Kutheni UThixo Evumela Ubungendawo?

AKUNAKUDE uye kude ukuze ubone ukubandezeleka nobungendawo. Xa imfazwe ibetha, idibanisa konke, ijoni nomntu oqhelekileyo. Ulwaphulo-mthetho nogonyamelo yinto yomhla nezolo. Kusenokwenzeka ukuba nawe ukhe wacalulwa okanye waphathwa ngokungekho sikweni. Ngenxa yoko, kusenokwenzeka ukuba uye wazibuza, ‘Kutheni uThixo evumela ubungendawo?’

Akungoku wabuzwa lo mbuzo. Kwiminyaka emalunga nama-3 600 eyadlulayo, omnye wabakhonzi abathembekileyo bakaThixo, uYobhi wabuza: “Kutheni abangendawo beqhubeka bephila?” (Yobhi 21:7) Ekhathazwa kukugqugqisa kobungendawo kwilizwe lakowabo ngenkulungwane yesixhenxe ngaphambi Kwexesha Eliqhelekileyo, umprofeti uYeremiya naye wabuza: “Kutheni na iphumelele indlela yabangendawo, bonke abo benza ngobuqhophololo ingabo abangakhathazekanga?” (Yeremiya 12:1) Bobabini uYobhi noYeremiya babesazi ukuba uThixo ulilungisa. Ukanti babexakwe kukwesamela okungako kobungendawo. Mhlawumbi kunjalo nakuwe.

Abanye bacinga ukuba nguThixo obangela bonke obu bungendawo nokubandezeleka. Bambi bade bazibuze: ‘Ukuba uThixo ungusomandla, usesikweni kwaye uyabathanda abantu, kutheni engabuphelisi ubungendawo nokubandezeleka? Kutheni eyeke kwade kwangoku kuqhubeka ubungendawo?’ Inqaku elilandelayo liza kuphendula le mibuzo kwaneminye ebalulekileyo.

[Inkcazelo Ngomfanekiso okwiphepha 3]

AP Photo/Adam Butler