Ulwamvila Lokufa Lususiwe
AKUNTO imangalisayo ukufunda ngokufa njengento yokwemvelo okanye efanelekileyo. Eneneni, akunjalo ngokutsho kwengxelo yeBhayibhile. Ukufa lutshaba olwavela ngenxa yesono. KwabaseRoma 5:12 iBhayibhile ithi: “Isono sangena ngamntu mnye ehlabathini, kwangena ke ukufa ngaso isono; kwaza ngokunjalo ukufa kwabatyhutyha abantu bonke, ekubeni bonke bonayo.”
Ekubeni uThixo wayengacebanga ukuba uluntu lufe, ngothando uye wenza indlela yokukhululeka. Ngokuvumela uNyana wakhe ukuba asifele, wanikela intlawulelo elinganayo ukuze aphelise isohlwayo sokufa. (Mateyu 20:28; 1 Yohane 2:2) Kwakhona uthembise iparadisi yasemhlabeni enorhulumente omtsha ngokupheleleyo oza kulawula lonke uluntu. Loo rhulumente uya kuyisusa ngokupheleleyo imiphumo yesono nokufa. (Luka 18:30) KwiSityhilelo 21:3, 4 iBhayibhile ithi: “Yena uThixo abe nabo, enguThixo wabo; azisule uThixo zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu; ngokuba izinto zokuqala zigqithile.” Kodwa kuthekani ngabo sele befile?
Banethemba lovuko—ithemba lokuphila kwakhona njengabantu kuloo mhlaba oyiParadisi, benemizimba nengqondo ephile ngokufezekileyo. Ewe, “kuza ilixa abaya kuthi ngalo bonke abasemangcwabeni balive ilizwi lakhe; baphume ke.” (Yohane 5:28, 29) Lowo wathunyelwa nguThixo ukuza kukhulula uluntu, uYesu Kristu, usiqinisekisa ngokubhekele phaya: “Kuko ke oku ukuthanda kowandithumayo, ukuthi babe nobomi obungunaphakade bonke abambonayo uNyana, bakholwe kuye; ndandiya kubavusa mna ngomhla wokugqibela.”—Yohane 6:40.
Leli themba lovuko elomeleza abaninzi abafelwe ngothandekayo. Bayaqonda ukuba abathandekayo babo “balele ekufeni,” yaye ngoko ke “ababi buhlungu njengoninzi lwabantu, abangenathemba.” (1 Tesalonika 4:13, The New English Bible) Bakhangele phambili ekunxulumaneni nabo ngovuyo kwakhona kuloo nkqubo yezinto intsha ethenjiswe nguThixo. Banokholo kuThixo onika intuthuzelo nethemba.—Roma 15:4, 13; 2 Korinte 1:3; 2 Tesalonika 2:16.
Kungenxa yeso sizathu lento iinkonzo zemingcwabo zamaNgqina kaYehova zahlukile kwezinye. Ukuze azuze inkoliseko kaThixo, amaNgqina ayaluphepha naluphi na uqheliselo oluchasene neLizwi lakhe, iBhayibhile. Ayawalumkela amasiko nezinxibo ezisekelwe kwiinkolelo ezingafundiswayo eBhayibhileni. Njengoko enqula kuphela uThixo oyinyaniso, uYehova, akavumi ukunikela imbeko yokunqula abafileyo bawo. Yaye akaqhayisi ngobutyebi okanye ngewonga, njengokuba esazi ukuba oku akumkholisi uThixo. (1 Yohane 2:16) Imingcwabo yawo mincinane yaye indilekile yaye inceda ekuthuthuzeleni iintliziyo zabo bafelweyo. Kunikelwa intetho engokukhumbula lowo ufileyo, ebonisa ithemba elifumaneka eBhayibhileni. Aba buhlungu, kodwa kungekhona ngokugqithiseleyo.
AmaNgqina kaYehova ayazi ukuba kungekudala ‘utshaba lokugqibela, ukufa,’ luza kususwa. Ngoko amazwi athethwa kwangaphambili aya kuzaliseka: “Ukufa kufincelwe eloyisweni. Luphi na, kufa, ulwamvila lwakho? Luphi na, Hadesi, uloyiso lwakho?”—1 Korinte 15:26, 54, 55.