Ndafunda Ukuthembela Kuyehova
NGOKUBALISWA NGUJÁN KORPA-ONDO
Kwakungowe-1942, ndilindwe ngamajoni aseHungary, kufuphi naseKursk, eRashiya. Sasingamabanjwa amazwe awayemanyene neJamani esilwa neRashiya kwiMfazwe Yehlabathi II. Ingcwaba lam lalisele lembiwe, yaye ndanikwa imizuzu elishumi yokwenza isigqibo sokutyobela uxwebhu olwalusithi andisenguye omnye wamaNgqina kaYehova. Ngaphambi kokubalisa okwenzekayo, mandikuxelele indlela endafika ngayo apho.
NDAZALWA ngowe-1904 kwidolophana encinane yaseZahor, ngoku ekwimpuma Slovakia. Emva kweMfazwe Yehlabathi I, iZahor yaba yinxalenye yelizwe elalisandul’ ukusekwa laseCzechoslovakia. Kwidolophana yethu kwakukho imizi emalunga nama-200 neecawa ezimbini, eyobuKatolika bamaGrike nekaCalvin.
Nakubeni ndandihamba iCawa kaCalvin, ndandingaphili ubomi bokuziphath’ okuhle. Kufuphi nalapho ndandihlala khona kwakuhlala indoda eyayiphila ngendlela eyahluke ngokupheleleyo. Ngenye imini yaqalisa ukuncokola nam yaza yandiboleka iBhayibhile. Yayisisihlandlo sokuqala ukuba ndiyibambe ngezam izandla lo ncwadi. Malunga neli xesha, ngowe-1926, ndatshata noBarbora, yaye kungekudala saba nabantwana ababini, uBarbora noJán.
Ndaqalisa ukufunda iBhayibhile, kodwa zazininzi izinto endandingaziqondi. Ngoko ke ndaya kucela uncedo kumfundisi wam. Wathi: “IBhayibhile yeyabantu abafundileyo kuphela, musa ukulinga kwaukulinga ukuyiqonda.” Wandula ke wandicela ukuba sidlale amakhasi.
Emva koko ndaya kula ndoda yayindiboleke iBhayibhile. YayinguMfundi WeBhayibhile, njengoko amaNgqina kaYehova ayebizwa njalo ngoko. Yakuvuyela ukundinceda, yaye emva kwexesha elithile yaqala yasuka inkungu emehlweni am. Ndayeka ukuzintyintya ngotywala ndaza ndaqalisa ukuphila ubomi bokuziphatha okuhle; ndaqalisa nokuthetha nabanye ngoYehova. Inyaniso yeBhayibhile yayiqalise ukufikelela eZahor ebutsheni beminyaka yee-1920, yaye kungekudala kwasekwa iqela elikhutheleyo laBafundi beBhayibhile.
Noko ke, kwakukho inkcaso ekrakra yonqulo. Umfundisi wasekuhlaleni waphembelela inkoliso yentsapho yakuthi ukuba indichase, esithi ndiyaphambana. Kodwa ubomi bam baqalisa ukuba nenjongo, yaye ndenza isigqibo esingenakujikwa sokukhonza uYehova, uThixo oyinyaniso. Ngenxa yoko, ngowe-1930 ndafuzisela uzahlulelo lwam kuYehova ngokubhaptizwa.
Isiqalo Seemvavanyo Eziqatha
Ngowe-1938 ummandla wethu waba phantsi kolawulo lweHungary, eyaxhasa iJamani kwiMfazwe Yehlabathi II. Ngelo xesha sasingamaNgqina anokuba ngama-50 kwidolophana yethu eyayinabantu abangaphantsi kwewaka. Saqhubeka sishumayela nakubeni ukwenjenjalo kwakubeka ubomi nenkululeko yethu emngciphekweni.
Ngowe-1940, ndabelwa ukuba semkhosini waseHungary. Ndandiza kuthini? Kaloku, ndandisele ndizifundile iziprofeto zeBhayibhile ngabantu abaya kukhanda izikhali zabo zemfazwe zibe zizixhobo zoxolo, yaye ndandisazi ukuba, uThixo uya kuziphelisa zonke iimfazwe emhlabeni. (INdumiso 46:9; Isaya 2:4) Ngaloo ndlela, ndaye ndayithiya imfazwe, yaye ndenza isigqibo sokuba ndingazibandakanyi nomkhosi, ingakhathaliseki imiphumo yoko.
