Indlela Yokuthintela Ityhefu Yelothe

PHEZU kwazo nje zonke iindaba ezimbi ezingetyhefu yelothe, imeko yayo ayiphelisi themba ngokupheleleyo. Ngokungafaniyo nezinye izigulo esingenako ukuzithintela, esi sisisongelo sezempilo iingcali zezempilo ezithi sinako ukwenza into ngaso.

INewsweek ichaza ukuba uNobhala Wezempilo Neenkonzo Zoluntu waseUnited States uthi: “Ityhefu yelothe iyathinteleka ngokupheleleyo.” Umngcipheko wetyhefu yelothe “unokupheliswa ngonaphakade,” satsho njalo esinye isazi ngezinto eziyityhefu esaziwayo kwenye iyunivesithi. ICDC (Amaziko Okuthintela Izifo AseUnited States) ithi: “Kuninzi ngoku okwaziwayo ngemithombo neendlela zokuchanabeka kwiilothe neendlela zokuthintela oku kuchanabeka ukuze kuqaliswe ukwenziwa imigudu yokusiphelisa ngokupheleleyo esi sifo.” Yaye okokugqibela, iSebe Lezempilo Neenkonzo Zoluntu laseUnited States longezelela imbono yalo ngokuthi: “Siyabazi oonobangela betyhefu yelothe ebantwaneni yaye, okubaluleke kakhulu, yindlela yokubaphelisa. Imigudu yabantu enentsebenziswano inokuphantse isiphelise esi sifo kwiminyaka engama-20.”

Oko Unokukwenza

Kunokuphunyezwa njani oku? Okokuqala, iingcali ziyavuma ukuba ipeyinti namanzi zingawona maxhoba aphambili. Ngokomzekelo, isazi ngezinto eziyityhefu esikhankanywe ngasentla siyavuma ukuba eyona mfuneko iphambili yokuphelisa ityhefu yelothe kukuba abaninimzi nabanini bemihlaba bathabathe amanyathelo akhawulezileyo okuthabathel’ indawo ezo peyinti naloo mibhobho midala. Ngoko ke, abaninimzi bafanele bahlolisise ukuba amakhaya abo akhuselekile ekungcolisekeni.

Iphephancwadi eliyi-In Health lithi: “Kodwa ungakhathazeki, ipeyinti engonakaliswanga ayiyongozi, nangona ukukrwela ipeyinti nothuli olunepeyinti kuyingozi. . . . Hlola ikhaya lakho ngaphakathi nangaphandle iindawo ezikrwelekileyo, ukhangela ngokukhethekileyo kumacango enziwe ngomthi nakwimigubasi yefestile apho imozulu nokukhuhlana kudla ngokutyumza kuze kuxobule iindawo ebezipeyintiwe.” Isebe lezempilo lendawo okanye lelizwe ohlala kulo lisenokukunceda ekuhlolisiseni enoba ikhaya lakho lisemngciphekweni, mhlawumbi lisenokukuthumela kubasebenzi baselebhu abaqeqeshelwe ukuhlola ilothe nokuyisusa. Nasi isilumkiso: Musa ukuzama ukuyisusa ngokwakho. Abantwana basenokufunyanwa yityhefu yelothe xa abazali babo bexobula yaye bekhuhla ipeyinti endala ezindongeni nakwimihombiso, izalisa umoya ngothuli oluzele yilothe.

Amanzi, Amanzi Akho Naphi Na

Kwizindlu apho amanzi asenokubekek’ ityala, ingxaki isenokuba kwimibhobho edibanisa loo ndlu nendawo yamanzi eyintloko. Indlu endala isenokuba inemibhobho yelothe, engowona mthombo ucacileyo wongcoliso. Kwanemibhobho yobhedu okanye yentsimbi isenokuba idityaniswe ngelothe. Kwamanye amazwe kusenokuba luncedo ukuhlola ucwangciso lokwakha ukuze ufunde ngemigangatho yemibhobho ekummandla wakho. Ukuba unezizathu zokukholelwa ukuba amanzi akho angcolisiwe, usenokugqiba kwelokuba ahlolwe. Kumazwe amaninzi kukho abasebenzi baselebhu abanobuchule bokwenza oku ngemali ephantsi.

Kuthekani ukuba amanzi akho anomlinganiselo oyingozi welothe? Yintoni onokuyenza ngoko? Ngapha koko, asinguye wonk’ ubani osenokukulungela ukuthabatha amanyathelo akhawulezileyo, njengokulungiswa kwemibhobho. Amagosa ezempilo anikela ngeendlela ezimbalwa ezilula zokunciphisa umlinganiselo welothe. Ngaphambi kokuba ukhe amanzi abandayo wayeke amanzi aphume kangangomzuzu okanye emibini, ngokukodwa ukuba impompo ibivaliwe ngaphezu kweeyure ezintandathu. Oku kuya kunceda ekukhupheni onke amanzi angcolisiweyo. Yaye ungaze usebenzise amanzi empompo ashushu ekuseleni nasekuphekeni. Kusenokwenzeka ukuba kubekho ilothe eninzi kumanzi empompo ashushu kunamanzi empompo abandayo.

