Imbono Elungeleleneyo Ngokuzonwabisa
“UKUSEBENZA kuze kungadlalwa kwenza uJack abe yinkwenkwe enyabileyo.” Loo mazwi aqheleke kakhulu namhlanje kangangokuba kulula ukuyilibala indlela ayinyaniso ngayo. Xa kuthethwa inyaniso, “ukusebenza kuze kungadlalwa” kunokwenza izinto eziphawulekayo ezinkulu ngakumbi kunokwenza nje uJack ukuba anyabe. Kunokumenza abe likhoboka lomsebenzi, elizibekela ecaleni zonke ezinye izinto.
Ngokomzekelo, qwalasela ingxaki eyayikhe yavela kwelaseJapan, ilizwe elaziwa ngokuba nomkhwa ongqongqo wokuthanda ukusebenza. Abaqeshwa basoloko belindelwe ukuba basebenze ixesha elongezelelekileyo ngobusuku ngabunye nangeempelaveki. Iphephancwadi laseKhanada, iMaclean’s lathi umsébenzi oqhelekileyo waseJapan uchitha iiyure ezingama-2 088 emsebenzini ngonyaka, xa zithelekiswa nezili-1 654 zomsébenzi oqhelekileyo waseKhanada. Sekunjalo, eli phephancwadi lathi: “Imizi-mveliso yaseJapan kwafuneka ilwe nengxaki eyahlukileyo: abaqeshwa ababenekaroshi, okanye ukubulawa kukusebenza ngokugqithiseleyo. Amaphephandaba anikela iingxelo zamadoda akwiminyaka yawo yama-40 aye aba nesifo sentliziyo okanye esokufa ilungu elithile lomzimba ngemva kokuba eye asebenza iintsuku ezili-100 bengakhange bafumane usuku lokuphumla.” Abameli babasebenzi eJapan kwaye kwafuneka benze iphulo lezibhengezo, ezizele zizandi ezinomtsalane, ukuze bakhuthaze abantu ukuba bathabathe ikhefu lempelaveki baze baphumle! Onjani wona umahluko kubantu bamazwe aseNtshona, apho abantu kuye kufuneke bacengwe ukuze basebenze iveki ezeleyo!
Iingenelo Zokudlala
Noko ke, ngokufanelekileyo iingcali ngokubanzi ziwujonga umkhwa wokuthanda ukusebenza njengesigulo, kungekhona njengomkhwa olungileyo. UJack kufuneka adlale—yaye kungekhona nje ngoxa eseyinkwenkwe; abantu abakhulu nabantwana bayakufuna oku. Ngoba? Abantu bafumana ntoni ekuzihlaziyeni, okanye ekudlaleni? Enye incwadi exubusha ngalo mbandela yadwelisa ezi zinto: “Ukuzibonakalisa ubuntu bakho, unxulumano, ukulungelelana kwengqondo nomzimba okanye ukuhlaziyeka, impilo engokwasemzimbeni, umahluko okanye utshintsho oluyimfuneko kucwangciso olumiliselwe kumsebenzi kuphela, ukuphumla nolonwabo, ithuba lokuzama ukwenza into entsha nokudibana nabantu abatsha, ukwakha ubuhlobo, ukomeleza intsapho, ukwazi indalo, . . . ukuziva nje wonwabile ungasazi isizathu. Zonke ezi zinto zezinye zeengenelo abantu abazifumanayo ekuzihlaziyeni.”
Iingcali kwezentlalo yoluntu ziye zakhupha iincwadi ezininzi ezixubusha ngombandela wokuzihlaziya nokudlala, yaye ziyavuma ukuba ukuzihlaziya kubalulekile kumntu ngamnye nasebuthweni labantu. Noko ke, ngokuqinisekileyo akukho namnye wazi ukubunjwa komntu ngaphezu koMdali woluntu. Yena uwujonga njani lo mbandela?
Ngokwahlukileyo koko abanye basenokukucinga, iBhayibhile ayikuchasanga ukuzonwabisa nokuzihlaziya. Isixelela ukuba uYehova nguThixo owonwabileyo, yaye ulindele nabakhonzi bakhe ukuba bonwabe. (INdumiso 144:15b; 1 Timoti 1:11, NW) KwiNtshumayeli 3:1-4, sifunda ukuba “ukuhleka kunexesha lako” yaye “kukho nexesha lokudloba.” Igama lesiHebhere elithi “ukuhleka” apha linxulunyaniswe namagama athetha “ukudlala.” Kwale ncwadi ikwanye yeBhayibhile isixelela ukuba “akukho nto ilungileyo ebantwini kunokuba badle, basele, bawubonise umphefumlo wabo okulungileyo emigudwini yabo.”—INtshumayeli 2:24.