Ndagwetywa iinyanga ezili-14 ndithothozela isigwebo sam ePécs, eHungary. Ndandikunye namanye amaNgqina amahlanu kwintolongo enye, yaye sakuvuyela ukuba sikwazi ukunxulumana. Noko ke, kangangexesha elithile, ndavalelwa ndedwa ndikhonkxwe iinyawo ngemixokelelwane. Xa singazange sivume ukwenza umsebenzi onokuthanani nemfazwe, sabethwa. Sasikwanyanzeliswa ukuba sime nkqo imini yonke, ngaphandle kweeyure ezimbini zasemini. Oko kungcungcuthekiswa kwaqhubeka kangangeenyanga. Sekunjalo sasonwabile kuba sasinesazela esicocekileyo phambi koThixo wethu.
Imbambano Yokulalanisa
Ngenye imini iqela labefundisi bamaKatolika abali-15 lazama ukusiqiqisa ngelithi kwakubalulekile ukuba sixhase imfazwe ngokungenela umkhosi. Kuloo ngxubusho sathi: “Ukuba ninokunikela ubungqina ngokusuka eBhayibhileni ukuba umphefumlo awufi yaye siza kuya ezulwini ukuba siye safa emfazweni, siya kungenela umkhosi.” Kambe ke, babengenakukwazi, yaye behla nomcinga kuloo ngxubusho.
Ngowe-1941 isigwebo sam saphela, yaye ndandijonge phambili ekubeni ndiphinde ndibe kunye nentsapho yam. Kunoko, ndakhonxwa ndaza ndasiwa kwiziko lomkhosi eliseSárospatak, eHungary. Ekufikeni kwethu, ndathenjiswa ngokukhululwa. “Inye kuphela into omele uyenze,” ndaxelelwa oko, “kukutyobela isibhambathiso sokuba uza kuhlawula iipengö ezingama-200 ukufika kwakho ekhaya.”
“Kubangelwa yintoni oko?” Ndabuza. “Yeyantoni le mali niyifunayo?”
“Xa uze naloo mali, uza kufumana isiqinisekiso sokuba akuphumelelanga kuvavanyo lwasemkhosini lwezamayeza,” leyo yinto endayixelelwayo.
Kwakulucelomngeni kum ukwenza isigqibo ngalo mbandela. Ngaphezu konyaka, bendiphethwe kakubi; ndandisele ndidiniwe. Ngoku, ngokuvuma ukuhlawula imali ethile, ndandinokukhululwa. Ndibumbombozela ndathi: “Ndiza kukhe ndicinge ngoku.”
Sisiphi isigqibo endandiza kusenza? Ndandinomfazi nabantwana endandifanele ndicinge ngabo. Kanye ngelo xesha ndafumana ileta ivela kumKristu endikhonza naye endikhuthaza. Wacaphula amaHebhere 10:38, apho umpostile uPawulos acaphula amazwi kaYehova athi: “‘Owam yena lowo ulilungisa uya kuphila ngenxa yokholo,’ yaye, ‘ukuba urhwaqelela emva, umphefumlo wam awukholiswa nguye.’” Kungekudala emva koko, amagosa amabini aseHungary awayehlala kwinkampu yamajoni athetha nam, elinye lathi: “Akuyazi indlela esikuhlonela ngayo ngokubambelela kwakho ngokuqinileyo kwimilinganiselo yeBhayibhile! Unganikezeli!”
Kusuku olulandelayo ndaya kwabo babendithembise ukundikhulula ngeepengö ezingama-200 ndaza ndathi: “Ekubeni uYehova uThixo evumele ukuba ndivalelwe, uya kuqinisekisa ukuba ndiya khululwa. Andisayi kunihlawula ukuba nindikhulule.” Ngoko ndagwetywa iminyaka elishumi entolongweni. Elo yayingelotyeli lokugqibela ukuhendelwa ukuba ndilalanise. Inkundla yathembisa ukundixolela ukuba ndandinokuvuma ukukhonza emkhosini kangangeenyanga ezimbini nje kuphela, yaye ndandingayi kusiphatha kwaukusiphatha isikhali! Ndasikhaba neso sithembiso, saza isigwebo sam sentolongo saqalisa.
Intshutshiso Iyaqatsela
Kwakhona ndasiwa kwintolongo yasePécs. Ngesi isihlandlo ndathuthunjiswa ngokuqatha. Ndandibotshwa izandla ngasemva, ndize ndixhonywe ngazo kangangeeyure ezimbini. Ngenxa yoku ndagungxuka amagxalaba omabini. Ndaphinda ndathuthunjiswa ngaloo ndlela emva kwexesha elinokuba ziinyanga ezintandathu. NguYehova kuphela endinokumbulela kuba ndingazange ndinikezele.
Ngowe-1942 iqela lethu—amabanjwa ezobupolitika, amaYuda, namaNgqina kaYehova angama-26—lasiwa kwisixeko saseKursk ummandla owawunemikhosi yaseJamani. Sanikelwa kumaJamani yaye ayesebenzisa amabanjwa ukuthwala ukutya, izixhobo, nempahla ukuzisa kumajoni asedabini. Thina maNgqina sawala loo msebenzi kuba wawuchasene nobundilele bethu bobuKristu. Ngenxa yoko, sabuyiselwa kumaHungary.
