Ukoyisa Ngoxa Ujamelene Nokufa

“Kanti okwawamangalisayo amaNazi kukuba nawo [amaNgqina] ayengenakutshayelwa kuthi tu. Okukhona ayecinezelwa kokukhona ayesomelela ngakumbi, esiba njengedayimani ukuba lukhuni ekuxhathiseni kwawo. UHitler wawafaka kwelona dabi lishushu lilinga ukholo lwawo, yaye alugcina ukholo. . . . Amava awo axabisekile akubo bonke abafunda iindlela zokusinda kwingcinezelo enganyamezelekiyo. Ukusinda kona asinda.”—Kuthiwa lanikelwa nguGqr. Christine King, umbhali-mbali, kulindixesha iTogether.

AMANGQINA KAYEHOVA afanele agqalwe kwimbali yenkulungwane yama-20 njengelona qela lonqulo liphethwe kakubi nelitshutshiswayo emhlabeni. Aye aqondwa phosakeleyo yaye ngokufuthi ephathwa kakubi ngenxa nje yokuma kwawo engathabathi cala njengamaKristu kwaye engavumi ukufunda okanye ukuqhelisela imfazwe. Ukungabi nanto yakwenza kwawo nawo onke amaqhina ezobupolitika kuwazisele ingqumbo yabalawuli abangoozwilakhe kumazwe amaninzi. Sekunjalo, enye yeendlela azenzele ngayo igama kwimbali yezi mini yingxelo yawo yokungathabathi cala ngokungqongqo nengqibelelo engenakwaphulwa.a

Umbhali-mbali waseBritani uArnold Toynbee wabhala oku ngowe-1966: “Kumhla wethu eJamani bekukho abafeli-nkolo abangamaKristu abanikela ngobomi babo kunokunikela imbeko kwinkqubo engqwabalala yobuHlanga eyayimelwa nguthixo ongumntu uAdolf Hitler.” Izibakala zibonisa ukuba amaNgqina kaYehova ayebalasele phakathi kwabo bafeli-nkolo. Wambi amava afanele abonise indlela awajamelana ngayo nentshutshiso kwanokufa ngenxa yengqibelelo yawo—ibe oku akuzange kwenzeke ngexesha lamaNazi nje kuphela. Kwiindawo ezininzi zehlabathi, kukho ingxelo efanayo nengenakuthelekiswa nanto yokoyisa kwawo ngoxa ayejamelene nokufa.

Ibali lika-Ananii Grogul WaseUkraine

“Abazali bam baba ngamaNgqina kaYehova ebudeni beMfazwe Yehlabathi II, ngowe-1942, xa ndandineminyaka eli-13 ubudala. Ngokukhawuleza emva koko, utata wabanjwa, wavalelwa entolongweni, yaye kamva wafuduselwa kwiinkampu zaseSoviet kwiiNtaba zeUral. Xa ndandineminyaka eli-15 ubudala, ngowe-1944, abasemagunyeni emkhosini bandibiza ukuba ndiye kuqeqeshelwa ukungenela imikhosi exhobileyo. Njengoko ndandisele ndinokholo oluqinileyo kuYehova, andizange ndivume ukufunda ukulwa. Ngenxa yesi sizathu, ndiselula ndinjalo, ndagwetywa iminyaka emihlanu entolongweni.

“Kwandula ke kwafika unyaka owawunzima gqitha we-1950. Kwakhona ndabanjwa ndaza ndagwetywa iminyaka engama-25 ngaphaya kwezitshixo ngenxa yemisebenzi yam njengeNgqina. Ndandineminyaka engama-21 ubudala. Ndanyamezela iminyaka esixhenxe neenyanga ezine kwiinkampu ekwakusetyenzwa nzima kuzo. Ndabona abantu abaninzi besifa, bebulawa kukulamba yaye beqotywa ngumsebenzi onzima.

“Emva kokufa kukaStalin ngowe-1953, iimeko zaqalisa ukuguquka, yaye ngowe-1957 abasemagunyeni bandikhulula entolongweni. Kwakhona ndangcamla ‘inkululeko.’ Kodwa kwesi sihlandlo bandithumela eSiberia kangangeminyaka elishumi.”

Ukuthuthunjiswa Ngenkohlakalo Kukadade Wethu

“ESiberia, ndadibana kwakhona nodade wethu, owayesele engumlwelwe. Wayebanjwe kanye kwiiveki ezimbini emva kokubanjwa kwam ngowe-1950. Uphando kwityala lakhe lwenziwa ngendlela engekho mthethweni ngokupheleleyo. Bamtshixela yedwa esiseleni baza ke bavulela iimpuku ukuba zidakase apho kweso sisele. Ezi mpuku zamkrekretha iinyawo ezi yaye zazikhwela zizehlela kuye emzimbeni. Ekugqibeleni, abathuthumbisi bakhe bammisa kumanzi abandayo nathe gabhu esifubeni ngoxa babembukele engcungcutheka. Wagwetyelwa ukuhlala entolongweni iminyaka engama-25 ngenxa yomsebenzi wakhe wokushumayela. Yomibini imilenze le yakhe ayizange iphinde isebenze, kodwa wayekwazi ukuzisebenzisa izandla neengalo zakhe. Kangangeminyaka emihlanu bamgcina kwisibhedlele senkampu baza ekugqibeleni bagqiba kwelokuba akusekho yakhe ngokungathi sele efile. Bandula ke bamthumela kubazali bethu, ababesele begxothelwe eSiberia ukuba bahlale khona ubomi babo bonke ngowe-1951.”