Namhlanje, enye yezona ndlela ziqheleke kakhulu zokunandipha ithuba lokuzihlaziya kukonwatyiswa, ukungqendeva uze unandiphe ukubona abanye bebonakalisa iziphiwo zabo. Oko akuyonto intsha kwaphela. IBhayibhile ibonisa ukuba kangangamawaka eminyaka abantu baye bazonwabisa ngokubukela abanye bengqungqa, becula, bedlala izixhobo zomculo, okanye bekhuphisana kwezemidlalo.
Njengohlobo lokuzihlaziya, ukuzonwabisa kusenokuba yingenelo enkulu kuthi. Ngubani ongonwatyiswayo kukubona amendu embaleki eqeqeshiweyo, ukutyibilika kwenenekazi elenza umngqungqo weballerina, okanye ukuxhalatyiswa kukulindela okulungileyo, ngumfanekiso oshukumayo onomphumo ongaziwayo, okanye sisandi sengoma esinkenteza engqondweni emva kokuba umculo uphelile? Yaye akuthandabuzeki ukuba uninzi lwethu siye sakunandipha ukungqendeva sifunde incwadi ebangel’ umdla, sityhila amaphepha ngokukhawuleza njengoko ingqalelo yethu iya itsaleleka kwibali elibaliswe kakuhle.
Ukuzonwabisa okulolo hlobo kusenokusihlaziya, yaye kwenze nokungaphezulu. Kusenokusikhuthaza, kuphucule imeko yethu, kuchukumise intliziyo yethu, kusihlekise—kude kusifundise. Ngokomzekelo, uncwadi lusenokusifundisa izinto ezininzi ngendalo engabantu. Iincwadi zikaShakespeare zingumzekelo ocacileyo woko.
Iingozi Zokuzonwabisa
Noko ke, ukuze sibe nembono elungeleleneyo ngokuzonwabisa kwanamhlanje, simele siqonde iingozi ndawonye neengenelo zako. Kuninzi okunokuthethwa ngempembelelo eyonakalisayo yokuzonwabisa, kodwa ngokubanzi ezi ngozi zinokwahlulwa zibe ziindidi ezimbini: ubungakanani nohlobo, umlinganiselo opheleleyo wokuzonwabisa ofumanekayo nohlobo okululo. Makhe siqale ngokuqwalasela uhlobo.
Siphila kumaxesha obumnyama, iBhayibhile ewabiza ngokuba ‘ngamaxesha anomngcipheko.’ (2 Timoti 3:1) Akumangalisi ukuba, ukuzonwabisa kwanamhlanje kufane nexesha esikulo, ngokufuthi ngezinto zako ezimbi. Ugonyamelo olunenkohlakalo, ukuziphatha okubi ngokuphandle nezona mvakalelo zingathandekiyo zabantu—njengobuhlanga—zonke ezo zinto ziyinxalenye yokuzonwabisa okuqhelekileyo, ezikungcolisayo kube yinto egqwetheke kakhulu. Eyona ibalaseleyo kwezi yeyokuba, ukuboniswa kwezinto ezingamanyala nokungcola phantse kube kuyeyona ndlela yokuzonwabisa. Qwalasela eminye imizekelo.
Imifanekiso Eshukumayo: Kwenye yezona ndumasi zaseHollywood, iiOscar, amadoda amathathu kudidi lwabantu ababizwa ngokuba “oyena mdlali ubalaseleyo” kulo nyaka baye badlala njengababulali abaphambeneyo, bonke bebulala ngokucacileyo embonisweni. Kuchazwa ukuba omnye umdlali uluma elinye ibhinqa ebusweni ngoxa elidlwengula. Ngokwasemalini, omnye weyona yaba nengeniso yayingumfanekiso oshukumayo obizwa ngokuba yiBasic Instinct. Xa uwuhlolisisa, lo mxholo awuyichazi into oyiyo. Lo mboniso uqala ngecandelo elibonisa isini ngokuphandle ekuthi ebudeni balo inenekazi elithile lihlabe isithandwa salo esibotshelelweyo ngokuphindaphindiweyo ngencula yokuqhekeza umkhence, lizitshiza ngegazi emzimbeni wonke.