Ekugqibeleni, sasiwa kwintolongo yasekuhlaleni eKursk. Kangangeentsuku eziliqela sasibethwa izihlandlo ezithathu ngemini ngamagqudu erabha. Ndabethwa ezintlafunweni ndaza ndaya kuthi folokohlo ngamadolo. Njengoko ndandibethwa, ndacinga, ‘Ukufa akunzima kangako.’ Umzimba wam wawundindisholo wonke, ngoko ndandingeva nto. Kangangeentsuku ezintathu asizange sinikwe kutya. Sandula sasiwa enkundleni, yaye abathandathu kuthi bagwetyelwa ukufa. Emva kokuphunyezwa kwesigwebo, sasala singama-20.
Uvavanyo lokholo endalufumana kwezo ntsuku eKursk ngo-Oktobha we-1942 lolona lwaluqatha kwendakha ndajamelena nalo. Indlela esasivakalelwa ngayo ikhanyiswa kakuhle koko kwathethwa nguKumkani wakudala uYehoshafati xa abantu bakhe babejamelene noloyiso xa wathi: “Ngokuba asinamandla okumelana nale ngxokolo ininzi isizelayo; thina asazi ukuba sothini na, kodwa amehlo ethu akuwe.”—2 Kronike 20:12.
Thina singama-20 sakhutshwa ukuya kuzimbela ingcwaba, sijongwe ngamajoni ali-18 aseHungary. Xa sagqibayo ukumba, saxelelwa ukuba sinemizuzu elishumi kuphela yokusayina uxwebhu, olwalufundeka ngolu hlobo: “Imfundiso yamaNgqina kaYehova iphosakele. Andisayi kuphinda ndiyikholelwe okanye ndiyixhase. Ndiya kulwela ilizwe laseHungary . . . Ngokutyobela kwam ndiqinisekisa ukuba ndililungu leCawa yamaRoma Katolika.”
Emva kwemizuzu elishumi sayalelwa: “Jikelani ngasekunene! Yiyani engcwabeni!” Sandula ke, sayalelwa: “Ibanjwa lokuqala nelesithathu malingene emngxunyeni!” Aba babini banikwa eminye imizuzu elishumi yokutyikitya olo xwebhu. Elinye ijoni lababongoza: “Lahlani ukholo lwenu niphume kweli ngcwaba!” Kwathi cwaka. Landula ke igosa eliphetheyo labadubula bobabini.
“Baza kuthiwani abanye?” elinye ijoni labuza igosa eliphetheyo.
Laphendula: “Bakhonxeni. Siza kuphinda sibathuthumbise size sibadubule ngentsimbi yesithandathu kusasa.”
Ngequbuliso ndangenwa luloyiko, ndingoyiki kufa, kodwa ndisoyikela ukuba ndandingasayi kukwazi ukunyamezela ukuthuthunjiswa yaye ndandiza kulalanisa. Ngoko ke ndema ngaphambili ndaza ndathi: “Mhlekazi, sone ngokufanayo nabazalwana bethu obadubuleyo. Kutheni ungasidubuli nathi?”
Kodwa abazange basidubule. Sakhonxwa izandla ngasemva. Sandula ke sajingiswa ngazo. Sathi sakufa isiqaqa, basigalela ngamanzi. Iintlungu zazingathetheki kuba ngenxa yokusindwa ngumzimba sagungxuka amagxa. Sathuthunjiswa ithuba elinokuba ziiyure ezintathu. Ngequbuliso kwafika umyalelo wokuba kungaphinde kudutyulwe naliphi na iNgqina likaYehova.
Ukusinga NgaseMpuma—Size Sisabe
Kwiiveki ezintathu kamva njengeqela seva endleleni sisenjenjeya kangangeentsuku eziliqela de saya kufika kunxweme loMlambo iDon. Sasixelelwe ngabaphetheyo ukuba asiyi-lubuyayo. Emini, sasisetyenziswa ngokungenanjongo, sisimba imisele sibuye siyidibe. Ebusuku, sasiyekwa sikhululekile ukusa kumkhamo othile.
Xa ndijonga, zimbini kuphela izinto ezinokwenzeka. Sinokufela apho, okanye sisabe kumaJamani sizinikezele kumaRashiya. Bathathu kuphela kuthi abagqiba ekubeni basabe bawele kumkhenkce woMlambo iDon. NgoDisemba 12, 1942, sathandaza kuYehova saza seva endleleni. Safika kumda waseRashiya yaye ngokukhawuleza saphoswa kwinkampu yamabanjwa eyayinamabanjwa angama-35 000. Ngentwasahlobo, ayemalunga nama-2 300 amabanjwa awayesaphila. Amanye ayebulewe yindlala.
