Imbono YeBhayibhile
Ubungendawo—Ngubani Obekek’ Ityala?
NJENGOKO wayengena ekhayeni lakhe, ngokukhawuleza waqonda ukuba kwakukho undonakele othile. Uthe akuthi ntla endlwini wabona ukuba ngenene kwakukho into eyenzekileyo—umabonwakude, unomathotholo, iimpahla ezithile nezinye izinto zazingekho. Ngoko, ingqondo yaqala ukubetha-bethana, ‘kuya kuthekani ukuba aba baqhekezi basesendlwini?’ Wabalekela endlwini yommelwane ukuze afumane inkuseleko nokuze abize abakwantsasana. Ewe, wayelelinye ixhoba elingakumbi lolwaphulo-mthetho.
Ukuba wena ngokobuqu akukaze uchatshazelwe lulwaphulo-mthetho, mhlawumbi wazi ubani othile oye wachatshazelwa lulo. Olu lwaphulo-mthetho lwenzeka umhla nezolo kulo lonke ihlabathi kubantu abangaluthandiyo. Ngokohlolisiso olwenziwe yiKomiti YeZizwe Ezimanyeneyo Ejongene Nokuthintela Nokulawula Ulwaphulo-mthetho, umlinganiselo wolwaphulo-mthetho olubikwayo untinga ngokukhawuleza kunezoqoqosho nokwanda kwabemi kumazwe ngamazwe.
Kuzo zonke iindawo abantu abalungileyo nabantliziyo zinyanisekileyo bayakhathazeka gqitha lulwaphulo-mthetho, ukubulawa kwabantu ngokuhlasimlis’ umzimba, ukungabikho kokusesikweni nokonakaliswa kwehlabathi yaye baxakanisekile kukoyika ugonyamelo oluqhubekayo. Abaninzi babuza oku, ‘Kutheni uThixo engakuphelisi nje oku?’
Lowo ngumbuzo omhle, yaye iBhayibhile iyawuphendula. Noko ke, ukuze impendulo iqondakale, kubalulekile ukwazi umthombo nonobangela osisiseko wobungendawo.
UThixo Akabekek’ Ityala
Umbhali weBhayibhile uPawulos ubuza oku, “Kukho ukuswela kulungisa kusini na kuye uThixo?” Uphendula athi, “Nakanye!” (Roma 9:14) Kodwa bambi basenokuvakalelwa kukuba ekubeni uThixo engusomandla, ubophelelekile ngayo yonke into eyenzekayo. Oku akunjalo. Khawuqwalasele oku: “Umzobi wezakhiwo uzoba isakhiwo esihle esisebenzisekayo. Abakhi baso basebenzise obona bugcisa bomgangatho ophakamileyo nempahla yokwakha esetyenzisiweyo iyeyona iphucukileyo. Noko ke, abahlali baso bayasonakalisa baze basiphathe kakubi. Kungekudala sifuna ukuphinda silungiswe ngokucokisekileyo. Ngokuqinisekileyo ubungavuma ukuba ngabantu abahlala kweso sakhiwo ababophelelekileyo ngemeko yaso embi, ayinguye umyili okanye umakhi waso! Kukwanjalo ke ngoluntu nomhlaba namhlanje. Njengokuba iDuteronomi 32:4, 5 isitsho, umsebenzi kaYehova ugqibelele. “Zonke iindlela zakhe zisesikweni. NguThixo wentembeko, tu ubugqwetha.” Ngoko, ngubani obekek’ ityala ngenkathazo engaka emhlabeni namhlanje?
Esi sibhalo siqhubeka sisithi: ‘Bazonakalisile kuye sisiphako sabo.’ Enyanisweni, inkoliso yomonakalo osehlabathini namhlanje ngumphumo othe ngqo wobuthathaka okanye, mhlawumbi, weenkani zoluntu. Noko ke, kukho omnye umthombo nonobangela omkhulu ngakumbi wobungendawo.
Unobangela Wokwenene Ubhenciwe
KwiSityhilelo 12:9, sifunda ukuba uSathana uMtyholi, “lowo ulilahlekisayo elimiweyo liphela,” uphoswe kummandla wasemhlabeni. Uba yintoni umphumo? Indinyana 12 yeso sahluko iqhubeka isithi: “Yeha, abo bawumiyo umhlaba nolwandle! ngokuba uhlile weza kuni uMtyholi.” Ngoko nguye, uTshaba olukhulu, oxhokonxa izenzo zokungabikho kokusesikweni ezizalise umhlaba. Liyinyaniso elokuba, bakho abantu abasebenzisana nemigudu yakhe; kodwa ke nguye kanye ochazwe ‘njengowaye esisibulala-mntu kwasekuqaleni.’ (Yohane 8:44) IZibhalo zisibonisa ukuba uSathana uMtyholi ungunobangela osisiseko weengxaki zoluntu. Akangonobangela nje kuphela kodwa uye waqhubeka ekhuthaza ubungendawo, ebhinqele phezulu kule “mihla yokugqibela.” (2 Timoti 3:1-5, 13) Ngoko uYehova uThixo akangonobangela wobungendawo. Kodwa ngaba unenkathalo ngokwaneleyo ngokokude akuphelise ukubandezeleka koluntu?
