Liliphi Ithemba Elikhoyo Ngokupheliswa Kwemfazwe?
IMFAZWE YEHLABATHI I, eyaliwa ukususela kowe-1914 ukusa kowe-1918, yabizwa ngokuthi yimfazwe yokuphelisa zonke iimfazwe. Kodwa ukususela ngoko bekukho iimfazwe ezingaphezu kwama-200, kuquka eyona inkulu eyakha yakho—iMfazwe Yehlabathi II.
Licacile elokuba, imigudu yomntu yokuphelisa imfazwe iye yasilela ngokupheleleyo. Ngoko, ngaba kuyamangalisa xa abaninzi besithi, “Iimfazwe ziya kusoloko zikho”? Ngaba nawe ukholelwa koko?
Injongo yokumiselwa kweZizwe Ezimanyeneyo ngowe-1945 emva kweMfazwe Yehlabathi II yayikukunika abantu abakruqulwe yimfazwe ithemba lehlabathi elingenamfazwe. Elo themba liboniswe kumbhalo oseludongeni lwesakhiwo seZizwe Ezimanyeneyo kwiSixeko saseNew York, ofundeka ngolu hlobo: ZIWAKHANDE AMAKRELE AZO ABE NGAMAKHUBA. NEZIKHALI ZAZO ZIBE ZIZITSHETSHE ZEEDILIYA: UHLANGA LUNGAPHAKAMISELI UHLANGA IKRELE. NEZIZWE ZINGAPHINDI ZIFUNDE UKULWA.
Okulusizi kukuba, iintlanga ngokuphembelela kwazo imfazwe ziye zahlekisa ngeli themba lihle livakalisiweyo loxolo. Sekunjalo, la mazwi aya kuzalisekiswa! Oku kungenxa yokuba athethwa ngaphezu kweminyaka engama-2 500 eyadlulayo ngoMthombo ophakame ngakumbi kunabantu abangafezekanga. Achaza idinga elenziwa nguThixo uSomandla.—Isaya 2:4.
Ithemba Lobuxoki
Abaninzi baye bakhangela kwiicawa njengezinokuba luncedo ekudaleni ihlabathi elingenamfazwe. Kodwa, enyanisweni, iicawa ziye zangqineka zingawona mandla aphembelela ukungavisisani nokuthand’ ukulwa embalini yonke. Ngokomzekelo, umphathi-mkhosi waseBritani unjengele Frank P. Crozier wathetha oku ebudeni beMfazwe Yehlabathi I: “IiCawa zamaKristu ngabona badali bophalazo-gazi esithe sabasebenzisa ngokukhululekileyo.”
Ngaloo ndlela, kubalulekile ngathi ukuba sahlule ubuKristu bokwenyaniso kobobuxoki. Ukusinceda sikwenze oku, uYesu wanikela umgaqo olula othi: “Nobaqonda ngeziqhamo zabo.” (Mateyu 7:16) Amazwi, okanye ukuzibabaza uyinto ethile, akwanele. Ezekelisa oku uSteve Whysall, umbhali weSun yaseVancouver wathi: “Asingabo bonke abantu abanxibe iimpahla eziluhlaza zokusebenza ezizele i-oli abangabalungisi beenqwelo-mafutha, nokuba babonakala njengabalungisi beenqwelo-mafutha, . . . nokuba bathi ‘Singabalungisi beenqwelo-mafutha.’”
Esebenzisa lo mzekelo wakhe kubuKristu, lo kaWhysall wathi: “Ngokufuthi uya kuva abantu bethetha ngendlela oku okanye okuya okuye kwenziwa ngayo egameni lobuKristu yaye enjani ukoyikeka into ukuba ingenziwa. Ewe, yayisoyikeka. . . . Kodwa ngubani owakha wathi babengamaKristu abo benza ezo zinto zoyikekayo?
“O-o, uthi, iicawa ezimiselweyo zitsho njalo. Ngoko, ngubani owakha wathi iicawa ezimiselweyo zezamaKristu?
“Ngoko upopu wasikelela uMussolini, yaye kukho ubungqina babanye oopopu abenza izenzo ezilihlazo kwixa elidluleyo. Ngoko ngubani owathi babengamaKristu?