Ukuba uyasela esikolweni, eofisini, okanye kumthombo owenziweyo wombane kumzi-mveliso, umele uwayeke amanzi aphume kangangemizuzwana embalwa ngaphambi kokuba uwasebenzise. Eminye imithombo eyenziweyo inemibhobho edityaniswe ngelothe.

Ilothe Ekutyeni Nakwiziselo

Isebe Lokutya Neziyobisi laseMerika (FDA) liye lancomela ukusetyenziswa kweegilasi ezineekristale zelothe. Iphephancwadi iGood Housekeeping lathi: “Nakubeni kungekho namnye ocetyiswa ukuba ayeke ukuzisebenzisa ngokupheleleyo, iFDA icebisa ukuphetshwa kokusetyenziswa kwezinto ezineekristale zelothe ukugcina ukutya neziselo kangangexesha elide, ngokukodwa xa kugcinwe ukutya okuneasidi (isosi yetumato; incindi yeorenji, yetumato neyeziqhamo; iwayini neviniga) . . . IFDA ikwancomela ukuba kungaze kondliwe iintsana nabantwana ngeebhotile ezineekristale zelothe . . . okanye nayiphi na into eyenziwe ngekristale yelothe.”

Kuthekani ngeebhotile zewayini ezivalwe ngezivalo ezingaphantsi kwesiciko ezenziwe ngelothe? Zimbi iingcali zezamayeza zincomela ukuba sisuswe eso sivalo singaphantsi kwesiciko ngokupheleleyo yaye, emva kokususa eso sivalo, umanzise ilaphu ngamathontsi ambalwa ewayini uze wosule umlomo webhotile ngalo.

Bomama, ngaba ngokuthe rhoqo niyaphindaphinda ukuzisebenzisa iingxowa zeplastiki ekugcineni ukutya? Abaphandi baye bafumanisa imilinganiselo ephakamileyo yelothe kwimibhalo yeinki esetyenzisiweyo ukubhala ezo ngxowa, esenokuphumela koko kutya. Ilothe ayiphumeli kwiplastiki ize ingcolise isonka esingaphakathi; noko ke, kuxa umthengi eguqula ingxowa leyo eyiphendulele, i-inki yelothe isenokubangela ukungcoliseka. Ukuba ingxowa leyo iyasetyenziswa kwakhona, qinisekisa ukuba umbhalo awubi ngaphakathi uze udibane nokutya.

Okokugqibela, iphephancwadi iDiscover linikela esi silumkiso: “Abahambi bamazwe aphesheya, ngokukodwa kuMazwe Asakhasayo, bafanele balumkele izitya zomdongwe; izinto zokuzenza zikhanye kusenokuba azizange zitshiswe ngobushushu obuphakamileyo obufunekayo ukuthintela ukuxobuka, ukuvuthuluka nokuphumela kwamasuntswana elothe ekutyeni.”

Yiba Ngolungeleleneyo

Enye into ebalulekileyo omele uyikhumbule xa uqwalasela oku okanye phantse nayo nayiphi na igxaki yasekuhlaleni ephazamisayo namhlanje yeyokuba: Yiba ngolungeleleneyo. Kulula ukukhathazeka, yaye ukukhathazeka akuncedi. Okubuhlungu kukuba ummandla osingqongileyo ungcoliswe zizinto ezininzi ezingcolisayo ezingeyolothe. Ukuze siphile ubomi obungenalungcoliso, bekuya kufuneka mhlawumbi siphumele kummandla ongaphandle ngokupheleleyo. Kodwa ngubani ofuna ukuhlala yedwa ngenxa yokuba ephepha ungcoliso? Eyona ndlela ilungeleleneyo yokumelana neengxaki ezinjalo kukuthabatha naziphi na izilumkiso ezisengqiqweni neziyimfuneko ukukhusela thina nabantwana bethu kwiingozi ezinzulu. Ukukhuseleka ngokupheleleyo ekusetyenzisweni kakubi kwezinto zalo mhlaba ngumntu kumele kuze kwixesha elizayo.

Yaye kuyeza! Ngaba ubusazi ukuba uMdali wesi sijikelezi-langa uthembisa ixesha apho uluntu luya kusebenzisa amandla alo ekusiguquleleni ukuba sibe yiparadisi? Abantu abasayi kuphinda basasaze ungcoliso olubulalayo nongcoliso naphi na. UIsaya 11:⁠9 wongezelela esi sithembiso: “Aziyi [abantu abayi] konakalisa ezintabeni zam zonke ezingcwele; ngokuba ilizwe liya kuzala kukwazi uYehova, njengamanzi egubungele ulwandle.” Akuthandabuzeki ukuba ‘oko kwazi uYehova’ kuya kuquka ukwazi indlela yokusebenzisa izinto ezininzi zesi sijikelezi-langa ngendlela engabangeli ngozi kubantwana okanye kubantu abakhulu​—⁠kuye nabani na.