Umculo: Kutshanje umculo werap nonesingqi esinamandla uye wagxekwa ngokwandayo ngenxa yeengxaki ezifanayo zohlobo olulo. Iingoma ezizukisa ukuziphatha okubi ngokwesini nokuxhatshazwa kwamabhinqa, ugonyamelo nokuthiya iintlanga ezahlukeneyo namapolisa kwanonqulo lukaSathana ziye zafunyaniswa kumculo werap nonesingqi esinamandla. Kwiindawo ezithile, amacwecwe anemibandela elolo hlobo kuye kufuneke abe namaphepha angaphandle alumkisayo. Kodwa kunjengokuba umculi werap uIce-T kuchazwa ukuba wathi, ubhala amazwi awothusayo kwiingoma zakhe ukuze afumane nje elo gama; oko ngokuqinisekileyo kuyawutsala umdla wabo bafuna ukwazi. Umculi owaziwayo werock uPrince wacula ingoma encoma iintlobano zesini phakathi kwabantu abazalanayo. Ngokufuthi, umculo weevideo wenza loo manyala abe yinto enomtsalane ngakumbi. Ingoma ethandwayo yevideo kaMadonna ethi Justify My Love yazuza udumo olubi ngokubonisa isini esigqwethekileyo nezenzo zobufanasini. KwaneMTV, ijelo laseUnited States likamabonwakude elaziwa maxa wambi ngokupapasha iivideo ezibonisa ukuziphatha okubi kodwa ngokungakhululekanga, lakwala ukuyipapasha le.
Iincwadi: Qwalasela imizekelo embalwa eqokolelwe kuhlolisiso lwakutshanje lweencwadi. IAmerican Psycho inikela iinkcukacha ngezenzo ezimasikizi zomntu ohlelele ukubulala nowenza izinto ezimasikizi ngokungathethekiyo, kuquka ukuwatya amaxhoba akhe. IVox ixubusha ngencoko ende yomnxeba ekuthi ebudeni bayo indoda nebhinqa abangazange badibana ngaphambili bavuselelane ngokwesini ngeentetho ezingamanyala. IRaptor ibalisa ngesenzo esinobungozi sesini esigqwethekileyo sabantu ababini benkulungwane yesithandathu ngamnye kubo enamalungu esini omntu oyindoda nolibhinqa. Iinoveli zothando ngokuqhelekileyo zikuqhwabela izandla zize zikuncome ukukrexeza nombulo. Iincwadi ezinamabali ahlekisayo, zakhe zazezingenabungozi ebantwaneni, ngokufuthi ngoku zibonisa imifanekiso yesini, ugonyamelo nemixholo engaqondakaliyo.
Imidlalo: Kwenziwa izicelo zokuba kupheliswe umdlalo wezamanqindi. Phezu kwabo nje ubungqina obubhekele phaya bokuba inqindi ngalinye elilalisa ngophotho libangela ingozi engenakuncedakala engqondweni, inzuzo engokwemali nezigidi zababukeli ziqhubeka zibarhwebeshela aba balwi eqongeni. Amakhulu eembethi-manqindi aye abethwa itshoba lalal’ umbethe ngolu hlobo.
Noko ke, eminye imidlalo iye yaba namanani amakhulu abantu abafayo. Akuyonto ingaqhelekanga ukufunda ngogonyamelo oluye luvele kumabala emidlalo okanye phakathi kwababukeli. Iziphithiphithi eziphenjelelwa bubuhlanga okanye ukusetyenziswa kakubi “komoya wokumela iqela lemidlalo” ziye zabulala amakhulu abantu kumabala emidlalo jikelele ehlabathini. Umdlalo wokulwa neenkomo, iDie Zeit yaseJamani ephuma ngeveki iwubiza ngokuba “usenokuba ngowona mdlalo uthiyekileyo oye waqhubeka kumaxesha ethu,” kutshanje uye wanda eSpeyin nakumzantsi welaseFransi. Emva kokuba inkomo yahlaba entliziyweni intshatsheli enguJosé Cubero onama-21 eminyaka ubudala kumdlalo wokulwa neenkomo, elo gorha loyisiweyo lathwalwa likwibhokisi yalo yomngcwabo kwajikelezwa iqonga lomdlalo wokulwa neenkomo eliyiMadrid ukuze kuthuthuzelwe abalandeli balo abali-15 000 ababemnqula. Ukufa kwakhe kwaqhubeka kuboniswa ngokuphindaphindiweyo kumabonwakude waseSpeyin.
Kuyavuywa ukuba, ezi ziimeko ezimbi kakhulu, yaye azithethi ukuba okunye ukuzonwabisa kwezi ndidi kubi. Kodwa imbono elungeleleneyo ngokuzonwabisa imele yamkele ukuba ezi zinto zimbi ngolu hlobo zikho yaye zandile. Kutheni? Kaloku, ngaba uye waphawula ukuba oko kwiminyaka edluleyo bekubonakala njengento embi akusabothusi abantu namhlanje? Izinto ezimbi sezityekele ekubeni zibe yinto eyamkelekileyo kubantu abaninzi; abantu bayaziqhela. Yintoni wena oya kuyiqhela?
