Abantu Abaselula Bayabuza . . .

Kutheni Ndifanele Ndifundisise Ngamandla Esikolweni?

‘Inkoliso yoko sikufunda esikolweni yinkcazelo nje kuphela kakade. Akukho nakunye okusebenziseka ngokwenene kuko.’

‘Umsebenzi wesikolo owenzelwa ekhaya awundiniki mdla. Ndinomdla ngakumbi kwezinye izinto, ezinjengemidlalo nokuphuma nabahlobo bam.’

‘Ndiyazi ukuba ndiza kungenela inkonzo yexesha elizeleyo, ngoko kunceda ntoni ukusebenza ngamandla esikolweni?’

AMAGQABAZA anjengala adla ngokwenziwa lulutsha xa luthetha ngesikolo nomsebenzi wesikolo owenzelwa ekhaya. Mhlawumbi nawe unezimvo ezifana nezalo.

Kuyavunywa ukuba, xa lunokukhethiswa phakathi kokufundisisa nokuzihlaziya, ulutsha oluninzi beluya kukhetha ukuzihlaziya. Lumbi lusenokude lunge ngekungazange kufuneke lufunde konke konke. Ukufunda alukuthabathi nzulu; alucingi ngomahluko okuya kuwenza ebomini balo. Kwelinye icala, mhlawumbi ungomnye ofuna ukuphumelela esikolweni kodwa akunanzondelelo kangako ngomsebenzi wakho wesikolo. Uqiqa ngokuthi, ‘andilohlobo lukhuthalele ukufunda.’

Enoba ziyintoni na iimvakalelo, umdla okanye ubuchule bakho, unako ukuphumelela esikolweni. Kodwa umele ushukunyiswe kokuthile ukuze wenjenjalo. Yaye ukuhlolisisa iingenelo onokuzifumana xa ufundisisa ngamandla kunokuyikhulisa ngakumbi loo ntshukumisa.

Ukuqeqesha Ingqondo

Okuninzi koko ukufundisisayo esikolweni kusenokubonakala kungenanto yakwenza nobomi bakho okwangoku. Ngaphandle kokuba uceba ukuba sisazinzulu, kusenokwenzeka ukuba akuyi kuyisebenzisa kwikamva imithetho yenzululwazi ngezinto zemvelo ezingaphiliyo (physics) asenokuba umfundisi-ntsapho wakho ukufundise yona. Ngaphezu koko, akunakwenzeka ukuba njengomntu omkhulu kufuneke ukuba mihla le uchaze izimo zezenzi okanye ubale ukulingana kwamacala kanxantathu onamacala amabini alinganayo. Uyabuza: ‘Ngoko, ndisakufundela ntoni konke oko?’

Phakathi kwezinye izinto, isikolo sikunika ithuba lokuzuza ulwazi olubanzi ngezifundo ezininzi ezahlukahlukeneyo, njengembali, uncwadi, inzululwazi, ezelizwe kunye nemathematika. Esi siseko solwazi oluphangaleleyo siya kukunceda uliqonde ngakumbi ilizwe elikungqongileyo ibe siya kuba sisiseko onokongezelela kuso inkcazelo ecace ngakumbi. IMizekeliso 14:⁠6 ithi, “Ukwazi kulula konengqondo.”

Kwincwadi yakhe ethi Savoir étudier, (Ukwazi Indlela Yokufundisisa), uRobert Bosquet uchaza ngokubhekele phaya ukuba amandla engqondo okufunda “amele afunyanwe aze ngokunenkqubela asetyenziswe.” Wongezelela athi: “Kuyaziwa ngokuqhelekileyo ukuba intshatsheli yezemidlalo inokuphumelela kuphela emva kwethuba elide loqeqesho ethi kulo ifumanise indlela yokusebenzisa ubuchule bayo ngokuzeleyo. . . . Oko ikwakoko kufunekayo ukuze wazi indlela yokufundisisa. Ukuwasebenzisa onke amandla akho, ukufumana ezona ziphumo zihle, ngexesha nomgudu ongephi.”