“Ngaba ucinga ukuba kuba umntu engupopu umele abe ngumKristu? Ukuthi nje komntu ‘NdingumKristu’ akuthethi ukuba unguye—kanye njengokuba umntu ozibanga engumlungisi weenqwelo-mafutha esenokungabi nguye.
“IBhayibhile ide ilumkise amaKristu ngabantu abazibanga bengamaKristu . . . Akukho mKristu unokulwa nomnye umKristu—oko bekuya kufana nomntu olwa nesiqu sakhe.”
“AmaKristu okwenyaniso angabazalwana noodade kuYesu Kristu. . . . Awasayi kuze nakanye, enzakalisane ngabom.”
Ngoko kufuneka sisebenzise umgaqo owanikelwa nguYesu size sikhangele iziqhamo eziveliswa ziicawa. Kodwa zyintoni ezo ziqhamo? IBhayibhile ikhankanya esinye ngokukhethekileyo, isithi: “Babonakala ngaloo nto abantwana bakaThixo, nabantwana bakaMtyholi. Bonke abangenzi bulungisa abangabakaThixo, nalowo ungamthandiyo umzalwana wakhe. Ngokuba le yintshumayelo enayivayo kwasekuqalekeni, ukuba sithandane; singabi njengoKayin, obengowongendawo, wambulala umninawa wakhe.”—1 Yohane 3:10-12.
Kunokuba zikhuthaze uthando lobuzalwana, iicawa ziye zaxhasa zada zakhuthaza ukubulalana kwabazalwana emfazweni. Ngaloo ndlela, ziye zaba zizixhobo zikaSathana uMtyholi kanye njengokuba lwalunjalo unqulo lwamandulo lwamaYiputa, ama-Asiriya, amaBhabhiloni nolwamaRoma. UYesu Kristu wambiza uSathana ngokuthi ‘ngumphathi walo eli hlabathi’ waza wathi ngokuphathelele abalandeli Bakhe abanyanisekileyo: “Abangabo abehlabathi, njengokuba nam ndingenguye owehlabathi.” (Yohane 12:31; 17:16; 2 Korinte 4:4) Kanti, iicawa ziye zazenza intsika yeli hlabathi.
Ngoko, licacile elokuba, uThixo akasebenzisi iicawa ukuzalisekisa injongo yakhe yokuvelisa ihlabathi elingenamfazwe. Phezu kwayo nje into ethethwa ngabefundisi basemkhosini nabanye abameli becawa, uThixo akaxhasi macala athile kwiimfazwe eziliwa ziintlanga.
Liya kuzalisekiswa njani idinga likaThixo lokuphelisa imfazwe? Ngaba kukho nabaphi na abantu abathe ngokunyanisekileyo bawakhanda amakrele abo aba ngamakhuba? Eneneni abathile bakwenzile oko.
Abo Bazalisekisa Idinga LikaThixo
Umbhali-mbali odumileyo wecawa uC. J. Cadoux wathi: “AmaKristu okuqala akholelwa koko kwakuthethwa nguYesu . . . Kangangoko ayenako alwenza unqulo lwawo lwalolunoxolo; ayigxeka ngokungapheleleyo imfazwe ngenxa yophalazo-gazi olubandakanyekileyo kuyo; asisebenzisa kuwo isiprofeto seTestamente Endala esakuxela kwangaphambili ukuguqulwa kwezixhobo zemfazwe zibe zizixhobo zokulima.”—Isaya 2:4.
Kodwa kuthekani namhlanje? Ngaba bakho abantu abakukholelwayo oko kwathethwa nguYesu nabathandana ngokunyanisekileyo? Ngaba aba ngokungathi kunjalo, bawakhandile amakrele abo aba ngamakhuba? Eneneni, iEncyclopedia Canadiana ithi: “Umsebenzi wamaNgqina kaYehova ukukuhlaziywa nokumiselwa ngokutsha kobuKristu bokuqala abaqheliselwa nguYesu nabafundi bakhe ebudeni benkulungwane yokuqala neyesibini yexesha lethu. . . . Onke angabazalwana.”
