Kungekudala—Ihlabathi Aliyi Kuba Nazimfazwe!

NGODISEMBA 24, 1914, ijoni eliselula laseBritani eligama linguJim Prince lanqumla kummandla owawuphakathi kwemikhosi emibini lisiya kuthetha nejoni laseJamani elihamba ngeenyawo. Eli joni laseJamani lambuza, “NdingumSaxon. UliNgesi elingumSaxon. Silwela ntoni?” Iminyaka kamva, lo kaPrince wathi: “Andikayazi nangoku impendulo yaloo mbuzo.”

Ngenye iveki engenakulibaleka ngowe-1914, amajoni omkhosi waseBritani nowaseJamani amanyana, kwadlalwa kunye ibhola ekhatywayo, yaye anikana nezipho zeKrismesi. Kakade ke, olo xolo, lwalungekho ngokwasemthethweni. Abaphathi bale mikhosi babengafuni ukuba imikhosi yabo ifumanise ukuba “utshaba” lwayo lwalungelorhamncwa linengcwangu olwaluchazwa lululo kwiindaba ezithetha ngemfazwe. Kamva ijoni laseBritani uAlbert Moren lakhumbula oku: “Ukuba oku kunqumama kwemfazwe kwakudlulele nakwenye iveki, kwakuya kuba nzima kakhulu ukuba kuqaliswe imfazwe kwakhona.”

Oko kunqumama ngokuzenzekelayo komlo kubonisa ukuba kwanamajoni amaninzi aqeqeshiweyo alangazelela uxolo kunemfazwe. Inkoliso yamajoni azaziyo izinto ezimanyumnyezi ezenzeka edabini aya kusixhasa isaci seSpanish esithi: “Myeke lowo ungayaziyo ukuba iyintoni na imfazwe aye.” Ngokungathandabuzekiyo, uhlolisiso lwezimvo olunokwenziwa ehlabathini lonke kubantu ngokubanzi lunokubonisa ukuba abantu abaninzi bakhetha uxolo kunemfazwe. Kodwa lo mnqweno woxolo wendalo iphela unokuguqulelwa njani ekubeni lihlabathi elingenamfazwe?

Ngaphambi kokuba kupheliswe iimfazwe, kumele kuguquke izimo zengqondo. Umgaqo-siseko woMbutho Wezemfundo, Ezenzululwazi NeZentlalo WeZizwe Ezimanyeneyo uthi: “Ekubeni iimfazwe ziqala ezingqondweni zabantu, ukulondolozwa koxolo kumele kuyileke kwasezingqondweni zabantu.” Sekunjalo ibutho labantu lanamhlanje, elizaliswe kukungathembani nentiyo, liya lisiba nobundlobongela ngakumbi, aliyi lisiba noxolo ngakumbi.

Sekunjalo, uThixo wathembisa ukuba ngenye imini uxolo luya kubhalwa ezingqondweni zabantu abatyekele ebulungiseni. Ngomprofeti wakhe uIsaya, wathi: “[UThixo] uya kugweba phakathi kweentlanga, ohlwaye izizwe ezininzi; ziwakhande amakrele azo abe ngamakhuba, nezikhali zazo zibe zizitshetshe zeediliya; uhlanga lungaphakamiseli uhlanga ikrele, nezizwe zingaphindi zifunde ukulwa.”—Isaya 2:4.

Ukukhulisa Uxolo Engqondweni

Ngaba inguqulelo ephawuleka ngolo hlobo kwindlela yokucinga ingenzeka? Ngaba abantu baya kuze bafunde ukulondoloza uxolo kunokuzukisa imfazwe? Khawuqwalasele umzekelo kaWolfgang Kusserow. Ngowe-1942 amaNazi amnqumla intloko lo mfana waseJamani oneminyaka engama-20 ubudala kuba ‘wayengafundi ukulwa.’ Sasiyintoni isizathu sokuba akhethe ukufa? Kwingxelo ebhaliweyo, wacaphula imigaqo yeZibhalo efana nalo, “Uze umthande ummelwane wakho ngoko uzithanda ngako” nothi, “Bonke abathabatha ikrele baya kutshabalala likrele.” (Mateyu 22:39; 26:52) Wandula ke engagwegwelezi wabuza: “Ngaba uMdali wethu konke oku wakubhalela imithi?”

