Ukuzibhokoxa Emsebenzini—Xa Kuyinto Elunge Ngokwenene

KUWO wonke uMzantsi-mpuma weAsia amantombazana amaninzi azizicaka awubekela ecaleni umsebenzi wawo wasekhitshini aze ahlale phantsi emilisele iingqondo koomabonwakude bawo xa umdlalo oqhutywayo kamabonwakude waseJapan obizwa ngokuthi yiOshin uqalisa. Eli libali elingebhinqa ebelitsala nzima eliye laphumelela emva kokunyamezela iminyaka emininzi yokubulaleka nobunzima. Entywizisa iinyembezi, la mantombazana azifanisa no-Oshin, igorhakazi. Kubonakala ukuba la ngamabali kanye afunwayo ngala mantombazana ukuwanceda ahlangabezane nosuku olulandelayo lomsebenzi onzima.

Eneneni, kumele ukuba zikho izizathu ezibangela ukuba abantu bazibhokoxe emsebenzini usuku nosuku, ukusa kwinqanaba lokonakalisa impilo kunye nobomi babo. Kutheni besenza oku nje? Kumantombazana azizicaka aseAsia, ngokuqinisekileyo eyona nto iqhelekileyo nengamandla ewashukumisela ukusebenza nzima kukufuna ukuphucula umgangatho wawo wokuphila. Noko ke, ngokucacileyo, ukufuna inzuzo yezinto eziphathekayo asikuphela kwento ebandakanyekileyo.

UStephen D. Cohen ubhala oku ngokuphathelele umkhwa wokusebenza kwabantu baseJapan, “Ukuma kakuhle ngokwasemalini kuyinto enqwenelwayo, nangona kungafane kube yeyona nto iphambili eshukumisela abantu ekusebenzeni.” Ngoko, yintoni eshukumisela abantu baseJapan ukuba bazibhokoxe kangaka emsebenzini? Lo kaCohen uyacacisa: “Impumelelo ekhoyo kwezorhwebo xa ithelekiswa naleyo yabo bakhuphisana nayo ingumthombo weqhayiya elikhulu nolwaneliseko lobuqu. Ukuzibhokoxa emsebenzini okufak’ isandla kule mpumelelo kungumvuzo woku.” Ukunyaniseka kwiinkampani abazisebenzelayo kuba sesona sizathu sokuba abaqeshwa bazibhokoxe emsebenzini, yaye kubo ukusebenza kuphela kwendlela abangabonakalisa ngayo uxabiso abanalo. Kwakhona, okungamele kulityalwe, ngumnqweno wokufumana isikhundla esiphezulu. Ingcinga yokuba ngaminazana ithile kunokwenzeka ubani afikelele kwisikhundla esiphezulu ihlala iyeyona nto inamandla eshukumisela abantu ukuba bazibhokoxe emsebenzini.

Ngaba Ezi Zizizathu Zokubeka Impilo Kabani Esichengeni?

Ngaba ezi zizizathu ezifanelekileyo zokubeka kukabani impilo nobomi bakhe esichengeni? IBhayibhile ithi ngalowo uzibhokoxa emsebenzini ukuze afumane ubuncwane bezinto eziphathekayo, ‘amehlo akhe akahluthi noko bubutyebi.’ Ekugqibeleni loo mntu usenokuzibuza oku: “Ndaphukela bani na, ndiwuhlutha nje umphefumlo wam kokulungileyo?” (INtshumayeli 4:8) Abo bazibhokoxa emsebenzini ngenxa yokufuna ukuba zizityebi babonakala bengazi apho mabaqale khona nalapho mabeme khona. Bazifumanisa bebambiseke kumjikelo ongaphele ndawo wokusebenza umlibe. IBhayibhile ilumkisa ngokucacileyo isithi: “Musa ukuzidinisa ngokufuna ubutyebi.”—IMizekeliso 23:4.

