuba ngaphezu komonakalo owenziweyo.” Khawucinge ngekamva ngaphandle kwemfazwe kaThixo yeHar–Magedon. Uluntu lutyekele ekuzibhubhiseni ngokungenalusini. Ukuba kunokuyekelwa emntwini, ebeya kuthabatha ithuba elide kangakanani ekonakaliseni esi sijikelezi-langa aze aphelise ngokulihlazo iintlobo zokugqibela njengezo sele eziphelise ngokungenatarhu? Ngaba kuya kuthabatha imva kwemini enye yentlekele yenyukliya? okanye amashumi ambalwa eminyaka yongcoliso lomhlaba? Nokuba imeko iyintoni na, uluntu lutshabalele ukuba uThixo akangeneleli kwimicimbi yoluntu. Kwelinye icala, qwalasela ukulunga, ekuthenjiswa ukuba iHar–Magedon iya kukuzisa—ikamva elinoxolo eliya kufunyanwa ngabantu abahlonel’ uThixo kulo mhlaba, kungabikho lungcoliso, kungabikho mfazwe, kungabikho buhlwempu, kungabikho sifo kwanakufa. UThixo uyathembisa: “Yabona, izinto zonke ndizenza ntsha.”—ISityhilelo 21:3-5.
“‘Iyakhetha,’ ikuphepha ukwenzakalisa abo bangathabathi cala emlweni apho kunokwenzeka.” IHar–Magedon iya kukhetha. “Abenzi bobubi baya kunqunyulwa; ke bona abamthembayo uYehova baya kulidla ilifa ilizwe.”—INdumiso 37:9.
Bonke abo banomdla wokusinda kule mfazwe eya kuba yeyobulungisa ngokwenene bafanele ngofundisiso lobuqu lweLizwi lakhe bazi isizathu sokuba ‘benokuthemba uYehova.’