Inkululeko Kodwa Sasisajongwe Yintlekele Engakumbi
Ndasinda kuyo yonke imfazwe, kuquka nokuba libanjwa laseRashiya, iinyanga eziliqela emva kokuba imfazwe iphelile. Ekugqibeleni, ngoNovemba 1945, ndagoduka ndisiya eZahor. Ifama yethu yayikwimeko emaxongo, ngoko ke kwafuneka ukuba ndiqale phantsi kwakhona. Umfazi wam nabantwana bam babeyinyamekela ifama ebudeni bemfazwe, kodwa ngo-Oktobha 1944, ukufika kwamaRashiya, bafuduselwa ngasempuma. Yonke into esasinayo yayiphangiwe.
Okwakukubi ngakumbi kukuba, ekufikeni kwam ekhaya, umfazi wam wayegula ngendlela engaginyisi mathe. NgoFebruwari 1946, wafa. Wayeneminyaka engama-38 kuphela ubudala. Saba nexesha elincinane gqitha lokuba sivuyele ukuba kunye emva kweminyaka emihlanu enzima yokwahlukana.
Ndathuthuzelwa kukuba phakathi kwabazalwana bam bokomoya, ukuya ezintlanganisweni nokwabelana nabanye kubulungiseli bendlu ngendlu. Ngowe-1947, ndakwazi ukuboleka imali yokuya endibanweni eBrno, uhambo olumalunga neekhilomitha ezingama-400. Phakathi kwabazalwana bam abangamaKristu ababelapho, kuquka uNathan H. Knorr, owayengumongameli weWatch Tower Bible and Tract Society ngoko, ndafumana intuthuzelo nokhuthazo olungathethekiyo.
Asizange siyixhamle ixesha elide inkululeko emva kwemfazwe. Ngowe-1948 amaKomanisi aqalisa ukusicinezela. Abazalwana abaninzi ababekhokela kumsebenzi wamaNgqina kaYehova eCzechoslovakia bavalelwa ngowe-1952, ndaza ndanikwa imbopheleleko yokunyamekela amabandla. Ngowe-1954, nam ndabanjwa ndaza ndagwetywa iminyaka emine entolongweni. Unyana wam, uJán nonyana wakhe uJuraj nabo babebanjiwe ngokugcina ubundilele babo bamaKristu. Ndavalelwa iminyaka emibini ePankrác intolongo karhulumente esePrague. Ngowe-1956, amabanjwa axolelwa ndaza nam ndakhululwa.
Inkululeko Ekugqibeleni!
Ekugqibeleni, ngowe-1989, ubuKomanisi bazibeka phantsi iintambo eCzechoslovakia, yaye umsebenzi wamaNgqina kaYehova wabhaliswa ngokusemthethweni. Ngaloo ndlela, saba nenkululeko yokuhlanganisana size sishumayele ngokukhululekileyo. Ngelo xesha iZahor yayinamaNgqina amalunga nekhulu, into ethetha ukuba malunga nomntu omnye kwabalishumi kulo dolophana wayeliNgqina. Kwiminyaka embalwa egqithileyo, sakhe iHolo yoBukumkani enkulu nentle eZahor, enokuhlala abantu abanokuba ngama-200.
Impilo yam seyinkenenkene, ngoko ke abazalwana bayandisa kwiHolo yoBukumkani. Ndiyakuvuyela ukuba lapho ndize ndinandiphe ukugqabaza kwiSifundo seMboniselo. Ndivuyiswa ngokukhethekileyo kukubona isizukulwana sesithathu sentsapho yam sikhonza uYehova, kuquka iqela labazukulwana. Omnye waba ukhonze njengomveleli ohambahambayo wamaNgqina kaYehova eCzechoslovakia de wathintelwa ziimbopheleleko zentsapho yakhe.
Ndiyambulela uYehova ngokundomeleza kwizihlandlo ezininzi zovavanyo lwam. Ukuhlala ndikhangele kuye—‘ngokungathi ndiyambona Lowo ungabonakaliyo’—kundomelezile. (Hebhere 11:27) Ewe, ndisivile isandla sakhe esinamandla okuhlangula. Kungenxa yoko le nto, de kube ngoku, ndiqhubeka ndibakho kwiintlanganiso zebandla ndize ndibe nesabelo ekuvakaliseni igama lakhe kubulungiseleli basesidlangalaleni kangangoko ndinako.
[Umfanekiso okwiphepha 25]
IHolo yoBukumkani eZahor
[Umfanekiso okwiphepha 26]
Ndiyalixabisa ilungelo lokugqabaza kwiSifundo se-“Mboniselo”