Umbandela Womlinganiselo
Noko ke, enoba konke ukuzonwabisa bekuyinto ecoceke ngokupheleleyo, sekunjalo kusekho umbandela ongomlinganiselo wobukhulu bako. Imizi-mveliso yezinto zokuzonwabisa ivelisa inkitha yezixhobo zako. Ngokomzekelo, eUnited States kuphela zingaphezu kwe-110 000 iincwadi ezahlukahlukeneyo ezapapashwa ngowe-1991 kuphela. Ukuba unokufunda incwadi uyigqibe ngosuku ngalunye, bekuya kukuthabatha ngaphezu kwama-300 eminyaka ukufunda iincwadi ezikhutshwe ngonyaka omnye! Umzi-mveliso waseUnited States wemifanekiso eshukumayo uvelisa imifanekiso eshukumayo engaphezulu kuhle kuma-400 ngonyaka, yaye amazwe amaninzi ayayithenga aze nawo azivelisele eyawo imifanekiso eshukumayo. Umzi-mveliso waseIndiya uvelisa amakhulukhulu emifanekiso eshukumayo ngesiHindi nyaka ngamnye. Yaye ngubani onokubala amacwecwe omculo, iicompact disc neekhasethi ezikhutshwa nyaka ngamnye? Yaye kukwakho nomabonwakude.
Kwamanye amazwe ahambele phambili, kukho intaphane yamajelo afumanekayo kumabonwakude—oomabonwakude abarhunyelwayo, amajelo asebenza ngesatellite, namajelo aqhelekileyo. Oko kuthetha ukuba umsinga othe ngcembe wokuzonwabisa unokuqukuqela ungene ekhayeni lakho kangangama-24 eeyure ngosuku. Imidlalo, umculo, imidlalo yeqonga, amabali ahlekisayo, iingcamango zezenzululwazi, iinkqubo zodliwano-ndlebe nezengxubusho, imifanekiso eshukumayo, zonke zifumaneka nje ngokucofa iqhosha. Ngenxa yokubakho komatshini wevideo kufumaneka amawakawaka emifanekiso eshukumayo, kuquka nenginginya yeevideo ezifundisa indlela yokwenza izinto, iivideo zomculo kwaneekhasethi ezifundisa ngendalo, imbali nenzululwazi.
Kodwa livela phi ixesha lako konke oku kuzonwabisa? Ubugcisa busenokukwazi ukusenzela ummangaliso wokuzonwabisa okuzenzekelayo—khawucinge indlela uMozart ebeya kothuswa ngayo kukuva umculo wakhe kwistereo esiphathwayo! Noko ke, ezobugcisa azinako ukulenza elo xesha lichithelwa kwezo ziyolo. Enyanisweni, kwamanye amazwe apho ezobugcisa zihambele phambili kakhulu, bekuye kwakho utyekelo lokungabikho kwexesha lokuzihlaziya, kunokuba libe ngakumbi.
Ngoko ukuba siyakuvumela, ukuzonwabisa ngokulula kusenokulitya ixesha lethu lokuzihlaziya. Yaye sifanele sikhumbule ukuba ukuzonwabisa asikuphela kohlobo lokuzihlaziya, ngokuqhelekileyo kuyeyona nto ingenankcitho. Kwakhona uninzi lwethu luyakufuna ukukhe luzikhuphe luze lwenze into ehlaziyayo, lube nenxaxheba kunokuba luhlale nje luze lonwatyiswe. Usenokuhamba, unandiphe unxulumano olulungileyo, udlale imidlalo.
Ukuba kuyimpazamo ukuvumela ukuzonwabisa kutye ixesha lethu lokuzihlaziya, hayi indlela ekuphosakele ngakumbi ngayo ukukuvumela ukuba kutye ixesha elifanele lisetyenziselwe iimbopheleleko ezibaluleke ngakumbi, ezinjengakuMdali wethu, iintsapho zethu, umsebenzi wethu, abahlobo bethu! Ngoko, kubaluleke kakhulu ukuba nembono elungeleleneyo ngokuzonwabisa! Sinokusenza njani isigqibo ngohlobo lokuzonwabisa okungasifanelanga, yaye kungakanani xa kukokugqithe emgceni?
[Imifanekiso ekwiphepha 7]
Okunye ukuzonwabisa kusenokuchukumisa iintliziyo zethu kuze kusifundise