Ukubuyela EUkraine Nentshutshiso Engakumbi

“ESiberia ndadibana noNadia, owaba ngumfazi wam waza wazala abantwana bethu. KwanaseSiberia saqhubeka nomsebenzi wethu wokushumayela. Ndandinembopheleleko yokunyamekela ukuveliswa nokukhutshelwa koncwadi lweBhayibhile. Busuku ngabunye mna nomnakwethu uJacob sasixakeka kwigumbi elingaphantsi kwindawo embiweyo, sikhuphela IMboniselo. Sasinoomatshini ababini bokuchwetheza nomatshini wokukhuphela esizenzele ngokwethu. Amapolisa ayesiza rhoqo ukuza kugqogqa ikhaya lethu. Lonke ixesha ayesimka engafumananga nto.

“Ixesha endandigwetyelwe ukulihlala apho laphela. Ndafudukela eUkraine nentsapho yam yonke, kodwa intshutshiso yasilandela. Ndabelwa ukukhonza njengomveleli ohambahambayo. Kwakufuneka ndiphangele ukuze ndikwazi ukuxhasa intsapho yam. Izihlandlo eziliqela nyanga zonke, amalungu eZokhuseleko lweLizwe ayesiza kwindawo endandiphangela kuyo aze azame ukundeyisela kwelokuba ndilalanise ukholo lwam. Ngasihlandlo sithile ndancedwa ngendlela ekhetheke gqitha nguYehova. Andibamba aza andisa kwiiofisi zeZokhuseleko lweLizwe eKiev, apho andigcina khona iintsuku ezintandathu. Lonke elo xesha ayezama ukundidida ngeengcamango zenkohliso zokungakholelwa kuThixo. Ngendlela yawo yokungahloneli Thixo, athetha ngeMboniselo nangezinye iimpapasho zeWatch Tower Society. Phantse ingcinezelo yayinganyamezeleki. Kwigumbi lokuhlambela, ndandiguqa ngamadolo ndize ndiziphalaze iinyembezi, ndikhala kuYehova. Hayi, ndandingaceli ukuba andikhulule koko ndandicela amandla okunyamezela nokuba ndingabangcatshi abazalwana bam.

“Yandula ke intsumpa yamapolisa yeza kundibona, yaza yahlala phambi kwam, yandibuza ukuba ndandeyisekile ngokwenene kusini na ngoko ndandikumela. Ndathi gqaba gqaba ndinikela ubungqina ndaza ndavakalisa ukuba ndikulungele ukuyifela inyaniso. Yaphendula isithi: ‘Ungumntu owonwabileyo. Akwaba nje bendeyisekile kukuba yinyaniso le, bendingenakulungela nje ukuhlala entolongweni iminyaka emi-3 okanye emi-5 kodwa kwanokuma ngomlenze omnye entolongweni iminyaka engama-60.’ Yahlala phantsi ithe cwaka ithutyana icinga yaza ke yaqhubeka isithi: ‘Ngumbandela obandakanya ubomi obungunaphakade. Ngaba unokukuthelekelela oko ngokwenene kuthethwa bubomi obungunaphakade?’ Ngemva kokunqumama kancinane, yathi: ‘Goduka!’ Loo mazwi andomeleza ngendlela endandingayilindelanga. Ngoku ndandingasalambanga. Ndandifuna nje ukugoduka. Ndandiqinisekile ukuba nguYehova owandomelezayo.

“Kwiminyaka yakutshanje izinto ziguqukile kummandla owawusakuba yiSoviet Union. Ngoku kukho intabalala yoncwadi lweBhayibhile. Siyakwazi ukuya kwiindibano zesiphaluka nezesithili, yaye siba nenxaxheba kuzo zonke iindlela zokushumayela, kuquka ubulungiseleli bendlu ngendlu. Liyinyaniso elokuba, uYehova usinike uloyiso ngoxa besijamelene nezilingo ezininzi!”

Ukuvavanywa Kwengqibelelo EAfrika

Ngasekupheleni kweminyaka yee-1960, eNigeria kwakugquba imfazwe yamakhaya. Ngenxa yokwanda kokulahlekelwa ngamajoni, amajoni aloo mmandla owawufuna ukuzimela, ngelo xesha owathiywa igama elitsha elithi Biafra, anyanzela abafana ukuba bangenele umkhosi. Ekubeni amaNgqina kaYehova engoondilele kwezobupolitika yaye engazibandakanyi emfazweni, amaNgqina amaninzi eBiafra ayezingelwa, aphathwe ngenkohlakalo, yaye ayebulawa. Omnye wamaNgqina kaYehova wathi: “Sasifana neempuku. Kwakufuneka sizimele ngalo lonke ixesha xa sasisiva amajoni esiza.” Ngokufuthi kwakungabikho thuba lakuzimela.