Ngoko ke umsebenzi wesikolo owenzelwa ekhaya unokubizwa ngokuba kukuqeqesha ingqondo. Incwadi ethi How to Study ithi: “Ingqondo . . . yinkqubo enkulu yothungelwano, ibe okukhona intsonkothe yaye ithungelana ngakumbi kokukhona isebenza ngobuchule ngakumbi.” Imisebenzi oyinikwa esikolweni inokukunceda uphucule ubuchule bakho bokunikel’ ingqalelo, bokuqiqa, bokucengceleza, bokucombulula ingxaki, nobokwenza izigqibo ezifanelekileyo.

Ukukhula Ngokweemvakalelo Nangokomoya

Iminyaka osesikolweni ngayo ikwalixesha lokukhula ngokweemvakalelo nangokomoya. Uvelisa imikhwa nesimo sengqondo esiya kuthi ngomlinganiselo omkhulu sigqibe ngohlobo lomntu oya kuba lulo. Ngaba uya kuba ngumntu okhutheleyo, onenyameko, ondilekileyo nonobuchule​—⁠lowo umqeshi anokunqwenela ukumqesha? Ukuziqeqeshela ukuba ube nemikhwa elungileyo yokusebenza kwangoku kuya kuba neengenelo ezihlala zihleli. (Thelekisa IMizekeliso 22:⁠6.) Phakathi kwezinye izinto, inganempumelelo enzulu kwindlela oya kuba noqoqosho ngayo nakumsebenzi oya kuwenza. Amashishini amaninzi ajonga ingxelo yemfundo ephakamileyo yomntu ukuba abone indlela lowo wenze isicelo aya kuqhuba ngayo emsebenzini kwixesha elizayo.

Indlela ofunda ngayo ikwachaphazela nenkqubo yakho yokomoya. UYesu wafundisa ukuba umntu umele anqule uThixo ‘ngengqondo yakhe iphela.’ (Marko 12:​30) Oku kuthetha ukuba abakhonzi bakaThixo, abancinane nabakhulu kuya kufuneka bazisebenzise ngamandla iingqondo zabo ukungenisa ulwazi uYehova enza ukuba balufumane nokuze baqonde indlela yokulusebenzisa ebomini babo.​—⁠Yohane 17:⁠3; 1 Timoti 4:⁠7.

USylvie, ibhinqa eliselula laseFransi, uthi: “Kolunye ulutsha olulingana nam, ndibona ukuba iindlela zokufundisisa kwalo esikolweni luye lwaqhubeka nazo nakufundisiso lobuqu kwimicimbi yokomoya. Olo lungazange luziqhelise ukuthanda ukufunda esikolweni lwalungenamdla kangako nakufundisiso lobuqu lweBhayibhile.” IMizekeliso 10:⁠4 ithi: “Uba lihlwempu osebenza ngesandla esidangaleyo; ke sona isandla sabakhutheleyo siyatyebisa.” Oku kwangqineka kuyinyaniso ngoSylvie ngengqiqo yokomoya. Imikhwa yakhe elungileyo yokufundisisa yenza kwalula ngaye ukwandisa ukuyiqonda kwakhe iBhayibhile. Oku kwamlungiselela umsebenzi wakhe njengomshumayeli wexesha elizeleyo.​—⁠Thelekisa INdumiso 1:​2, 3.

Funda Indlela Yokufundisisa

Kodwa kuthekani ukuba akungomntu uthanda ukufundisisa? Qonda ukuba umahluko oyintloko phakathi komfundi ophumelelayo nalowo ungaphumeleliyo ngokuqhelekileyo kukukhuthala​—⁠ingebubo ubukrelekrele. USylvie uyavuma: “Ndandingekho krelekrele ngokwemvelo njengabanye abafundi. Ukuze ndiqhube kakuhle esikolweni, kwakufuneka ndisebenze ngamandla ukuze nje ndifumane amanqaku afanelekileyo.” Nangona isikolo sasingeyondawo yakhe, uSylvie wenza imigudu yenkuthalo; akazange aphelele nje ngokuzifundisa indlela yokufundisisa kodwa wafunda nokukunandipha. Uthi, “Ngenxa yokuba kwaba ngumkhwa akuzange kube luxanduva ukufundisisa okanye ukuphanda ngesifundo esithile. Ndazifundisa ukuba kube segazini.”

