Ngaba Umsebenzi Onzima Uyonwabisa?
“NGAPHA koko, umsebenzi uyinto yonke emntwini, akunjalo na?” wabuza njalo uBunpei Otsuki, ingangalala yesityebi eyaziwayo kwimicimbi yezoshishino eJapan. Wayecacisa isizathu sokuba wayengathandi ukuya kuphumla ngethuba leholide yasehlotyeni. Indlela athetha ngayo ifana nqwa neyabantu baseJapan abathi balakha ngokutsha elo lizwe ukususela kwingxushungxushu elalikuyo emva kwemfazwe. Abantu baseJapan baye bachazwa njengabantu abakhutheleyo ukususela oko uMphathi weeNqanawa uPerry welaseUnited States wayenza yaziwa iJapan eyikhupha kubukheswa bayo obabuyiqamangele kangangethuba elide. Ibe bayazidla ngokuba bengabantu abasebenza nzima.
Noko ke, ngoku iJapan iyagxekwa ngenxa yokusebenza nzima kakhulu, kuba inezona yure zinde zomsebenzi ngonyaka phakathi kwezizwe ekufane kuthiwe zihambele phambili kwezoshishino. Urhulumente waseJapan uzama ukushenxisa le ngcamango yokuba ngamakhoboka omsebenzi. Omnye umxholo ophambili wephephandaba ufundeka ngolu hlobo: “ISebe Lezemisebenzi Lithi ‘Kuyekeni Ukusebenza Nzima Kangaka.’” Kwintetho yalo yephulo lokuba makuthatyathwe ithuba leholide yehlobo yowe-1987, eli sebe lade lafikelela ekubeni lithi, “Ukuthabatha iholide kububungqina bokuba uyakwazi ukusebenza.” Ngamanye amazwi, urhulumente ubuza isizwe ukuba, “Kutheni niziqoba ngomsebenzi ngolu hlobo?”
Kakade ke, asingabo bonke abemi baseJapan abangabasebenzi abazinikeleyo nabasebenza nzima. Uhlolisiso lwakutshanje olwenziwe liZiko Lezemveliso laseJapan kubasebenzi abasebatsha abangaphezu kwama-7 000 lwatyhila ukuba basisi-7 kuphela ekhulwini abo babewubeka kwindawo yokuqala umsebenzi kunemicimbi yabo yobuqu. Olu tyekelo lunokubonwa nakwamanye amazwe. KwelaseJamani iAllensbacher Institut für Demoskopie yafumanisa ukuba kuphela li-19 ekhulwini labemi baseJamani abasusela kwi-18 ukusa kuma-29 eminyaka ubudala abathi bazinikele ngokonakona emsebenzini kungakhathaliseki ukuba bafumana umvuzo ongakanani na.
Xa bethelekiswa nolutsha olungenankathalo, abasebenzi belaseJapan abavela kwamanye amazwe basebenza nzima ngaphezulu lee kunolo lutsha. Umqeshi waseTokyo uthetha ngegugu elikhulu ngomqeshwa wakhe waseAlgeria owenza umsebenzi wezandla. Uthi: “Abantu baseJapan abayi kulufuna olu hlobo lomsebenzi, ibe nokuba bangenza isicelo sawo, bebeya kuwushiya ngokukhawuleza.” Hayi, nkqu nabemi baseJapan abasebenza nzima abakuzuzanga njengelifa ukukhuthala. Xa abantu besebenza nzima, kufanele ukuba kubekho intshukumisa enamandla.
Izizathu Zokusebenza Nzima
IDer Spiegel, iphephancwadi leeveki ngeeveki laseJamani linikela le ngxelo: “Ubutyebi, ukuba ngozinzileyo, ukuba nezinto ezizezakho, kwanokuhambela phambili ehlabathini”—ezi zizinto abantu baseJamani abasebenza nzima besukela zona. Ewe, abaninzi basebenza nzima ukuze bazuze ubutyebi bezinto eziphathekayo besenzela ukunandipha umlinganiselo othile wokuba ngabazinzileyo ebomini. Abanye basebenza nzima benenjongo yokuba “bahambele phambili ehlabathini” okanye benyukele kumanqwanqwa aphezulu. Abaninzi abashukunyiswe ngamandla ngumnqweno wenkqubo yokhuphiswano yezemfundo ukuba basukele iinjongo ezilolo hlobo ngelishwa baphelela kumsina–ndozele wokugcina inkqubo yorhwebo isebenza—bezidinisa baze bangahambeli ndawo.
Noko ke, imali newonga, asikuphela kwezizathu abantu abanazo zokuba basebenze nzima. Abanye basebenza kuba kufuneka kusetyenziwe. Kubo, umsebenzi uyinto yonke. Abanye bayawunandipha umsebenzi wabo. UHaruo uyavuma esithi: “Ndandinomdla kakhulu koko ndandikwenza kwilabholatri yam, kangangokuba kwada kwaziminxa izilangazelelo zokomoya.”
Kwandula ke kubekho abo bazinikele ngenxa yezizathu ezilungileyo eziphathelele ukukhonza nokuxhalabela impilo-ntle yabanye. Basebenza nzima ukuze basindise ubomi. Ngokomzekelo, umcimi womlilo usebenza nzima yonke imihla ukugcina izixhobo zakhe zikwimeko entle.
Kodwa ngaba zizonke ezi zizizathu ezivakalayo zokuba sisebenze nzima? Ngaba ziya kukhokelela kulonwabo? Eneneni, nguwuphi umsebenzi onokukonwabisa ngokwenene?