Ngenye intsasa yangoLwesihlanu ngowe-1968, uPhilip, umlungiseleli wexesha elizeleyo owayeneminyaka engama-32 ubudala, wayekwilali yaseUmuimo eshumayela kwindoda eyayisele ikhulile xa amajoni aseBiafra angena kuloo lali ngenjongo yokuya kugaya amajoni.

Inkokeli yelo qela yabuza: “Wenza ntoni?” UPhilip wathi wayethetha ngoBukumkani obuzayo bukaYehova.

Elinye ijoni lakhwaza lathi: “Eli asiloxesha lokushumayela! Eli lixesha lemfazwe, yaye asifuni kubona abafana bejikeleza kungekho nto bayenzayo.” Andula ke la majoni abamba uPhilip amkhulula wahamba ze, abophelela izandla zakhe azidibanisa, aza amthabatha ahamba naye. UIsrael, umdala ongumKristu oneminyaka engama-43 ubudala, naye akazange abe nalo ithuba lokuzimela. Wabanjwa xa wayelungiselela abantwana bakhe ukudla. Ngeye-2:00 emva kwemini amajoni ayesele ebambe abantu abangaphezu kwekhulu. Anyanzela loo mabanjwa ukuba abaleke umgama oziikhilomitha ezingama-25 ukuya enkampini yamajoni eUmuacha Mgbedeala. Nawaphi na awayebaleka kancinane ayebethwa.

UIsrael waxelelwa ukuba wayeza kuphatha umbayimbayi omkhulu; uPhilip wayeza kuqeqeshelwa ukusebenzisa umpu omncinane. Xa bachazayo ukuba babengenako ukungenela kwezomkhosi kuba uYehova wayekwalela oko, umphathi-mkhosi wayalela ukuba bavalelwe. Ngeye-4:00 emva kwemini bonke abo babenyanzelelwa ukuba babe ngamajoni, kuquka nabo babevalelwe, bayalelwa ukuba benze umgca. Amajoni axelela ndoda nganye ukuba ityikitye iphepha elibonisa ukuba yayivumile ukungenela umkhosi. Xa kwafika ixesha lokuba makatyikitye, uPhilip wabhekisela kumazwi akweyesi-2 kuTimoti 2:3, 4 waza wathi kumphathi-mkhosi: “Sele ndinguye ‘umphumi-mkhosi kaKristu.’ Andinakulwela uKristu ndize ndilwele nomnye umntu. Ukuba ndenjenjalo, uKristu uya kundijonga njengomngcatshi.” Umphathi wamajoni wambetha entloko, esithi: “Uyekile ukuba lijoni likaKristu! Ngoku ulijoni laseBiafra.”

UPhilip waphendula: “UYesu akakandixeleli ukuba ndiyekile ukuba lijoni lakhe, yaye ndiselilo ndide ndifumane isaziso esinjalo.” Esakutsho, amajoni abaphakamisela emoyeni uPhilip noIsrael aza abaphosa phantsi. Bedengile yaye besopha emehlweni, empumlweni nasemlonyeni, abo babini barhuqwa.

Phambi Kwamajoni Adubula Abantu Abagwetyelwe Ukufa

Kamva ngaloo mini, uIsrael noPhilip bazibona bephambi kwamajoni adubula abantu abagwetyelwe ukufa. Kodwa amajoni awazange abadubule. Kunoko, ababetha ngamanqindi nangemiva yemipu. Waza umphathi wenkampu yamajoni wagqiba kwelokuba ababethele ukufa. Wabela amajoni angama-24 ukuba enze oku. Amathandathu ayeza kubetha uPhilip, yaye amanye amathandathu ayeza kubetha uIsrael. Amanye amajoni ali-12 ayeza kulinda nezinye iintonga xa kukho ezaphukileyo yaye ayeza kuthabatha indawo yamanye adiniweyo.

UPhilip noIsrael babebotshwe izandla neenyawo. UIsrael uyabalisa: “Andinako ukuyichaza imivumbo esayibethwayo ngobo busuku. Lisakuba lidiniwe elinye ijoni, elinye lalithabatha indawo yalo. Aqhubeka esibetha ithuba elide kwanaxa sasingasekho zingqondweni.” UPhilip uthi: “UMateyu 24:13, othetha ngokunyamezela kude kube sekupheleni, wathi qatha engqondweni yam ngoxa sasithuthunjiswa, yaye oko kwandomeleza. Intlungu yokubethwa ndayiva kuphela okwemizuzwana embalwa. Kwabonakala ngathi uYehova wayethumele esinye sezithunywa zakhe ukuze sisincede, njengoko wenzayo ngexesha likaDaniyeli. Ngapha koko ngesasingazange siphumelele ngobo busuku boyikekayo.”