Ngaloo ndlela, ngokuvisisana nomyalelo kaKristu wokuthandana, amaNgqina kaYehova akakuvumi ukuthiya okanye ukubulala abazalwana bawo, nakubeni aba isenokuba ngamalungu olunye uhlanga okanye isizwe. (Yohane 13:34, 35) UMartin Niemöller, inkokeli yamaProtestanti eJamani, waphawula ukuba “ukutyhubela imbali, [iicawa] bezisoloko zikuvuma ukusikelela imfazwe, imikhosi nezixhobo zemfazwe yaye ziye zathandazela ukutshatyalaliswa ngokupheleleyo kotshaba lwazo ngeyona ndlela ingeyoyabuKristu.” Kanti, ngokuchasene noko, wathi, amaNgqina “aye aya kwiinkampu zoxinaniso engamakhulu namawaka yaye afa ngenxa yokuba awazange avume ukuya emfazweni aze adubule abantu.”
Ewe, ngokungafaniyo nabantu bezinye iinkonzo, ngokunyanisekileyo amaNgqina kaYehova awakhandile amakrele awo aba ngamakhuba. Ngokuhlala ‘engengawo awehlabathi,’ njengoko uKristu wayalelayo, ngenene ahlukile kwezinye iinkonzo. (Yohane 15:19) ISt. Anthony’s Messenger yamaRoma Katolika yathi: “AmaNgqina kaYehova akananxaxheba kule ‘nquleqhu’ yaye akazithwalisi uxanduva lokusikelela nantoni na urhulumente wehlabathi agqiba ukuyenza.”
Ngaba idinga likaThixo eliphathelele ukubekwa phantsi kwezixhobo liya kuphunyezwa kuphela nje ngenxa yezigidi ezimbalwa zabantu abaphuma kuzo zonke iintlanga abaye bawakhanda amakrele abo aba ngamakhuba? Nakanye! Idinga likaThixo liya kuzalisekiswa ngomlinganiselo omkhulu ngakumbi nangendlela emangalisayo.
Indlela Eya Kupheliswa Ngayo Imfazwe
UMdali, uYehova uThixo, uya kuphelisa imfazwe ngokushenxisa zonke izixhobo zemfazwe nabenzi bazo. Umdumisi weBhayibhile wamema abafundi ukuba bacingisise ngeli themba lichwayitisayo. Wabhala esenjenje: “Yizani nikhangele imisebenzi kaYehova; owenze iziphanziso ehlabathini; ulophelisa iimfazwe kude kuse eziphelweni zehlabathi.” (INdumiso 46:8, 9) Esinjani sona ukubalasela, nokukhuthaza isaziso!
Ngaba ithemba lehlabathi elingenamfazwe libonakala lingakholeleki? Abantu abathandabuzayo basenokucinga ngolo hlobo. Kwanombhali-mbali wasemkhosini uGillett Griswold wacinga ngolo hlobo. Kodwa wazinika ixesha lokubuhlolisisa ngenyameko obu bungqina. Ngokomphumo, wangqina ukuba ngenene iBhayibhile inokuthenjwa. Wafumanisa ukuba iziprofeto zeBhayibhile ezingeziganeko zangaphambili embalini, zazaliseka kanye ngexesha elililo, azizange zisilele. Oku kwamnika isizathu sokukholelwa ukuba ezo ziganeko kwakuprofetwe ngazo ukuba ziya kubakho ziya kwenzeka kanye ngexesha elimisiweyo.
Ngokomzekelo, khawucinge ngendlela iziganeko ezigungqis’ ihlabathi ezenzekayo ngoku ezifana kakuhle ngayo neziganeko iBhayibhile eyazixela kwangaphambili njengezaziya kuphawula imihla yokugqibela yale nkqubo yezinto. (Mateyu 24:3-14; 2 Timoti 3:1-5) Oku kuthetha ukuba siphila kwixesha lokufika koBukumkani bukaThixo, lokuzaliseka komthandazo uYesu awawufundisa abalandeli bakhe, ongulo: “Bawo wethu osemazulwini, malingcwaliswe igama lakho. Mabufike ubukumkani bakho. Makwenziwe ukuthanda kwakho nasemhlabeni, njengokuba kusenziwa emazulwini.”—Mateyu 6:9, 10.
Kungayiphi indlela esifanele silindele ukuba buya kufika ngayo uBukumkani bukaThixo? Isiprofeto seBhayibhile sithi ngokuphathelele oku: “Ngemihla yabo kumkani, [oko kukuthi, abo rhulumente balawulayo ngoku] uThixo wamazulu uya kumisa uBukumkani obungayi konakala naphakade. Obo bukumkani abuyi kusala nabantu bambi; buya kuzicola buzigqibe zonke ezo zikumkani [okanye, oorhulumente], bona [urhulumente kaThixo obuBukumkani] bume ngonaphakade.”—Daniyeli 2:44.