Kuthekani ngokunyaniseka kwinkampani oyisebenzelayo? Ngoxa kusenokuba kokulunge ngakumbi, kufanele kucingwe ngemiphumo esenokubakho yokusebenza ngokugqithiseleyo. Elinye igosa eliyintloko eliphetheyo kwinkampani yaseMerika lathi, “Ukuba umntu uzidinisa ngokugqithiseleyo, andimfuni ukuba abe ngumqeshwa wam.” Omnye umfazi welungu labaphumi-mkhosi abamanyeneyo (“corporate warrior”) emva kokufa komyeni wakhe ngaphambi kokufikelela kubudala beminyaka engama-40 ngenxa yokusebenza ngokugqithiseleyo wabhala oku kwelinye iphephandaba: “Ngawaphi amazwi ovelwano esilindele ukuwafumana kwiinkampani abazisebenzelayo xa zisithi, ‘Silusizi kakhulu kuba silahlekelwe ngumntu oxabiseke ngolu hlobo’? Loo malungu olu manyano afel’ edyokhweni, akuba efile, aphathwa ngokungathi ‘ebezizinto nje ezingenaxabiso.’”

Kwanaxa ubani engazidinisi kakhulu okanye engazibulali ngokusebenza ngokugqithiseleyo, yintoni eyenzekayo xa efikelela kwixesha lokudla umhlala-phantsi? UMotoyo Yamane, umsasazi waseJapan, uthi: “Phezu kwako nje ukusebenza nzima kwabo kwiinkampani zabo, benziwa bayiqonde inyaniso yokuba inkampani ayisabafuni nganto yaye abaseloncedo kuyo.” Kwiinkampani ezingenamvakalelo ngabantu, abaqeshwa abazibhokoxayo emsebenzini bazizinto nje ezingabalulekanga kwiqumrhu labo elikhulu, abanokuthatyathelwa indawo xa sele bephelelwe ngamandla. Akumangalisi ukuba abantu abaninzi baseJapan bengazithembi iinkampani abazisebenzelayo! Baqalisa ukuqonda ukuba ukuzinikela kwabo kwinkampani luthando olungenambuyekezo.

Yintoni enokuthethwa ngokufumana isikhundla esiphezulu? Abo sele befikelele kwinqwanqwa lokuba ngabaphathi abaphakathi kamsinya bafumanise ukuba asinguye wonke ubani oya kukwazi ukufikelela esona sikhundla siphezulu. Ngoko yintoni eyenzekayo? Bekhohliswe ngamathemba okunyuselwa, baqalisa ukufuna imisebenzi elunge ngakumbi. Ukunyaniseka kwinkampani akukhange kungqineke kuyingenelo elunge ngokwenene!

Imbono Elungeleleneyo Ngokuzibhokoxa Emsebenzini

Nangona ukuzibhokoxa emsebenzini okushukunyiswa kukuthanda imali, ukunyaniseka kwiqumrhu olisebenzelayo okanye ngumoya wokhuphiswano ekugqibeleni kudimaza yaye kuzisa udano, iBhayibhile ayikubethi ngoyaba ukubaluleka kokuzibhokoxa emsebenzini. “Kwanokuba wonke umntu adle, asele, abone okulungileyo emigudwini yakhe yonke; sisipho sikaThixo eso.” (INtshumayeli 3:13) IBhayibhile ikhuthaza ukuba ubani adle iziqhamo zomsebenzi onzima awenzileyo. Oku kusenza sikhanyelwe koko kusenokuba yimbono efanelekileyo ngokuzibhokoxa emsebenzini.

ISebe leZempilo neNtlalo-ntle eJapan kutshanje licebise abasebenzi ukuba “balibale ngomsebenzi owenziwa emva kweeyure zomsebenzi (baze) banandiphe isidlo sangokuhlwa kunye neentsapho zabo.” Ngokucacileyo bambi abaqhubi bamashishini bayabuqonda ubulumko beli cebiso. Ngokomzekelo, umlawuli womzi-mveliso okhulayo wezinto zobugcisa ezinxulumene nebhayoloji wavakalisa oku: “Ndifuna ukuba bonke abantu esibaqeshileyo banyamekele kakuhle iintsapho zabo ngaphezu kwayo yonke enye into. Ukusebenza kwabo kwinkampani yethu kuyindlela nje yokuba bafumane umvuzo wokuxhasa iintsapho zabo.”

Eneneni, ukuba nolwalamano oluhle lwentsapho ngokuqinisekileyo kulusukelo olubalulekileyo olufanele lusetyenzelwe nzima. Ukuba umoya ofudumeleyo wentsapho uyonakaliswa okanye impilo yakho iba nkenenkene ngenxa yomsebenzi wakho, awuboni okulungileyo emigudwini yakho yonke.