Esakugqiba amajoni, uIsrael noPhilip bashiywa kucingwa ukuba bafile. Lalisina. La maKristu mabini abuyela ezingqondweni ngentsasa elandelayo. Xa amajoni aphawula ukuba ayesaphila, awatsala aphinda aya kuwavalela.

“Sele Ninuka Okwezidumbu”

Oko kubethwa kwashiya inyama yabo ibomvu yaye ixobukile, babenamanxeba emzimbeni wonke. UIsrael ukhumbula oku: “Sasingavunyelwanga ukuba siwahlambe amanxeba ethu. Emva kweentsuku ezithile saba lilifa leempukane. Ngenxa yoko kubethwa sasingakwazi ukutya. Saqala ukukwazi ukutya nantoni na engengomanzi emva kweveki.”

Ntsasa nganye amajoni ayebabetha ngesabhokhwe—ngamnye wayebethwa imivumbo engama-24. Loo majoni akhohlakeleyo ayekubiza oko ngokuba “sisidlo sakusasa” okanye “yiti eshushu yakusasa.” Yonke imihla emini emaqanda, amajoni ayebathabatha abase ebaleni ukuze bagqatswe lilanga elishushu kude kube ngeyoku-1:00 emva kwemini. Emva kokuphathwa ngolo hlobo iintsuku eziliqela, umphathi-mkhosi wababiza waza wababuza enoba babekuguqulile kusini na ukuma kwabo. Bathi akunjalo.

Umphathi-mkhosi wathi, “Niya kufela eziseleni zenu. Eneneni, sele ninuka njengezidumbu.”

UPhilip waphendula: “Enoba singafa, siyazi ukuba uKristu, lowo simlwelayo, uya kusivusa.”

Bamelana njani neli xesha libi kangaka? UIsrael uthi: “Mna noPhilip sasikhuthazana ngalo lonke ixesha lokuvavanywa kwethu. Ekuqaleni, ndathi kuye, ‘Musa ukoyika. Enoba kwenzeka ntoni na, uYehova uya kusinceda. Mna okunokwam akukho nto iya kundibangela ndingenele umkhosi. Kwanokuba kufuneka ndife, andiyi kuphatha mpu ngezi zandla zam.’” UPhilip wathi wayenze isigqibo esifanayo. Babekhumbula baze baxubushe izibhalo ezahlukahlukeneyo kunye.

Umphathi-mkhosi omtsha wagqiba kwelokuba afuduse malunga nekhulu labo babenyanzelelwe ukungenela umkhosi abafudusele eIbema, inkampu yokuqeqeshela amajoni kummandla waseMbano wendawo ngoku ebizwa ngokuba liLizwana laseImo. UIsrael ubalisa oko kwenzekayo: “Kwakumi ilori enkulu, yaye bonke abo babenyanzelelwe ukuba ngamajoni babesele bekhwele. Umfazi wam, uJune, wabaleka waya emajonini waza ngenkalipho wacela ukuba kungahanjwa nathi. Xa wabhebhethwayo, waguqa ecaleni kwelori, wathandaza, waza watsho ngoamen ovakalayo. Emva koko ilori yahamba.”

Ukudibana Nejoni Elinovelwano

Ilori yamajoni yafika kwinkampu yaseIbema ngemva kwemini elandelayo. Indoda eyayibonakala iphethe apho yayilijoni lakwaSirayeli. Xa yabona indlela uPhilip noIsrael ababebethwe nababebuthathaka ngayo, yathetha nabo yaza yababuza isizathu sokuba babe kwimeko embi ngolo hlobo. Bachaza ukuba babengamaNgqina kaYehova yaye babalile ukungenela uqeqesho lomkhosi. Ngomsindo yaguqukela kwamanye amagosa asemkhosini awayelapho. Yathi, “IBiafra ngokuqinisekileyo ayinakuyiphumelela le mfazwe. Naliphi na ilizwe elisemfazweni eliphatha kakubi amaNgqina kaYehova ngokuqinisekileyo alinakuphumelela. Anifanelanga niwanyanzele amaNgqina kaYehova ukuba angenele umkhosi. Ukuba iNgqina liyavuma ukuya emfazweni, kulungile. Kodwa ukuba liyala, musani ukulinyanzela.”

Ugqirha wasenkampini wawabuza loo maNgqina mabini enoba ayekhe agonywa na nokuba ayenaso kusini na isiqinisekiso esivela kugqirha sokuba ayekufanelekele ukulwa. Ekubeni ayengenaso, ijoni alizange libafune bonke abo babenyanzelelwe ukungenela umkhosi laza layalela ukuba baphindiselwe eUmuacha.

“Hambani Indlela Yenu, Niye Kukhonza UThixo Wenu”

Kamva, umfazi kaIsrael nonina kaPhilip bagqiba kwelokuba batyelele kwinkampu yaseUmuacha ngethemba lokuba babeya kuva indaba. Njengoko babesondela, beva ingxolo enkampini. Esangweni, umlindi wathi: “Ngqina likaYehova! Umthandazo wakho uphenduliwe. Iqela ebelithatyathiwe kwiintsuku ezintathu ezidluleyo liphinde labuyiswa.”

