Imbono YeBhayibhile
Yintoni Efanele Yenziwe Xa Umlungiseleli Esona?
IHAMBO etenxileyo yeenkokeli zonqulo ixhomis’ amehlo namhlanje kunanini na ngaphambili. AmaProtestanti aye aphoxwa yihambo elihlazo yabalungiseleli abashumayela kumabonwakude. Emva kokuba omnye umshumayeli oshumayela kumabonwakude ebhaqwe nehenyukazi kutshanje okwesihlandlo sesibini kwiminyaka emithathu, wazisa abalandeli bakhe ukuba uThixo wamxelela ukuba indlela aziphatha ngayo ayifuni omnye umntu koko ifuna yena.
Linikela ingxelo ngohlolisiso olwenziwe iminyaka engama-25, iphephancwadi iTime lathi: “Owayesakuba yimonki kwicawa ka-St. Benedict . . . uthelekelela ukuba isiqingatha sabefundisi bamaRoma Katolika abangama-53 000 eUnited States siyasaphula isifungo saso sokungatshati.” Kwakhona, ingxelo yowe-1990 yeendaba ezingeqela labefundisi baseKhanada abafunyaniswa benetyala lokuxhaphaza abantwana ngokwesini ithi: “Iinkokeli zeCawa ziye zazibetha ngoyaba, azazamkela okanye azazikhathalela izikhalazo ezingokuxhaphaza ngokwesini, nakubeni ezo zikhalazo bezivela kumaxhoba, kumarhamente, kumapolisa, koonontlalo-ntle nakwabanye abefundisi.”
ITime yathi: “Kude kube kutshanje, abefundisi abonayo babesuka nje bahanjiswe kwinqila ethile basiwe kwenye.” Kodwa ngoku ngenxa yokuba amaxhoba ehambo etenxileyo yabefundisi eye amangala ezinkundleni efuna ukuhlawulwa ngezigidi ezingama-R825 eUnited States, abefundisi ngokufuthi banikwa unyango lwezifo zengqondo ngaphambi kokubuyela kumsebenzi wonqulo.
Yintoni efanele yenziwe xa umlungiseleli, umfundisi okanye umdala esona? Luluphi ulwalathiso iBhayibhile elunikelayo ngendlela yokusingatha loo hambo itenxileyo nebangela ubuhlungu? Masihlolisise ezi ndinyana zimbini zeBhayibhile ezingundoqo—uTito 1:7 neyoku-1 kuTimoti 3:2.
Umele Abe “Ngongenakumangaleleka”
IBhayibhile ithi “Umveleli [“ubhishophu,” The New American Bible (inguqulelo yamaKatolika)] umelwe kukuba ngongenakumangaleleka, njengegosa likaThixo.” (Tito 1:7) UPawulos wanika uTito lo myalelo xa wayemnika isabelo sokumisela abadala kumabandla aseKrete. Noko ke, wayethetha ukuthini lo mpostile?
Igama elithi “ongenakumangaleleka” liguqulelwe ngokusuka kwigama lesiGrike elithi a·negʹkle·tos. Igqabaza ngeli gama, iThe New International Dictionary of New Testament Theology ithi: “Igama elithi anenklētos lisetyenziswa ngokubhekisele kwindlela yokumangalela umntu enkundleni, yaye libonisa ihambo engenatyala, engenakumangaleleka.” Ngaloo ndlela, udumo lomntu lumele lube luhle phambi kokuba amiselwe njengomdala; akamele abe netyala, okanye abe nokumangaleleka. Yaye umdala unokuqhubeka nalo msebenzi ukuba kuphela unokuhlala engenakumangaleleka.—Thelekisa eyoku-1 kuTimoti 3:10.
Umdala akapheleli nje ekulikhokeleni ibandla kodwa kwakhona uyalikhonza. Umele ayamkele imbopheleleko yakhe yokuba ligosa. Uligosa likaThixo; walusa izimvu zikaThixo. Ngaloo ndlela, okokuqala unembopheleleko kuMnini-mhlambi, uYehova, nakubantu uThixo awamnika imbopheleleko yokubavelela.—1 Petros 5:2, 3.