Noko ke, kwibutho labantu baseJapan, apho kulawula inkqubo yokuba ngowongamileyo kwabanye emsebenzini ngenxa yeminyaka emininzi usebenza apho, bambi banesi simo sengqondo: “Ungaze ungabikho emsebenzini, okanye wenze kade, okanye usebenze.” Bazenza abakhutheleyo ngokuhlala emsebenzini belinde nje ukuba umphathi agoduke. UKenji, ongumthengisi kwinkampani ethengisa izinto zokuhombisa zangaphakathi endlwini eHiroshima, wayeneso simo sengqondo. Wayengasebenzi, ixesha lomsebenzi elichitha ehleli kumzi othengisa ukudla okanye edlala koomatshini bokungcakaza.

Ngaba isimo sengqondo esinjalo siphumela elonwabeni? Umzekeliso weBhayibhile uthi, “Ukudangala kufakwa uviko.” Namhlanje, uthile usenokungaziva enyanzelekile ukusebenza ngenxa yobuvila bukabani. Sekunjalo, umsebenzi unokuba ngodinisayo, evakalelwa kukuba uwenza nje kuba kunyanzelekile. Kwelinye icala, kwalo mzekeliso ukwamnye ubonisa ingenelo yokuba ngokhutheleyo: “Isandla sabakhutheleyo siyalawula.” (IMizekeliso 12:24) Enoba awude ulawule ilizwe okanye inkampani, ubuncinane uya kuhlonelwa yintsapho yakho yaye uyakwazi ukuzilawula. Ukongezelela usenokuthenjwa ngumqeshi wakho, yaye ube nesazela esicocekileyo.

UKenji wakufumanisa kunjalo oku. Wagqiba ekubeni afundisise iBhayibhile, yaye ubomi bakhe baguquka ngendlela ephawulekayo. Uthi, “Ngokusebenzisa umgaqo wokunyaniseka kwindawo yempangelo, ndaqalisa ukusebenza ngenyameko enoba umphathi wayekho okanye engekho. Oku kwenza ukuba andithembe.”

Xa Ukuzibhokoxa Emsebenzini Kusiba Yinto Elunge Ngokwenene

Inyaniso ikukuba, ukuze umsebenzi ube ngonentsingiselo, umele ube yingenelo kwabanye. Umbhali wezorhwebo wathi, ‘Umsebenzi owanelisayo ngulowo uluncedo, wonwabisayo okanye uyolisayo kubomi babantu abaninzi.’ Umsebenzi onjalo uzisa ulwaneliseko olunzulu kulowo usebenzayo. Kunjengokuba uYesu Kristu wathi: “Ukupha kunoyolo ngaphezu kokuphiwa.”—IZenzo 20:35.

Nangona ukusebenzela ukwanelisa abanye kuyinto encomekayo, sekunjalo kukho enye into engundoqo ekufumaneni ulwaneliseko emsebenzini nasebomini. Ukumkani uSolomon, emva kokuba enandiphe bonke ubunewunewu nobuncwane obunokufumaneka ebomini, wafikelela kwesi sigqibo sibalulekileyo: “Yoyika uThixo, ugcine imithetho yakhe; ngokuba indawo leyo yimfanelo yoluntu lonke.”—INtshumayeli 12:13.

Licacile elokuba, sifanele sicingisise ngoko kukukuthanda kukaThixo kuyo nantoni na esigqiba ukuyenza. Ngaba sisebenza ngokuvisisana nokuthanda kwakhe okanye sisebenza ngokuchasene nako? Ngaba sizabalazela ukumkholisa okanye ukukholisa nje iziqu zethu? Ukuba siyakutyeshela ukwenza ukuthanda kukaThixo, siba ngabathandi bezinto eziphathekayo okanye abathandi beziyolo yaye ekugqibeleni siya kuva intlungu yokuba ngamalolo, ukungabi nto yanto nokuphelelwa lithemba.

Ngoko khumbula ukuba ukukhonza uYehova uThixo—ukwenza umsebenzi okholisa uMdali wethu—akusayi kusishiya singabanganelisekanga. UYehova uyazibhokoxa emsebenzini, yaye uyasimema ukuba simthelele size sibe ‘ngabasebenzi kunye naye.’ (1 Korinte 3:9, NW; Yohane 5:17) Kodwa ngaba ukuzibhokoxa okulolo hlobo emsebenzini ngokwenene kuzisa ulonwabo lokwenene?