Kwangaloo mini inye, uPhilip noIsrael bakhululwa enkampini. Umphathi-mkhosi wathi kuJune: “Ngaba uyazi ukuba ngumthandazo wakho obangele ukuba oko besikwenza kungaphumeleli?” Wandula wathi kuIsrael noPhilip: “Hambani indlela yenu, niye kukhonza uThixo wenu, nize niqhubeke nigcine ingqibelelo kuYehova wenu.”

Ke bona uIsrael noPhilip, bachacha baza baqhubeka nomsebenzi wamaKristu. Emva kwemfazwe, uIsrael washumayela ixesha elizeleyo kangangeminyaka emibini waza waqhubeka ekhonza njengomdala ongumKristu. UPhilip wakhonza njengomveleli ohambahambayo kangangeminyaka elishumi yaye nangoku usengumshumayeli wexesha elizeleyo. Naye ukwangumdala ebandleni.

Ukwala Ukunikela Ukuze Kuthengwe Izixhobo

UZebulan Nxumalo noPolite Mogane ngabalungiseleli bexesha elizeleyo ababini abaselula baseMzantsi Afrika. UZebulan uyachaza: “Ngenye intsasa yangeCawa, amadoda aliqela eza endlwini yethu aza afuna ngenkani ama-R20 ukuze athenge izixhobo. Ngokuzithoba sawacela ukuba abuye ngokuhlwa ngaloo mini, ekubeni sasixakeke kakhulu ngaloo Cawa ukuba sasingaxubusha loo mcimbi ngelo xesha. Okumangalisayo kukuba avuma. Ngaloo ngokuhlwa, kwafika amadoda ali-15. Kwabonakala ebusweni bawo ukuba ayengazanga kudlala. Emva kokuzazisa ngokuzolileyo, sawabuza ukuba ayefuna ntoni na. Achaza ukuba ayefuna imali yokuthenga izixhobo ezikhulu nezilunge ngakumbi awayeza kulwa ngazo neqela lobupolitika elichasene nawo.

“Ndawabuza: ‘Kungenzeka na ukuba ucime umlilo ngepetrol?’

“Aphendula, ‘Hayi, akunakwenzeka.’

“Sachaza ukuba ngendlela efanayo, izenzo zogonyamelo zinokukhuthaza ugonyamelo nempindezelo kuphela.

“Kwabonakala ngathi la mazwi ayalucaphukisa uninzi lwamadoda awayekhona apho. Oko ayekuzele ngoku kwabonakala kusisisongelo esicel’ umngeni. Avungama, ‘Le ngxoxo yinkcitha-xesha. Lo mnikelo sisinyanzelo akukho nto ifunisa ukuba makuxoxwe. Niyahlawula okanye nijamelane nemiphumo engemyoli!’”

UZebulan ukhumbula oku: “Ngelo xesha kanye xa izinto zazibonakala zisiba nzima, kwangena inkokeli yawo. Yafuna ukwazi ukuba yayiyintoni na ingxaki. Sachaza ukuma kwethu, yaye yaphulaphula ngenyameko. Senza umzekelo ngokuzinikela kwawo kwiinkolelo zawo zobupolitika. Sawabuza ukuba ayelindele ukuba ijoni eliqeqeshiweyo lombutho wawo lisabele njani ukuba lalibanjwa lize linyanzelwe ukuba lilalanise koko likumeleyo. Athi umntu onjalo ufanele akulungele ukufela iinkolelo zakhe. Ancuma xa sasiwancoma ngempendulo yawo; awazange aqonde ukuba ayesinike ithuba elihle lokuchaza imeko yethu. Sachaza ukuba sahlukile kwiicawa zeNgqobhoko. Njengabaxhasi boBukumkani bukaThixo, ‘ukuma’ kwethu kusekelwe eBhayibhileni, ezalelayo zonke iintlobo zokubulala. Ngenxa yesi sizathu, sasingazimiselanga kunikela nesenti emdaka ukuze kuthengwe izixhobo.

“Ngeli xesha, njengoko ingxoxo yayifikelela kuvutho-ndaba, kwakusithi wayi-wayi abantu abaninzi besiza endlwini yethu, kangangokuba ekugqibeleni sasithetha nabantu abaninzi. Babengazi ukuba sasithandaza ngenzondelelo kangakanani na ukuze sifumane imiphumo emihle kuloo ngxoxo.

“Emva kokucacisa ukuma kwethu, kwathi cwaka ixesha elide. Ekugqibeleni, inkokeli yabo yathetha ibhekisa kwiqela layo: ‘Manene, ndiyakuqonda ukuma kwala madoda. Ukuba besifuna imali yokwakha ikhaya lokuhlala abantu abasele bekhulile, okanye ukuba omnye wabamelwane bethu ebefuna imali yokuya esibhedlele, la madoda ebeya kusinika imali. Kodwa awazimiselanga kusinika imali yokubulala. Mna ngokwam andiboni nto iphosakeleyo kwiinkolelo zawo.’

“Isakutsho, baphakama bonke. Sawaxhawula saza sawabulela kuba ebonakalise umonde. Imeko eyaqala ngokungathi iza kusongela ubomi bethu yayigqibele ngokuba luloyiso oluzukileyo.”