Ngaba UThixo Uya Kubuphelisa Ubungendawo?
Ewe, unenkathalo yaye uya kubuphelisa ubungendawo nokubandezeleka. UnguThixo wothando, yaye njengoBawo onothando, uyazazi yaye ufuna ukuzanelisa iintswelo neminqweno yabantwana bakhe. (INdumiso 145:16; 1 Yohane 4:8-10) Isibakala sokuba uThixo engekenjinjalo asibonakalisi ukuba uyekelel’ umxakatho. Kunoko, ukuzibamba kwakhe nokuba nomonde kwakhe kububungqina bokuba ngusomandla kwakhe nokuba engulowo onganqatyelwanga nto. Uyalazi elona xesha lilungileyo lokuphelisa le nkqubo ingendawo yezinto yaye kanye ngexesha elililo, uya kwenjenjalo.
Le meko isenokuthelekiswa naleyo yomama okhulelweyo. Ngoxa engxamele ukuba lude lufike usana lwakhe, uyazi ukuba akukho mfuneko yokuba akhathazeke ngokugqith’ emgceni. Uyaqonda ukuba kuthabatha ixesha elithile ngosana olusesibelekweni ukuba lukhule ngokupheleleyo. Ngokungathandabuzekiyo, kuya kubakho amaxhala nokungonwabi kule ndlela, kodwa ukufika kosana olusempilweni, olukhule ngokupheleleyo nobelusesiswini sonina ithuba elaneleyo kwenza konke ukukhathazeka nokulinda kube kokufanelekileyo ngelo xesha.
Ngoko, kukwanjalo ngehlabathi elitsha elizukileyo loxolo elichazwe eBhayibhileni. Liya kufika kamsinya emva kokuba uBukumkani bukaThixo bungenelele kwimicimbi yabantu, buze bushenxise eli hlabathi likhoyo lingenabulungisa. Ngelo xesha, bonke ubungendawo buya kuba yinto yexesha elidluleyo. Ukubandezeleka, iintlungu, ukugula nokufa—zonke ezi zinto ziya kube zingekho. (ISityhilelo 21:3, 4) Nabo babophelelekileyo ngenxa yako konke ukubandezeleka baya kube betshatyalalisiwe. USathana needemon zakhe kunye nabantu ababeyinxalenye yale nkqubo yezinto, baya kube betshatyalalisiwe.—Malaki 4:1; ISityhilelo 20:1-4.
Akusayi kubakho mfuneko yokuba abo banjengelaa bhinqa likhankanywe ekuqaleni kweli nqaku bangongozelwe luvalo xa besiya emakhayeni abo behamba bodwa. Kunjengokuba yena nendoda yakhe bekubeka oku: “Emva kokuba ikhaya lethu liqhekeziwe, safakela isixhobo esikhalayo esilumkisa ngomonakalo. Sele kudlule iminyaka ngoku ukususela kobo busela, ngoku asisaziva sinexhala kangako ngako. Kodwa siyazi ukuba kukwikamva kuphela, phantsi kwelungiselelelo loBukumkani bukaThixo, esiya kuthi sinandiphe uxolo nonqabiseko lokwenene.”
Ide loo mini eza kufika kungekudala iqalise, kufuneka silisebenzise ngobulumko ixesha esinalo ngoku. UPetros usixelela ukuba sibalele “ukuzeka kade umsindo kweNkosi yethu ekuthini lusindiso.” (2 Petros 3:15) Kwanosindiso lwabanye, kuba njengokuba sixelela abantu ngeli themba limangalisayo, ‘siya kuzisindisa thina sibasindise nabo basivayo.’ (1 Timoti 4:16) Ngoku lixesha lokuba sisebenzele kwiimpawu eziya kusenza sibe luhlobo lwabantu abaya kuphila kwelo hlabathi litsha, apho ubungendawo buya kuba yinto yexesha elidluleyo. (INdumiso 37:9-11) Kufuneka siyiphengulule iBhayibhile ukuze sifumane kungekuphela nje iimpendulo kwimibuzo yethu kodwa nokhokelo esilufunayo ukuze sivisisanise ubomi bethu nokuthanda kukaThixo.
[Inkcazelo Ngomfanekiso okwiphepha 10]
Doré’s illustration of Lucifer for Dante’s Divine Comedy