Umele Abe “Ngongenakukhalazelwa”
IBhayibhile ithi: “Umveleli [“ubhishophu,” NAB] ngoko umelwe kukuthi abe ngongenakukhalazelwa.” (1 Timoti 3:2) Igama lesiGrike elithi a·ne·piʹlem·ptos liguqulelwa ngokuthi “ngongenakukhalazelwa” yaye ngokoqobo lithetha ukuba “ngongenakumangaleleka.” Ngamanye amazwi ubomi bomveleli bufanele bungabi nayo nanye into anokuthi ummangali ayisebenzise njengesizathu sokumkhalazela. Igqabaza ngakumbi ngentsingiselo yelo gama lesiGrike, iTheological Dictionary of the New Testament ithi umveleli “akanakuhlaselwa (nangabo bangengomaKristu) ngenxa yokuziphatha kwakhe.”
UThixo ubabekela imilinganiselo ephakamileyo abo bavelela abantu bakhe nabafundisa iLizwi lakhe. UYakobi wathetha oku ngaye nangabanye abadala: “Siya kwamkela olona lukhulu ugwebo.” Yaye uYesu wanikela lo mgaqo wokukhokela: “Kuba bonke abanikwe okukhulu, kuya kufunwa okukhulu kubo.”—Yakobi 3:1; Luka 12:48.
Ngoko ke, ukuba umveleli ongumKristu wona ngokunzulu kodwa aguquke, usenokuhlala elilungu lebandla, kodwa ufanele asuswe ekubeni ngumdala. Akasenguye ongenakukhalazelwa. Kusenokuthabatha iminyaka ukuze abuye azuze udumo oluhle ukuze angabi nakumangaleleka kwakhona. Imeko yakhe isenokufaniswa naleyo yegosa likaHezekiya, uShebhena. Ngenxa yehambo yakhe etenxileyo uYehova wamkhalimela ngala mazwi: “Ndokuguzula usuke ebugoseni bakho, akugungxule ebumeni bakho.” Kodwa kamva kumele ukuba uShebhena wabuya waluzuza udumo lwakhe oluhle ngenxa yokuba sifunda ukuba kwakhona wayesebenza njengonobhala kakumkani.—Isaya 22:15-22; 36:3.
Kuthekani Ukuba Umlungiseleli Akaguquki?
Iinkonzo ezininzi zeNgqobhoko ziye zabanyamezela abalungiseleli abaqhelisela isono. Ngowe-1459 ukhadinali uRodrigo Borgia waba lisekela-ngqonyela likapopu, esona sikhundla solawulo siphakamileyo kwiiCawa zamaKatolika. Ngenxa yodumo lwakhe lokuziphatha kakubi, wakhalinyelwa nguPopu Pius II. Ukanti, nakubeni wayenguyise wabantwana abane ababeyimigqakhwe, ngowe-1492 ikholeji yeekhadinali yamnyula ukuba abe ngupopu owongamileyo! Waqhuba ikhondo lakhe elilihlazo njengoPopu Alexander VI. Ukunyanyezelwa kwabalungiseleli abangaguqukiyo nabanganyanisekanga ukutyhubela imbali yeNgqobhoko ngokungathandabuzekiyo kuye kwafak’ isandla kukonakala esikubona kuyo namhlanje. Ngoko, yintoni emele yenziwe ukuba umlungiseleli akaguquki?
Umlungiseleli ongumKristu owenza isono esinzulu aze oyisakale ukubonisa ubungqina bokuguquka ufanele agxothwe ebandleni. Umpostile uPawulos wabhala: “Maningazidibanisi nosukuba enegama lokuba ngumzalwana ukanti wenza umbulo, nokuba ulibawa, nokuba ungumkhonzi wezithixo, nokuba ungumtshabhisi, nokuba ulinxila nokuba ungumphangi; ningakhe nidle nokudla nonjalo. . . . Ize nimnyothule kuni nina lowo ungendawo.”—1 Korinte 5:11-13.
Ukuthabatha isenzo esiqinileyo kuyalukhusela udumo lwebandla yaye kulenza lahluke kwabo ‘bavumayo ukuba bayamazi uThixo, kanti ngayo imisebenzi yabo bayamkhanyela.’ Indlela unqulo oluyisingatha ngayo ingxaki yomlungiseleli owonayo iya kukunceda uqonde enoba olo nqulo lolobuKristu bokwenyaniso kusini na.—Tito 1:16; Mateyu 7:15, 16.
[Umfanekiso okwiphepha 22]
UPopu Alexander VI
[Inkcazelo]
Alinari/Art Resource, N.Y.