Amahlokondiba Akhokelwa Ngabefundisi

Ngokubaliswa liNgqina lasePoland uJerzy Kulesza:

“Ngokuphathelele inzondelelo nokubeka izilangazelelo zoBukumkani kwindawo yokuqala, utata, uAleksander Kulesza, wayengumzekelo wokuxeliswa. Kuye, inkonzo yasentsimini, iintlanganiso zamaKristu, ufundisiso lobuqu nolwentsapho yayizizinto ezingcwele ngokwenene. Wayengaphazanyiswa nto enobalikhephu enoba yiqabaka enoba ngumoya ovuthuzayo okanye ubushushu. Ebusika wayenxiba impahla yakhe yokuhamba ekhephini, athabathe ingxowa yakhe exwaywayo enoncwadi lweBhayibhile aze aye kwimihlaba ekwanti yasePoland ahlale khona iintsuku eziliqela. Wayedla ngokudibana neengozi ezahlukahlukeneyo, kuquka namaqela abanqolobi andlongondlongo.

“Maxa wambi abefundisi babexhokonxa inkcaso nxamnye namaNgqina, baphembelele amahlokondiba. Babedla ngokuwagculela, bawagibisele ngamatye, okanye bawabethe. Kodwa ayebuyela ekhaya, onwabile kuba eye anyamezela ukugculelwa ngenxa kaKristu.

“Kwiminyaka yokuqala emva kweMfazwe Yehlabathi II, abasemagunyeni babengakwazi ukumisela umthetho nocwangco elizweni. Kwakukho iziphithiphithi yaye kutshatyalaliswa izinto. Emini kwakulawula amapolisa nemikhosi yezokhuseleko, logama ebusuku kwakulawula abanqolobi namanye amaqela awahlukahlukeneyo. Kwanda ubusela nokuphanga, yaye ngokufuthi abantu babebulawa. AmaNgqina kaYehova awayengenandlela yakuzikhusela ayengamaxhoba, ingakumbi njengokuba amanye amaqela awayekhokelwa ngabefundisi ayehlasela ngokukhethekileyo amaNgqina. Xa behlasela amakhaya ethu babezithethelela ngelithi babekhusela unqulo looyisemkhulu ubuKatolika. Ngezihlandlo ezinjalo babesophula iifestile, besiba imfuyo, yaye babetshabalalisa nempahla, ukutya, kwakunye noncwadi. IiBhayibhile babezilahla equleni.”

Ukuba Ngumfeli-nkolo Engalindelanga

“Ngenye imini ngoJuni 1946, ngaphambi kokuba sidibane ukuze sihambe ngeebhayisekile ukuya kwenye intsimi engabelwanga bani, umzalwana oselula, uKazimierz Kądziela, wasityelela waza wathetha notata ngelizwi eliphantsi. Utata wasindulula ukuba masihambe, kodwa akazange ahambe nathi, yaye oko kwasimangalisa. Sasiza kuva isizathu kamva. Ekufikeni kwethu ekhaya, seva ukuba ngobusuku obandulelayo intsapho yakwaKądziela yayibethwe kabuhlungu, ngoko utata waya kunyamekela abazalwana noodade ababenzakele.

“Xa kamva ndangena kwigumbi ababelele kulo, zasuka zaphalala iinyembezi ngenxa yaloo mbono. Kwakuzele igazi ezindongeni nasesilingini. Abantu babebotshwe ngeebhandeji belele ezibhedini, babefe mnyama, bedumbile, bophuke iimbambo namalungu. Kwakunzima ukubona ukuba ngoobani na. Udade Kądziela, umama waloo ntsapho, wayebethwe kanobom. Utata wayebanceda, yaye phambi kokuba ahambe wathetha la mazwi abalulekileyo: ‘Oo, Thixo wam, ndiyindoda ephilileyo nenamandla [ngelo xesha wayeneminyaka engama-45 yaye wayengazange akhe agule], yaye andizange ndilixhamle ilungelo lokubandezeleka ngenxa yakho. Kutheni oku kufanele kwenzeke kulo dade sele ekhulile?’ Wayengakwazi oko kwakuza kwenzeka kuye.