Umlawuli owongamelayo womzi-mveliso othile wokushicilela ngaxa lithile watyelela umzi-mveliso wokushicilela weWatch Tower eJapan ukuya kuhlola indlela oyilwe ngayo. Ingqalelo yakhe yayitsaleleke kokunye ngaphezu koomatshini. Wabona abafana bewunandipha umsebenzi wabo, yaye wabamb’ ongezantsi akuva ukuba bonke bangabasebenzi bokuzithandela yaye kukho inani elingakumbi elingenakubalwa labanye abafake izicelo zokubathelela. Kwakutheni ukuze amangaliswe koku? Ecacisa wathi, “Kwinkampani yethu, ukuba siqeshe abantu abalishumi, simele sikugqale njengento entle ukuba kwabo bantu sisenabantu abane abasebenzayo emva konyaka. Nina maWatchtower ninento exabisekileyo ngaba basebenzi baselula!”

Yintoni eyenza aba bafana bonwabe kangaka yaye bazibhokoxe ngolu hlobo emsebenzini? Njengabasebenzi bokuzithandela, licacile elokuba abasebenzeli ukufumana imali. Ngoko, yintoni ebashukumisayo? Luzahlulelo lwabo noxabiso abanalo ngoYehova, uMdali wabo, nothando abanalo ngommelwane wabo. Isimo sabo sengqondo sibonisa ukuba abasebenzeli ‘ukukholisa abantu, kodwa basebenza ngokwabakhonzi bakaKristu, bekwenza ukuthanda kukaThixo ngokwasemphefumlweni.’—Efese 6:6.

Konke oku kusisandulela nje soko kuza kwenzeka kwixesha elizayo. Abo bazibhokoxayo ngoku ekukhonzeni uYehova banokukhangela phambili kwixesha laxa kamsinya eya kubuyisela iParadisi yaye umhlaba wonke uya kuzaliswa yimisebenzi eyingenelo. UIsaya, umprofeti kaThixo wamandulo, wayixela kwangaphambili indlela obuya kuba yiyo ubomi ngelo xesha esithi: “Bayakwakha izindlu bazihlale; batyale izidiliya, badle iziqhamo zazo. Abayi kwakha, kuhlale bambi; abayi kutyala, kudle bambi; . . . badle into esetyenzwe zizandla zabo abanyulwa bam.”—Isaya 65:21, 22.

Onjani wona ukuba yintsikelelo umsebenzi oya kwenziwa ngelo xesha! Ngokwazi oko kukuko ukuthanda kukaThixo ngawe uze usebenze ngokuvisisana nako, ngamana ungaphakathi kwabo basikelelweyo nguYehova yaye usoloko ‘ubona okulungileyo emigudwini yakho yonke.’—INtshumayeli 3:13.

[Ibhokisi ekwiphepha 24]

Imbono Elungeleleneyo Ngomsebenzi Iyawusindisa Umtshato

KuYasuo, ohlala eHokkaido, eJapan, umsebenzi wawuyinto nje yokuchitha ixesha de kwaba semva kweminyaka embalwa edluleyo. Wayekwisikhundla esiphakathi sokongamela, yaye wayexakekiswe kukuthengwa okwandayo kwemveliso yabo. Imihla ngemihla wayesebenza de kube yintsimbi ye–11:00 ebusuku engenantsuku aphumla ngazo. Ngoko, ukhumbula oku: “Ndafumanisa ukuba ingakhathaliseki indlela endandizibhokoxa ngayo, ndandingafumani naluphi na ulonwabo ngomsebenzi wam.” Impilo kaYasuo yaqalisa ukuba nkenenkene. Xa wathetha nomfazi wakhe, wafumanisa ukuba kwakukho nto ithile ibaluleke ngakumbi kunomsebenzi wakhe—intsapho yakhe. Wayiguqula indlela yakhe yokuphila waza wathelela umfazi wakhe ekufundisiseni iBhayibhile. Ngoku uyintloko ethandekayo nehlonelwayo yentsapho eyonwabileyo.

[Umfanekiso okwiphepha 24]

Umsebenzi wakho awufanele wonakalise ulwalamano lwentsapho

[Umfanekiso okwiphepha 25]

Kungekudala bonke baya kukunandipha ukusebenza besenza umhlaba ube yiparadisi