Inkqubo Enomtsalane Yokuzonwabisa
IHOLLYWOOD! Kungakhathaliseki apho uhlala khona ehlabathini, mhlawumbi elo gama lenza kuthi qatha imifanekiso eshukumayo nokuzonwabisa. Ibizwa ngokwahlukahlukeneyo ngokuba likomkhulu lehlabathi lokuzonwabisa neDolophu Yobuqheleqhele, ayikho enye indawo enempembelelo ngolu hlobo ngoshishino lwemiboniso njengeli hlomela ledolophu laseLos Angeles, eCalifornia. Ngokuqinisekileyo ibonakala iliziko lehlabathi lobuqheleqhele nolonwabo. Kunjengokuba omnye umbhali wathi, “umfanekiso weHollywood njengomthombo wamaphupha obuqheleqhele obuboniswa kwimifanekiso bhanya-bhanya uye waba yinto yazwenibanzi.”
Ukuzonwabisa—Ushishino Olukhulu
Kodwa asingomfanekiso nje weHollywood oye wanda zwenibanzi; “iHollywood” yindawo enoshishino olukhulu lwezinto ezithunyelwa kwamanye amazwe. Enyanisweni, ngokutsho kwephephancwadi iTime, eUnited States kwizinto eziveliselwa amanye amazwe izixhobo zokuzonwabisa ziyeyona mveliso enkulu elandela imveliso yeziphekepheke. Olu shishino luqokelela amakhulu amawaka ezigidi zeerandi nyaka ngamnye, yaye inxalenye yazo—enokuba ngama-20 ekhulwini—ivela kwamanye amazwe.
IUnited States izuza ingeniso kuma-35 ekhulwini oshishino lweencwadi ezithengiswa lihlabathi, izuze ama-50 ekhulwini engeniso yehlabathi yezixhobo zomculo, ama-55 ekhulwini engeniso yehlabathi yemifanekiso eshukumayo neevideo ezirhafelwayo nengeniso yehlabathi yama-75 ukuya kuma-85 ekhulwini yoomabonwakude.
Ukuze izuze obu butyebi bungaka, iHollywood yonwabisa ihlabathi. Oku akuthethi ukuba ihlabathi lisoloko lanelisekile yiyo—maninzi amazwe aye akhalaza ngokunwenwa kwezithethe zaseMerika, njengokuba ulutsha lwawo luye lwatyeshela izithethe zasekuhlaleni luze luthiwe swii zezaseMerika. Noko ke, oko akuthethi ukuba ukuzonwabisa kuyinto evela kwelaseUnited States kuphela. Amazwe amaninzi anamashishini awo okuzonwabisa—imifanekiso eshukumayo, oomabonwakude, nezinto zomculo, iincwadi, ezemidlalo, njalo njalo.
Ukuzonwabisa—Indlela Ekulula Ngayo Namhlanje
Engakhathaliseki lowo wonwabisa okanye ofanele onwabise ihlabathi, okuphawulekayo kukuba ukuzonwabisa kufumaneka lula, namhlanje kungumdliva kangangokuba simokamokana nokuguquguquka kwako. Ngokomzekelo: Ukuba wawuphila kwinkulungwane edluleyo, ubuya kube wonwatyiswe ngokufuthi kangakanani ngabantu abaqeqeshiweyo nabanobuchule? Enoba wawukhe waphila kwelona lizwe lifumileyo, kusenokuba ubuya kubonakala ubandezelekile ngenxa yokusilela ukuzonwabisa ngokwembono yabaninzi kwisizukulwana sanamhlanje. Ngokomzekelo, ubuya kuba noxanduva lokuhamba umgama usiya kwimidlalo yomculo okanye kumculo wentambula. Namhlanje sisuka nje siphulaphule koomatshini bestereo abaphathwayo nabadlala naluphi na uhlobo lomculo olukhoyo, okanye sisuka nje sithi zava kwisitulo sokuhlala sentsapho size, ngokucofa nje iqhosha, sonwatyiswe phantse lulo naluphi na uhlobo lokuzonwabisa esilufunayo.
Kulo naliphi na ilizwe elihambele phambili, unokufumanisa ukuba kumakhaya amaninzi kukho ubuncinane umabonwakude omnye, umatshini wevideo nesidlali seecompact disc okanye isidlali-zikhasethi, ndawonye nezinye izixhobo ezisebenza ngombane. Bambi abantwana bakhule kukho oomabonwakude abazalise phantse yonke indawo endlwini njengezipili. Kumazwe asakhasayo, iidolophana ezininzi nezingabamelwane bazo zineziko lazo lasekuhlaleni lokubukela umabonwakude apho abantu bahlanganisana khona ngeemva kwemini ukuze bonwatyiswe. Uluntu lusuke lwathi phithi thwanga ngumabonwakude. Amaxesha okuphumla azaliswe ziintlobo ntlobo ezingakumbi zokuzonwabisa.
Ngaba ikho into ephosakeleyo ngoko? Ngaba kukho iingozi ekuzonwabiseni kwale mihla? Okanye ngaba ukwanda kwanamhlanje kokuzonwabisa kuthetha ukudlala ngobutyebi? Makhe siqwalasele ngokulungeleleneyo le nkqubo inomtsalane yokuzonwabisa.