“Njengoko ilanga lalitshona, sabuyela ekhayeni lethu elalikummandla [oziikhilomitha ezintathu ukusuka kwindawo esasikuyo]. Iqela lamadoda angama-50 lalijikeleze indlu yasekhaya. Kwakukho nentsapho yakwaWincenciuk, ngoko sasilithoba apho. Ngamnye wethu wabuzwa lo mbuzo: ‘Ngaba uliNgqina likaYehova?’ Xa sasiphendula ngokuthi ewe, sasibethwa. Emva koko, etshintshisana, amabini kuloo madoda akhohlakeleyo abetha utata ngoxa ayembuza ukuba wayeza kuyeka kusini na ukufundisisa iBhayibhile nokushumayela ngayo. Ayefuna ukwazi ukuba wayeza kuya ecaweni aze avume izono zakhe kusini na. Ayemngcikiva, esithi: ‘Namhlanje, siza kukumisela njengebhishophu.’ Utata akazange akhuphe nelimdaka, engazange ancwine nokuncwina. Wanyamezela oko kuthuthunjiswa kwakhe, ethe cwaka njengemvu. Ngesifingo, malunga nemizuzu eli-15 emva kokuba ezo zikhohlakali zonqulo zimkile, wafa, ngenxa yokuba wayebethwe walutywantsi. Kodwa ngaphambi kokuba zimke, zandikhetha ukuba zaziza kulandelisa ngam. Ngoko ndandineminyaka eli-17 ubudala. Ngoxa ndandibethwa, ndemkelwa ziingqondo izihlandlo eziliqela. Umzimba wam wawufe mnyama ukususela esinqeni ukunyuka ngenxa yokubethwa. Sabethwa kangangeeyure ezintandathu. Ngenxa nje yokuba singamaNgqina kaYehova!”

Inkxaso Yomfazi Othembekileyo

“Ndandiphakathi kweqela lamaNgqina angama-22 awayevalelwe kangangeenyanga ezimbini esiseleni esimnyama esingaphantsi [kwezikwemitha ezilishumi]. Lisakuphela elo xesha, izixa zethu zokutya zancitshiswa. Yonke imihla, sasinikwa iqhekeza lesonka nemagi encinane enekofu ekrakra. Sasikwazi ukulala phantsi kumgangatho obandayo owenziwe ngesamente kuphela xa kukho umntu othatyathiweyo waya kuncinwa ebusuku.

“Ndavalelwa entolongweni izihlandlo ezihlanu ngenxa yomsebenzi wamaKristu, ezenza iminyaka esibhozo xa zizonke. Ndandiphethwe njengebanjwa elikhethekileyo. Kwingxelo ebhalwe iinkcukacha zam kwakubhalwe esi saziso: ‘Mkhathazeni uKulesza ngokokude angaze abuye abe nomdla ngalo msebenzi.’ Noko ke, sihlandlo ngasinye ndikhululwa, ndandisebenza enkonzweni yamaKristu. Abasemagunyeni babekwaphathele imbengwana umfazi wam, uUrszula neentombi zam ezincinane ezimbini. Ngokomzekelo, kangangeminyaka elishumi igosa lasemthethweni lalithabatha inxalenye yomvuzo umfazi wam awayewusebenzela nzima. Kwakusithiwa yirhafu ngenxa yokuba ndandihlela uncwadi lweBhayibhile ngondlela mnyama. Kwathinjwa yonke into ngaphandle kwezo zinto zazijongwa njengeziyimfuneko ebomini. Ndinombulelo kuYehova ngenxa yomfazi wam okhaliphileyo, owanyamezela kunye nam ngomonde zonke ezo ntshutshiso nowandixhasa ngokwenene ngalo lonke ixesha.

“Siye salubona uloyiso lokomoya apha ePoland; ngoku sineofisi yesebe esemthethweni yeWatch Tower Society eNadarzyn, kufuphi neWarsaw. Emva kwamashumi eminyaka entshutshiso, ngoku kukho amaNgqina angaphezu kwe-108 000, anxulumana namabandla ali-1 348.”

Kutheni Kukho Abafeli-nkolo Abaninzi Kangaka?

Ingxelo yengqibelelo yamaNgqina kaYehova kule nkulungwane yama-20 inokuyizalisa ngokoqobo imiqulu—amawaka aye afa njengabafeli-nkolo okanye avalelwa ezintolongweni aza atshutshiswa ngendlela engathethekiyo, adlwengulwa, aza aphangwa kwiindawo ezifana neMalawi neMozambiki, eSpeyin phantsi kwenkqubo yobuFasi, eYurophu phantsi kwenkqubo yobuNazi, kwiMpuma Yurophu phantsi kwenkqubo yobuKomanisi, nakwelaseUnited States ebudeni beMfazwe Yehlabathi II. Umbuzo uyaphakama, Kutheni? Kungenxa yokuba iinkokeli zobupolitika nezonqulo ezingoontamo-lukhuni azikhange zifune ukuhlonela izazela eziqeqeshwe yiBhayibhile zamaKristu anyanisekileyo angavumiyo ukufunda ukubulala nangenanxaxheba kuyo yonke inkqubo yezobupolitika. Kunjengokuba uKristu watshoyo, njengoko kuchazwe kuYohane 15:17-19: “Ndiniwisela lo mthetho wokuba nithandane. Ukuba ihlabathi linithiyile, yazini ukuba lindithiye kuqala kunani. Ukuba beningabehlabathi, ihlabathi linge likuthanda okwalo; ke ngokuba ningengabehlabathi, ndaninyulayo mna kulo ihlabathi, ngenxa yoko linithiyile ihlabathi.”