Ewe, uBukumkani bukaThixo buya kufika ngendlela enomtsalane ukushenxisa bonke oorhulumente abakhoyo, kanye njengokuba uMkhukula womhlaba wonke owawuxelwe ngenx’ engaphambili wafikayo ngomhla kaNowa. (Mateyu 24:36-39; 1 Yohane 2:17) Ngenxa yokusondela kwentshabalalo yabo bonke oorhulumente abakhoyo, neyeenkonzo ezibaxhasayo, kubalulekile ukuba ngamnye wethu ahlolisise imeko yakhe. Ngaba siya kwenza umgudu wokufunda ngoYehova uThixo nangoNyana wakhe, uYesu Kristu, sandule ke senze oko bafuna sikwenze? (Yohane 17:3) Ngaba siya kubonakalisa uthando omnye komnye, singavumi ukwenzakalisa abazalwana bethu, size ngaloo ndlela sibonise ukuba siwakhandile amakrele ethu aba ngamakhuba?
Ukuba uyavuma ukuba imfazwe ayikho ngqiqweni nokuba ubungathanda ukuphila kumhlaba apho uxolo luya kube lwesamele kwindalo yonke, dibana namaNgqina kaYehova. Aya kukuvuyela ukukunceda ufunde okungakumbi ngendlela imfazwe eya kuphela ngayo kungekudala, phantsi kolawulo loBukumkani bukaThixo.
Ukuba, emva kokufunda eli phephancwadi, unayo nayiphi na imibuzo ngeBhayibhile, zive ukhululekile ukuqhagamshelana namaNgqina kaYehova kwiHolo yoBukumkani ekummandla okuwo, okanye ubhalele abapapashi beli phephancwadi. (Bona iphepha 5.)
[Ibhokisi ekwiphepha 31]
Amacebo KaHimmler NgamaNgqina KaYehova
UHEINRICH HIMMLER wayeyinkokeli yama-SS amaNazi, okanye yamaElite Guard, yaye ngexesha lemfazwe Yehlabathi II wayeyeyona ndoda yesibini enegunya eJamani, eza emva koAdolf Hitler. Nangona uHimmler wayewathiyile amaNgqina kaYehova ngenxa yokungavumi kwawo ukuba nenxaxheba kumacebo amaNazi okoyisa ihlabathi, ekugqibeleni wawahlonela. Kwenye yeencwadi zakhe eziya kumphathi wamaGestapo uErnst Kaltenbrunner, uHimmler wabhala:
“Yimbi inkcazelo neembono zakutshanje zindikhokelela ekubeni ndikwazise oko ndiceba ukukwenza nendithanda ukukuzisa kwingqalelo yakho. Oku kuphathelele amaNgqina kaYehova. . . . Siya kuyilawula size siyithomalalise njani iRashiya xa . . . siza koyisa imimandla emikhulu yomhlaba wayo? . . . Zonke iindidi zonqulo nezamahlelo athanda uxolo zimele zixhaswe . . . phakathi kwezona ziphambili ziinkolelo zamaNgqina kaYehova. Kuyaziwa ukuba wona aneempawu ezinokuba luncedo ngendlela emangalisayo: Ngaphandle kokuba bengayifuni inkonzo yasemkhosini kunye nantoni na enxulumene nemfazwe . . . , bathembeke ngendlela emangalisayo, abangomakhoboka otywala, abatshayi; ngabasebenzi abanenzondelelo nababalaseleyo ngokunyaniseka. Ilizwi abalithethayo lithembekile. Ezi ziimpawu ezintle . . . , ziimpawu ezinqweneleka ngakumbi.”
UHimmler wayengenakuwenza amaNgqina asebenzele amaNazi. Iimpawu zamaNgqina zokuthanda uxolo wayengazifuneli yena nabantu bakhe, kodwa wayefuna ukuba ezi mpawu zintle zifunyanwe ngamaRashiya. Zaziya kuwenza abe ngabantu abanoxolo, ziwabangele ukuba akhande amakrele awo abe ngamakhuba.