Imibuzo Evela Kubafundi

Yintoni ‘imfazwe kaThixo uSomandla’ yaseHar–Magedon, ibe iya kuba nemiphumo enjani?—ISityhilelo 16:14, 16.

Ngamafutshane, imfazwe yaseHar–​Magedon lidabi lomhlaba wonke apho uKumkani omiselwe nguYehova, uYesu Kristu eya kutshabalalisa iintshaba zikaThixo. IBhayibhile ithi ezi ntshaba, “ookumkani bomhlaba omiweyo uphela,” bahlanganiswa “ngamazwi aphefumlelwe ziidemon” yaye bahlanganiselwa “kwimfazwe yemini enkulu kaThixo uSomandla . . . kwindawo ebizwa ngesiHebhere ngokuba yiHar–​Magedon.”—ISityhilelo 16:14, 16.

Le asiyondawo yokoqobo. Igama elithi Har–​Magedon, eliguqulelwa ngokuthi “Armagedon” kwezinye iinguqulelo zeBhayibhile, lithetha “iNtaba yaseMegido.” (ISityhilelo 16:16) Ayikho intaba eyakha yanelo gama. Eny’ into, akunakwenzeka ukuba “ookumkani bomhlaba nemikhosi yabo” bahlanganiselwe ndawonye ngokoqobo. (ISityhilelo 19:19) Eneneni, le ‘ndawo’ ibhekisela ekuhlanganiselweni kwabalawuli bezopolitiko bomhlaba nabalandeli babo—abo bachasa uYehova ‘nemikhosi yasezulwini’ elawulwa ngumthetheli wemikhosi “uKumkani wookumkani neNkosi yeenkosi,” uYesu Kristu.—ISityhilelo 19:14, 16.

Okuphawulekayo kukuba, igama elithi “Har–​Magedon” linxulumene nesixeko saseMegido mandulo kwaSirayeli. Ekubeni yayikwimpuma yeNtaba yeKarmele, iMegido yayibalasele ngorhwebo nokoyiswa kwemikhosi apho kuyo. Maninzi amadabi alwelwe apho, kusoyiswa imikhosi. Ngokomzekelo, kwakulapho “ngakumanzi aseMegido” awathi uMgwebi wakwaSirayeli uBharaki woyisa umkhosi onamandla wamaKanan owawukhokelwa nguNjengele uSisera. (ABagwebi 4:12-24; 5:19, 20) Kukwalapho kuloo ndawo, awathi uMgwebi uGidiyon watshabalalisa khona amaMidiyan. (ABagwebi 7:1-22) Ngokubhekisela kwiMegido ukuchaza imfazwe ezayo, iBhayibhile isiqinisekisa ukuba xa esebenzisa uNyana wakhe, uThixo uza kuyoyisa ngokupheleleyo yonke imikhosi yeentshaba zakhe.

Iya kuba njani imiphumo yale mfazwe? Imfazwe yaseHar–​Magedon iya kutshayela konke ukonakala nobungendawo emhlabeni. Iya kuhlahlel’ indlela elona xesha lakha lamnandi kwimbali yoluntu. (ISityhilelo 21:1-4) Xa sele kulawula uBukumkani bukaThixo, umhlaba uya kuguqulwa ube yiparadesi apho aya kuphila khona ngonaphakade amalungisa.—INdumiso 37:29.