Phezu kwayo nje yonke le ntshutshiso ikhoyo ehlabathini lonke, amaNgqina kaYehova aye anda—ukusuka kwi-126 000 kumazwe angama-54 ngowe-1943 ukusa phantse kwizi-4 500 000 kumazwe angama-229 ngowe-1993. Aye anamava oloyiso kwanaxa ejamelene nokufa. Azimisele ukuqhubeka nalo msebenzi wawo wokufundisa ubalaseleyo wokuvakalisa iindaba ezilungileyo zoBukumkani ade uYehova athi kugqityiwe.—Isaya 6:11, 12; Mateyu 24:14; Marko 13:10.

[Umbhalo osemazantsi]

[Ibhokisi/Umfanekiso okwiphepha 6]

Ukufela Ukholo EJamani

UAUGUST DICKMANN wayeneminyaka engama-23 ubudala xa inkokeli yama-SS uHeinrich Himmler wayalela ukuba adutyulwe phambi kwawo onke amanye amaNgqina kwinkampu yoxinaniso yaseSachsenhausen. UGustav Auschner, ingqina lokuzibonela, wanikela le ngxelo: “Amdubula UMzalwana Dickmann aza asixelela ukuba sasiya kudutyulwa sonke ukuba sasingasityobeli isigqibo sokulahla ukholo lwethu. Kwakuza kuthatyathwa ama-30 okanye ama-40 ethu ngexesha asiwe kumngxuma osentlabathini, yaye ayeya kusidubula sonke. Ngomhla olandelayo, ama-SS azisa iphetshana kumntu ngamnye ukuba alityobele okanye adutyulwe. Akwaba wawukubonile ukudana kwawo xa ahamba engenalo nokuba libe linye iphetshana elityotyelweyo. Ayenethemba lokusoyikisa ngokubulala esidlangalaleni. Kodwa sasisoyika ngakumbi ukungamkholisi uYehova kunokoyika iimbumbulu zawo. Akazange abuye adubule namnye wethu esidlangalaleni.”

[Ibhokisi/Umfanekiso okwiphepha 9]

Elona Xabiso Liphakamileyo

MAXA WAMBI, uloyiso xa ujamelene nokufa lusenokubandakanya elona xabiso liphakamileyo. Ileta eyafunyanwayo ivela kwiBandla laseNseleni, kummandla osemantla wePhondo laseNatal eliseMzantsi Afrika, ichaza ngebali elibuhlungu: “Sinibhalela le leta ukuze sinazise ngokushiywa kwethu ngumzalwana wethu othandekayo uMoses Nyamussua. Umsebenzi wakhe ibikukulungisa iinqwelo-mafutha. Ngasihlandlo sithile wacelwa lelinye iqela lezobupolitika ukuba alungise oozenzele bemipu yalo, nto leyo angazange avume ukuyenza. Kwaza, ngomhla we-16 kuFebruwari, 1992, babenentlanganiso yabo yezobupolitika, apho balwa nabo beqela eliphikisayo. Kwangaloo mini ngokuhlwa xa babebuya edabini, badibana nalomzalwana esiya ezivenkileni. Bambulalela apho ngemikhonto yabo. Bathi siyintoni isizathu sabo? ‘Walile ukulungisa imipu yethu, yaye ngoku amaqabane ethu afile edabini.’

UMzalwana uDumakude, unobhala webandla uthi, “Oku kuye kwabothusa kakhulu abazalwana.” Uyongeza, “Kodwa, sisaya kuqhubeka nobulungiseleli bethu.”

[Ibhokisi/Umfanekiso okwiphepha 11]

Ukufela Ukholo EPoland

NGOWE-1944, xa imikhosi yaseJamani yayirhoxa ngokukhawuleza yaye umkhosi wawusondela kwidolophu ekummandla ongakwintshona yePoland, abasemagunyeni bemikhosi ehlaselayo banyanzela abemi ukuba bembe imingxuma eyayiza kuthintela iinqwelo zemfazwe ukuze zingangeni. AmaNgqina kaYehova ala ukuthabatha inxaxheba. UStefan Kieryło, iNgqina eliselula—elalibhaptizwe kwiinyanga ezimbini ngaphambili—wanyanzelwa ukuba athelele iqela labasebenzi kodwa ngenkalipho naye akazange afune ukuthabatha nxaxheba. Kwenziwa izinto ezahlukahlukeneyo ukuze kophulwe ingqibelelo yakhe.

Bambophelela emthini osemgxobhozweni ehamba ze ukuze atyiwe ziimbuzane nazezinye izinambuzane. Wanyamezela loo ntshutshiso kunye nezinye, baza bamyeka. Noko ke, xa igosa eliphezulu laliye kuhlola elo qela labasebenzi, mntu uthile walixelela ukuba kwakukho indoda eyayingayi kuwuthobela kwaphela umyalelo walo. UStefan waxelelwa izihlandlo ezithathu ukuba embe umngxuma. Wala kwanokuthabatha umhlakulo ngesandla sakhe. Wadutyulwa wafa. Amakhulu abo babebukele loo mbono ayemazi. Ukufela ukholo kwakhe kwaba bubungqina bamandla amakhulu uYehova anokuwanika abantu.

[Umfanekiso okwiphepha 7]

UAnanii Grogul

[Umfanekiso okwiphepha 10]

UJerzy Kulesza