Ilizwi likaThixo, eliseBhayibhileni, “linamandla” yaye lashukumisela eli Ngqina likaYehova liselula ekubeni liphuthume uxolo, kungakhathaliseki imiphumo eyayisenokubakho. (Hebhere 4:12, NW; 1 Petros 3:11) Kodwa uWolfgang Kusserow yayingenguye kuphela owaphuthuma uxolo. Kwincwadi ethi The Nazi Persecution of the Churches 1933-45, uJ. S. Conway ucaphula kwiincwadi ezingokwasemthethweni ezikumzi wokulondoloza iincwadi zembali yamaNazi eziqinisekisa ukuba amaNgqina kaYehova njengeqela ala ukuthabatha izixhobo. Njengoko uConway ebonisa, ukuma ngenkalipho ngolo hlobo kwakuthetha ukutyobela isiqinisekiso sawo sokufa.

Namhlanje amaNgqina kaYehova ayaqhubeka ephuthuma uxolo, kungakhathaliseki uhlanga okanye isizwe asiso. Ngoba? Kuba afundile eBhayibhileni ukuba abakhonzi bokwenyaniso bakaThixo bafanele bakhande amakrele abo abe ngamakhuba. UAlejandro, umfana waseArgentina owafudukela kwaSirayeli ngowe-1987, unokusingqinela esi sibakala.

Kangangeminyaka emithathu uAlejandro wayehlala kwifama ethile (kibbutz) ngoxa wayefunda eyunivesithi yaye esebenza kwiihotele neendawo zokutyela ezahlukeneyo. Ebudeni beli thuba, waqalisa ukufunda iBhayibhile yaye wayefuna injongo yobomi. Phezu kwako konke, wayelangazelela ukubona ihlabathi abantu abanokunandipha uxolo nokusesikweni kulo. UAlejandro—ongumYuda—wayesebenza namaYuda nama-Arabhu kodwa wakhetha ukungathabathi cala.

Ngowe-1990 uAlejandro wamenywa ngumhlobo wakhe owayefundisisa iBhayibhile namaNgqina kaYehova kwindibano yosuku olunye eHaifa. Emangaliswe kukubona amaYuda nama-Arabhu angama-600 encokola ngolonwabo endibanweni, wacinga oku, ‘Le yindlela efanelekileyo abantu abamele bahlalisane ngayo.’ Kwisithuba seenyanga ezintandathu, waba liNgqina ibe ngoku uchitha inkoliso yexesha lakhe ekushumayeleni isigidimi seBhayibhile soxolo.

Indlela UThixo Aya Kuluzisa Ngayo Uxolo

Nangona le mizekelo ichukumisa, inqabile kweli hlabathi lanamhlanje. Nangona le nkqubo ikhoyo ithetha ngoxolo, inkcenkceshela imbewu yemfazwe. Ngaba ubungathanda ukuhlala kwisitalato apho abahlali bachithela isi-7 ne-16 ekhulwini kwimivuzo yabo kwimipu nakwiindlela zokukhusela imizi yabo? Enyanisweni, iintlanga bezichithela imali eninzi kangako emkhosini kule minyaka yakutshanje. Akumangalisi ke ngoko, ukuba isiprofeto sikaIsaya sibonisa ukuba uluntu ngokubanzi alusayi kuze luwakhande amakrele alo abe ngamakhuba de uThixo ‘ohlwaye iintlanga ezininzi.’ Uya kukwenza njani oko?

Indlela ephambili yokulungisa izinto buBukumkani bukaYehova uThixo. Umprofeti uDaniyeli waxela kwangaphambili ukuba ‘uThixo wamazulu wayeya kumisa ubukumkani obungayi konakala naphakade.’ Wongezelela wathi, obu Bukumkani, “buya kuzicola buzigqibe zonke ezo zikumkani [oorhulumente bomhlaba], bona bume ngonaphakade.” (Daniyeli 2:44) La mazwi abonisa ukuba uBukumkani bukaThixo buya kulumisela ngokuthe nkqi ulawulo lwabo kuwo wonke umhlaba. Ngokuphelisa imida yeentlanga, uBukumkani buya kwenza usukuzwano lube yinto ephelelwe lixesha. Ngokubhekele phaya, ekubeni abantu abalawulwa bubo ‘beya kuba ngabafundi bakaYehova, luya kuba lukhulu uxolo lwabo.’ (Isaya 54:13) Kungeso sizathu uYesu wasixelela ukuba sithandaze kuThixo sithi: “Mabufike ubukumkani bakho”!—Mateyu 6:10.