Kwincwadi yakhe ethi How to Study, uHarry Maddox uthi: “Ubuchule bodwa abanelanga. Abafundi abaninzi abakrelekrele abaphumeleli . . . ngenxa yokuba abasebenzi ngokwaneleyo, okanye ngenxa yokuba abazange bafunde ukufundisisa ngokunempumelelo.” Wongezelela athi: “Iindlela zokufundisisa ngokunempumelelo ziwufanele umgudu kungekhona ukwenzela ukufundisisa ngoku kuphela, kodwa nangenxa yokuba imikhwa yakho yokusebenza ayisayi kuguquka ubomi bakho bonke.”

Abantu ngokuqhelekileyo bayakunandipha ukwenza izinto abazenza kakuhle​—⁠ibe batyekele ekuziphepheni izinto abangazenzi kakuhle. Ngoko, kusenokwenzeka ukuba akuwuthandi umsebenzi wesikolo, ngenxa yokuba akukhange uvelise ubuchule bokufundisisa ngokwaneleyo ukuwenza umsebenzi wakho unandipheke. Ukuba kunjalo, kutheni unganikeli ingqalelo ekufundeni indlela yokufundisisa? Inkcazelo eluncedo iyafumaneka kwisahluko 18 sencwadi ethi Imibuzo Yabantu Abaselula—⁠Iimpendulo Eziluncedo.a

Khangela Ngaphaya Kweminyaka Yokufunda Esikolweni

Abafundi abaninzi bayazityeshela izifundo zabo ngenxa nje yokuba bebengathanda ukwenza enye into​—⁠njengokuzonwabisa. Kodwa IMizekeliso 21:​17 iyalumkisa: “Othanda imigcobo uba yindoda esweleyo.” Ukuzihlaziya nokuphumla kunendawo yako. (INtshumayeli 3:​1, 4) Noko ke, ngoxa usesikolweni, ukufundisisa kufanele kube yenye yezinto ozibeke kwindawo yokuqala. Iziphumo ozifumanayo ziya kuxhomekeka ubukhulu becala kumgudu ozimisele ukuwenza. IMizekeliso 14:​23 ithi: “Ekubulalekeni konke kubakho ungeniselo.”

Oku akuthethi ukuba uya kuthanda zonke izifundo okanye umsebenzi owunikwa esikolweni. Kodwa imfundo yakho unokuyijonga njengendlela yokufikelela usukelo​—⁠ukuzuza ulwazi nobuchule obuya kukunceda uphile ubomi obunenjongo nobuneziqhamo. Kuyinyaniso ukuba, izinto ezifunekayo emfundweni kunye neemeko zoqoqosho zahluka kakhulu kumazwe ngamazwe. Sekunjalo, abantu abaselula abaninzi baphuma esikolweni bengafumenanga nobona buchule bokufundisisa busisiseko; bazifumanisa bengazilungelanga okanye bengazifanelekelanga iintlobo ezininzi zemisebenzi. Kutheni? Ngenxa yokuba abakhange bazimisele ngoxa bebesesikolweni.

Ungangeni kulo mgibe! Khangela ngaphaya kweminyaka yokufunda esikolweni uze ucwangcisele ukukwazi ukuzixhasa wakuphuma esikolweni. Ngenye imini usenganembopheleleko yokunyamekela intsapho. (1 Timoti 5:⁠8; thelekisa IMizekeliso 24:​27) Njengolutsha oluninzi phakathi kwamaNgqina kaYehova nawe usenokuba uceba ukusebenza njengomshumayeli wexesha elizeleyo. Sekunjalo kuya kufuneka uzixhase mhlawumbi uxhase nentsapho. Ngoko cingela nexesha elizayo. Lisekude ixesha lokuba uphume esikolweni, zama ukuqonda uhlobo lemisebenzi yesingxungxo efumanekayo kwindawo ohlala kuyo. Ukuzibhokoxa kumsebenzi wakho wesikolo kuya kukunceda uvelise ubuchule obufunekayo bokufumana imisebenzi enjalo.

Enoba ziyintoni na iinjongo zakho ngekamva, kusengqiqweni ukufunda ngamandla esikolweni. Akuyomfuneko ukuba ude ubagqwese bonke ofunda nabo. Kodwa unokufunda ukukuthanda ukufunda. Ubuncinane, unokuvelisa ulwazi, ubuchule nemikhwa eya kuba yingenelo kuwe kubomi bakho bonke.

[Umbhalo osemazantsi]

[Umfanekiso okwiphepha 24]

Ubuchule bokufunda obuvelisa ngoxa usesikolweni buya kuba yingenelo kuwe ubomi bakho bonke