Ikamva Eliqaqambileyo Kubantwana

KWINGQUNGQUTHELA Yehlabathi Ngemicimbi Yabantwana, iinkokeli ezininzi zehlabathi zathetha ngentembelo ngekamva. Zaxela kwangaphambili “ixesha elitsha” labantwana, “ukuzinikela okutsha kwiimfuno zabantwana.” Zathetha “‘ngomanyano olutsha’ olunceda ‘ihlabathi elimanyeneyo elizimisele ukudibana’” ukuze lincede abantwana.

Lawo ngamazwi abalulekileyo. Kodwa ukuba iintlanga ziza kuhamba ziye kumaphi ekufikeleleni iinjongo zazo oko kuseza kubonakala. Kufanelekile ukuphawula ukuba kwiinyanga ezintlanu emva kwaloo ngqungquthela, iintlanga zalwa kwimfazwe yePersian Gulf eyangqineka iyeyona inenkcitho kakhulu​—⁠nge-R168 lamawaka ezigidi⁠—​yaye iyeyona etshabalalisa imeko-bume. Kwimiphumo yayo amakhulu amawaka abantu eIraq naseKuwait abhaca eshiya amakhaya awo. Kumawaka-waka itshoba lalal’ umbethe​—⁠ngesinye isihlandlo kwakusifa amakhulu-khulu abantu iintsuku zilandelelana⁠—​ngenxa yenxele likaKhetsekile, ukungabi nakhusi, ukungondleki nezifo. Abamalunga nabasi-⁠8 kwabali-10 yayingabafazi nabantwana.

Ukuxelwa Kwangaphambili KooYeha

Abafundi beLizwi likaThixo bayazi ukuba iingxaki ezithwaxa abantwana abasehlabathini zazixelwe kwangaphambili phantse kwiminyaka engamawaka amabini eyadlulayo. IBhayibhile yaprofeta ngale ‘mihla yokugqibela’ yathi:

◻ “Kuya kubakho . . . iindyikityha zokufa.”​—⁠Luka 21:⁠11.

◻ “Kuya kubakho iindlala.”​—⁠Mateyu 24:⁠7.

◻ “[Abantu baya kuba ngabo] bawonakalisayo umhlaba.”​—⁠ISityhilelo 11:⁠18.

◻ “Uhlanga luya kuvukelana nohlanga, nobukumkani buvukelane nobukumkani.”​—⁠Marko 13:⁠8.

◻ “Kuya kufika amaxesha anomngcipheko. Kuba abantu baya kuba ngabazithandayo, . . . abangenabubele.”​—⁠2 Timoti 3:​1-3.

Kwakhona iBhayibhile yaxela kwangaphambili ngexesha elisondelayo apho iintlanga ziya kucinga ukuba zizamile ukulungisa iingxaki zabantu kangangokuba ziya kuvakalisa ukuba: “Luxolo nokunqaba!”​—⁠1 Tesalonika 5:⁠3.

Ikamva Eliqaqambileyo

Noko ke, eso sibhengezo siya kuba ngumqondiso wokungenelela kukaThixo kwimicimbi yabantu. NgoBukumkani bakhe bamazulu, uThixo uya kushenxisa le nkqubo ikhoyo yezinto aze amisele ihlabathi elitsha loxolo lokwenene nonqabiseko oluhlala luhleli, kubantwana nakubantu abakhulu.​—⁠IMizekeliso 2:​21, 22; Daniyeli 2:44; Mateyu 6:⁠10.

Phantsi kwelungiselelo elizukileyo loBukumkani bukaThixo, “akayi kuthi ummi wakhona, ndiyafa.” (Isaya 33:24) Ukungondleki kuya kuba kungasekho: “Makubekho intabalala yengqolowa ezweni, ise encotsheni yentaba.” (INdumiso 72:16) Kwanemfazwe ayisayi kubakho, iBhayibhile ithembisa isithi: “[UYehova] ulophelisa iimfazwe kude kuse eziphelweni zehlabathi.”​—⁠INdumiso 46:⁠9.

Kodwa kuthekani ngabo bonke abantwana​—⁠nabanye⁠—​abasele bebulewe kukungondleki, izifo okanye abanye oonobangela? ILizwi eliphefumlelweyo likaThixo lithi: “Kuza kubakho uvuko lwabafileyo, lwamalungisa kwanolwabangemalungisa.”​—⁠IZenzo 24:⁠15.

Xa wayesemhlabeni, uYesu Kristu wabonisa ukuba ukuvuselwa kubomi emhlabeni kwihlabathi elitsha likaThixo kuya kuquka nabantwana. Ngokomzekelo, xa intombazana emalunga neminyaka eli-12 ubudala yafayo, “baye ke bonke belila, beyimbambazelela.” Kodwa ke ngoko, ebamba isandla sentombazana, uYesu wathi kuyo: “Ntombi, vuka.” Ingxelo engokwembali ibonisa ukuba: “Yesuka yema kwangoko; wamisa ukuthi mayinikwe into, idle.” Basabela njani abazali bayo? IBhayibhile ithi: “Bathi nqa ngokuthi nqa okukhulu.”​—⁠Luka 8:​40-42, 49-56; Marko 5:⁠42.

Kwesinye isihlandlo, uYesu wadibana nomngcelele womngcwabo owawuquka umhlolokazi owayefelwe ngunyana okuphela kwakhe. UYesu ‘wavula ke walichukumisa ithala, bema ke ababethwele. Wathi, Ndodana ndithi kuwe vuka. Wavuka wahlala umfo lowo, waza ke wathetha. Wamnikela ke kunina.’ Abo babekufutshane “babemzukisa uThixo.”​—⁠Luka 7:​11-⁠16.

Ngaloo ndlela, phantsi kolawulo lobulungisa lorhulumente woBukumkani bukaThixo, abantwana kuquka nabo bavusiweyo, baya kuba nelona kamva liqaqambileyo abanokulifumana. Baya kukwazi ukukhulela kwihlabathi lobulungisa elinoxolo elihle, elinqabisekileyo, elinobutyebi, kangangokuba uYesu ulibiza ngokuba ‘yiParadisi.’​—⁠Luka 23:⁠43.

[Umfanekiso okwiphepha 9]

Kwihlabathi elitsha likaThixo, abantwana baya kukhula benqabisekile, besempilweni yaye bonwabile