Ukushenxisa Imiqobo Yonqulo

UThixo uya kususa kwanemiqobo yonqulo exabe endleleni yoxolo. Unqulo lwabangela ukungquzulana ngezixhobo okwathabath’ ixesha embalini—iiMfazwe Zomnqamlezo, okanye “iiMfazwe Ezingcwele,” ezaqaliswa nguPopu Urban II ngowe-1095 C.E.a Kule nkulungwane siphila kuyo ngabefundisi abaye bakhuthaza ukuxhaswa kweemfazwe, kwanezo zingenanto yakwenza tu kwaphela nonqulo.

Ethetha ngendima yeecawa ezazizibiza ngokuba zezamaKristu ebudeni beMfazwe Yehlabathi I, umbhali-mbali uPaul Johnson wabhala: “Abefundisi babengakwazi, yaye ubukhulu becala babengenamdla, wokubeka ukholo lobuKristu ngaphambi kobuhlanga. Inkoliso yakhetha undlela lula yaza yalinganisa ubuKristu nokuthand’ izwe. Amajoni angamaKristu azo zonke iimvaba ayeyalelwa ukuba abulalane egameni loMsindisi wawo.”

Unqulo lwenze lukhulu ekuphembeleleni imfazwe kunokukhuthaza uxolo. Enyanisweni, iBhayibhile iluchaza unqulo lobuxoki ‘njengehenyukazi’ elihenyuza nabalawuli bomhlaba. (ISityhilelo 17:1, 2) UThixo uthi lulo ngokuyintloko olubekek’ ityala ngokuphalazwa kwegazi labo bonke abo banqunyulweyo emhlabeni. (ISityhilelo 18:24) Ngenxa yoko, ngokuqinisekileyo uYehova uThixo uya kuwushenxisa ngokupheleleyo lo mqobo umi endleleni yoxolo.—ISityhilelo 18:4, 5, 8.

Kwanaxa oothunywashe ababangela iiyantlukwano abanjengezobupolitika nonqulo lobuxoki sebethe shwaka, uxolo alusayi kufumaneka ngaphandle kokuba kushenxiswe oyena nobangela weemfazwe umkhulu kubo bonke—uSathana uMtyholi. Lowo ngumsebenzi wokugqibela oya kwenziwa buBukumkani bukaThixo kucwangciso lwabo lokuzisa uxolo olupheleleyo kulo mhlaba. Incwadi yeBhayibhile yeSityhilelo ichaza ukuba uSathana uya ‘kubanjwa akhonkxwe’ aze ‘aphoswe enzonzobileni’ ukuze, ‘angabi sazilahlekisa iintlanga.’ Emva koko uya kutshatyalaliswa ngokupheleleyo.—ISityhilelo 20:2, 3, 10.

Isithembiso seBhayibhile esingokuphela kwemfazwe asilophupha nje. Ilungiselelo likaYehova uThixo loxolo sele liqalisile ukusebenza. UBukumkani bakhe bumiselwe emazulwini yaye bulungele ukuphumeza imilinganiselo ebhekele phaya yokuqinisekisa ubukho boxolo ehlabathini lonke. Okweli thuba, izigidi zamaNgqina kaYehova, ezixhasa lo rhulumente wasezulwini, zifunde ukuhlala ngoxolo.

Ngoko, ngokucacileyo, sinezizathu ezivakalayo zokukholelwa ukuba iimfazwe zinako ukuthinteleka. Okuvuyisa nangakumbi, sinokukhangela phambili kolo suku lungekude laxa uYehova eya kuziphelisa ngonaphakade iimfazwe. (INdumiso 46:9) Uya kuqiniseka ukuba kungekudala kuya kubakho ihlabathi elingenamfazwe.

[Umbhalo osemazantsi]

[Umfanekiso okwiphepha 7]

Unokuphila kwihlabathi elitsha elingenamfazwe